‘Mo Mu Biara Dɔ Rekɔ So Yɛ Kɛse’

ATOYERƐNKYƐM ahorow bi sii Japan wɔ afe 2004 mu. Ebi yɛ ahum, nsuyiri, ne asasewosow. Ɛkaa nnipa pii a Yehowa Adansefo nso ka ho. (Ɔsɛnkafo 9:11) Nanso saa asiane yi maa Yehowa Adansefo nyaa hokwan de daa onuadɔ adi kyerɛɛ wɔn ho wɔn ho.—1 Petro 1:22.

Sɛ nhwɛso no, esiane sɛ osu tɔɔ kɛse wɔ July mu nti, asubɔnten bi a ɛwɔ Japan mfinimfini yirii. Nsuyiri no sɛee Adansefo no afi bɛboro 20. Wɔ Ahenni Asa biako so no, nsu yiri kɔɔ soro bɛyɛ anammɔn abiɛsa. Ntɛm ara, Adansefo a wɔwɔ asafo ahorow a ɛbɛmmɛn hɔ no ba bɛboaa wɔn. Nnipa pii tuu wɔn ho mae siesiee afie a atɛkyɛ ayɛ mu ma no mu. Wosiesiee Ahenni Asa no so yɛɛ ho adwuma wɔ adapɛn abien pɛ ntam.

Wɔ October 23 mu no, asasewosow a sɛ wɔde Richter nsenia susuw a, ano den bɛyɛ 7, sii wɔ saa beae koro no ara. Anyɛ yiye koraa no, nnipa bɛyɛ 40 wuwui, ɛnna nnipa bɛboro 100,000 nso tu fii wɔn afie mu. Wɔtoo nsu ne gas mu, na wodunnum anyinam ahoɔden nkanea. Ɛwom sɛ beae a asasewosow no fii ase no ne Ahenni Asa a wosiesiee no ntam kwan bɛyɛ akwansin 30 pɛ de, nanso anka ɔdan no. Enti ɛhɔ bɛyɛɛ beae a wofi de bere tiaa mu mmoa maa afoforo ntɛm ara. Kristofo ahwɛfo yɛɛ ntɛm kɔhwɛɛ sɛnea wɔn mfɛfo gyidifo no ho te na wɔn koma tɔɔ wɔn yam bere a wohui sɛ obiara ampira anaa obiara anwu no. Ade kyee anɔpa no, Adansefo baasia a nsu no sɛee wɔn nneɛma wɔ July mu no de ahopere tuu wɔn ho mae kyekyɛɛ nnuan ne nsu maa nnipa na wɔwɔ baabi a asasewosow no sii no. Wɔ asasewosow no akyi no, ankyɛ koraa na wɔde nneɛma a wohia kɔmaa wɔn.

Ɔhwɛfo bi kae sɛ: “Wɔn a nsuyiri no sɛee wɔn nneɛma no buu adwuma a wɔyɛ de boaa wɔn a asasewosow no asɛe wɔn nneɛma no sɛ ɛyɛ hokwan a wɔde akyerɛ mmoa a wɔn ankasa nyae no ho anisɔ. Wɔyɛɛ adwumaden fii anɔpatutuutu de kosii anadwo. Sɛ wohwɛ wɔn anim a, wuhu sɛ wɔn ani agye!”

Nsuyiri anaa asasewosow ntumi ntetew ɔdɔ a ɛka Yehowa Adansefo Kristofo anuanom bom no ntam. Nea ɛne no bɔ abira no, sɛ asiane a ɛte saa sii a, Kristofo hu nea ɔsomafo Paulo ka kyerɛɛ mfɛfo gyidifo a na wɔwɔ Tesalonika no: “Na mo mu biara dɔ a moda no adi kyerɛ mo ho no rekɔ so yɛ kɛse.”—2 Tesalonika 1:3.