Nya Koma A Esuro Yehowa
Nya Koma A Esuro Yehowa
‘O, sɛ anka wobenya koma a ɛte sɛɛ na wɔde asuro me adi me mmara nsɛm so nna nyinaa ɛ.’—DEUTERONOMIUM 5:29.
1. Yɛbɛyɛ dɛn atumi anya awerɛhyem sɛ bere bi bɛba a, nkurɔfo bɛde wɔn ho afi osuro ho?
EHU ahyɛ nnipa so mfehaha pii. Ɔkɔm, yare, nsɛmmɔnedi, anaa ɔko ho suro ayɛ nnipa ɔpepem pii dadwen bere nyinaa. Eyi nti na Amansan Nyinaa Mpaemuka a Ɛfa Hokwan a Nnipa Wɔ Ho nnianim asɛm no ka wiase a nnipa nyinaa bɛde wɔn ho afi osuro ho ho asɛm no. * Anigyesɛm ne sɛ Onyankopɔn ankasa aka sɛ wiase a ɛte saa bɛba—ɛwom sɛ ɛnyɛ nnipa na wɔde bɛba de. Yehowa nam ne diyifo Mika so hyɛ yɛn bɔ sɛ wɔ ne wiase foforo a trenee te mu mu no, ‘obiara renyi ne nkurɔfo hu.’—Mika 4:4.
2. (a) Ɔkwan bɛn so na Kyerɛwnsɛm no hyɛ yɛn nkuran sɛ yensuro Onyankopɔn? (b) Sɛ yesusuw ahyɛde a yɛwɔ sɛ yesuro Onyankopɔn no ho a, nsɛmmisa bɛn na ebetumi asɔre?
2 Nanso, osuro betumi ayɛ ade a mfaso wɔ so. Wotu Onyankopɔn nkurɔfo fo mpɛn pii wɔ Kyerɛwnsɛm no mu sɛ wonsuro Yehowa. Mose ka kyerɛɛ Israelfo no sɛ: “[Yehowa, NW] wo Nyankopɔn na suro no, na ɔno na som no.” (Deuteronomium 6:13) Mfehaha pii akyi no, Salomo kyerɛwee sɛ: “Suro Onyankopɔn, na di ne mmara nsɛm so. Na eyi ne nnipa nyinaa asɛde.” (Ɔsɛnkafo 12:13) Saa nso na yɛnam yɛn adansedi adwuma a abɔfo di anim no so tu nkurɔfo fo sɛ ‘wonsuro Onyankopɔn na wɔnhyɛ no anuonyam.’ (Adiyisɛm 14:6, 7) Sɛ Yehowa ho suro a Kristofo wɔ no da nkyɛn a, ɛsɛ sɛ wofi wɔn koma nyinaa mu dɔ no nso. (Mateo 22:37, 38) Yɛbɛyɛ dɛn atumi adɔ Onyankopɔn na yɛasuro no bere koro no ara? Adɛn nti na ɛfata sɛ yesuro Onyankopɔn a ɔwɔ ɔdɔ no? Sɛ yesuro Onyankopɔn a, mfaso bɛn na yebenya? Sɛ yebenya nsɛmmisa yi ho mmuae a, ɛsɛ sɛ yedi kan hu nea Onyankopɔn suro kyerɛ ne sɛnea saa suro yi ho hia kɛse wɔ yɛne Yehowa ntam abusuabɔ mu.
Nidi, Obu, ne Osuro
3. Onyankopɔn suro kyerɛ dɛn?
3 Onyankopɔn suro yɛ su a ɛsɛ sɛ Kristofo nya ma wɔn Bɔfo no. Saa osuro yi asekyerɛ biako ne “nidi ne obu a emu dɔ a yɛwɔ ma yɛn Bɔfo no ne osuro pa a ɛne sɛ yɛrenyɛ nea ɔmpɛ.” Enti Onyankopɔn suro fa yɛn asetram nneɛma abien titiriw bi ho: su a yekura wɔ Onyankopɔn ne nneɛma a ɔtan ho. Nokwarem no, abien no nyinaa ho hia na ɛsɛ sɛ yesusuw ho yiye. Sɛnea Vine’s Expository Dictionary of New Testament Words kyerɛ no, wɔ Kristofo fam no, osuro pa yi yɛ ‘adwene a ɛkyerɛ asetra kwan wɔ honhom fam ne abrabɔ fam nneɛma nyinaa mu.’
4. Yɛbɛyɛ dɛn atumi anya nidi ne obu ama yɛn Bɔfo no?
4 Yɛbɛyɛ dɛn atumi anya nidi ne obu ama yɛn Bɔfo no? Sɛ yehu asase bi a ɛyɛ fɛ, aworoeɛ a ɛka koma, anaa owiatɔe a ɛyɛ fɛ a, yɛn ho dwiriw yɛn kɛse. Sɛ yɛde gyidi aniwa hu sɛ Onyankopɔn na ɔbɔɔ nneɛma a ɛte saa a, ɛma saa nkate a yɛwɔ yi mu yɛ den. Afei nso, te sɛ Dawid no, sɛ yɛde yɛn ho toto Yehowa adebɔ a ɛyɛ nwonwa no ho a, yehu sɛ yɛnsɛ hwee. “Sɛ mehwɛ wo soro, wo nsateaa ano adwuma, ɔsram ne nsoromma a woasiesie a, ɔdesani ne hena a wokae no, na onipa ba ne hena a w’ani ku ne ho.” (Dwom 8:3, 4) Nidi kɛse yi ma yenya obu, na ɛka yɛn ma yɛda Yehowa ase kamfo no wɔ nea ɔyɛ ma yɛn nyinaa ho. Dawid nso kyerɛwee sɛ: “Meda wo ase sɛ woyɛɛ me ma ɛyɛ hu ne nwonwa; wo nneyɛe yɛ nwonwa, na me kra nim saa yiye.”—Dwom 139:14.
5. Dɛn nti na ɛsɛ sɛ yesuro Yehowa, na nhwɛso pa bɛn na yɛwɔ wɔ eyi ho?
5 Nidi ne obu ma yenya Onyankopɔn tumidi ho suro pa sɛ Ɔbɔadeɛ ne amansan yi Sodifo a ɔfata. Wɔ anisoadehu bi a ɔsomafo Yohane nyae mu no, ‘wɔn a wodii aboa no ne ne honi so nkonim’—Kristo akyidifo a wɔasra wɔn a wɔwɔ soro no—kae sɛ: “[Yehowa, NW] Nyankopɔn, ade nyinaa so tumfoɔ, wo nnwuma yɛ akɛse na ɛyɛ nwonwa. Amanaman hene, w’akwan teɛ na ɛyɛ nokware. [Yehowa, NW], hena na ɔrensuro wo na ɔnhyɛ wo din anuonyam?” (Adiyisɛm 15:2-4) Onyankopɔn suro a saa nkurɔfo yi a wɔbɛyɛ Kristo yɔnko adedifo wɔ ɔsoro Ahenni mu nya esiane obu kɛse a wɔwɔ ma ne kɛseyɛ nti no ma wɔkamfo Onyankopɔn sɛ ade nyinaa so tumfoɔ. Sɛ yesusuw nea Yehowa ayɛ nyinaa ne trenee mu a ofi di amansan yi so ho a, so ɛmma yennya nneɛma pii a ɛbɛma yɛasuro no?—Dwom 2:11; Yeremia 10:7.
6. Dɛn nti na ɛsɛ sɛ yenya osuro pa sɛ yɛrenyɛ nea Yehowa mpɛ?
6 Nanso, nidi ne obu akyi no, nea ɛsɛ sɛ yɛde ka Onyankopɔn suro ho ne osuro pa a yebenya sɛ yɛrenyɛ nea ɛnsɔ n’ani anaasɛ yɛrenyɛ ne so asoɔden. Dɛn ntia? Efisɛ bere a Yehowa wɔ ‘abodwokyɛre na n’adɔeyɛ dɔɔso pii’ no, ɛsɛ sɛ yɛkae sɛ ‘ɔremma ɔbɔnefo nni bem.’ (Exodus 34:6, 7) Ɛwom sɛ Yehowa wɔ ɔdɔ ne mmɔborohunu de, nanso ommu n’ani ngu amumɔyɛ ne boapayɛ bɔne so. (Dwom 5:4, 5; Habakuk 1:13) Wɔn a wɔboapa yɛ Yehowa ani so bɔne na wɔnkyerɛ ahonu na wɔsɔre tia no no mfa wɔn ho tɔtorɔtɔɔ. Sɛnea ɔsomafo Paulo kae no, “Onyankopɔn a ɔte ase no nsam hwe yɛ hu.” Osuro pa a yebenya sɛ yɛmfa yɛn ho nkɔhyɛ tebea a ɛte saa mu no yɛ ahobammɔ kɛse ma yɛn.—Hebrifo 10:31.
“Mommata Ne Ho”
7. Adanse bɛn na ɛwɔ hɔ a ɛma yenya Yehowa ogye tumi no mu ahotoso?
7 Onyankopɔn suro pa a yɛwɔ ne ne tumi kɛse a yebehu no ma yenya Yehowa mu ahotoso. Sɛnea sɛ abofra bi wɔ ne papa nkyɛn a onsuro hwee no, saa ara na yɛn nso yenya abotɔyam ne ahotoso wɔ Yehowa mu. Hyɛ sɛnea Israelfo no yɛɛ wɔn ade bere a Yehowa yii wɔn fii Misraim no nsow: “Na Israel huu nsa kɛse a [Yehowa, NW] de kyerɛɛ Misraim so no, na ɔman no suroo [Yehowa, NW] na wogyee Yehowa dii.” (Exodus 14:31) Nea Elisa hui no nso di adanse sɛ “[Yehowa, NW] bɔfo bɔ wɔn a wosuro no ho nsra hyia, na ogye wɔn.” (Dwom 34:7; 2 Ahene 6:15-17) Ɛnnɛyi Yehowa nkurɔfo asetra ne ebia yɛn ankasa suahu da no adi sɛ Onyankopɔn taa wɔn a wɔsom no no akyi. (2 Beresosɛm 16:9) Enti, yetumi hu sɛ ‘Yehowa suro ma yenya ahotoso a emu yɛ den.’—Mmebusɛm 14:26.
8. (a) Dɛn nti na ɛsɛ sɛ Onyankopɔn suro ka yɛn ma yɛnantew n’akwan so? (b) Kyerɛkyerɛ sɛnea ɛsɛ sɛ ‘yɛbata’ Yehowa ho no mu.
8 Ɛnyɛ ahotoso ne awerɛhyem nko na Onyankopɔn suro ma yenya, na mmom ɛma yɛnantew n’akwan so nso. Bere a Salomo buee asɔrefie no ano no, ɔbɔɔ Yehowa mpae sɛ: ‘Israel nsuro wo na wɔnnantew w’akwan so nna a wɔde bɛtra asase a wode maa yɛn agyanom no so no nyinaa.’ (2 Beresosɛm 6:31) Na Mose adi kan ahyɛ Israelfo no nkuran sɛ: “[Yehowa, NW] mo Nyankopɔn akyi na munni, na ɔno na munsuro no, na ne mmara nsɛm so na munni, na ne nne na muntie, na monsom no, na mommata ne ho.” (Deuteronomium 13:4) Sɛnea nkyekyem yi kyerɛ pefee no, ɔpɛ a yɛwɔ sɛ yɛbɛnantew Yehowa akwan so ‘abata’ ne ho no gyina ahotoso ne awerɛhyem a yebenya wɔ Onyankopɔn mu so. Ampa, Onyankopɔn suro ma yɛyɛ osetie ma Yehowa, som no, bata ne ho, te sɛ nea abofra kumaa bi tumi de ne ho fam ne papa a ɔwɔ ne mu ahotoso ne awerɛhyem koraa ho no.—Dwom 63:8; Yesaia 41:13.
Onyankopɔn Dɔ Ne sɛ Yebesuro No
9. Abusuabɔ bɛn na Onyankopɔn dɔ ne Onyankopɔn suro wɔ?
9 Sɛnea Kyerɛwnsɛm no kyerɛ no, Onyankopɔn a yebesuro no no nkyerɛ sɛ yentumi nnɔ no. Mmom no, wɔka kyerɛɛ Israelfo no sɛ ‘wonsuro Yehowa, nnantew n’akwan nyinaa so, na wɔnnɔ no.’ (Deuteronomium 10:12) Enti Onyankopɔn suro ne dɔ a yɛbɛdɔ no no wɔ abusuabɔ kɛse. Onyankopɔn suro ka yɛn ma yɛnantew n’akwan so, na ɛno kyerɛ sɛ yɛdɔ no. (1 Yohane 5:3) Ntease wɔ eyi mu, efisɛ sɛ yɛdɔ obi a, ɛfata sɛ yesuro sɛ yɛbɛyɛ biribi ma ahaw no. Atua a Israelfo no tewee wɔ sare so no yɛɛ Yehowa yaw. Nokwarem no, yɛmpɛ sɛ yɛbɛyɛ biribi de ahow yɛn soro Agya no werɛ. (Dwom 78:40, 41) Mmom no, esiane sɛ “[Yehowa, NW] ani sɔ wɔn a wosuro no” no nti, osetie ne yɛn nokwaredi ma ne koma ani gye. (Dwom 147:11; Mmebusɛm 27:11) Onyankopɔn dɔ ma yɛyɛ nea ɛsɔ n’ani na Onyankopɔn suro mma yɛnnyɛ nea ɛbɛhaw no. Su yi mu biara ma ɔfoforo wie pɛyɛ, ɛmmɔ abira.
10. Ɔkwan bɛn so na Yesu kyerɛe sɛ n’ani gye Yehowa suro ho?
10 Yesu Kristo asetra ma yehu pefee sɛ yebetumi adɔ Onyankopɔn na yɛasuro no bere koro no ara. Odiyifo Yesaia kyerɛw Yesu ho asɛm sɛ: “[Yehowa, NW] honhom besi no so, nyansa ne nhumu honhom, afotu ne mmaninyɛ honhom, nimdeɛ ne [Yehowa, NW] suro honhom. Na [Yehowa, NW] suro bɛyɛ no huam.” (Yesaia 11:2, 3) Nkɔmhyɛ yi kyerɛ sɛ, Onyankopɔn honhom na ɛmaa Yesu tumi suroo ne soro Agya no. Afei nso, yehu sɛ sɛ anka saa suro yi bɛyɛ katee no, ɛmaa no nyaa abotɔyam. Wɔ tebea ahorow a emu yɛ den mpo mu no, Yesu nyaa ɔpɛ sɛ ɔbɛyɛ Onyankopɔn apɛde na wasɔ n’ani. Bere a na wɔrebɛbɔ no asɛnduam akum no no, ɔka kyerɛɛ Yehowa sɛ: “Ɛnyɛ sɛnea mepɛ, na sɛnea wopɛ.” (Mateo 26:39) Esiane osuro pa yi nti, Yehowa tiee ne Ba no mpaebɔ, hyɛɛ no den na ogyee no fii owu mu.—Hebrifo 5:7.
Sɛnea Yebesua Yehowa Suro
11, 12. (a) Adɛn nti na ɛsɛ sɛ yesua sɛ yebesuro Onyankopɔn? (b) Ɔkwan bɛn so na Yesu kyerɛkyerɛ yɛn Yehowa suro?
11 Nea ɛnte sɛ osuro a yefi nkate mu nya bere a yehu adebɔ mu tumi ne kɛseyɛ no, Onyankopɔn ho suro mma prɛko pɛ. Enti na Dawid Kɛseɛ, Yesu Kristo, to nsa frɛ yɛn wɔ nkɔmhyɛ kwan so sɛ: “Mma, mommra, monyɛ aso mma me! Mɛkyerɛ mo [Yehowa, NW] suro” no. (Dwom 34:11) Ɔkwan bɛn so na Yesu betumi akyerɛ yɛn Yehowa suro?
12 Yesu kyerɛ yɛn Yehowa suro denam boa a ɔboa yɛn ma yɛte yɛn soro Agya no nipasu a ɛyɛ anigye no ase so. (Yohane 1:18) Yesu ankasa nhwɛso ma yehu sɛnea Onyankopɔn dwene ne sɛnea ɔne afoforo di, efisɛ Yesu da N’agya su adi pɛpɛɛpɛ. (Yohane 14:9, 10) Afei nso, ɛdenam Yesu afɔrebɔ no so no, yetumi bɔ Yehowa mpae de srɛ yɛn bɔne fafiri. Ɛsɛ sɛ Onyankopɔn mmɔborohunu a ɛda nsow yi ma yenya ɔpɛ kɛse sɛ yebesuro no. Odwontofo no kyerɛwee sɛ: “Na wo na fafiri wɔ wo fam, na wɔasuro wo.”—Dwom 130:4.
13. Akwan bɛn na ɛwɔ Mmebusɛm nhoma no mu a ɛboa yɛn ma yesuro Yehowa?
13 Mmebusɛm nhoma no kyerɛ yɛn akwan bi a yebetumi afa so anya Onyankopɔn suro. “Me ba, sɛ wutie me nsɛm, na wode me mmara nsɛm sie wo nkyɛn, sɛ wobɛyɛ asõ atie nyansa, na woakom wo koma ama ntease, yiw, sɛ wusu frɛ nhumu, na woma wo nne so frɛ ntease, . . . ɛno na wubehu [Yehowa, NW] suro, na woahu Onyankopɔn ho nimdeɛ.” (Mmebusɛm 2:1-5) Enti, sɛ yebesuro Onyankopɔn a, ɛsɛ sɛ yesua N’asɛm, na yɛyere yɛn ho te nkyerɛkyerɛ a ɛwom no ase, na afei yetie afotu a ɛde ma no yiye.
14. Yɛbɛyɛ dɛn atumi adi afotu a wɔde maa tete Israel ahemfo no akyi?
14 Wɔka kyerɛɛ tete Israel hene biara sɛ ɔnkyerɛw Mmara no bi mfa na ‘ɔnkenkan mu, ne nkwa nna nyinaa, na wasua Yehowa Nyankopɔn suro, ne mmara no mu nsɛm nyinaa.’ (Deuteronomium 17:18, 19) Sɛ yebetumi asuro Yehowa a, Bible akenkan ne ne sua ho hia kɛse. Sɛ yɛde Bible mu asɛm bɔ yɛn bra a, yebenya Onyankopɔn nimdeɛ ne nyansa nkakrankakra. Yebehu “[Yehowa, NW] suro” efisɛ ɛma yebu bra pa wɔ yɛn asetram, na yɛn ani sɔ yɛne ne ntam abusuabɔ no. Afei nso, sɛ yɛne yɛn mfɛfo gyidifo hyiam daa a, mpanyimfo ne mmofra nyinaa tumi tie Onyankopɔn nkyerɛkyerɛ, sua Onyankopɔn suro, na yɛnantew n’akwan so.—Deuteronomium 31:12.
Nhyira Ne Obiara a Osuro Yehowa
15. Akwan bɛn so na Onyankopɔn suro ne ɔsom a yɛde ma no no wɔ abusuabɔ?
15 Esiane nea yɛasusuw ho dedaw no nti, yebetumi ahu sɛ Onyankopɔn suro yɛ su pa a ɛsɛ sɛ yɛn nyinaa nya, efisɛ ɛyɛ yɛn som a yɛde ma Yehowa no fa titiriw. Ɛma yetumi nya ne mu ahotoso koraa, nantew n’akwan so, na yɛbata ne ho. Sɛnea na ɛte wɔ Yesu Kristo fam no, Onyankopɔn suro betumi nso akanyan yɛn ma yɛadi yɛn ahosohyira ho bɔhyɛ no so ɛnnɛ ne daa.
16. Adɛn nti na Yehowa hyɛ yɛn nkuran sɛ yensuro no?
16 Onyankopɔn suro nyɛ osuro a ɛmfata anaasɛ ɛyɛ katee. Bible ma yɛn awerɛhyem sɛ: “Nhyira ne obiara a osuro [Yehowa, NW] na ɔfa n’akwan so.” (Dwom 128:1) Yehowa hyɛ yɛn nkuran sɛ yensuro no efisɛ onim sɛ saa su yi bɛbɔ yɛn ho ban. Yehu sɛnea ofi ɔdɔ mu dwene afoforo ho no wɔ asɛm a ɔka kyerɛɛ Mose no mu: ‘O, sɛ anka wɔn, Israelfo no, benya koma a ɛte sɛɛ na wɔde asuro me adi me mmara nsɛm so nna nyinaa, na asi wɔn ne wɔn mma yiye daa ɛ!’—Deuteronomium 5:29.
17. (a) Mfaso ahorow bɛn na yenya fi Onyankopɔn suro mu? (b) Dɛn na yebesua afa Onyankopɔn suro ho wɔ asɛm a edi hɔ no mu?
17 Saa nso na sɛ yenya koma a esuro Onyankopɔn a, ebesi yɛn yiye. Akwan bɛn so? Nea edi kan koraa no, su a ɛte saa no bɛma yɛasɔ Onyankopɔn ani na ama yɛabɛn no. Na Dawid fi n’ankasa suahu mu nim sɛ, “ɔyɛ nea n’afɛrefo pɛ ma wɔn, na otie wɔn sufrɛ, na ogye wɔn.” (Dwom 145:19) Nea ɛto so abien no, Onyankopɔn suro so bɛba yɛn mfaso efisɛ ebetumi anya su a yɛwɔ wɔ bɔne ho no so nkɛntɛnso. (Mmebusɛm 3:7) Yebesusuw sɛnea saa suro yi bɛbɔ yɛn ho ban afi honhom fam asiane ho wɔ asɛm a edi hɔ no mu, na ɛbɛda Kyerɛwnsɛm mu nhwɛso a ɛfa nnipa a wosuroo Onyankopɔn na wɔtwee wɔn ho fii bɔne ho nso adi.
[Ase hɔ asɛm]
^ nky. 1 Amanaman Nkabom no Mmarahyɛ Bagua no de Amansan Nyinaa Mpaemuka a Ɛfa Hokwan a Nnipa Wɔ Ho no too gua December 10, 1948.
Wubetumi Abua Nea Edidi So Yi?
•Onyankopɔn suro kyerɛ dɛn, na ɔkwan bɛn so na enya yɛn so nkɛntɛ- nso?
•Abusuabɔ bɛn na ɛda Onyankopɔn a yebesuro no ne nantew a yɛne no bɛnantew no ntam?
•Ɔkwan bɛn so na Yesu nhwɛso no kyerɛ sɛ Onyankopɔn suro ne Onyan- kopɔn dɔ wɔ abusuabɔ?
•Akwan bɛn so na yebetumi anya koma a esuro Yehowa?
[Adesua no ho Nsɛmmisa]
[Mfonini wɔ kratafa 17]
Wɔhyɛɛ Israel ahemfo sɛ wɔnkyerɛw Mmara no bi mfa na wɔnkenkan no daa
[Mfonini wɔ kratafa 18]
Yehowa suro ma yenya ne mu ahotoso sɛnea abofra bi nya ne papa mu ahotoso no
[Mfonini Fibea wɔ kratafa 15]
Stars: Photo by Malin, © IAC/RGO 1991