Nea Ɛsɛ Sɛ Wuhu Fa Abayisɛm ho

ƐYƐ den sɛ wobetumi akyerɛ nnɛyi abayisɛm ase. Eyi te saa efisɛ, wɔn a wɔde wɔn ho hyem no gu ahorow pii. Wonni baabi a wɔn nyinaa gye wɔn tumi anaa nkyerɛkyerɛ fi a ɛbɛma wɔanya gyidi biako. Afei nso, ɛsono wɔn amammerɛ, nhyehyɛe, amanne, ne wɔn adwene wɔ onyame a ɛsɛ sɛ wodi no ni ho. Nhoma kyerɛwfo bi ka sɛ: “Ahonhonsɛmdi ma obi nya ‘ahofadi’ a ɛma otumi paw nsusuwii biara a ɔpɛ.” Ɔfoforo nso ka sɛ: “Ɛkame ayɛ sɛ Nnɛyi Abosonsomfo pii adwene nhyia wɔ biribiara ho.”

Wɔn adwene a enhyia no nhaw wɔn mu pii. Akwankyerɛ nhoma bi a wɔayɛ ama wɔn a wɔpɛ sɛ wodi abayisɛm no ka sɛ: “Sɛ obi de asɛm bi a ɛte sɛ nea ɛne w’adwene nhyia bɛsɔ wo hwɛ a, hwehwɛ mu hwɛ, na si nea ɛsɛ sɛ woyɛ ho gyinae. Tie nea w’ahonim bɛka akyerɛ wo. Ɔkwan foforo so no, fi wo pɛ mu paw amanne ho nsɛm a wɔatintim ne amanne ho akwankyerɛ nhoma horow mu nea wote nka sɛ eye.”

Wɔ wɔn a wonim sɛnea nokware te fam no, adwene a enhyia yɛ ɔhaw. Abirabɔ biara nni nokware mu, ɛyɛ kann. Susuw a obi susuw sɛ biribi yɛ nokware no nkutoo mma ɛnyɛ nokware. Sɛ nhwɛso no, bere bi a atwam no, na nnuruyɛfo susuw sɛ sɛ wɔpae akokɔ a onwui mu abien de fã biara to obi a ɔyare mpafe koko so a, ebetumi asa no yare. Akyinnye biara nni ho sɛ na ayarefo no mu pii gye di ampa sɛ aduruyɛ yi betumi asa wɔn yare. Nanso, na wɔn nsusuwii ne anidaso no nnyina nokwasɛm so—ɔkwan a ɛte saa a wɔfa so no ntumi nsa mpafe. Nnipa ntumi nhyehyɛ nokware; wɔbɔ mmɔden sɛ wɔbɛte ase.

Bible no kyerɛ sɛ ɛwɔ honhom fam nsɛm ho nokwasɛm. Bere a na Yesu Kristo wɔ asase so no, ɔka kyerɛɛ N’agya wɔ mpaebɔ mu sɛ: “W’asɛm yɛ nokware.” (Yohane 17:17) Ɔsomafo Paulo kyerɛwee sɛ: “Kyerɛw nyinaa fi Nyankopɔn home mu.” (2 Timoteo 3:16) Nnipa a wodi abayisɛm no mu pii ne wɔn ho nyɛ adwene. Mmom no, wɔhwehwɛ nkuranhyɛ ne akwankyerɛ fi anansesɛm, tete som, ne nyansahu mu ayɛsɛm mpo mu. Nanso, anyɛ hwee koraa no, so ntease nnim sɛ yebesusuw nea Bible no ka ho? Anyɛ yiye koraa no, ɛkame ayɛ sɛ wogye tom wɔ mmaa nyinaa sɛ nhoma kronkron. Afei nso, ɛyɛ ɔsom mu nhoma a akyɛ sen biara no mu biako. Wɔde mfe bɛyɛ 1,600 na ɛkyerɛw Bible no, nanso ne nkyerɛkyerɛ nyinaa hyia. Momma yɛmfa Bible no  nkyerɛkyerɛ ahorow no ntoto gyidi ahorow bi a mprempren wɔn a wɔhyɛ abayisɛm ho nkuran no kura mu no ho nhwɛ.

Henanom na Wɔte Ahonhom Atrae Hɔ?

Sɛ yɛrehwehwɛ honhom mu ntease a, asɛm tiawa a ɛsɛ sɛ yebisa ne sɛ, Henanom na wɔte ahonhom atrae hɔ? Bere a nnɛyi abayifo pii gyidi gyina suban anaa gyidi ahorow so no, ebinom som nyamewa kɛse bi a wobu no sɛ ɔwɔ nipasu abiɛsa, kyerɛ sɛ ɔyɛ abeawa, ɛna, ne aberewa, a ɛkyerɛ asetra mu gyinapɛn atitiriw abiɛsa no. Ne kunu yɛ onyame bi a ɔwɔ mmɛn. Abayifo foforo som nyame ne nyamewa nyinaa. Nhoma kyerɛwfo bi ka sɛ: “Wobu nyame ne nyamewa sɛ ade a ɛma wohu tumi a mmea ne mmarima wɔ wɔ adebɔ mu. Wɔn mu biara wɔ nneɛma soronko bi a sɛ wɔka bom a, nkwa tumi fi mu ba.” Nhoma kyerɛwfo foforo bi nso ka sɛ: “Nneɛma a abayisɛm gyina so titiriw no mu biako ne anyame a wobɛpaw (Anyame/Anyamewa) ne wɔn ayɛ adwuma. . . . Bayie no ma wo ahofadi a wode bɛpaw Nyame ko a wopɛ sɛ wosom no, na ɛma wunya kwan de di w’ankasa Nyame ni.”

Bible no mfoa saa nsusuwii yi mu biara so. Yesu Kristo de bere a ɔde yɛɛ ne som adwuma no nyinaa kyerɛkyerɛɛ afoforo Yehowa, “Nyankopɔn koro” no, ho ade. (Yohane 17:3) Bible no ka sɛ: “[Yehowa, NW] yɛ ɔkɛse na ɔsɛ ayeyi sɛ, na ne ho yɛ hu anyame nyinaa so. Na amanaman anyame nyinaa yɛ abosonhuhuw.”—1 Beresosɛm 16:25, 26.

Na Ɔbonsam nso ɛ? Webster’s Ninth New Collegiate Dictionary kyerɛ abayisɛm ase sɛ “nkitaho a wɔne ɔbonsam di.” Ɛbɛyɛ den sɛ ɛnnɛ, wubenya ɔbayifo a obegye nkyerɛase yi atom, efisɛ wɔn mu pii mpo nnye ntom sɛ Satan Ɔbonsam wɔ hɔ. Ɔbea bi a wɔka ne ho asɛm wɔ The Irish Times atesɛm krataa mu sɛ “ɔbayifo a ɔwɔ dibea kɛse ne Ireland abayifo kuw titiriw bi mu hemmaa” no ka n’asɛm saa kwan yi so sɛ: “Gye a yebegye Ɔbonsam adi no kyerɛ sɛ yegye Kristosom tom . . . [Ɔbonsam] ntumi ntra amansan a Onyankopɔn nnim mu.”

Sɛ yɛde toto ho a, Bible no si so dua sɛ Ɔbonsam wɔ hɔ, na ɛde asase so amanehunu ne basabasayɛ no mu dodow no ara ho asodi to no so. (Adiyisɛm 12:12) Ɛnyɛ kyerɛ nko na Yesu kyerɛe sɛ Ɔbonsam wɔ hɔ, na mmom ɔkyerɛe nso sɛ obi betumi ayɛ Ɔbonsam apɛde bere a n’ani nni ne ho so. Sɛ nhwɛso no, afeha a edi kan no nyamesom akannifo a na wobu wɔn ho atreneefo no kae sɛ ɔkwan bi so no, wɔyɛ Onyankopɔn mma, na na wogye di sɛ wɔreyɛ Onyankopɔn apɛde. Nanso, na Yesu a otumi hu wɔn komam no nsusuw saa. Ɔka kyerɛɛ wɔn pen sɛ: “Mo agya a mufi no mu ne ɔbonsam, na mo agya no akɔnnɔde na mopɛ sɛ moyɛ.” (Yohane 8:44) Bio nso, Bible mu nhoma a ɛne Adiyisɛm no ka sɛ Ɔbonsam ‘redaadaa amanaman nyinaa.’—Adiyisɛm 12:9.

So Nkonyaayi Bi Ye?

Ɛyɛ nokware sɛ nkonyaayi ne ahonhonsɛmdi anya abusuabɔ bere nyinaa. * Nnipa pii a wɔtraa  ase tete ne nnɛ gye di sɛ abayifo yi nkonyaa de pira afoforo. Abayifo na wɔkyerɛ sɛ wɔnam nkonyaayi so de wɔn tumi no yɛ afoforo ayayade na mpo wɔde kum wɔn. Wɔtaa de asiane ahorow a ɛto nkurɔfo, te sɛ ɔyare, owu, ne kuayɛ mu huammɔdi ho asodi to abayifo so.

Ɛnnɛ, abayifo nnye sobo a ɛtete saa no ntom koraa. Bere a wogye tom sɛ abayifo no binom nye na wodi bɔne no, wɔn mu dodow no kyerɛ sɛ wɔn de no de mfaso na ɛba, na wɔmfa nsɛe ade. Abayifo kyerɛkyerɛ sɛ sɛ obi yi nkonyaa a, ɛdan ba ne so mprɛnsa, na ɛka sɛ eyi titiriw nti na wɔmpɛ sɛ wɔdome afoforo no. Nkonyaayi a wɔkyerɛ sɛ ɛboa afoforo no ho nhwɛso bi ne nsɛm a wobɛkankye de abɔ wo ho ban, de apam honhommɔne a nnipa binom a wɔbɛtraa wo fie gyaw no hɔ, de ama obi adɔ wo, de ama woate apɔw ntɛmntɛm anya ahoɔden, na w’adwuma remfi wo nsa, na ama woanya sika. Tumi kɛse a wɔkyerɛ sɛ ɛwɔ abayisɛm mu yi nti, ɛnyɛ nwonwa sɛ agye din saa.

Nanso, Bible no nkyerɛ nsonsonoe biara wɔ nkonyaayi a eye ne nea enye mu. Onyankopɔn maa ne gyinabea mu daa hɔ pefee wɔ Mmara a ɔde maa Mose no mu. Ɔkae sɛ: “Munngoru abayiguro.” (Levitucus 19:26) Yɛkenkan bio sɛ: “Mma wonnhu wo mu obi a . . . ɔhyɛ abosonkɔm, ɔbayifo ne ɔdebisafo ne ntafoayifo, ne kaberɛkyerefo.”—Deuteronomium 18:10, 11.

Dɛn nti na Onyankopɔn kaa saa? Ɛnyɛ sɛ ɔpɛ sɛ ɔde biribi a mfaso wɔ so kame yɛn. Esiane sɛ Yehowa dɔ ne man na ɔmpɛ sɛ gyidihunu fa wɔn dommum nti na ɔde mmara yi maa wɔn. Mmom no, ɔto nsa frɛ n’asomfo sɛ wommegye wɔn ahiade mfi ne nkyɛn. Ɔno ne “akyɛde pa nyinaa ne adekyɛde a ɛyɛ pɛ nyinaa” Mafo. (Yakobo 1:17) Ɔsomafo Yohane maa mfɛfo gyidifo awerɛhyem sɛ: “Biribiara a yɛsrɛ no, yenya fi [Onyankopɔn] nkyɛn, efisɛ yedi n’ahyɛde so, na yɛyɛ nea ɛsɔ n’ani.”—1 Yohane 3:22.

Na Ahonhommɔne Nso Ɛ?

Abayifo pii gye nea Bible ka yi tom: Ahonhommɔne wɔ hɔ. Obi a ɔhyɛ abayisɛm ho nkuran bɔ kɔkɔ wɔ nhoma bi mu sɛ: “Sunsuma no wɔ hɔ: Wɔwɔ ahonhom wiase a ɛte sɛ yɛn de yi a abɔde wom no mu. . . . Nsɛm a wɔde gyina hɔ ma ‘Mmoatia’, ‘Honhommɔne’ ne ‘Adaemone’ fata ankasa. Wɔn ho yɛ den yiye. . . . (Sɛ obi dom bue hokwan no ma wɔn a) wɔn mu binom a wɔaben paa no . . . betumi ne yɛn abɛtra. . . . Wobetumi ahyɛn wo nipadua mu . . . , na wɔanya wo so nkɛntɛnso  mpo. Yiw, eyi te sɛ nea na wɔka ho asɛm tete no sɛ Adaemone hyɛn nnipa mu no ara pɛ.”

Wɔ Bible mmere mu no, adaemone hyɛnee nnipa mu haw wɔn wɔ akwan horow pii so. Ná wɔn a wɔhyɛn wɔn mu no binom ntumi nkasa, ebinom ani furae, ebinom bobɔɔ adam, na ebinom nyaa ahoɔden a ɛboro nnipa de so. (Mateo 9:32; 12:22; 17:15, 18; Marko 5:2-5; Luka 8:29; 9:42; 11:14; Asomafo no Nnwuma 19:16) Ɛtɔ mmere bi a, ɔhaw no yɛ kɛse bere a adaemone pii tumi hyɛn onipa bi mu prɛko no. (Luka 8:2, 30) Ɛnde akyinnye biara nni ho sɛ, biribi pa bi nti na Yehowa bɔ nkurɔfo kɔkɔ sɛ wɔntwe wɔn ho mfi abayisɛm ne ahonhonsɛmdi mu nneyɛe ho no.

Ɔsom a Egyina Nokware So

Nnipa pii ani gye abayisɛm ho nnɛ esiane sɛ ɛte sɛ nea asiane biara nnim, ɛboa nnipa, na ɛyɛ adebɔ mu som nti. Wɔagye atom wɔ aman bi mu. Wonsuro. Mmom no, wɔabu no sɛ ade a ɛho nhia ahe biara. Ɔsom biara hokwan a wɔma wɔ mmeae bi no ma nnipa pii de wɔn ho hyɛ nneɛma a ntease nim mu, na ama abayisɛm abenya anuonyam yiye.

Nokwarem no, ɔsom abɛyɛ baabi a ahofadi wɔ a obiara tumi paw nea ɛne n’ahiade hyia, te sɛ nea wɔtɔ mpaboa wɔ guaso no ara pɛ. Nea ɛne no bɔ abira no, Yesu kaa nneɛma abien pɛ a yebetumi apaw mu biako ho asɛm. Ɔkae sɛ: “Monhyɛn ɔpon teateaa no mu; na ɔpon a ɛso ne ɔkwan a ɛtrɛw no ne nea ɛkɔ ɔsɛe mu no, na wɔn a wɔhyɛn mu no yɛ pii. Na ɔpon teateaa ne ɔkwan hihiaa no ne nea ɛkɔ nkwa mu, na wɔn a wohu no sua.” (Mateo 7:13, 14) Sɛnea ɛte no, yefi awosu mu wɔ hokwan sɛ yɛpaw ɔkwan a yɛbɛfa so. Nanso, esiane sɛ ɛfa yɛn daa yiyedi ho nti, nea yɛbɛpaw no ho hia paa. Sɛ yebenya honhom mu nimdeɛ a, ɛsɛ sɛ yɛfa nokware kwan no so—ɔkwan a wohu wɔ Onyankopɔn Asɛm, Bible mu nkutoo no.

[Ase hɔ asɛm]

[Mfonini wɔ kratafa 5]

Nnipa pii bu abayisɛm sɛ adebɔ mu som a asiane biara nnim

[Mfonini wɔ kratafa 6]

Abayisɛm ne ahonhonsɛmdi anya abusuabɔ bere nyinaa

[Mfonini wɔ kratafa 6]

So wɔn a wodi abayisɛm no reyɛ Ɔbonsam apɛde a wɔn ani nni wɔn ho so anaa?

[Mfonini ahorow wɔ kratafa 7]

Bible no kyerɛ nokware kwan no