Fi Baabi A Asiane Wɔ no!

ƐYƐ nyansahufo a wɔwɔ ogya bepɔw ho nimdeɛ no asɛyɛde sɛ wɔhwɛ nneɛma ne adanse a ɛkyerɛ sɛ ogya bepɔw rebɛpae, na afei wɔde ho kɔkɔbɔ ama. (Sɛ Bepɔw Fugen pae a, na ɛsɛ sɛ polisifo hwɛ sɛ nkurɔfo nkɔ baabi a asiane no wɔ no.) Saa ara na Bible asuafo hwɛ ‘nneɛma nhyehyɛe yi awiei’ ho sɛnkyerɛnne no, na wɔma afoforo te asiane a ɛreba no ho asɛm.—Mateo 24:3.

Yebetumi akenkan nneɛma a ebedi kan asisi yi ho asɛm wɔ Bible ti koro no ara a ɛbɔ wiase nyinaa asiane a ɛreba ho kɔkɔ no mu: “Ɔman bɛsɔre ɔman so, ne ahenni ahenni so; na ɔkɔm ne asasewosow bɛba mmeaemmeae. . . . Na atoro adiyifo bebree bɛsɔre, na wɔabɛdaadaa nnipa bebree. Na sɛ amumɔyɛ rebɛdɔɔso nti, wɔn mu dodow no ara dɔ ano bedwo. . . . Na wɔbɛka ahenni ho asɛmpa yi wiase nyinaa de adi amanaman nyinaa adanse; ɛno ansa na awiei no bɛba.”—Mateo 24:7-14.

Enhia sɛ yɛbɛyɛ nnipa a wɔhwehwɛ nsɛm mu na ama yɛahu sɛnea saa nkɔmhyɛ yi renya mmamu nnɛ. Yɛahu eyi titiriw fi, afe 1914 reba. Wɔadi wiase nyinaa ko abien, amanko akɛse, akodi nketewa, ne mmusua ne nyamesom mu akodi wɔ saa afeha yi mu. Sɛ ahokyere a asiane de ba no da nkyɛn a, akodi nso ama adesamma adi kɔm. Asasewosow akunkum nnipa pii. Ɔsom ahorow a wɔn akannifo ho wɔ asɛm ne akyidifo a wɔyɛ katee aba. ‘Amumɔyɛ a adɔɔso’ ama nnipa pii nna ɔdɔ adi, na yɔnkodɔ nni hɔ bio.

Wɔreyɛ wiase nyinaa asɛmpaka adwuma a ɛno nso yɛ sɛnkyerɛnne no fa foforo no. Wo de hwɛ nsɛmma nhoma yi akyi, na wubehu sɛ asɛm yi, “Ɛka Yehowa Ahenni Kyerɛ” ka asɛmti no ho. Ɔwɛn-Aban a wotintim no kasa 132 mu, na wotintim mfuamfua bɛboro ɔpepem 22 no, yɛ adwinnade kɛse a wɔn a wɔka “ahenni ho asɛmpa yi” wiase nyinaa no de di dwuma. Nea ɛka saa asɛmpa no ho ne sɛ amansan Bɔfo, Yehowa Nyankopɔn,  de ɔsoro Ahenni a ɛbɛsɛe nneɛma nhyehyɛe bɔne yi na ɛde paradise asase aba no asi hɔ. Nokwarem no, mprempren yetumi hu sɛnkyerɛnne a ɛkyerɛ sɛ Onyankopɔn bɛyɛ ade nnansa yi ara no, na ɛkyerɛ sɛ nneɛma nhyehyɛe yi mu nnipa nkwa da asiane mu.—Fa toto 2 Timoteo 3:1-5; 2 Petro 3:3, 4; Adiyisɛm 6:1-8 ho.

Yehowa Da a Ɛyɛ Hu No

Sɛ Yehowa atemmu bere du a, dɛn na ebesi? Tie nea ɔno ankasa aka sɛ ebesi saa bere no: “Mɛma anwonwade aba ɔsoro ne asase so, mogya ne ogya ne owusiw kumɔnn. Owia beduru sum, na ɔsram adan mogya, ansa na [Yehowa, NW] da kɛse a ɛyɛ hu no aba.”—Yoel 2:30, 31.

Saa da a ɛyɛ hu yiye, na ɛbɛsɛe nneɛma asen ogya bepɔw a ɛpae anaa asasewosow a esi wɔ beae bi no, abɛn. Odiyifo Sefania ka sɛ: “[Yehowa, NW] da kɛse no abɛn, abɛn na ɛreba ntɛm sɛ, . . . na ne ninkuntwe gya no mu na asase no nyinaa bɛhyew, na ɔdwerɛw a ɛba mpofirim ara na ɔde bɛba asase no sofo nyinaa so.” Ɛwom sɛ “wɔn dwetɛ anaa wɔn sika rentumi nnye wɔn, [Yehowa, NW] abufuw da no” de, nanso ɔkwan bi wɔ hɔ a obi betumi afa so anya ne ti adidi mu wɔ ɛda a ɛyɛ hu no mu.—Sefania 1:14-18.

Sefania rekyerɛ ɔkwan no, ɔka sɛ: “Mommma ahyɛde no mmma ansa, da no resen aba sɛ ntɛtɛwa, mommma [Yehowa, NW] abufuw mu gya no mmma mo so ansa, mommma [Yehowa, NW] abufuw da no mmma mo so ansa. Monhwehwɛ [Yehowa, NW], asase sofo a mobrɛ mo ho ase . . . nyinaa! Monhwehwɛ trenee, monhwehwɛ ahobrɛase; ebia wɔbɛkora mo so, [Yehowa, NW] abufuw da no.” (Sefania 2:2, 3) Yɛnam ‘Yehowa a yɛbɛhwehwɛ no, trenee a yɛbɛhwehwɛ, ne ahobrɛase a yɛbɛhwehwɛ’ so betumi anya guankɔbea. Henanom na wɔrehwehwɛ Yehowa nnɛ?

Akyinnye biara nni ho sɛ sɛ wote asɛmfua “Yehowa” a, w’adwene kɔ Yehowa Adansefo so esiane wɔn asɛnka adwuma no nti. Ebia wɔn mu biako na ɔde nsɛmma nhoma yi maa wo. Wonim wɔn sɛ ɔmamma pa a wɔn abrabɔ ho tew. Wɔrebɔ mmɔden sɛ wɔbɛhyɛ ‘nipasu foforo,’ a ahobrɛase a wobenya nso ka ho. (Kolosefo 3:8-10) Wogye tom sɛ nea ama wɔayɛ saa ne nkyerɛkyerɛ a wonya fi Yehowa ahyehyɛde a aniwa hu a ɛwɔ wiase nyinaa, a Yehowa Adansefo asafo ahorow a ɛwowɔ mmeae a wɔte no na ɛyɛ n’ananmusifo no. Yiw, wubetumi ne ‘anuanom nyinaa,’ Yehowa Adansefo a wɔwɔ wiase nyinaa, anya guankɔbea.—1 Petro 5:9.

Hwehwɛ Guankɔbea Nnɛ

Sɛ yebenya guankɔbea denam Yehowa a yɛbɛhwehwɛ no so a, ɛsɛ sɛ yɛfa no adamfo. Dɛn na ɛno kyerɛ? Bible bua sɛ: “Munnim sɛ wiase adamfofa ne ɔtan a wɔtan Onyankopɔn? Enti obiara a ɔpɛ sɛ ɔyɛ wiase no adamfo no gyina hɔ sɛ Onyankopɔn tamfo.” (Yakobo 4:4) Sɛ yɛbɛfa Onyankopɔn adamfo a, ɛsɛ sɛ yɛtwe yɛn ho fi nkate fam abusuabɔ biara a yɛne mprempren wiase bɔne a ɛtew atua tia Onyankopɔn wɔ no ho.

Bible tu yɛn fo sɛ: “Monnnɔ wiase anaa nneɛma a ɛwɔ wiase. Sɛ obi dɔ wiase a, agya no dɔ no nni ne mu. Na nea ɛwɔ wiase nyinaa, honam akɔnnɔ ne aniwa akɔnnɔ ne asetra mu ahohoahoa, emfi agya no, na mmom efi wiase. Na wiase ne n’akɔnnɔ retwam, na nea ɔyɛ ade a Onyankopɔn pɛ no tra hɔ daa.” (1 Yohane 2:15-17) Honam akɔnnɔ na ɛkanyan nnipa dodow no ara nnɛ—nna ho akɔnnɔ nhyɛso, sikanibere, ne tumi a wɔde di dwuma ɔkwammɔne so. Nanso, sɛ obi begyina Yehowa afã a, ɛsɛ sɛ odi akɔnnɔ a ɛtete saa nyinaa so.—Kolosefo 3:5-8.

Ebia bere ne bere mu no, wokenkan nsɛmma nhoma yi, na ebetumi aba sɛ wugye sɛnea ɛkyerɛkyerɛ Bible nkɔmhyɛ ahorow mu no tom. Nanso, ebia wotwentwɛn wo nan ase sɛ wobɛkɔ w’anim na wo ne Yehowa Adansefo abɔ fekuw. Nanso, sɛ yɛrehyia asiane a, so kɔkɔbɔ a yebetie no nkutoo dɔɔso? Sɛnea yehu wɔ Bepɔw Fugen a ɛpaee ho asɛm no mu no,  ɛsɛ sɛ yɛyɛ kɔkɔbɔ no ho biribi. Kae sɛ, anyɛ yiye koraa no, nsɛm ho amanneɛbɔfo 15 ne mfoninitwafo a na wɔpɛ sɛ wonya nea ɛrekɔ so no ho nsɛm no hweree wɔn nkwa. Nokwasɛm ne sɛ, mfoninitwafo no biako wui bere a na ne nsateaa si ne mfoninitwa afiri no so retwa mfonini. Nyansahufo a osua ogya bepɔw ho ade—a na waka sɛ, “Sɛ mewu da bi a, mɛpɛ sɛ mewu wɔ ogya bepɔw ano”—no hweree ne nkwa sɛnea ɔkae no ara pɛ. Na wɔn nyinaa de wɔn ho ama wɔn adwuma ne nneɛma a wɔrehwehwɛ no. Nanso, wɔde wɔn nkwa twaa so—ani a wobu gu kɔkɔbɔ so ho akatua.

Ɛnnɛ, nnipa pii te gyinae a Onyankopɔn asi sɛ ɔbɛsɛe nhyehyɛe bɔne yi no, na wohu sɛnea kɔkɔbɔ no yɛ nokware no kodu baabi. Ebia wɔbɛka sɛ: ‘ɛbɛba da bi, nanso ɛnyɛ nnɛ.’ Wotu Yehowa da no hyɛ akyirikyiri sɛnea wɔpɛ, na amma wɔn adwene amfi nneɛma a wɔ wɔn ani so no, ɛte sɛ nea ɛho hia kɛse saa bere yi no so.

Na Baruk wɔ ɔhaw a ɛte saa. Sɛ́ tete diyifo Yeremia kyerɛwfo no, Baruk de akokoduru bɔɔ Israelfo kɔkɔ wɔ ɔsɛe a na ɛreba Yerusalem so no ho. Nanso, bere bi, n’adwuma no bɛfonoo no. Ɛbaa saa no, Yehowa teɛɛ no so sɛ: “Worehwehwɛ ade kɛse afa? Nhwehwɛ.” Sɛ́ na ɛyɛ ahonyade, edin, anaa honam fam nneɛma no, na ɛnsɛ sɛ Baruk ‘hwehwɛ ade kɛse fa.’ Na ɛsɛ sɛ ɔma n’ani gye ade biako ho, Onyankopɔn apɛde a ɔbɛyɛ de aboa nkurɔfo ma wɔagyina N’afã. Na ɛbɛma ne nsa aka ‘ne kra sɛ asade.’ (Yeremia 45:1-5) Sɛ yɛde toto ho a, sɛ́ anka ‘yɛbɛhwehwɛ nneɛma akɛse afa’ no, ɛsɛ sɛ yɛhwehwɛ Yehowa, a ɛno betumi akowie yɛn ankasa nkwagye mu.

Wɔ Bepɔw Fugen so no, na polisifo bɛboro du ne odumgyafo a wɔatu wɔn ho ama reyɛ wɔn adwuma bere a ogya bepɔw mu dɔte a ɛyɛ hyew boro so no twiw faa wɔn so no. Na wɔrebɔ mmɔden aboa nkurɔfo a wɔn nkwa da asiane mu no abɔ wɔn ho ban. Na wɔte sɛ mmarima ne mmea a wɔwɔ adwempa a wɔayere wɔn ho sɛ wɔbɛboa ma wiase yi atu mpɔn no. Ɛwom sɛ wɔn adwene no ye de, nanso “nea akyea no, wontumi nteɛ.” (Ɔsɛnkafo 1:15) Wontumi nteɛ nneɛma nhyehyɛe a akyea yi. So ntease wom sɛ obi bɛfa “wiase adamfo” denam wiase nyinaa nhyehyɛe a Onyankopɔn abɔ ne tirim sɛ obeyi afi hɔ no a ɔbɛyere ne ho abɔ ho ban no so?

Bere a Woafi Mu no, Nsan Nkɔ Mu

Ɛsono sɛ wubefi nhyehyɛe bi a ɛwɔ asiane mu mu, ɛna ɛsono sɛ wobɛkɔ so atra ‘anuanom fekuw’ mu na woanya ahobammɔ. (1 Petro 2:17) Mommma yɛn werɛ mmfi akuafo a woguanee na akyiri yi wɔsan kɔhwɛɛ wɔn mfuw a ɛbɛn Bepɔw Fugen no. Ebetumi aba sɛ na wɔn ho pere wɔn sɛ wɔbɛsan akɔtra wɔn ase “sɛnea ɛsɛ.” Nanso woahu sɛ nyansa nni gyinae a wosii sɛ wɔbɛsan akɔ wɔn akyi no mu. Ebia na ɛnyɛ ɛno ne bere a edi kan a wɔkɔɔ baabi a na asiane wɔ no. Ebetumi aba sɛ wɔkɔɔ baabi a asiane no wɔ no kodii bere tiaa bi a hwee ansi. Bere a edi hɔ no, ebetumi aba sɛ wɔkyɛɛ kakra, nanso biribiara ansi. Ɛda adi sɛ, na wɔtaa fi baabi a ahobammɔ wɔ no twa kɔ baabi a na asiane wɔ no, na wonyaa akokoduru twentwɛn wɔn nan ase. Yesu Kristo kaa biribi a ɛte saa a ebesi wɔ ‘nneɛma nhyehyɛe yi awiei’ ho asɛm. Ɔkae sɛ: “Sɛnea nna a edi nsuyiri anim no mu no wodidii na wɔnomee, wɔwaree na wɔmaa aware, de kosii da a Noa hyɛn adaka no mu, na wɔanhu de kosii sɛ nsu yiri bɛfaa wɔn nyinaa kɔe no, saa ara nso na onipa ba no ba bɛyɛ.”—Mateo 24:3, 38, 39.

Hyɛ no nsow sɛ, Yesu kaa adidi, ɔnom, ne aware a wɔmae ho asɛm. Saa nneɛma no mu biara nyɛ mfomso ankasa wɔ Yehowa ani so. Ɛnde, dɛn na na atoto saa bere no? Noa bere sofo no ‘anhu,’ na wɔmaa wɔn asetra gyinaa asetram nneɛma a wɔyɛ no daa so. Wɔ bere a nneɛma gye ntɛmpɛ mu no, obi ntumi ntra ase “sɛnea ɛsɛ.” Bere a woafi mprempren wiase a wɔabu no fɔ no mu, anaasɛ woatwe wo ho afi ho no, ɛsɛ sɛ woko tia akɔnnɔ  biara a ɛbɛma woasan akɔhwehwɛ biribi wom no. (1 Korintofo 7:31) Wubetumi afi baabi a ahobammɔ wɔ wɔ honhom fam no akokyinkyin, na woasan aba a hwee renyɛ wo na obiara renhu mpo. Nanso, ɛda adi sɛ ɛno bɛma woanya akokoduru na ɛde wo akɔ wiase no mu bio akɔtwentwɛn wo nan ase bere tenten kakra. Ɛrenkyɛ, wubetumi anya saa su yi: “Awiei no remma nnɛ.”

Afei nso, susuw nnipa baasa a na wɔka taksi a wɔhweree wɔn nkwa bere a na wɔretwɛn nsɛm amanneɛbɔfo ne mfoninitwafo no bere a ogya bepɔw no pae twiw faa wɔn so no ho hwɛ. Ɛnnɛ, ebinom betumi de wɔn ho abɔ nnipa bi a wɔasan kɔ wiase no mu ho. Ɛmfa ho nea ɛma wɔyɛ saa biara no, ɛda adi sɛ mfaso nni so sɛ wobɛma wɔadɛfɛdɛfɛ wo ma woasan akɔ baabi a asiane wɔ no.

Nnipa a wowuwui ne wɔn a wopirapirae wɔ Bepɔw Fugen a ɛpaee mu no nyinaa traa baabi a na ahobammɔ wɔ no kɔɔ baabi a na asiane wɔ no. Ɛwom sɛ na wɔhwɛ kwan sɛ bepɔw no bɛpae da bi de, nanso wɔn mu biara ansusuw sɛ ebesi saa da no. Sɛ nnipa pii hu nneɛma nhyehyɛe no awiei ho sɛnkyerɛnne no a, wɔhwɛ kwan sɛ Yehowa da no bɛba da bi, nanso wonya adwene sɛ ɛnyɛ seesei. Ebinom mpo te nka sɛ ɛrentumi mma “nnɛ.” Su a ɛte saa yɛ hu ankasa.

Ɔsomafo Petro bɔɔ kɔkɔ sɛ: “[Yehowa, NW] da no bɛba sɛ owifo ba.” Ɛsɛ sɛ yɛma yɛn ani da hɔ, bere a ‘yɛretwɛn Yehowa da no,’ na yɛyɛ nea ‘yebetumi nyinaa ma wohu yɛn sɛ nnipa a yenni nkekae ne dɛm asomdwoe mu.’ (2 Petro 3:10-14) Sɛ wɔsɛe mprempren nneɛma nhyehyɛe bɔne yi wie a, yebenya paradise wɔ Onyankopɔn Ahenni ase. Ɛmfa ho biribiara a ɛbɛba yɛn adwenem no, ɛmmra sɛ yɛrentra nkɔ baabi a asiane wɔ no da, efisɛ Yehowa da no betumi aba da a yɛbɛsan akɔ wiase no mu no.

Hwehwɛ guankɔbea wɔ Yehowa nkurɔfo mu na wo ne wɔn ntra.

[Mfonini ahorow wɔ kratafa 7]

Hwehwɛ guankɔbea wɔ Yehowa nkurɔfo mu na wo ne wɔn ntra

[Mfonini Fibea wɔ kratafa 4]

Iwasa/Sipa Press