Sɛnea Wubetumi Ayɛ Agya Pa

WOFII Economist nsɛmma nhoma no mu asɛm bi a ɛfa abusua asetra a ɛresɛe ho ase wɔ saa kwan a ɛtwe adwene yi so: “Ɛyɛ mmerɛw sɛ wobɛwo mma, nanso sɛ́ wobɛyɛ agya pa no nna fam.”

Nneɛma pii wɔ asetra mu a ne yɛ nna fam nanso nea ɛyɛ den kɛse paa—na ɛsan nso hia paa—ne sɛ wobɛyɛ agya pa. Ɛsɛ sɛ agya biara bɔ mmɔden sɛ ɔbɛyɛ agya pa esiane sɛ ɛno na ɛbɛma asi n’abusua yiye na wɔn ani agye.

Nea Enti a Ɛnyɛ Mmerɛw

Ne tiatwa mu no, nea ɛma ɛyɛ den sɛ obi bɛyɛ agya pa ne sintɔ a efi awo mu—awofo ne wɔn mma nyinaa tɔ sin. Bible ka sɛ “onipa komam adwene yɛ bɔne fi ne mmofraase.” (Genesis 8:21) Enti Bible kyerɛwfo bi gye toom sɛ: “Bɔne mu na me nã nyinsɛn me.” (Dwom 51:5; Romafo 5:12) Nnipa adwene a ɛtɔ kɔ bɔne so esiane sintɔ a wonya fi awo mu nti na ɛma agya pa a obi bɛyɛ yɛ den saa no.

Wiase a yɛte mu yi nso yɛ akwanside kɛse biako. Dɛn ntia? Bible no kyerɛ mu sɛ ‘wiase nyinaa da ɔbɔnefo’ a “wɔfrɛ no ɔbonsam ne Satan” no mu. Bible no san frɛ Satan sɛ “wi yi ase nyame.” Enti ɛnyɛ nwonwa sɛ Yesu kae sɛ n’akyidifo “mfi wiase,” sɛnea na ɔno ankasa te no.—1 Yohane 5:19; Adiyisɛm 12:9; 2 Korintofo 4:4; Yohane 17:16.

Sɛ obi bɛyɛ agya pa a, ɛsɛ sɛ ohu bere nyinaa sɛ yɛtɔ sin, Satan Ɔbonsam wɔ hɔ, na wiase no hyɛ n’ase. Eyi nyɛ anansesɛm, ɛyɛ akwanside a ɛwɔ hɔ! Nanso, obi bɛyɛ dɛn ahu ɔkwan a ɔbɛfa so adi saa akwanside yi so na wabɛyɛ agya pa?

Onyankopɔn Nhwɛso Pa a Yebesuasua

Sɛ agya bi pɛ mmoa de adi akwanside a yɛaka ho asɛm yi so a, obetumi akɔ Bible mu. Emu na nhwɛso a ɛyɛ anigye wɔ. Yesu twee adwene sii nhwɛso a ɛkyɛn so so bere a ɔkyerɛɛ n’akyidifo sɛ wɔmmɔ mpae sɛ, ‘Yɛn Agya a wowɔ soro’ no. Bible no ka yɛn soro Agya no ho asɛm tiawa sɛ: “Onyankopɔn ne dɔ.” Dɛn na ɛsɛ sɛ agya a ɔyɛ ɔdesani yɛ wɔ ɔdɔ nhwɛso yi ho? Paulo hyɛɛ nkuran sɛ: ‘Munsua Onyankopɔn na monkɔ so nantew ɔdɔ mu.’—Mateo 6:9, 10; 1 Yohane 4:8; Efesofo 5:1, 2.

 Sɛ woyɛ agya a, susuw nea wubetumi asua afi sɛnea Onyankopɔn ne ne Ba Yesu dii nsɛm no ho nhwɛso biako pɛ mu no ho hwɛ. Mateo 3:17 bɔ yɛn amanneɛ sɛ bere a wɔbɔɔ Yesu asu no, wɔtee Onyankopɔn nne fii soro sɛ: ‘Oyi ne me dɔba a ɔsɔ m’ani.’ Dɛn na yesua fi eyi mu?

Nea edi kan, susuw sɛnea abofra bi te nka bere a ne papa de no tu ne ho sɛ ‘Me babarima no ni’ anaa ‘Me babaa no ni’ no. Mmofra nya nkɔso bere a wɔn awofo ani kũ wɔn ho, titiriw bere a wɔkamfo wɔn no. Ɛno bɛka abofra no ma wabɔ mmɔden sɛ ɔbɛkɔ so ayɛ nea ɛfata nkamfo.

Nea ɛtɔ so mmienu, Onyankopɔn kyerɛɛ sɛnea ɔte nka wɔ Yesu ho bere a ɔfrɛɛ no “me dɔba” no. Ɛbɛyɛ sɛ ka a n’agya kaa sɛ ɔdɔ no no maa Yesu ani gyee paa. Sɛ wonam wo kasa, w’adagyew ne w’ani a ekũ wo mma ho no so kyerɛ sɛ wodɔ wɔn a, ɛbɛhyɛ wɔn nso nkuran.

Nea ɛtɔ so mmiɛnsa, Onyankopɔn ka kyerɛɛ ne Ba no sɛ: ‘Wosɔ m’ani!’ (Marko 1:11) Ehia sɛ agya yɛ eyi nso, ɛne sɛ, ɔka kyerɛ ne mma sɛ ɔpɛ wɔn asɛm. Ɛwom, ɛtaa ba sɛ abofra di mfomso. Saa na yɛn nyinaa te. Nanso, sɛ́ agya no, wohwehwɛ ade pa a wo mma yɛ no kamfo wɔn wɔ ho?

Yesu suasuaa ne soro Agya no yiye. Bere a ɔwɔ asase so no, ɔnam ne nsɛm a ɔkae ne ne nneyɛe so kyerɛɛ sɛnea N’agya te nka wɔ Ne mma a wɔwɔ asase so ho. (Yohane 14:9) Bere a na Yesu nni adagyew na nsɛm ahyɛ ne so mpo no, ogyee bere traa ase ne mmofra kasae. Ɔka kyerɛɛ n’asuafo no sɛ: “Momma mmofraa no kwan na wɔmmra me nkyɛn, na munnsiw wɔn kwan.” (Marko 10:14) Mo a moyɛ agyanom no, mubetumi asuasua Yehowa Nyankopɔn ne ne Ba nhwɛso no yiye?

Nhwɛso Pa Ho Hia

Ɛho hia paa sɛ moyɛ nhwɛso pa ma mo mma. Sɛ mo ankasa moannye Onyankopɔn kasakyerɛ antom amma ankyerɛ mo kwan a, mmɔden a mobɛbɔ sɛ ‘mobɛkɔ so ayɛn mo mma wɔ Yehowa kasakyerɛ ne nyansakyerɛ mu’ no renkosi hwee. (Efesofo 6:4) Nanso, wɔ Onyankopɔn mmoa so no, mubetumi adi akwanside biara so na moahwɛ mo mma sɛnea n’ahyɛde kyerɛ no.

Susuw Viktor Gutshmidt a ɔka Yehowa Adansefo a na wɔwɔ kan Soviet Union ho no nhwɛso no ho hwɛ. Wɔ October 1957 no, wobuu no fɔ sɛ ɔnkɔda afiase mfe du esiane sɛ ɔka ne gyidi ho asɛm nti. Ogyaw ne mma mmaayewa baanu ne ne yere Polina hɔ. Ɔwɔ afiase no, wɔmaa no kwan sɛ otumi kyerɛw krataa kɔma n’abusuafo nanso onni ho kwan sɛ ɔka Onyankopɔn anaa ɔsom ho asɛm biara. Saa ɔhaw yi mu mpo no, Viktor sii ne bo sɛ ɔbɛyɛ n’asɛde sɛ agya pa, na na onim sɛ  Onyankopɔn ho asɛm a ɔde bɛkyerɛkyerɛ ne mma no ho hia yiye. Enti dɛn na ɔyɛe?

Viktor kyerɛ mu sɛ: “Minyaa nsɛm ne mfonini ahorow wɔ Sovietfo nsɛmma nhoma Young Naturalist ne Nature mu. Na meyɛ mmoa ne nnipa ho mfonini wɔ nkrataa nketewa bi so, na makyerɛw ho asɛm anaa osuahu bi a ɛfa abɔde ho aka ho.”

Polina ka sɛ: “Sɛ yɛn nsa ka saa nkrataa yi a, ntɛm pa ara na yɛde Bible mu nsɛm bi atoto ho. Sɛ nhwɛso no, sɛ krataa no mu mfonini no fa sɛnea adebɔ, kwae anaa asubɔnten yɛ fɛ ho a, mekenkan Yesaia ti 65” a ɛka bɔ a Onyankopɔn ahyɛ sɛ ɔbɛyɛ asase yi paradise ho asɛm no.

Viktor babaa Yulia ka sɛ, “Ɛno akyi Maame ne yɛn bɔ mpae, na ɛyɛ a na yesu. Saa krataa nketewa yi boaa kɛse wɔ yɛn ntetee mu.” Polina se eyi nti “mmabaa no fi wɔn mmofraase dɔɔ Onyankopɔn paa.” Seesei abusua no tebea te sɛn?

Viktor bɔ amanneɛ sɛ: “Ɛnnɛ me mmabaa baanu no awareware Kristofo asafo mu mpanyimfo, na wɔwɔ mmusua a wɔyɛ den wɔ ɔsom no mu a wɔn mma nso resom Yehowa nokware mu.”

Sɛ obi betumi ayɛ nhwɛso pa a, egye mmɔdenbɔ pii ne nyansa. Sɛ mmofra hu sɛ wɔn agya rebɔ mmɔden sɛ ɔbɛyɛ nhwɛso pa a, etumi ka wɔn koma. Ɔbarima bi a ɔde mfe bebree yɛɛ bere nyinaa som adwuma no de anisɔ kaa n’agya ho asɛm sɛ: “Ɛtɔ da bi a Paapa befi adwuma aba no na wabrɛ yiye a ɔte n’ani a ɛnyɛ yiye nanso ɔbɛma yɛayɛ abusua adesua no. Eyi boaa yɛn ma yebehuu hia a abusua adesua no hia.”

Enti emu da hɔ pefee sɛ nhwɛso pa a obi bɛyɛ wɔ ne kasa ne ne nneyɛe mu hia na ama wayɛ agya pa. Ehia sɛ woyɛ saa na Bible abebusɛm yi aba mu ama wo: “Kyerɛ abofra ɔkwan a ɔmfa so, na sɛ onyin nso a, ɔremfi ho.”—Mmebusɛm 22:6.

Enti kae sɛ ɛnyɛ nea woka nko ara na ehia. Nea ehia titiriw ne nea woyɛ—wo nhwɛso. Canadani a waben wɔ nkokoaa ntetee mu kyerɛwee sɛ: “Sɛ yɛpɛ sɛ yɛn mma yɛ nea yɛka kyerɛ wɔn no a, ɔkwan pa a ɛkyɛn biara ne sɛ yɛn ankasa yɛbɛbɔ saa bra no.” Ampa, sɛ wopɛ sɛ wo mma ani sɔ ɔsom mu nneɛma a, ɛho hia sɛ w’ankasa wokyerɛ ho anisɔ.

Nya Wɔn Ho Adagyew

Ɛsɛ sɛ wo mma hu wo nhwɛso pa no. Nea ɛkyerɛ ne sɛ ehia sɛ wubenya wɔn ho adagyew pii—ɛnyɛ bere nketenkete a ɛtoto sisi. Fi nyansa mu tie Bible afotu na ‘tɔ bere,’ kyerɛ sɛ, gyae sɛ wobɛyɛ nneɛma a ɛho nhia kɛse na woanya adagyew ama wo mma. (Efesofo 5:15, 16) Nokwarem no, dɛn na ehia paa kyɛn wo mma? Sɛ́ wubenya TV kɛse bi, agodie pii a wubedi akyi, ɔdan fɛfɛ anaa w’adwuma?

 Sɛ agyanom anhwɛ wɔn mma yiye a, daakye ɛbɛdan abɛbɔ wɔn ankasa so. Agyanom a wɔn mma akɔtɔ ɔbrasɛe mu anaa mpo wɔapo ɔsom pa no taa nu wɔn ho yiye. Ɛyɛ wɔn yaw sɛ bere a na wɔn mma no susua a wohia agya mmoa kɛse no, wɔantumi annya wɔn ho adagyew anhwɛ wɔn.

Kae sɛ bere a wo mma no susua no na ɛsɛ sɛ wodwene nea ebetumi afi wo nneyɛe mu aba no ho. Bible frɛ mma sɛ ‘agyapade a efi Yehowa hɔ,’ ade a Onyankopɔn ankasa de ahyɛ wo nsa. (Dwom 127:3) Enti mma wo werɛ mmfi da sɛ wubebu wo mma ho akontaa akyerɛ Onyankopɔn.

Wubetumi Anya Mmoa

Agya pa hwehwɛ mmoa a ɔde bɛboa ne mma. Bere a ɔbɔfo bi bɛbɔɔ Manoa ne ne yere amanneɛ sɛ wɔbɛwo ba no, Manoa bɔɔ Onyankopɔn mpae sɛ: ‘Ma no mmra yɛn nkyɛn bio, na ɔmmɛkyerɛ yɛn nea yɛnyɛ abofra a wɔrebɛwo no no.’ (Atemmufo 13:8, 9) Mmoa bɛn na na Manoa hia a awofo a wɔwɔ hɔ nnɛ nso hia? Ma yɛnhwɛ.

Brent Burgoyne a ɔkyerɛ ade wɔ Cape Town Sukuupɔn a ɛwɔ South Africa kae sɛ: “Akyɛde a ɛsen biara a obi betumi de ama ne ba ne sɛ ɔbɛkyerɛ no abrabɔ pa ho mmara.” Nea ɛkyerɛ sɛ mmofra hia sɛ wɔkyerɛ wɔn saa mmara yi da adi wɔ Japan atesɛm krataa Daily Yomiuri amanneɛbɔ yi mu: “Nhwehwɛmu bi kyerɛ sɛ Japan mmofra 100 biara mu 71 na wɔn agyanom nka nkyerɛɛ wɔn sɛ enni sɛ wodi atoro.” Eyi nyɛ awerɛhosɛm?

Hena na obetumi de abrabɔ pa ho mmara ama? Onii a Manoa nyaa ne hɔ mmoa no—Onyankopɔn ankasa! Onyankopɔn somaa ɔno ara ne Dɔba Yesu sɛ Ɔkyerɛkyerɛfo—edin a na wɔtaa de frɛ no—ma ɔde saa mmoa no mae. Saa bere yi, Suasua Ɔkyerɛkyerɛfo Kɛse No nhoma a emu nkyerɛkyerɛ gyina Yesu nsɛm so, a wɔatintim wɔ kasa horow pii mu no boa wɔ mmofra nkyerɛkyerɛ mu.

Suasua Ɔkyerɛkyerɛfo Kɛse No fi Onyankopɔn Asɛm mu kyerɛkyerɛ abrabɔ pa ho mmara mu. Nanso ɛnyɛ ɛno nko ara na ɛwom. Mfonini bɛboro 160 a nsɛmmisa ka ho no ma nsɛm a wɔakyerɛw no mu da hɔ yiye. Sɛ nhwɛso no, ti 22 no kura asɛmti a ɛne, “Nea Enti a Ɛnsɛ Sɛ Yedi Atoro,” na ɛno mu mfonini na ɛwɔ kratafa 32 no. Nea wɔakyerɛw wɔ kratafa a mfonini no wɔ no ne sɛ: “Abarimaa bi ka kyerɛ ne papa sɛ: ‘Dabi, mammɔ bɔɔl no wɔ fie.’ ‘Na sɛ ɔbɔe wɔ fie nso ɛ?’ So ɛbɛyɛ mfomso sɛ ɔbɛka sɛ wammɔ wɔ fie?”

Wɔkyerɛkyerɛ adesua a ɛkanyan nnipa wɔ ti ahorow a wɔato din “Ɔsetie Bɔ Wo Ho Ban,” “Ehia Sɛ Yɛko Tia Sɔhwɛ Ahorow,” “Ayamye a Yɛbɛda no Adi Ho Asuade,” “Nyɛ Owifo Da!” “So Apontow Nyinaa Sɔ Onyankopɔn Ani?,” “Sɛnea Yɛbɛma Onyankopɔn Ani Agye,” ne “Nea Enti a Ehia sɛ Yɛyɛ Adwuma” no mu. Eyinom yɛ nsɛmti 48 a ɛwɔ nhoma no mu no kakraa bi.

Nhoma no nnianim nsɛm no ba awiei sɛ: “Ade titiriw a mmofra hia ne sɛ awofo bɛma wɔahu nyansa Fibea, yɛn soro Agya, Yehowa Nyankopɔn. Eyi na Yesu, Ɔkyerɛkyerɛfo Kɛse no, yɛe bere nyinaa. Yɛwɔ awerɛhyem ankasa sɛ nhoma yi bɛboa wo ne w’abusua ma moabɔ mo bra ma asɔ Yehowa ani, na moanya so nhyira a enni awiei.” *

Emu da hɔ sɛ, sɛ wobɛyɛ agya pa a ɛsɛ sɛ woyɛ nhwɛso pa ma wo mma, nya wɔn ho adagyew, na woboa wɔn ma wɔbɔ wɔn bra sɛnea Onyankopɔn mmara a wada no adi wɔ Bible mu no kyerɛ.—g04 8/22.

[Ase hɔ asɛm]

[Mfonini wɔ kratafa 8]

Viktor Gutshmidt da afiase mpo, ɔbɔɔ mmɔden yɛɛ agya pa

[Mfonini ahorow wɔ kratafa 8, 9]

Bere a ne gyidi nti ɔkɔdaa afiase no, Viktor yɛɛ saa mfonini yi de kyerɛkyerɛɛ ne mma

[Mfonini wɔ kratafa 9]

Viktor mma mmaa no, 1965 mu

[Mfonini wɔ kratafa 10]

Ɛsɛ sɛ agyanom kyerɛkyerɛ wɔn mma