Bible no Adwene

So Asanom Bebrebe Nye Ankasa?

WƆAYI asadweam a woyi nsɛnkwaa wɔ TV so ma afoforo serew no mfe pii ni. Ɛwom sɛ ebia na wɔregye afoforo ani ara kwa de, nanso sɛnea woyi nsɛnkwaa no ma yehu adwene a ɛnteɛ a nkurɔfo kura wɔ asanom bebrebe ho—wɔte nka sɛ ɛyɛ mmerɛwyɛ de, nanso ne nyinaa akyi no wosusuw sɛ ɛrentumi mpira wɔn.

Nanso ɛnyɛ asɛm a ɛsɛ sɛ wɔde di agoru. Wiase Nyinaa Akwahosan Ahyehyɛde no kyerɛ sɛ asanom bebrebe ka nneɛma a ɛsɛe nnipa akwahosan sen biara wɔ wiase nyinaa no ho. Wɔkyerɛ sɛ tawanom a ɛka nkurɔfo hɔ akyi no, asanom bebrebe kum nkurɔfo pii na ɛma wonya nyarewa sen nnubɔne foforo biara a wɔde di dwuma. Na wobu akontaa nso sɛ ɛma Amerika nkutoo sɛe bɛboro dɔla ɔpepepem 184 afe biara.

Nokwasɛm yi nyinaa akyi no, nnipa pii da so ara dwen sɛ asanom bebrebe nyɛ hwee. Ɛwom sɛ wogye tom sɛ asadweamyɛ tumi pira de, nanso wonhu mfomso biara wɔ nsã a ɛwom wom a obi bɛnom ma aboro so no mu. Wɔ wiase no afã bi no, mmabun bu asabow sɛ ade a sɛ obi si so a obetumi de ne ho ahyem. Na ɛmfa ho kɔkɔbɔ a anibere wom a akwahosan ho adwumayɛfo de ma no, nsã bebrebe a wotumi tra faako nom no redɔɔso wɔ mpanyin ne mmofra nyinaa mu. Ne saa nti ɛnyɛ nwonwa sɛ nnipa pii ntumi nhu mfomso a ɛwɔ asanom bebrebe mu. Dɛn na Bible no ka wɔ ho?

Bobesa ne Nsaden—Akyɛde a Efi Onyankopɔn Hɔ

Bible ka nsɛm pii fa bobesa ne nsaden ho. Ɔhene Salomo kyerɛwee sɛ: “Kɔ na fa anigye kodi w’aduan, na fa koma pa nom wo nsã, na Onyankopɔn ani asɔ wo nneyɛe dedaw.” (Ɔsɛnkafo 9:7) Odwontofo no kae sɛ Yehowa Nyankopɔn na Ɔma ‘nsã a ɛma ɔdesani koma tɔ ne yam’ no. (Dwom 104:14, 15) Ɛda adi sɛ bobesa ka nneɛma a Yehowa de ahyira adesamma no ho.

Ɛda adi sɛ na Yesu nkasa ntia bobesa a obi bɛnom. Nokwarem no, anwonwade a odii kan yɛe ne sɛ ɔdan nsu ma ɛyɛɛ nsã pa wɔ ayeforohyia bi ase. (Yohane 2:3-10) Afei ɔde bobesa yɛɛ ne mogya ho sɛnkyerɛnne ma ɛfatae bere a na ɔde Awurade Anwummeduan ho afahyɛ resi hɔ no. (Mateo 26:27-29) Bible no ka sɛnea wotumi de bobesa sa yare ho asɛm efisɛ ɔsomafo Paulo hyɛɛ Timoteo nkuran sɛ ‘ne yafunu nti, ɔnnom bobesa kakraa bi!’—1 Timoteo 5:23; Luka 10:34.

Ɛnsɛ Sɛ Obi Nom Ma Ɛboro So

Hyɛ no nsow sɛ Paulo kae sɛ Timoteo ‘nnom bobesa kakraa bi’ pɛ. Bible no kasa tia nsa biara a obi bɛnom ma aboro so. Sɛ Yudafo asɔfo nni adwuma asɔrefie a, na wobetumi anom nsa kakra. Nanso wɔbaraa wɔn sɛ wɔnnnom nsa biara bere a wɔreyɛ wɔn asɔfodwuma no. (Leviticus 10:8-11) Mfe pii akyi no, wɔbɔɔ afeha a edi kan Kristofo no kɔkɔ sɛ asabofo “rennya Onyankopɔn ahenni no.”—1 Korintofo 6:9, 10.

Bio nso bere a Paulo de akwankyerɛ rema Timoteo no, Paulo kae sɛ ɛnsɛ sɛ wɔn a wodi asafo no anim no yɛ “asadweam.” * (1 Timoteo 3:3, 8) Nokwasɛm ne sɛ, Bible de ahyɛde ma sɛ ɛsɛ sɛ wotu asadweam a wɔnkyerɛ ahonu no fi Kristofo asafo no mu. (1 Korintofo 5:11-13) Sɛnea Kyerɛwnsɛm no ka ma ɛfata no, “nsã yɛ ɔfɛwdifo.” (Mmebusɛm 20:1) Sɛ obi nom nsã bebree a, ɛremma ontumi nhyɛ ne ho so, na ɔrentumi mfa atɛmpa nni dwuma.

 Nea Enti a Onyankopɔn Asɛm Kasa Tia Asanom Bebrebe

Yehowa a ‘ɔkyerɛ yɛn nea eye ma yɛn’ no nim sɛ sɛ yɛyɛ biribiara ma ɛboro so a, ebepira yɛne afoforo. (Yesaia 48:17, 18) Saa na ɛte bere a yɛnom nsã no. Onyankopɔn Asɛm bisa sɛ: “Hena na ɔwɔ ahohia mu, hena na ɔwɔ awerɛhow mu, hena na ɔwɔ atutuw ne nkɔmmɔdi, hena na ɔwɔ apirapira hunu ne ani a abere?” Na ebua sɛ: “Wɔn a wɔkyɛ nsã ho, wɔn a wɔkɔka afrasa hwɛ.”—Mmebusɛm 23:29, 30.

Nkurɔfo a wɔnom nsã ma ɛboro so no ayɛ nneɛma pii a nyansa nni mu na ɛyɛ hu: wɔka kar bere a wɔn ani so nna hɔ ma wɔde wɔne afoforo nkwa to asiane mu, ɛma wɔne afoforo ahokafo fa yɔnko ma ɛkɔ akyiri ma ɛsɛe awarefo ntam, ɛma wɔkasa a wonnwen ho anaa wɔkeka nsɛm a ɛmfata. (Mmebusɛm 23:33) Ɛfata sɛ wɔka sɛ asanom bebrebe ka nneɛma a ɛsɛe adesamma nnɛ no ho. Ɛnyɛ nwonwa sɛ Onyankopɔn asɛm tu fo sɛ: “Mfra sadweamfo . . . mu.”—Mmebusɛm 23:20.

Wɔ Galatifo 5:19-21 no, Paulo ka asabow ne agobɔne ho asɛm sɛ ɛyɛ “ɔhonam nnwuma” a ɛko tia Onyankopɔn honhom aba. Sɛ obi nom nsa tra so a, ɛbɛsɛe ɔne Onyankopɔn ntam abusuabɔ. Ɛnde na ɛda adi pefee sɛ ɛnsɛ sɛ Kristofo nom nsã ma ɛboro so.

[Ase hɔ asɛm]