Ɛtɔ da a, sɛ wusua ade wie a, ɛyɛ a ɛyɛ den ma wo sɛ wobɛkae anaa? Yɛn nyinaa, ɛwom ara a ebi yɛ yɛn. Dɛn na ebetumi aboa wo? Sɛ wokaakae nsɛntitiriw no a, ɛbɛboa wo.

Sɛ woresua ade a, ɛwom ara a gyina na hwɛ sɛ wobɛkae nsɛntitiriw a ɛwom no anaa. Hyɛ nea ɔsomafo Paul yɛe yi nsow. Bere a ɔkyerɛw krataa kɔmaa anuanom no, nea ɛbɛyɛ na wɔakae emu nsɛntitiriw no, ɔkyerɛwee sɛ: “Asɛntitiriw a ɛwom ni.” (Heb. 8:1) Nea ɔyɛe yi boaa anuanom no ma wɔtee nea na ɔpɛ sɛ ɔkyerɛ no ase, na ɛboaa wɔn ma wɔhuu sɛnea nsɛntitiriw a ɛwom no si asɛm a ɔreka no so dua.

Sɛ woresua ade na worebewie a, wubetumi de simma du a etwa to no adwinnwen nea woasua no ho ahwɛ sɛ wobɛkae emu nsɛntitiriw no anaa. Sɛ woantumi ankae a, hwɛ nsɛmti nketewa no anaa kasamu a edi kan wɔ nkyekyɛm biara no sɛnea ɛbɛyɛ a wobɛkae. Sɛ wusuaa biribi foforo a, bɔ mmɔden fa wo ara wo nsɛm kyerɛkyerɛ mu. Sɛ wokaakae nsɛntitiriw no a, ɛbɛyɛ mmerɛw sɛ ɛbɛka wo tirim. Afei nso, ɛbɛma woahu sɛnea wode nea woasua no bɛbɔ wo bra.