Yesaia 59:1-21
59 Hwɛ! Yehowa nsa nyɛ tiaa sɛ ebegye nkwa,+Na n’asom nso nyɛ den* sɛ ɛbɛte asɛm.+
2 Mmom, mo ara mo mmarato na ama mo ne Onyankopɔn ntam atetew.+
Mo bɔne nti, ɔde n’anim ahintaw mo,Na ontie mo.+
3 Mogya akeka mo nsam,+Na bɔne agu mo nsateaa ho fĩ.
Mo ano ka atosɛm,+ na mo tɛkrɛma ka nea ɛnteɛ.
4 Obiara nni hɔ a ɔhwehwɛ trenee,+Na obiara nni hɔ a ɔyɛ n’adwene sɛ ɔbɛka nokware wɔ asɛnnibea.
Wɔde wɔn ho to biribi a mfaso nni so*+ so, na wɔkeka nsɛnhunu.
Wonyinsɛn ɔhaw, na wɔwo mmusu.+
5 Ɔwɔ a n’ano wɔ bɔre nkosua na wɔpae,Na wɔnwene ananse ntentan.+
Obiara a odi wɔn nkosua no bewu,Na sɛ wutia kosua no so a, ɛpae ahurutoa.*
6 Wɔn ntentan rentumi nyɛ ataade,Na nea wɔyɛ no nso, wɔrentumi mfa nkata wɔn ho.+
Wɔn nnwuma yɛ mmusu,Na awudisɛm wɔ wɔn nsam.+
7 Wɔn nan tu mmirika kɔyɛ bɔne,Na wɔyɛ ntɛm hwie nnipa a wɔn ho nni asɛm mogya gu.+
Wɔn adwene nyinaa yɛ adwemmɔne;Ɔsɛe ne ahoyeraw wɔ wɔn akwan so.+
8 Wonnim asomdwoe kwan,Na atɛntrenee nni wɔn akwan mu.+
Wɔakyeakyea wɔn akwan,Na obiara a ɔfa so no renhu asomdwoe.+
9 Ɛno nti na atɛntrenee ne yɛn ntam kwan aware,Na trenee nto yɛn no.
Yɛhwɛ kwan sɛ yebenya kanea, nanso hwɛ! esum na ɛba;Yɛhwɛ kwan sɛ yebenya hann, nanso yɛkɔ so nantew sum tumm mu.+
10 Yɛde yɛn nsa keka ban ho te sɛ anifuraefo,Yɛde yɛn nsa keka nneɛma te sɛ wɔn a wonni ani.+
Yehintiw awia ketee te sɛ nea yɛnam anadwo sum mu;
Yɛwɔ ahoɔdenfo mu a, na yɛayɛ sɛ awufo.
11 Yɛn nyinaa kɔ so pow te sɛ asisi,Na yesũ mmɔbɔmmɔbɔ te sɛ mmuruburuw.
Yɛtwɛn atɛntrenee, nanso ebi nni hɔ;Yɛhwɛ nkwagye kwan, nanso ɛmmɛn yɛn koraa.
12 Efisɛ yɛn atuatew dɔɔso wɔ w’anim;+Na yɛn bɔne biara di adanse tia yɛn.+
Yenim yɛn atuatew,Na yɛn bɔne nso, yenim.+
13 Yɛato mmara, na yɛapo Yehowa;Yɛadan yɛn akyi akyerɛ yɛn Nyankopɔn.
Nhyɛso ne atuatew na yɛka ho asɛm;+Yesusuw atosɛm wɔ yɛn komam, na nkontomposɛm pue fi yɛn anom.+
14 Wɔapam atɛntrenee kɔ n’akyi,+Na adetrenee akogyina akyirikyiri;+Efisɛ nokware ahwe ase wɔ gua so,Na nea ɛteɛ ntumi mma hɔ.
15 Nokware ayera,+Na obiara a ɔtwe ne ho fi bɔne ho no, wɔsesaw ne nneɛma fa.
Yehowa hui, na n’ani annye ho,*Efisɛ na atɛntrenee biara nni hɔ.+
16 Ohui sɛ obiara nni hɔ,Na ɛyɛɛ no nwonwa sɛ ɔkamafo biara nni hɔ.Enti ɔno ara n’abasa de nkwagye bae,*Na ɔno ara ne trenee hyɛɛ no den.
17 Ɛnna ɔhyɛɛ trenee sɛ dade ataade,Na ɔde nkwagye* dade kyɛw hyɛɛ ne ti.+
Ɔhyɛɛ aweredi sɛ n’ataade,+Na ɔhyɛɛ ahokeka sɛ ataade nguguso.*
18 Nea wɔayɛ no, wɔbɛma wɔn ɛho akatua:+
Wɔn a wokyi no no benya n’abufuw; n’atamfo benya asotwe.+
Na nsupɔw nso, obetua wɔn ka.
19 Na wobesuro Yehowa din afi atɔe,*Na wɔahyɛ no anuonyam afi apuei.*Na ɔbɛba sɛ asubɔnten a ɛrebu fa soA Yehowa honhom repia no.
20 “Ogyefo+ no bɛba Sion,+Ɔbɛba Yakob mu nnipa a wɔasan afi bɔne ho no nkyɛn,”+ Yehowa na waka.
21 “Na me de, eyi ne apam a me ne wɔn ayɛ,”+ Yehowa asɛm ni. “Me honhom a ɛwɔ wo so ne me nsɛm a mede ahyɛ w’anom no remfi w’anom anaa wo mma* anom anaa wo mma mma* anom fi nnɛ kosi daa,” Yehowa na waka.
Ase Hɔ Nsɛm
^ Nt., “nyɛ duru.”
^ Anaa “adehunu.”
^ Ɔwɔ bi a n’ano wɔ bɔre paa.
^ Nt., “na ɛyɛɛ n’ani so bɔne.”
^ Anaa “brɛɛ no.”
^ Anaa “nkonim.”
^ Anaa “ataade nsasin.”
^ Anaa “owiatɔe.”
^ Anaa “owiapuei.”
^ Nt., “w’aba.”
^ Nt., “w’aba aba.”
