Yiw. Sɛ wo ho kyere wo wɔ sikasɛm mu anaa wode ka a, Bible mu afotu nnan a edidi so yi betumi aboa wo:

1.   Yɛ wo sika ho nhyehyɛe. “Nsiyɛfo nhyehyɛe de mfaso ba, na obiara a ɔpere ne ho de, ohia na ebehia no.” (Mmebusɛm 21:5) Ɛnyɛ nea w’ani bɛbɔ so biara na ɛsɛ sɛ wopere wo ho tɔ. Tena ase na sẽsẽ nneɛma a wuhia ne nea wo sika bɛsõ. Afei kyerɛw biribiara to hɔ na hwɛ sɛ worenni mmoro sika a woatwa ato hɔ no.

2.   Nsoa ɛka hunu ngu wo ho so. “Nea ogye obi hɔ bosea no yɛ akoa ma nea ɔbɔ no bosea no.” (Mmebusɛm 22:7) Sɛ wode ka na wuntumi ntua a, bɔ mmɔden sɛ wo ne nea wode no ka no bɛtena ase apɛ ɔkwan foforo a wobɛfa so atua ka no. Mpa abaw; mmom, fa Bible afotu yi yɛ adwuma. Obi a wansusuw nneɛma ho yiye na okodii ne yɔnko agyinam kogyee bosea maa no na asɛm yi fa ne ho. Esiane sɛ ɛka no abɛda ne so nti, Bible ka kyerɛ no sɛ: “Kɔbrɛ wo ho ase, kɔ na koguan wo yɔnko no ho. Mma nna mmma w’ani so, na mma w’ani nnkum.” (Mmebusɛm 6:1-5) Sɛ wosrɛ wɔn a wode wɔn ka no na wɔampene a, kɔ so ara srɛ wɔn kosi sɛ wɔne wo bɛyɛ ɛka no tua ho nhyehyɛe foforo a wubetumi adi so.

3.   Mma w’ani mmere sika. “Nyɛ pɛsɛmenkominya na mpere wo ho sɛ wobɛyɛ osikani​—ebewie ase na woyɛ ohiani sen kan no.” (Mmebusɛm 28:22, Contemporary English Version) Anibere ne ahoɔyaw betumi asɛe wo sikasɛm, na asɛe wo ne Onyankopɔn ntam mpo.

4.   Ma w’ani nsɔ nea wowɔ. “Sɛ yɛwɔ yɛn ano aduan ne nea yɛde kata yɛn ho a, yɛbɛma ɛno ara adɔɔso ama yɛn.” (1 Timoteo 6:8) Sika ntumi ntɔ anigye anaa abotɔyam. Nnipa a wɔwɔ anigye pa ara wɔ asetenam no bi wɔ hɔ a, wonni sika pii. Nanso, wɔn mmusua ne wɔn nnamfo dɔ wɔn, na wɔyɛ Onyankopɔn nnamfo.​—Mmebusɛm 15:17; 1 Petro 5:6, 7.