Dɛn Na Bible Ka Fa Nsanyare Kodiawuo a Etu Atese Ho?

BƆ

Nea Bible ka

Bible ka too hɔ sɛ, awiei mmere no mu no, nsanyare a edi awu (te sɛ yare kodiawuo a etu atese wɔ wiase) bɛba. (Luka 21:11) Yare kodiawuo a Bible ka ho asɛm yi, ɛnyɛ asotwe a efi Onyankopɔn hɔ. Nea ɛwom ne sɛ, ɛrenkyɛ, Onyankopɔn nam n’Ahenni so beyi yare biara afi hɔ, na nsanyare kodiawuo nso ka ho.

Bible ka too hɔ sɛ nsanyare kodiawuo a etu atese bɛba anaa?

Bible anhyɛ nkɔm sɛ yare pɔtee bi te sɛ COVID-19, AIDS, anaa Spanish influensa bɛba. Mmom ɛka too hɔ sɛ “nsanyare a edi awu” ne “owuyare” bɛba. (Luka 21:11; Adiyisɛm 6:8) Saa nneɛma yi nyinaa kyerɛ sɛ yɛwɔ “awiei mmere” mu anaa ‘awiei bere no adu.’—2 Timoteo 3:1; Mateo 24:3.

Onyankopɔn de yare atwe nkurɔfo aso da?

Bible ka sɛ, mmere bi wɔ hɔ a Onyankopɔn de yare twee nkurɔfo aso, nanso ɛnnɔɔso. Sɛ yɛbɛyɛ nhwɛso a, ɔmaa kwata yɛɛ nnipa bi. (Numeri 12:1-16; 2 Ahene 5:20-27; 2 Beresosɛm 26:16-21) Nanso saa yare no, nnipa baako mmienu bi pɛ na ɛyɛɛ wɔn, na antu atese anyɛ wɔn a asɛm no mfa wɔn ho. Mmom wɔn a saa yare no yɛɛ wɔn no, biribiara kyerɛ sɛ na wɔayɛ Onyankopɔn bɔne nti na na ɔrebu wɔn atɛn.

Ɛnnɛ, sɛ nsanyare kodiawuo tu atese a, ɛkyerɛ sɛ Onyankopɔn de retwe yɛn aso anaa?

Daabi. Ebinom ka sɛ Onyankopɔn de nsanyare kodiawuo a etu atese ne nyarewa foforo twe nnipa aso nnɛ. Nanso Bible mfoa saa asɛm no so. Adɛn nti na yɛreka saa?

Ade baako ne sɛ, Onyankopɔn nkurɔfo a wɔtenaa ase tete no bi yaree, na wɔn a wɔwɔ hɔ nnɛ no nso binom yare. Ɔnokwafo Timoteo sei, na ‘ɔtaa yare.’ (1 Timoteo 5:23) Nanso Bible nka sɛ na Onyankopɔn bo afuw no nti na na ɔyareyare no. Onyankopɔn nkurɔfo anokwafo a wɔwɔ hɔ nnɛ no nso bi tumi yare anaa yare tumi san wɔn. Mpɛn pii no, ɛyɛ asiane na ɛto wɔn.—Ɔsɛnkafo 9:11.

Ade foforo nso ne sɛ, Bible ma yehu sɛ bere a Onyankopɔn bɛtwe abɔnefo aso no nnui. Mmom “nkwagye da” anaa nkwagye bere mu na yɛwɔ yi; ɛyɛ bere a Onyankopɔn reto nsa afrɛ nnipa nyinaa sɛ wɔmmɛn no na onnye wɔn nkwa. (2 Korintofo 6:2) Ɔkwan baako a ɔfa so to nsa frɛ nkurɔfo ne sɛ ɔma nnipa ka asɛm bi a ɛhyɛ nkuran wɔ wiase nyinaa. Saa asɛm no, wɔfrɛ no “Ahenni no ho asɛmpa.”—Mateo 24:14.

Nsanyare kodiawuo a etu atese no, ɛto betwa da bi?

Yiw. Bible ahyɛ nkɔm sɛ ɛrenkyɛ obiara renyare bio. Sɛ Onyankopɔn de n’Ahenni no bedi nnipa so a, obeyi nyarewa nyinaa afi hɔ. (Yesaia 33:24; 35:5, 6) Obeyi amanehunu, ɛyaw, ne owu afi hɔ. (Adiyisɛm 21:4) Ɔbɛyɛ biribiara pɛpɛɛpɛ wɔ asaase so ha, na wanyan wɔn a wɔawuwu no aba nkwa mu bio a wɔwɔ apɔwmuden.—Dwom 37:29; Asomafo Nnwuma 24:15.

Nea Bible ka fa yare ho

Mateo 4:23: “[Yesu kyinkyin] Galilea nyinaa, kyerɛkyerɛe wɔ wɔn hyia adan mu kaa Ahenni no ho asɛmpa. Na ɔsaa nyarewa ne ahoɔmmerɛw ahorow a ɛwɔ nnipa no so nyinaa bi.”

Nea ɛkyerɛ: Anwonwade a Yesu yɛe no, ɔde yɛɛ nhwɛso kakra ma yehuu nea Onyankopɔn Ahenni no bɛyɛ ama nnipa nyinaa nnansa yi ara.

Luka 21:11: “Nsanyare a edi awu . . . bɛba.”

Nea ɛkyerɛ: Nneɛma a ɛma yehu sɛ yɛwɔ awiei mmere mu no, nyarewa a etu atese ka ho.

Adiyisɛm 6:8: “Hwɛ! ɔpɔnkɔ bi a ɔyɛ hoyaa ni; na nea ɔte no so no din de Owu. Ná Ɔdamoa di n’akyi pɛɛ. Na wɔmaa wɔn . . . tumi sɛ wɔmfa . . . owuyare . . . nkunkum [nnipa].”

Nea ɛkyerɛ: Adiyisɛm nhoma no mu nkɔmhyɛ a ɛfa nnipa nnan a wɔtete apɔnkɔ so ho no, ɛma yehu sɛ, nsanyare kodiawuo betu atese wɔ yɛn bere yi so.