Ampa anaa Atoro

1.   Wowɔ nnamfo bebree a, worenyɛ ankonam da.

2.   Wode sohyial nɛtwɛk di adwuma a, worenyɛ ankonam da.

3.   Wode text message pii menamena afoforo a, worenyɛ ankonam da.

4.   Woyɛ nneɛma de boa afoforo a, worenyɛ ankonam da.

 Adɛn ntia?

•   Sɛ wowɔ nnamfo bebree a, ɛno nko ara nkyerɛ sɛ worenyɛ ankonam da.

   “Midwen me nnamfo ho, nanso ɛtɔ mmere bi a, mete nka sɛ wɔn de wonnwen me ho saa. Sɛ nnamfo pii atwa wo ho ahyia nanso ɛte sɛ nea wo ho nhia wɔn mu biara, na wɔnnɔ wo sɛnea wodɔ wɔn no a, saa bere no na wubetumi ate nka pa ara sɛ woayɛ ankonam.”​—Anne.

•   Wode sohyial nɛtwɛk di adwuma a, ɛno nko ara nkyerɛ sɛ worenyɛ ankonam da.

   “Ebinom sesaw nnamfo bɔ so te sɛ nea wɔresesaw abaduaba de akosiesie wɔn dan mu no. Sɛ wowɔ abaduaba pii wɔ wo dan mu a, ɛno bɛma woate nka sɛ abaduaba no dɔ wo anaa? Dabida! Sɛ wunni nnamfo pa a, nyɛ w’adwene sɛ intanɛt so nnamfo betumi aboa wo. Wɔte sɛ abaduaba a nkwa biara nni mu.”​—Elaine.

•   Wode text message pii menamena afoforo a, ɛno nko ara nkyerɛ sɛ worenyɛ ankonam da.

   “Ɛtɔ mmere bi na wote nka sɛ woayɛ ankonam a, wohwɛ wo mobal fon so mpɛn pii sɛ ebia wo nnamfo asɛnde wo biribi anaa. Na sɛ wuhu sɛ obiara nyɛɛ n’adwene sɛ ɔne wo bedi nkitaho a, na biribi reyɛ ayɛ wo!”​—Serena.

•   Woyɛ nneɛma boa afoforo a, ɛno nko ara nkyerɛ sɛ worenyɛ ankonam da.

   “Mpɛn pii no mebɔ mmɔden sɛ mɛkyɛ me nnamfo ade nanso mihu sɛ wɔn de wɔnyɛ me saa. Ɛwom, minnuu me ho sɛ mekyɛ wɔn ade, nanso ɛyɛ me nwonwa kakra sɛ wɔnkyɛɛ me biribiara mfa nkyerɛɛ nea meyɛ no ho anisɔ da.”​—Richard.

 Nea yɛreka akosi: Yɛbɛka pa ara a, adwene no na ɛma obi te nka sɛ wayɛ ankonam. Ababaa bi a ne din de Jeanette ka sɛ: “Wo ara na wote nka saa, na emfi afoforo.”

 Sɛ wote nka sɛ wunni adamfo biara anaa woayɛ ankonam a, dɛn na wobɛyɛ?

Mmu wo ho abomfiaa.

 “Wote nka sɛ obiara nnwen wo ho a, ebetumi ama woayɛ ankonam. Sɛ ɛyɛ wo sɛ w’asɛm mfa obiara ho a, ɛbɛyɛ den sɛ wubebue wo komam ahwehwɛ nnamfo.”​—Jeanette.

 Bible ka sɛ: “Dɔ wo yɔnko sɛ wo ho” (Galatifo 5:14) Sɛ yebenya nnamfo pa a, ɛsɛ sɛ yɛte nka sɛ yɛsom bo, nanso ɛnsɛ sɛ yenya adwene sɛ yɛsen afoforo.​—Galatifo 6:3, 4.

Kwati sɛ wubesu wo ho mmɔbɔ.

 “Ankonamyɛ akɔyɛ sɛ anwea anaa atɛkyɛ a obi gyina mu a etumi didi n’ase ma ɔmem. Dodow a wumunumunum wɔ mu no, dodow no ara na ɛbɛyɛ den sɛ wubepue afi mu. Sɛ woma ankonamyɛ ho adwinnwen bɛtɔ wo so na daa wusu wo ho mmɔbɔ a, obiara ani rennye ho sɛ ɔbɛbɛn wo; ɛno mmom bɛma w’ankonamyɛ no ayɛ kɛse.”​—Erin.

 Bible ka sɛ: ‘Ɔdɔ . . . nhwehwɛ nea n’ankasa hia.’ (1 Korintofo 13:​4, 5) Nokwasɛm ne sɛ, sɛ yɛde yɛn adwene si nea yɛn nko ara hia so a, ɛremma yɛn yam nhyehye yɛn mma afoforo. Ɛba saa a, ɛbɛyɛ den sɛ yebenya nnamfo. (2 Korintofo 12:15) Nea ɛwom ne sɛ, sɛ wugyina sɛnea afoforo yɛ wɔn ade so na ɛkyerɛ sɛ nneɛma rekɔ yiye ma wo a, ɛnde wubedi nkogu kẽ! Sɛ wotaa keka nsɛm te sɛ “Obiara mfrɛ me” anaa “Obiara nto nsa mfrɛ me nkɔ baabiara” a, nea ɛkyerɛ ne sɛ, sɛ w’ani begye a egyina afoforo so. Wunhu sɛ woyɛ saa a, ɛbɛma nkurɔfo anya wo so tumi dodo anaa?

Ɛnyɛ obiara kɛkɛ na ɛsɛ sɛ wofa no adamfo.

 “Nnipa a wɔayɛ ankonam pɛ sɛ afoforo nya bere ma wɔn. Enti nkakrankakra ebedu baabi no, obiara a obeyi ne ti no, sɛ ɔte sɛn oo, sɛ ɔte sɛn oo, ɛnyɛ ɛhɔ koraa na wɔhwɛ. Nea wɔpɛ ara ne sɛ afoforo begye wɔn atom. Nanso ebinom betumi ama woate nka sɛ w’asɛm yɛ wɔn asɛm sɛnea ɛbɛyɛ a wobedidi wo ho anaa wɔde wo bɛyɛ nea wɔpɛ. Wɔyɛ wo saa a, afei wobɛte nka sɛ wotenaa wo baabi koraa a anka eye.”​—Brianne

 Bible ka sɛ: “Nea ɔne anyansafo nantew no bɛyɛ onyansafo, na nea ɔne nkwasea bɔ no, ebewie no bɔne.” (Mmebusɛm 13:20) Sɛ ɔkɔm de obi a, nea ne nsa bɛka biara odi no saa ara. Saa ara na sɛ obi repɛ adamfo denneennen a, anhwɛ a ɔbɛpaw obiara kɛkɛ sɛ n’adamfo. Obi a ɔte saa no, nkurɔfo betumi adaadaa no ayɛ no nea wɔpɛ biara. Ɛba saa a, obetumi asusuw sɛ saa ara na adamfofa biara te; papa biara nni hɔ.

 Awiei Nsɛm: Nnipa binom tumi te nka sɛ wɔayɛ ankonam pa ara; afoforo nso, wɔnte nka pii saa. Ne nyinaa mu no, ɛwom ara a, obiara tumi te nka sɛ wayɛ ankonam. Ankonamyɛ betumi ama obi ate nka sɛ wabubu koraa, nanso nokwasɛm a ɛwom ne sɛ ankonamyɛ yɛ atenka kɛkɛ​—ɛno ara ne no. Mpɛn pii no, nea yedwen ho na ɛde atenka no ba. Nea yedwen ho nso de, yebetumi ayɛ ho biribi.

 Nhwehwɛ nea ɛboro so mfi afoforo hɔ. Jeanette a yɛadi kan aka ne ho asɛm no kaa sɛ: “Ɛnyɛ obiara na obetumi ayɛ adamfo pa akosi awiei. Bere rekɔ so no, wubenya nnipa a wodwen wo ho. Sɛ wuhu sɛ obi dwen wo ho a, ɛno ara na ehia na ama woadi ankonamyɛ so.”

 Wuhia mmoa pii anaa? Kenkan “ Sɛnea Wubedi Adamfofa Ho Suro So.” Wubetumi nso atwe dwumadi krataa a yɛato din: “Sɛnea wubegyina ankonamyɛ ano” no bi.