FESILI I TE 6
Ne a Mea ne ‵Valo Mai i te Tusi Tapu e Uiga ki te Mesia?
VALOAGA
“Kae ko koe, e Peteleema Efalata, . . . ka vau mai i a koe se tino mō oku telā ka fai mo pule i Isalaelu.”
FAKATAUNUGA
“Mai tua o te fanauga o Iesu i Peteleema i Iuta, i aso o Helota te tupu, kiloke! ne olo atu ki Ielusalema a tino iloilo fetū mai te feitu ki Saegala.”
VALOAGA
“E vaevae ne latou oku gatu i a latou eiloa, kae fai ne latou a vili mō oku gatu.”
FAKATAUNUGA
“I te otiga ne ‵tuki ne sotia a Iesu ki te pou, ne puke ne latou tena gatu kae vaevae ki vaega e fa . . . Kae ko tena gatu ‵tao loto e seai ne sokoga i ei me ne ‵laga eiloa mai luga ke oko ki lalo. Tenā ne fai aka ei latou i a latou eiloa: “Ke se saesae ne tatou, kae ke fai ne tatou se vili me ko oi ka maua ne ia.”
VALOAGA
“E leoleo ne ia ana ivi katoa; e seai loa sena ivi ne fati.”
FAKATAUNUGA
“I te lotou okoatuga ki a Iesu, ne lavea ne latou i a ia ko leva ne mate, tenā ne seki ‵fati ei ne latou ana vae.”
VALOAGA
“Ne velo a ia mō ‵tou amioga solitulafono.”
FAKATAUNUGA
“Ne velo ne se sotia e tokotasi tena kaokao ki se tao, kae ne ‵sali fakavave mai ei ki tua a toto mo vai.”
VALOAGA
“Ne tuku mai ne latou toku ‵togi, e 30 tupe siliva.”
FAKATAUNUGA
“Tenā ne fanatu ei se tokotasi mai te toko Sefululua, telā e igoa ki a Iuta te Isikaliota, ki faitaulaga pule kae fai atu: ‘Se a toku ‵togi e tuku mai ne koutou ke fakatogafiti ne au a ia?’ Ne lotoma‵lie latou ke tuku atu ki a ia e 30 tupe siliva.”