MATAUPU I TE ‵KAVA | KE MAUA A MEA AOGA E UKE ATU MAI TAU FAITAUGA
Kaia e ‵Tau o Faitau ki te Tusi Tapu?
“Ne mafaufau au me ko tō faigata ke malamalama i te Tusi Tapu.”—Jovy
“Ne mafaufau au me se mea fakafi‵ta.”—Queennie
“Kafai e kilo au ki te matolu o te Tusi Tapu, galo loa toku fia faitau ki ei.”—Ezekiel
Kai mafaufau aka eiloa koe ke faitau ki te Tusi Tapu kae taofi aka ne vaegā lagonaga penā? Ne foliga fakafi‵ta a te faitau ki te Tusi Tapu ki te tokoukega o tino. Kae e a māfai ko iloa ne koe me e mafai o fesoasoani atu te Tusi Tapu ke momea aka te fakafiafia mo te fakalotomalie o tou olaga? Kae e a māfai ko iloa ne koe auala ‵gali ke faitau ki ei? E mata, ka fiafia koe ke onoono atu ki mea e akoako mai i te Tusi Tapu?
Mafaufau ki nai pati mai tino kolā ne maua ne latou a mea ‵gali i te taimi ne kamata o fai‵tau latou ki te Tusi Tapu.
A Ezekiel, telā ko 20 tupu fua ana tausaga, ne fai mai: “I aso mua, ne fai au pelā me se tino e fakatele se motoka e aunoa mo te mafaufau ki te koga ka fano au ki ei. Kae ko te faitau ki te Tusi Tapu ne fesoasoani mai ei ke maua ne au se olaga aoga. E maua i ei a pati fakatonutonu aoga kolā e mafai o fakaaoga ne au i aso katoa.”
A Frieda, ko 20 tupu foki ana tausaga, ne fai mai: “Ne ita vave sāle au. Kae ona ko taku faitau ki te Tusi Tapu, ne kamata o pule faka‵lei ifo au ki oku lagonaga. Ne fakafaigofie ne te mea tenei ke mafai o fealofani au mo nisi tino, telā ko uke atu nei oku taugasoa.”
Ne fai mai se fafine ko 50 tupu ana tausaga e igoa ki a Eunice, e uiga ki te Tusi Tapu, “Ne fesoasoani mai ke momea aka te ‵lei oku uiga, kae ne ‵fuli i ei aku nisi faifaiga masani sē ‵lei.”
E pelā mo mea ko oti ne iloa aka ne tino fai‵tau konā kae penā foki a te fia miliona o tino, a te faitau ki te Tusi Tapu e mafai o fesoasoani atu ke maua ne koe se olaga tai fakafiafia atu. (Isaia 48:17, 18) I tafa o nisi mea, a mafai o fesoasoani atu ki a koe (1) ke fai a fakaikuga ‵lei, (2) ke maua a taugasoa ‵tonu, (3) ke mafai o fa‵ki i te loto mafatia, kae ko te (4) telā ko te ‵toe mea tāua, ke iloa ne koe te munatonu e uiga ki te Atua. A pati fakatonutonu mai te Tusi Tapu ne aumai mai te Atua, tela la, e se mafai eiloa o ‵se koe māfai e tautali atu ki ei. E se mafai ne te Atua o tuku mai a pati fakatonutonu sē ‵lei.
A te mea tāua ko te taumafai ke na kamata. Ne a manatu fesoasoani aoga kolā ka fai ei ke faigofie kae fiafia koe ke na kamata o faitau ki te Tusi Tapu?
