ITE taimi e faitau ei koe ki fakamatalaga e lua konā, se a te mea e ‵pau mo tau kilokiloga? E mafau‵fau a tino e tokouke me e fakamafanafana loto kae ‵gali foki a pati a Saulo mai Taso, telā e taku foki ki te apositolo ko Paulo. (Galuega 17:26, 27) Kae e maua foki i te Tusi Tapu a nisi fakatalitonuga e pelā mo te mea tenā. E pelā mo te faiatuga ne Iesu o se ‵talo telā e aofia i ei se fakatalitonuga fakamafanafana me e mafai o iloa ne ana soko a te Atua kae maua foki tena fakamanuiaga.—Ioane 17:3.

Kae e ‵kese a kilokiloga a tino ‵poto e pelā mo Philo. Ne fai mai latou me e se mafai eiloa o iloa ne tatou a te Atua me e seai se tino e mafai o malamalama ‵lei i te Atua. Se a te mea e fakavae ki ei a te munatonu?

E fai ‵tonu mai te Tusi Tapu me e isi ne mea e uiga ki te Atua kolā e faigata ke malamalama i ei a tino. E pelā mo te leva o te olaga o te Mafuaga, te poto o tena mafaufau, te ‵poko o tena poto e se mafai o fua aka, o fakatusagina io me maina katoatoa i ei. Ko sili fakafia atu i te mea e mafai o malamalama i ei a tino. Kae ko feitu konā e uiga ki te Atua e se mafai o taofi aka ei tatou mai te iloa ‵lei ne tatou a ia. A te ‵tonuga loa, a te mafaufau ‵loto ki mea konā e mafai o fesoasoani mai ke “fakapili‵pili atu ki te Atua.” (Iakopo 4:8) Ke mafau‵fau aka tatou ki nai fakaakoakoga o mea kolā e faigata o maina i ei. Ko onoono ei tatou ki mea e uiga ki te Atua kolā e mafai eiloa o maina tatou i ei.

TE LEVA O TE OLAGA O TE ATUA: E akoako mai te Tusi Tapu me ne ola te Atua “mai mua loa, kae ka fai loa koe mo Atua ki te se gata mai.” (Salamo 90:2) I nisi tugapati, e seai se kamataga mo te fakaotiga o te Atua. Mai te kilokiloga a tino, “e se mafai foki o lau ne tatou a tausaga o tena olaga.”—Iopu 36:26.

Te auala e maua ei ne koe a mea aoga: E folafola atu ne te Atua me ka maua ne koe te ola se-gata-mai māfai ko iloa tonu ne koe a ia. (Ioane 17:3) E a, e mafai o tali‵tonu katoatoa ki te folafolaga tenā māfai e se ola ki te se-gata-mai a te Atua? Ko te “Tupu [fua] o te se-gata-mai” e mafai o fakataunu ne ia a te vaegā folafolaga penā.—1 Timoteo 1:17.

MAFAUFAU O TE ATUA: E akoako mai te Tusi Tapu me “e seai se tino e malamalama i ona mafaufauga [o te Atua]” ona ko te mea e ma‵luga fakafia atu ana mafaufauga i lō ‵tou mafaufauga. (Isaia 40:28; 55:9) Se mea ‵lei eiloa me ne fai mai ne te Tusi Tapu se fesili ke mafau‵fau ki ei: “Ko oi e iloa ne ia a te mafaufau o te Aliki? Ko oi e mafai ne ia o fakatonu a ia?”—1 Kolinito 2:16, TT.

Te auala e maua ei ne koe a mea aoga: E mafai ne te Atua o fakalogologo ki te fia miliona o ‵talo i te taimi eiloa e tasi. (Salamo 65:2) E iloa foki eiloa ne ia a manu eva fo‵liki kolā e ‵to ki te laukele. E mata, e mafai o ‵fonu te mafaufau o te Atua, telā e se mafai ei o lavea ne ia koe kae fakalogologo atu ki au ‵talo? Ikai, me e seai se tapula ki tena mafaufau. Kae e sili atu i ei, “e tāua fakafia koutou i lō manu eva fo‵liki e uke” ki a ia.—Mataio 10:29, 31.

FAIFAIGA A TE ATUA: E akoako mai te Tusi Tapu me e se mafai ne tino o “malamalama faka‵lei i mea e fai ne ia.” (Failauga 3:11) Tela la, ka se mafai o iloa ne tatou a mea katoa e uiga ki te Atua. A te poto mai tua o faifaiga a te Atua “ko oko eiloa i te faigata ke malamalama” i ei. (Loma 11:33) Kae e loto fiafia eiloa a te Atua ke fakaasi mai ana faifaiga ki tino kolā e fia fakafiafia atu ki a ia.—Amosa 3:7.

Te auala e maua ei ne koe a mea aoga: Kafai e faitau kae sukesuke koe ki te Tusi Tapu, ka se mafai eiloa o gata tou tauloto ki mea ‵fou e uiga ki te Atua mo ana faifaiga. E fakauiga a te mea tenei me e mafai o momea aka ‵tou fakapilipili atu ki te ‵tou Tamana faka-te-lagi ki te se-gata-mai.

Ona ko te mea e se mafai o maina katoatoa tatou i nisi mea e uiga ki te Atua, e se fakauiga i ei me e se mafai o iloa ‵lei ne tatou a ia. E aofia i te Tusi Tapu a fakamatalaga e uke kolā e fesoasoani mai ke iloa ‵lei ne tatou te Atua. Mafaufau ki nisi fakaakoakoga konei:

TE IGOA O TE ATUA: E akoako mai te Tusi Tapu me ne taku mai eiloa ne te Atua tena igoa. Ana muna: “Au ko Ieova. Tenā toku igoa.” E nofo loa ki te 7,000 taimi e sae mai te igoa o te Atua i te Tusi Tapu, e sili fakafia atu i lō nisi igoa.—Isaia 42:8, NW.

Te auala e maua ei ne koe a mea aoga: Ne fai atu a Iesu i tena ‵talo fakaakoako: “Te motou Tamana telā i te lagi, ke tapu tou igoa.” (Mataio 6:9) E mata, e fakaaoga foki ne koe a te igoa o te Atua i au ‵talo? E loto fiafia eiloa a Ieova ke faka‵sao a tino katoa kolā e fakaasi atu ne latou a te āva ‵tau ki tena igoa.—Loma 10:13.

TE KOGA NOFO O TE ATUA: E akoako mai te Tusi Tapu me e lua a “koga ‵nofo”—se koga telā e ‵nofo i ei a tino mo foitino faka-te-agaga mo se koga faka-te-foitino telā e aofia i ei ‵tou lalolagi mo te iunivesi. (Ioane 8:23; 1 Kolinito 15:44) I te Tusi Tapu, a te pati “lagi” e masani o fakasino atu ki te koga e ‵nofo i ei a tino faka-te-agaga. E tu atu eiloa a te “koga nofo” o te Mafuaga i “lagi” konā.—1 Tupu 8:43.

 Te auala e maua ei ne koe a mea aoga: E maua ne koe se ata manino o te Atua. A te Mafuaga e sē se malosi sē matea telā e nofo atu i koga katoa mo mea katoa. A Ieova se Tino tonu telā e nofo i se koga tonu. Kae e “seai [eiloa] se mea ne faite e mafai o ‵funa mai i ana mata.”—Epelu 4:13.

UIGA O TE ATUA: E akoako mai te Tusi Tapu me e isi ne uiga ‵gali o te Atua. “Te Atua ko te alofa eiloa a ia.” (1 Ioane 4:8) E se mafai o loi. (Tito 1:2) A ia e se fakailoga tino, e alofa fakamagalo, e tuai o ita. (Esoto 34:6; Galuega 10:34) E mafai o ofo a tino e tokouke, me e manako te Mafuaga ke maua se ‘va fakataugasoa’ mo latou kolā e āva ki a ia.—Salamo 25:14.

Te auala e maua ei ne koe a mea aoga: E mafai o fai koe mo fai se taugasoa o Ieova. (Iakopo 2:23) I te taimi e kamata ei o iloa ne koe a uiga o Ieova, e mafai o momea aka tou malamalama i tala i te Tusi Tapu.

E fakaasi mai i te Tusi Tapu se ata manino o Ieova te Atua. E faigofie fua ke iloa ne tatou a ia. A te ‵tonuga loa, e manako eiloa te Mafuaga ke iloa ne koe a ia. E folafola mai tena Muna ko te Tusi Tapu: “Kafai e ‵sala atu koe ki a ia, kae ka talia ne ia ke maua ne koe a ia.” (1 Nofoaiga Tupu 28:9) Kaia e se taumafai ke iloa ne koe te Atua mai te faitau mo te mafaufau ‵loto ki tala i te Tusi Tapu? Kafai e fai koe penā, e folafola mai te Tusi Tapu me “ka fakapilipili mai [te Atua] ki a koutou.”—Iakopo 4:8.

Kāti ka fai mai koe, ‘Ona ko te mea e se mafai o malamalama au i mea katoa e uiga ki te Mafuaga, e mafai pefea o fai au mo fai tena taugasoa?’ Mafaufau ki te mea tenei: E mata, e ‵tau o isi se pepa fakatokita o te ‵toe taugasoa pili o se tokita tipitipi? Ikai! E mafai o ‵kese ‵ki a te galuega a te taugasoa o te tokita tipitipi. Kae koi mafai eiloa o ‵pili te la taugasoa. A te mea tāua ko te iloa ne te taugasoa o te tokita tipitipi a uiga o te tokita tipitipi, pelā foki mo mea e fiafia ki ei mo mea e se fiafia a ia ki ei. E penā foki loa, e mafai o tauloto ne koe mai te Tusi Tapu me ko Ieova se vaegā tino pefea—ko mea eiloa kolā e ‵tau o iloa ne koe ke fakamalosi aka ei te va fakataugasoa mo ia.

I lō te tuku mai o fakamatalaga sē manino ‵lei e uiga ki te Mafuaga, e tuku mai i te Tusi Tapu a vaegā fakamatalaga kolā e manakogina ke iloa ne tatou a te Atua. E mata, e fia sukesuke koe ki mea e uke atu e uiga ki a Ieova te Atua? E fai eiloa ne Molimau a Ieova se polokalame o akoga faka-te-Tusi Tapu sē ‵togi. E ‵kami ne matou koe ke fesokotaki atu ki se Molimau i te koga e nofo koe i ei io me e fano ki te fakatuatusi o matou i te itaneti, ko te www.isa4310.com.