TE TALI I TE TUSI TAPU: “Ka oko mai eiloa te itula e lagona ei ne tino katoa kolā e i loto i tanuga a tena leo [o Iesu] ko ulu mai ei ki tua.”—Ioane 5:28, 29.

Ne ‵valo mai ne Iesu a te taimi ka se toe ai ne tino i lalo i te Tanuga, māfai ko ‵nofo atu tatou mai lalo i tena Malo. “Ne ofo malosi au i te taimi muamua ne faitau ei au ki te Ioane 5:28, 29,” ne fai mai ne Fernando, telā ne taku atu i te mataupu mai mua, ana mea ne masaua. “Ne maua ei ne au se fakamoemoega tonu, kae ne kamata o mafaufau au ki aso mai mua mo te loto fiafia.”

I aso mua, ne fakamoemoe a te tagata fakamaoni ko Iopu me mai tua o tena mate, ka toe fakatu fakamuli mai a ia ne te Atua ki te ola. Ne fesili atu a Iopu: “Kafai e mate se tagata, e mata e mafai o toe ola mai?” Kae ne toe tali atu tou tagata mo te loto talitonu: “Ka ko au ka fakatalitali ki te taimi ‵lei, ka faka‵tali au [i te Tanuga] ke oti atu a taimi o fakalavelave konei. Tenā la, ka kalaga mai koe, kae tali atu au.”—Iopu 14:14, 15.

A te toetuga e sē se manatu fou ki te tuagane o Lasalo ko Maleta. Mai tua o te matega o Lasalo, ne fai atu a Iesu ki tou fafine: “Ka toetu mai tou tuagane.” Ne tali atu a Maleta: “E iloa ne au me ka toetu mai a ia i te toe‵tuga i te aso fakaoti.” Ne toe fai atu ei a Iesu ki tou fafine: “Au ko te toetu mo te ola; so se tino e fakatuanaki ki a au, e tusa eiloa me mate; kae ola eiloa a ia.” (Ioane 11:23-25) Kae ne toe fakatu fakavave ne Iesu a Lasalo ki te ola! E tuku mai ne te tala fakafiafia tenā se ata foliki o mea ‵lasi kolā ka fai i aso mai mua. Mafaufau ki vaegā toetuga penā e fai i te lalolagi kātoa!

TE TALI I TE TUSI TAPU: E fakaasi mai i te Muna a te Atua me ne ‵kese a te toetuga o Iesu mai i nisi toetuga e valu i te Tusi Tapu. Ne toe‵tu mai a tino e tokovalu konā ki te ola i te lalolagi. Kae e fai‵tau tatou penei e uiga ki te toetuga o Iesu: “Iesu Keliso . . . ko nofo nei a ia i te feitu fakaatamai o te Atua, me ne fanatu a ia ki te lagi.” (1 Petelu 3:21, 22) E mata, ko Iesu fua te tino e toe fakatu aka ki te lagi? Ko oti ne fai atu mua a Iesu ki ana apositolo: “Kafai foki e fano au o fakatoka se koga mō koutou, ka toe foki mai au o puke koutou, ko te mea ke ‵nofo foki koutou i te koga telā e nofo au i ei.”—Ioane 14:3.

Ne fanatu a Keliso ki te lagi ke fakatoka mō te oko atu o ana nisi soko. Ne fakaasi fakamuli mai me e toko 144,000 a tino kolā ka faka‵tu aka ki te lagi.  (Fakaasiga 14:1, 3) Kae ne a mea ka fai ne soko ‵pili o Iesu i konā?

Ka fakalavelave malosi eiloa latou! E fai mai te Tusi Tapu: “E fiafia kae e tapu so se tino telā e aofia i te toe‵tuga muamua; me e seai se pulega a te mate fakalua ki luga i a latou, kae ka fai latou mo fai a faitaulaga a te Atua mo Keliso, kae ka pule latou pelā me ne tupu fakatasi mo ia i te 1,000 tausaga.” (Fakaasiga 20:6) A tino kolā ne faka‵tu aka ki te lagi ka pule e pelā me ne tupu mo faitaulaga mo Keliso ki te lalolagi.

TE TALI I TE TUSI TAPU: E fakamau i te Tusi Tapu a pati konei a te apositolo ko Paulo: “Kae e isi soku fakamoemoega mai te Atua, ko te fakamoemoega foki telā e tali‵tonu ki ei a tāgata konei, me ka toe‵tu mai a tino amio‵tonu mo tino amio sē ‵tonu.”—Galuega 24:15.

Ko oi ka aofia i te potukau telā ne fakasino ki ei a Paulo e pelā me e “amio‵tonu”? Mafaufau ki se fakaakoakoga. Ne fai atu penei ki te tagata fakamaoni ko Tanielu i te taimi ko pili ei o mate a ia: “Ka mate koe, kae ka toe tu mai koe o puke te taui ‵lei o koe i te taimi o te gataga.” (Tanielu 12:13) Ka toe ala aka ki fea a Tanielu mai te moe i te mate? “A tino amio‵tonu ka fai mo latou te fenua, kae ka ‵nofo faeloa i ei ki te se gata mai.” (Salamo 37:29) Kae ne ‵valo mai a Iesu: “E fia‵fia a latou kolā e agamalu, me ka fai mō latou te lalolagi.” (Mataio 5:5) Ka faka‵tu mai eiloa a Tanielu mo nisi tāgata mo fāfine fakamaoni ke toe ola i te lalolagi ki te se-gata-mai.

Ko oi ka aofia i te potukau telā ne taku ne Paulo ki tino “amio sē ‵tonu”? E aofia i ei a te fia piliona o tino kolā ne ola kae ko oti ne ‵mate, kae ne seki maua ne te tokoukega o latou a te avanoaga ke malamalama kae fakagalue aka a te munatonu i te Tusi Tapu. Mai tua o te lotou toe‵tuga, ka mafai ei o iloa kae fakatāua ne latou a Ieova * mo Iesu. (Ioane 17:3) Ka maua eiloa ne latou kolā e filifili ke tavini atu ki te Atua a te fakamoemoega ke ola e ‵tusa mo te leva e ola ei a Ieova—ki te se-gata-mai.

TE TALI I TE TUSI TAPU: A te Atua “ka ‵solo keatea ne ia a loimata katoa mai i olotou mata, kae ka se toe ai se mate, kae ka se toe ai foki se fanoanoa, se tagi io me se ‵mae.” (Fakaasiga 21:4) “A tino ka faite olotou fale ko nofo ei i ei . . . ka ‵toki olotou togāvine kae inu fiafia i te uaina mai i olotou togāvine konā.”—Isaia 65:21.

Mafaufau ki te ola mai lalo i vaegā tulaga penā fakatasi mo ou tino pele kolā ka toe‵tu mai! Kae koi isi eiloa se fesili, Kaia e mafai ei o talitonu koe me ka isi eiloa se toetuga?