I taimi mua, ne moe‵miti faeloa a tino ki te gali o te tumau i se tulaga talavou kae ola ‵lei ki te se-gata-mai. Kae se mea fakafanoanoa, me i te ‵tonuga loa: A tatou e ‵mate. Ne tusi eiloa a pati a Iopu konei mai luga i tausaga e tolu afe tupu ko ‵teka, kae koi lavea atu eiloa ne tatou a te ‵tonu o pati konā i aso nei.

E malosi ‵ki te manakoga ke ola ki te se-gata-mai kae e maua foki ne tino katoa. E fai mai te Tusi Tapu me ne faite tatou ne te Atua mo te manakoga ke ola ki te se-gata-mai, kae fia iloa foki a mea ‵tupu i aso mai mua. (Failauga 3:11) Kafai e penā loa, e mata e ‵lei ki a koe me ne tuku mai ne te Atua alofa se manakoga ki loto i a tatou, telā e se mafai o fakataunu? Kafai tau tali ko te ikai, e sao eiloa koe. E taku ne te Muna a te Atua a te mate ki se fili telā “e ‵tau o fakatakavale.”—1 Kolinito 15:26.

E mautinoa eiloa me i te mate se fili. E seai eiloa se tino e ‵lei tena mafaufau e manako ki ei. Kafai ko tai oko mai se mea fakamataku, e faka‵seke, e muni, io me ‵tele kea‵tea tatou. Kafai ko ma‵saki tatou e ‵sala atu eiloa tatou ki se faka‵leiga. E fai ne tatou a ‵toe mea e mafai ke kalo kea‵tea mai i mea kolā e mafai o ‵mate tatou i ei.

E mata, e isi se pogai ke tali‵tonu me e mafai o fakaseai atu te fili leva tenei? Ao, e isi. Ne seki faite ne Ieova te Atua, te Mafuaga, a tino ke ola fua i nai tausaga ka oti ko ‵mate atu ei. A te mate o te tino ne seki aofia i tena fuafuaga muamua. Ne manako a ia ke ola a tino ki te se-gata-mai i te lalolagi nei, kae fakataunu eiloa ne Ia a tena fuafuaga.—Isaia 55:11.

E mafai la pefea o fakaseai atu a te mate? I tala fakasolopito, ne taumafai malosi a tāgata o fakagata aka te fakalavelave tenei ki te mate, kae ne seki mafai eiloa ne latou. I aso nei, koi tumau eiloa te sukesukega tenā. Ne faite ne saienitisi a vai ‵suki mo fuaga kolā ne mafai o faka‵lei ki ei a nisi masaki. Ne sukesuke ‵loto eiloa latou ki te faitega mo gasuesuega o mea i foitino o mea ola. I koga e uke, e fakatautau aka pelā me e ola leva atu a tino i aso nei, i lō te sefulu tausaga ko ‵teka. Kae koi faigata eiloa ke fakagata aka te mate. E pelā mo pati i te Tusi Tapu, e “toe ‵foki tasi eiloa te tino mo te manu ki te koga e tasi - te pefu.”—Failauga 3:20.

A te tala fakafiafia me e se ‵tau mo tatou o fakalagolago ki poto o tāgata ke faka‵lei aka i ei a te fakalavelave leva tenei. Ko oti eiloa ne fakatoka ne Ieova te Atua ke faka‵sao tatou mai i te mate, kae ko te auala ke fakataunu ei te fakatokaga tenā, ko Iesu Keliso.