E pelā mo te kēsi poisini tenā, e faigata ‵ki foki ke lavea atu a Satani, kae ko se faka‵tau eiloa i te fakamataku o tou tagata. Kae e se tuku tiaki tatou ne te Atua e aunoa mo se fesoasoani. E se ‵tau o mataku koe ki a Satani māfai e fakaaoga faka‵lei ne koe a meaalofa mai i te Atua kolā e fakaasi atu mai lalo nei.

Te malosi o filifiliga. E fai mai te Iakopo 4:7: “‵Teke atu te Tiapolo, kae ka tele a ia keatea mai i a koutou.” Faitalia eiloa te malosi o Satani, e se mafai ne ia o faimalō atu ke fai a mea kolā e se manako koe ki ei. E ‵tau eiloa o fai ne koe a te filifiliga. E fai mai te 1 Petelu 5:9 penei: “Ke tumau koutou i te ‵teke atu ki a ia [te Tiapolo], kae ke ‵mautakitaki te otou fakatuanaki.” Masaua, me ne tiaki fakavave ne Satani a Iesu i te taimi ne ita fitifiti ei a ia ma talia a fakaosoosoga. (Mataio 4:11) E mafai foki o filifili aka ne koe ke ‵teke atu ki taumafaiga a Satani.

Te va fakataugasoa mo te Atua. E fakamalosi mai ki a tatou a te Iakopo 4:8 ke “fakapili‵pili atu ki te Atua.” E ‵kami atu eiloa tatou ne Ieova ke ati aka se va fakataugasoa pili mo Ia. E mafai pefea o fai ne koe te mea tenā? A te ‵toe auala ‵lei ke fai penā ko te tauloto ki mea e uke atu e uiga ki a Ia mai te Tusi Tapu. ( Ioane 17:3) E fai ne mea kolā e tauloto ne koe e uiga ki a Ieova ke alofa malosi koe ki a Ia, kae ka fakamalosi aka koe ne te alofa tenā ke fai tena loto. (1 Ioane 5:3) Ka saga atu pefea tou tamana i te lagi i te taimi e fakapilipili atu koe ki a Ia? Ne toe fai mai a Iakopo me “ka fakapilipili mai a ia [Atua] ki a koutou.”

Te folafolaga e uiga ki te puipuiga. E fai‵tau tatou penei ki te Faataoto 18:10: “A te Aliki [igoa o Ieova] e pelā me se taoa malosi, te koga tenā e olo ki ei a tino amio‵tonu ke ‵sao latou.” E se fakauiga i ei, me i te igoa o te Atua e tuku fakafuasei mai ei a fakamanuiaga fakaofoofogia. I lō te fai penā, e fakauiga loa me i tino kolā e fakatāua ne latou a te igoa o te Atua, e mafai o ka‵laga atu ki a ia mō se fesoasoani i so se taimi.

Se fakaakoakoga ‵lei. E fakamatala mai i te Galuega 19:19, se tala tāua e uiga ki Kelisiano kolā ne fatoa ‵fuli i Efeso: “E tokouke a tino faivailakau ne ‵luku fakatasi olotou tusi kae ‵sunu ne latou i mua o tino katoa. Ne  galue aka ne latou te ‵togi o mea katoa konā kae maua aka me e ‵tusa mo te 50,000 tupe siliva.” * Ne fakaseai ne Kelisiano konā so se mea telā e aofia i faifaiga faivailakau, faitalia eiloa te togi ‵mafa. E aoga malosi eiloa te fakaakoakoga tenā ki a tatou i aso nei. Ko ‵fonu eiloa te lalolagi tenei i mea fakataulaitu mo faifaiga faivailakau. Ke oko foki loa ki mea fakataulaitu mo faifaiga kolā e foliga ‵lei mai, e mafai o ‵kami mai ei ne tatou a te kau temoni. Se mea tāua ‵ki ke ‵kalo kea‵tea mai vaegā mea penā faitalia te ‵togi ‵mafa.—Teutelonome 18:10-12.

A Rogelio telā ne taku atu i te kamataga o mataupu fakasolo konei, ne seki talitonu me isi loa se Tiapolo i te 50 tausaga muamua o tena olaga. Kae ne ‵toe mafaufau a ia ki tena kilokiloga. Kaia? “Ne fatoa maua ne au se Tusi Tapu mō te taimi muamua eiloa i toku olaga,” ko pati a Rogelio. “A te malamalama i te Tusi Tapu ne fakatalitonu mai ki a au me i te Tiapolo se tino tonu. A te iloaga tenā ko puipui ei au mai te tosina atu ki ana fakamalosiga ma‵sei.”

E mata, e fia lavea ne koe a te aso telā ka fakaseai atu ei a Satani? E mafai eiloa. E ‵valo mai i te Tusi Tapu me e isi se taimi mai mua, ka ‵pei atu ei a te Tiapolo, telā e takitaki ‵se ne ia a te tokoukega o tino, “ki loto i te lase ‵ka ulaula mo te pauta ‵ka.” (Fakaasiga 20:10) E tonu, e se mafai ne se afi mo te pauta ‵ka o fakapakia se agaga sē lavea. Tela la, e fakauiga eiloa te lase ‵ka ulaula ki te fakaseaiga se-gata-mai. Ka galo atu eiloa Satani ki te se-gata-mai. Mā‵faga la, o taimi fakafiafia mō tino kolā e a‵lofa tonu ki te Atua!

I te taimi tenei, ke na tumau loa i te sukesuke ki mea e uiga ki a Ieova mo ana faifaiga. * Fakaataata i ‵tou mafaufau a te taimi e mafai ei o ola tatou kae fai ‵tonu atu penei, “Ko galo atu a Satani!”