E faigofie ke mafau‵fau tatou i a Satani telā e fai‵tau tatou ki ei i te Tusi Tapu se fakailoga o mea ma‵sei katoa. Kae e mata, tenā eiloa te mea e akoako mai i te Tusi Tapu? Kafai e penā loa, kaia la ne fakamatala mai i te Tusi Tapu me ne fai‵pati a Satani mo Iesu Keliso kae penā foki mo te Atua Malosi Katoatoa? Ke mafaufau ki taimi e lua ne fai ei a sau‵talaga konā.

I te taimi ne kamata ei ne Iesu tena galuega talai, ne taumafai te Tiapolo o fakaosooso a ia ki mea e tolu. A te mea muamua, ne taumafai a Satani o fakamalosi atu a Iesu ke fakaaoga ne ia tena malosi mai te Atua, i se auala kaimanako ke faka‵lei aka ei tena fiakai. Mai tua ifo i ei, ne pati toa atu te Tiapolo ki a Iesu ke fakamasei atu ki tena ola i se auala valea kae ke saga ifo ki a ia eiloa. A ko te ‵toe mea, ne ofo atu ne Satani ki a Iesu a te pulega ki malo katoa o te lalolagi māfai e tapuaki fakatasi atu fua ki a ia. Ne ita fitifiti a Iesu ma fakalogo ki osoatuga ‵poto e tolu konā, kae ne tali atu faeloa a ia mai te Tusi Tapu i taimi takitasi konā.—Mataio 4:1-11; Luka 4:1-13.

Ko oi ne faipati ki ei a Iesu? Ki se uiga masei i loto i a ia? E pelā mo te mea e fakaasi mai i te Tusi Tapu, a Iesu, “se tino telā ko oti ne tofotofogina i feitu katoa e pelā eiloa mo tatou, kae e seai sena agasala.” (Epelu 4:15) E fai mai foki te Tusi Tapu: “E seai sena agasala ne fai, io me se pati loi ne tō mai i tena gutu.” (1 Petelu 2:22) Ne tumau te ‵lei katoatoa o Iesu kae ne ‵piki ‵mau a ia ki se olaga fakamaoni. Ne seki talia lele ne ia ke tupu aka se uiga masei i loto i a ia. E manino ‵lei, me ne seki faipati a Iesu ki se uiga masei i loto i a ia; ne faipati eiloa a ia ki se tino tonu.

E tuku mai foki ne te sau‵talaga tenā a nisi fakamaoniga me i a Satani se tino tonu eiloa.

• Ke masaua me ne ofo atu ne te Tiapolo a te pulega ki malo katoa o te lalolagi ki a Iesu māfai e ifo o tapuaki fakatasi atu fua ki a ia. (Mataio 4:8, 9) Ne mafai eiloa o seai se aoga o te mea tenā, moi fai Satani e sē se tino. E se gata i ei, ne seki fakafesili ne Iesu a pati a Satani e uiga ki te pulega lasi ne maua ne ia.

• Mai tua o te ‵tekeatuga a Iesu ki fakaosoosoga konā, ne “tiaki ei ne te Tiapolo a ia ke oko ki se isi taimi ‵lei.” (Luka 4:13) E mata, e foliga mai a Satani i konei e pelā me se uiga masei io me se fili telā e tumau i te taumafai atu?

• Onoono la me ne “o‵mai a agelu o tavini ki a ia.” (Mataio 4:11) E mata, a agelu konā ne tino faka-te-agaga ‵tonu kolā ne tuku atu ne latou a fakamalosiga kae fesoasoani atu foki ki a Iesu? Ao. Kae kaia la e fai atu ei tatou me i a Satani e sē se tino faka-te-agaga kae se mea fakaa‵tea?

A te lua o taimi, e aofia i ei te tala o te tagata loto fakamaoni ko Iopu. E fakamatala mai i te tala tenā a te sau‵talaga a te Tiapolo mo te Atua i taimi e lua. I taimi e lua konā ne tavae ne te Atua a Iopu ona ko tena loto fakamaoni. Ne ‵losi atu a Satani me i a Iopu e tavini fua ki te Atua ona ko pogai kaima‵nako kae fai atu foki me ne ‵togi ne te Atua a Iopu ke loto fakamaoni ki a Ia. Ne kinau atu te Tiapolo me e iloa ‵lei atu ne ia a Iopu i lō te Atua. Ne talia ne Ieova * ke kaisoa ne Satani a koloa a Iopu, ana tama‵liki kae fakamasei atu foki ki tena malosi. Fakamuli ifo, ne lavea ‵lei atu ei te ‵tonu o te Atua i ana pati e uiga ki a Iopu kae ne fakamaoni atu ei me i a Satani se tino loi. Ne fakamanuia ne te Atua a Iopu ona ko tena loto fakamaoni.—Iopu 1:6-12; 2:1-7.

I te sau‵talaga tenā a te Atua mo Satani, e mata, ne faipati atu a Ieova ki se uiga masei i loto i a Ia? E fai mai te Tusi Tapu: “A te Atua tenei, e ‵lei katoatoa ana faiga.” (2 Samuelu 22:31) E fai mai foki te Muna a te Atua: “E tapu, e tapu, e tapu a Ieova te Atua Malosi Katoatoa.” (Fakaasiga 4:8) E fakauiga eiloa te tapu ki te ‵ma pakipaki, e ‵malu kae ‵kese ‵mao mai te agasala. A Ieova e ‵lei katoatoa kae seai sena pona. E seai lele eiloa se uiga masei i a Ia.

Kāti koi kinau mai eiloa a nisi tino me i a Iopu e sē se tino tonu, tela la, a te sau‵talaga kātoa tenā e sē se mea tonu foki. E mata, e tonu te manatu tenā? E fai mai a nisi tusi fai‵tau i te Tusi Tapu me i a Iopu se tino tonu eiloa. E pelā mo te Iakopo 5:7-11 ne fakaaoga i konā a Iopu e pelā me se fakaakoakoga ‵lei ke fakamalosi ei a Kelisiano i taimi faiga‵ta, kae se fakamasauaga fakamafanafana foki me ka taui ne Ieova a te vaegā kufaki tenā. Se a la te aoga o te fakaakoakoga tenā moi fai a Iopu e sē se tino tonu kae ko te osoatuga a Satani se tala ‵kai fua? E se gata i ei, i te Esekielu 14:14, 20 ne aofia eiloa a Iopu, Noa, mo Tanielu i te fakasologa o tino amio‵tonu e tokotolu. E pelā mo Noa mo Tanielu, a Iopu se tino tonu eiloa, se tagata telā e lasi ‵ki tena fakatuanaki. Kafai a Iopu se tino tonu, e a, e se ‵tau foki o fai tena fili, te pogai o ana fakalavelave, mo fai se tino tonu?

E manino ‵lei, me fakaasi mai i te Tusi Tapu me i a Satani se tino tonu. Kāti e mafai o mafaufau koe penei, ‘E mata, ka fakamataku eiloa a ia ki a au mo toku kāiga i aso nei?

Mafaufau la māfai ko ualo‵lo atu se potukau o tino amio takafia‵toa ki te otou fa‵kai. E mautinoa eiloa me ka seai se tokagamalie mo uiga ‵lei i te otou kogā koga tenā. Ke mafaufau la nei ki se tulaga tai ‵pau penā: A Satani mo ana temoni—ne agaga ‵tonu kolā ne ‵teke atu ki te Atua, e pelā eiloa mo Satani—ko oti nei ne ‵tuli fakavave ifo ki te lalolagi. Se a te mea ne iku mai i ei? Ia, ke mafaufau nei ki mea e lavea ne koe i tala o mea ‵tupu i tou fenua e penā foki i te lalolagi kātoa.

• E mata, e lavea ne koe te fanakaga o faifaiga va‵lea kae fakasaua faitalia a taumafaiga a te lalolagi kātoa ke fakagata a mea konā?

• E mata, e lavea ne koe te gasolo aka o fakaaoga a faifaiga faivailakau i fakafiafiaga, faitalia eiloa te manava‵se o matua e tokouke?

• E mata, e lavea ne koe te lasi o te sonā fakamaseigina o te enivalomene, faitalia a taumafaiga ‵tonu ke fai faka‵lei atu ki ei?

• E mata, e isi se mea ‵se lasi ne fai i te fenua, telā ko ala ei o maua ne tino a fakalavelave ‵tupu?

Mafaufau nei ki pati a te Tusi Tapu e uiga ki te tino masei telā e tu mai tua o fakalavelave: “Ne ‵pei ifo ei te talako lasi, ko te gata muamua telā e fakaigoa ki te Tiapolo io me ko Satani, kae telā e takitaki ‵se ne ia te lalolagi nofoaki kātoa. Ne ‵pei ifo a ia ki te lalolagi, kae ne ‵pei ifo foki ana agelu fakatasi mo ia. . . . Kae ko malaia eiloa te lalolagi mo te tai, me ko oti ne fanaifo te Tiapolo ki a koulua, kae ko oko eiloa i te kaitaua me e iloa ne ia i tena taimi ko toetoe.” (Fakaasiga 12:9, 12) Mai tua o te iloiloga o fakamaoniga konei, ne fakaiku aka ne tino e tokouke me i a Satani se tino faka-te-agaga fakamataku telā e lasi ‵ki tena fakamalosiga masei i te lalolagi kātoa.

Kāti e mafai o mafaufau koe ki te auala e mafai ei o maua ne koe se puipuiga. A te mea tenā se mea ‵tau. Ka tuku mai i te suā mataupu a nisi fesoasoani aoga.