1, 2. E fakaasi mai pefea ne te Tusi Tapu a te tāua o te alofa?

A TE alofa ko te ‵toe uiga tāua o te Atua. (1 Ioa. 4:16) A tena mea muamua ne faite ko Iesu, telā ne ola fakatasi mo ia i te lagi mō se fia piliona o tausaga kae ne tauloto ne ia a auala a‵lofa o te Atua. (Ko. 1:15) Mai tena olaga kātoa, e aofia i ei tena olaga i te lalolagi, ne fakaasi mai ne Iesu me e malamalama katoatoa a ia i te alofa o te Atua ko Ieova, kae e fakaakoako foki a ia ki te alofa tenā. Tela la, e mafai o tali‵tonu tatou me i te pulega telā e fakagalue ne Ieova mo Iesu ka takitaki faeloa ne te uiga ko te alofa.

² I te taimi ne ‵sili atu ei me se a loa te Tulafono tafasili i te tāua, ne fai atu a Iesu, penei: “‘E ‵tau mo koe o alofa ki a Ieova tou Atua mo tou loto kātoa mo tou foitino kātoa mo tou mafaufau kātoa.’ Tenei te ‵toe fakatonuga sili kae tu muamua. E penā foki te lua o fakatonuga: ‘E ‵tau mo koe o alofa ki tou tuakoi e pelā mo koe ki a koe eiloa.’”—Mata. 22:37-39.

3. Ko oi a ‵tou “tuakoi”?

³ Masaua la me ne fakatulaga lua ne Iesu a te alofa ki tuakoi ki te alofa ki a Ieova. E fakaasi mai i te mea tenei a te tāua ke fakaasi atu te alofa e auala i so se fesokotakiga e fai ne tatou. Kae ko oi la ‵tou “tuakoi”? Kafai tatou ko oti ne a‵vaga, a ‵tou tuakoi  ‵pili ko ‵tou avaga. E aofia foki i ei a ‵tou taina tapuaki ki te Atua tonu i te fakapotopotoga Kelisiano. A ko nisi tuakoi o tatou, ko tino taki tokotasi kolā e fetaui mo tatou i te galuega talai. E fakaasi atu pefea ne tino kolā e tapuaki ki a Ieova a te alofa ki tuakoi kae tau‵tali i akoakoga a tena Tama?

4. E mafai pefea o manuia se fakaipoipoga faitalia te tulaga sē ‵lei katoatoa?

⁴ Ko Ieova ne māfua mai i a ia te fakaipoipoga muamua, mai te faitega ne ia o Atamu mo Eva kae tuku fakatasi ne ia laua. Ko tena fuafuaga eiloa ko te tauavaga muamua ke ola fia‵fia kae fealofani kae ke faka‵fonu foki te lalolagi ki lā fanau. (Kene. 1:27, 28) Ona ko te ‵tekeatuga ki te pulega sili a Ieova, ne fakamakosu ei a te fakaipoipoga muamua kae togi atu ei ki tino katoa a te agasala mo te mate. (Loma 5:12) E ui i ei, e fakaasi mai ne te Tusi Tapu a te auala e mafai ei o manuia se fakaipoipoga. E aofia i ei a toe pati fakatonutonu tāua e uiga ki te mataupu tenei ona ko te mea ne māfua mai i a Ieova, te Mafuaga o te fakaipoipoga.—Faitau te 2 Timoteo 3:16, 17.

5. E pefea te tāua o te alofa i se olaga avaga?

⁵ E fakaasi mai i te Tusi Tapu me i te alofa se uiga tāua ki tino katoa me e maua i ei se fesokotakiga ‵pili kae fakafiafia. E lavea tonu atu a te mea tenei i te olaga avaga. I ana pati kolā ne fai atu ki te fakapotopotoga, ne fai atu te apositolo ko Paulo, penei: “A te alofa e kufaki kae kaimalie. E se loto masei te alofa, e se tavae ne ia a ia eiloa kae e se ‵fonu i te fakamatamata, e se fakamaualuga, e se salasala ki mea mō tena ‵lei eiloa, e se kaitaua vave. E se ita fakamoemoe. E se fiafia ki amioga ma‵sei, kae e fiafia eiloa ki te munatonu. E onosai i mea katoa, e talitonu ki mea katoa, e fakamoemoe ki mea katoa, e kufaki i mea katoa. E se mafai o gata te alofa.” (1 Koli. 13:4-8) Kafai e fakaasi kae fakagalue ne tatou a muna fakaosofia konei, ka mautinoa eiloa me ka momea aka te fiafia i se olaga avaga.

6, 7. (a) Ne a pati a te Tusi Tapu ki te fakatokaga e uiga ki ulu o kāiga? (e) E ‵tau o pefea a faifaiga a se tagata avaga Kelisiano ki tena avaga?

⁶ Ona ko te mea e aofia i te fakatokaga a te Atua a te fakatakitakiga e uiga ki ulu o kāiga, e tāua ‵ki eiloa a te alofa i te fakatokaga tenā. Ne fakamatala mai a Paulo: “Kae e manako au ke iloa ne koutou me i te ulu o tāgata katoa ko Keliso. A te ulu o te fafine ko te tagata. A ko te ulu o Keliso ko  te Atua.” (1 Koli. 11:3) Kae e se ‵tau o fai te takitakiga a se ulu o te kāiga i se auala fia pule. E pelā me se fakaakoakoga, ne fakagalue ne Ieova tena pulega ki luga i a Keliso i se auala atafai kae kaimalie, kae ne fakalogo eiloa a Iesu ki ei. Ne loto fakafetai a ia ki te pulega alofa a te Atua, me ne fai mai a ia penei: “Au e alofa ki te Tamana.” (Ioa. 14:31) Moi ne fai e saua kae sē ‵lei a faifaiga a Ieova ki tena Tama fagasele, penei e se mafai o fakaasi atu ne Iesu a lagonaga a‵lofa.

⁷ E tiga eiloa a te tagata ko te ulu o tena avaga, e fakatonu mai te Tusi Tapu ke ‘āva latou ki olotou avaga.’ (1 Pe. 3:7) A te auala e tasi e āva ei a tāgata ki olotou avaga ko te ‵saga atu faka‵lei kae fakamuamua olotou manakoga i nisi mea. E tonu, e fai mai te Muna a te Atua, penei: “Tāgata, ke tumau koutou i te a‵lofa ki otou avaga, e pelā eiloa mo te alofa o Keliso ki te fakapotopotoga kae tuku atu tena ola mō te fakapotopotoga.” (Efe. 5:25) Ao, ne tuku atu foki ne Iesu tena ola mō ana soko. Kafai e fakaakoako atu te tagata avaga ki te auala ne fakagalue ne Iesu a tena pulega mo te alofa, ka faigofie ei ke fakaasi atu ne tena avaga a te alofa, te āva mo te fakalogo.—Faitau te Tito 2:3-5.

8. E ‵tau o pefea te kilokiloga a tino tapuaki taki tokotasi a Ieova ki olotou taina Kelisiano?

⁸ I te lalolagi kātoa, e lau i miliona o tino e tapuaki atu ki a Ieova kae folafola atu ne latou tena igoa mo ana fuafuaga. E ‵tau o pefea te kilokiloga a tino tapuaki taki tokotasi a Ieova ki olotou taina Kelisiano? E tali mai a te Muna a te Atua, penei: “Ke na ga‵lue tatou o fai a mea ‵lei mō tino katoa, kae maise eiloa ki a latou kolā e kāiga tatou i te tapuakiga tonu.” (Kala. 6:10; faitau te Loma 12:10.) Ne tusi mai te apositolo ko Petelu: “Ona ko te mea ko oti ne faka‵magina koutou e auala i te otou faka‵logo ki te munatonu mo te tinā alofa fakataina telā ne iku mai i ei, ke fakatau a‵lofa malosi la koutou i a koutou eiloa i otou loto.” Ne fai atu foki a Petelu ki taina tali‵tonu, penei: “E sili atu i mea katoa, ke fakatau a‵lofa koutou.”—1 Pe. 1:22; 4:8.

9, 10. Kaia e ‵kau fakatasi i ei a tino o te Atua?

⁹ E tu ‵kese eiloa te fakapotopotoga a Ieova i te lalolagi kātoa ona ko te alofa i vā o ‵tou taina tapuaki. E se gata i ei, ona ko te mea e a‵lofa tatou ki a Ieova kae faka‵logo ki ana tulafono, e tuku mai eiloa ne ia te fesoasoani e auala i te ‵toe malosi sili i te iunivesi tenei, ko te agaga tapu, io me ko tena malosi galue. E fesoasoani mai eiloa te malosi tenei ke maua ne tatou se kautaina fia‵fia telā e ‵kau fakatasi i te lalolagi kātoa.—Faitau te 1 Ioane 4:20, 21.

¹⁰ Ke faka‵mafa atu a te tāua o te alofa i vā o Kelisiano, ne tusi mai a Paulo: “Ke fakapei ki luga i a koutou a te alofa atafai, te alofa kaimalie, te loto maulalo, te agamalu mo te kufaki. Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā. Kae i tafa o mea katoa konei, ke fakapei ki luga i a koutou a te alofa, me tenā eiloa te fusi ‵lei katoatoa telā e fai ei ke ‵kau fakatasi a tino.” (Ko. 3:12-14) E loto fakafetai eiloa tatou me e “‵kau fakatasi” tatou i te alofa faitalia te kese‵kese o telega mo fenua ne ‵mai ei tatou!

11. Se a te iloga o te fakapotopotoga saukātoa a Ieova?

¹¹ E lavea atu a te alofa tonu mo te ‵kau fakatasi i tavini a Ieova kolā e fai ne latou te tapuakiga tonu, me e fai mai a Iesu: “Ona ko te mea tenei ka iloa ei ne tino katoa i a koutou ko oku soko, manafai e fakatau a‵lofa koutou.” (Ioa. 13:34, 35) Kae ne tusi mai te apositolo ko Ioane, penei: “E mateagofie a fanau a te Atua mo fanau a te  Tiapolo ona ko te mea tenei: So se tino e se fai ne ia a faifaiga o te amiotonu e se māfua mai i te Atua, e penā foki te tino telā e se alofa ki tena taina. Me tenei eiloa te fekau telā ko oti ne lagona ne koutou mai te kamataga, me e ‵tau o fakatau a‵lofa tatou te suā tino ki te suā tino.” (1 Ioa. 3:10, 11) A te alofa mo te ‵kau fakatasi ko te iloga o Molimau a Ieova e pelā me ne soko ‵tonu o Keliso, kolā e fakaaoga ne te Atua ke folafola atu ne latou te tala ‵lei o te Malo ki te lalolagi nofoaki kātoa—Mata. 24:14.

12, 13. Ne a mea ko fai ne te “vaitino tokouke” i aso nei, kae ne a mea ko pili o lavea atu ne latou?

¹² A te tokoukega o tavini a Ieova e aofia i te “vaitino tokouke . . . mai i atufenua katoa, matakāiga katoa, tino katoa, penā foki loa mo ‵gana katoa. Ne ‵tu atu latou i mua o te nofogaaliki [o te Atua], kae i mua foki o te Tamā Mamoe [Iesu Keliso].” Ko oi la a latou konei? “Konei eiloa a tino ne ‵sao i te fakalavelave lasi, kae ne ‵ta ne latou olotou gatu ke ‵kena i te toto o te Tamā Mamoe,” me ne fakatuanaki latou ki te taulaga togiola a Iesu. A latou kolā e aofia i te “vaitino tokouke” e a‵lofa ki a Ieova mo tena Tama kae “e tavini atu eiloa latou ki a ia [te Atua] i te ao mo te po.”—Faka. 7:9, 14, 15.

¹³ Ko pili o fakaseai atu ne te Atua a te lalolagi masei tenei i te “fakalavelave lasi.” (Mata. 24:21; faitau te Ielemia 25:32, 33.) Kae ona ko tena alofa ki ana tavini, ka puipui ne Ieova latou e pelā me se potukau kae takitaki atu latou ki loto i te lalolagi fou. E pelā mo te mea ne ‵valo mai i se 2,000 tausaga ko ‵teka, “ka ‵solo kea‵tea ne ia [te Atua] a loimata katoa mai i olotou mata, kae ka se toe ai se mate, kae ka se toe ai foki se fanoanoa, se ‵tagi io me se ‵mae.” E mata, e olioli koe ke ola i te Palataiso māfai ko “palele atu a mea mua”?—Faka. 21:4.

14. Ko pefea nei te aofaki o te vaitino tokouke?

¹⁴ I te kamataga o aso fakaoti i te 1914, e lau fua i afe o tavini a Ieova i te lalolagi kātoa. Ona ko te alofa ki tuakoi, mo te fesoasoani o te agaga o te Atua, ne tumau eiloa se aofaki foliki o te ‵toega o Kelisiano fakaekegina i te faiga o te galuega talai o te Malo mo te loto kufaki. Tela la, i aso nei, ne mafai eiloa o fakamaopoopo mai se vaitino tokouke o tino kolā e fakamoe‵moe ke ola i te lalolagi nei. Ko nofo nei ki se 8,000,000 o Molimau kolā e aofia i fakapotopotoga e silia atu mo te 115,400 i te lalolagi kātoa, kae koi fanaka eiloa ki luga te aofaki o tatou. E pelā me se fakaakoakoga, e silia atu mo te 275,500 o Molimau ‵fou ne papatiso i te tausaga faka-te-taviniga i te 2014—e nofo ki se 5,300 e papatiso i vaiaso takitasi.

15. Fakamatala mai te salalau atu o te faiga o te galuega talai o te Malo.

¹⁵ Ko oko eiloa i te fakaofoofogia o te salalau atu o te galuega talai. Ko oti nei ne ‵lomi a ‵tou tusi faka-te-Tusi Tapu ki ‵gana e silia atu mo te 700. A Te Faleleoleo Maluga ko te ‵toe mekesini lauiloa telā ko oti ne tufatufa atu i te lalolagi kātoa. Ko silia nei mo te 52,000,000 o ‵kopi ko oti ne ‵lomi ki ‵gana e 247 i masina takitasi. E nofo foki ki te 200,000,000 ‵kopi o te tusi ko te Ne a Mea e Akoako ‵Tonu Mai i te Tusi Tapu? kolā e fai ki ei a akoga faka-te-Tusi Tapu, ko oti ne ‵lomi aka ki ‵gana e silia atu mo te 250.

16. Kaia e tumau eiloa te gasolo ki mua o te maumea faka-te-agaga o te vaega o te fakapotopotoga saukātoa a Ieova i te lalolagi nei?

¹⁶ A te gasoloakaga fakaofoofogia tenei e lavea ne tatou i aso nei, ko te ikuga o te ‵tou fakatuanaki ki te Atua mo te talia katoatoa ne tatou a te Tusi Tapu e pelā me ko te Muna fakaosofia a Ieova. (1 Tesa. 2:13) Kae ko lavea atu foki ne tatou a fakamanuiaga faka-te-agaga e maua ne tino o Ieova faitalia te takalialia mo te ‵teke mai o Satani, “te atua o te olaga masani tenei.”—2 Koli. 4:4.

17, 18. Se a te kilokiloga e ‵tau o maua ne tavini a te Atua ki tino sē tali‵tonu?

¹⁷ Se a te kilokiloga e ‵tau o maua ne tavini a Ieova ki tino kolā e se tapuaki ki te Atua tonu e tokotasi? I te galuega talai, e fetaui eiloa tatou mo tino kese‵kese—nisi tino e fia‵fia, kae ko nisi e se fia faka‵logo mai. Kae faitalia te auala e ‵saga mai ei latou, e fakaasi mai i te Muna a te Atua a te kilokiloga telā e ‵tau o fakatumau ne ana tavini. E fai mai penei: “Ke fai faeloa otou pati ke ‵tagi ‵lei, ke faka‵kona ki te masima ko te mea ke mafai o tuku atu ne koutou se tali ‵lei ki tino taki tokotasi.” (Ko. 4:6) Kafai e ‵pulu ne tatou a ‵tou talitonuga mai fakamaseiga a tino, e ‵tau eiloa o fakaasi atu ne tatou “i te agaga o te filemu mo te āva lasi” ona ko te a‵lofa o tatou ki ‵tou tuakoi.—1 Pe. 3:15.

¹⁸ E fakaasi atu ne tatou a te alofa ki tuakoi faitalia me e se talia ne te tino kaitaua i te fale a te ‵tou fekau. E fakaakoako eiloa tatou ki a Iesu: “I taimi ne puapuaga ei a ia, ne seki kaitaua a ia, kae ne tuku atu faeloa ne ia a ia ki te tausiga a te tino [Ieova] telā e fai ne ia a fakamasinoga ‵tonu.” (1 Pe. 2:23) Tela la, faitalia me e ‵nofo fakatasi tatou mo ‵tou taina tali‵tonu io me ko nisi tino, e fakaasi atu ne tatou te loto maulalo kae fakagalue a te fakatakitakiga tenei: “Ke se taui atu te masei ki te masei io me ko pati fakama‵sei ki pati fakama‵sei. I lō te fai penā, tuku atu se fakamanuiaga.”—1 Pe. 3:8, 9.

19. Se a te fakatonuga ne tuku mai ne Iesu e uiga ki ‵tou fili?

¹⁹ Mai te fakatumauga o se kilokiloga loto maulalo, e faka‵logo eiloa a tino o Ieova ki te fakatonuga tāua telā ne tuku mai ne Iesu. I tena Lāuga i luga i te Mauga, ne fai atu a Iesu, penei: “Ne lagona ne koutou a pati konei: ‘E ‵tau mo koe o alofa ki tou tuakoi kae takalialia ki tou fili.’ Kae e fai atu au ki a koutou: Ke tumau koutou i te a‵lofa ki otou fili kae ‵talo mō latou kolā e fakasaua atu ki a koutou, ko te mea ke fai koutou mo tama a te otou Tamana telā i te lagi, me e fakamaina ne ia a te la ki luga i tino ma‵sei mo tino ‵lei kae e faka‵to ne ia te vaiua ki luga i tino amio‵tonu mo tino sē amio‵tonu.” (Mata. 5:43-45) Ao, e pelā me ne tavini a te Atua, e ‵tau mo tatou o ‘a‵lofa ki ‵tou fili,’ faitalia me pefea olotou kilokiloga ki a tatou.

20. Kaia ka ‵fonu ei te lalolagi fou i te alofa ki te Atua mo tuakoi? (Ke onoono ki te ata i te kamataga.)

²⁰ I feitu katoa o te olaga, e ‵tau mo tino o Ieova o fakaasi atu te lotou a‵lofa ki a Ieova mo olotou tuakoi e auala i olotou kilokiloga mo faifaiga. E pelā me se fakaakoakoga, kafai e se fia ‵saga mai a nisi tino ki te fekau o te Malo, e fakaasi atu eiloa ne tatou te alofa ki tuakoi māfai e ma‵nako latou ki se fesoasoani. Ne tusi mai penei a te apositolo ko Paulo: “Ke mo a ma ‵nofo kaitalafu koutou i se mea e tasi mai so se tino, kae ke fakatau a‵lofa koutou; me ko ia telā e alofa ki nisi tino ko fakataunu ne ia te tulafono. Me e fai mai penei te tulafono, “Sa mulilua, Sa tatino, Sa kaisoa, Sa kaimanako,” mo nisi tulafono aka katoa, e aofia katoa i pati konei, “E ‵tau mo koe o alofa ki tou tuakoi e pelā mo koe ki a koe eiloa.” E se fai ne te alofa a mea ma‵sei ki te tuakoi o se tino. Tela la, a te alofa ko te fakataunuga o te tulafono.” (Loma 13:8-10) E pelā me ne Molimau a Ieova, e fakaasi atu ne tatou a te alofa tonu i te lalolagi sē ‵kau fakatasi, amio fakasaua, kae masei telā e nofo mai lalo i te pulega a Satani. (1 Ioa. 5:19) E mautinoa eiloa me ka faka‵fonu te lalolagi fou mo mea katoa i ei ki te uiga ko te alofa māfai ko oti ne fakaseai atu a Satani, ana temoni, mo tino ‵teke katoa. Se fakamanuiaga eiloa ke maua ne tino katoa kolā e ‵nofo i te lalolagi fou a te alofa ki te Atua mo olotou tuakoi!