A PESALELI mo Oliapo e se ne tino ‵fou ki galuega fakatu‵tu. Ona ko te uke o puliki ne faite ne laua i te taimi ne ‵nofo pologa ei i Aikupito, ko sē mafai o masaua ne laua te aofaki o puliki ne faite i konā. Ko ‵teka atu a tausaga konā. Nei la, ko fai pelā me ne tino apo i te faite mea i te taimi ne ‵tofi aka ei laua ke takitaki te galuega ki te faitega o te faleie. (Eso. 31:1-11) Kae ne nāi tino fua ne lavea ne latou a galuega fakaofofogia a laua. E mata, ne fakafanoanoa a te sē ‵saga atu o tino ki lā galuega? E mata, ne tāua ki a laua a te lavea ne tino a lā galuega? E mata, e tāua foki ki a koe ke lavea ne tino au galuega?

A nisi meafale i loto i te faleie ne tinā mea ‵gali eiloa kolā ne faite. E pelā me se fakaakoakoga, i luga i te ‵pono o te pusa o te feagaiga e ‵tu i ei a kelupi aulo. Ne fakamatala mai ne te apositolo ko Paulo me “‵malu” a kelupi konei. (Epe. 9:5) Mafaufau lā ki te ‵gali o kelupi konā ne faite ki aulo tuki!—Eso. 37:7-9.

Moi fai ne maua a mea konā ne faite ne Pesaleli mo Oliapo i aso nei, ne mafai loa o tuku i loto i fale e tausi ei a mea mua, kae mafai o fakatāua ne tino i te koga tenā. Kae i te faitega, e mata, e tokofia ne lavea tonu ne latou a te ‵gali o mea konā? A kelupi e tuku i te Potu Tapu; tela la ko te faitaulaga sili fua e lavea ne ia mafai e ulu ki loto fakatasi i te tausaga i te Aso o te Faka‵maga. (Epe. 9:6, 7) Tela la, ne nāi tino fua ne lavea ne latou.

Moi fai koe ko Pesaleli io me ko Oliapo telā ne galue malosi i te faitega o mea ‵gali konā, ne a ou lagonaga mafai ne nāi tino fua ne lavea ne latou? I aso nei, e fakamata‵mata a tino māfai e maua ne latou a tavaega mai i olotou taugasoa. E fai pelā me se mea faigaluega telā e fua ne ia te tāua o olotou galuega ne fai. Kae kese a tavini a Ieova. E pelā loa mo Pesaleli mo Oliapo, e maua ne tatou te lotomalie i te faiga o te loto o Ieova kae ke maua foki ei tena taliaga.

I aso o Iesu, se mea masani mō takitaki lotu ke fai a ‵talo kolā e tavae ei latou ne tino. Kae ‵kese te mea ne fai mai ne Iesu ke fai: Ke ‵talo atu mo ‵tou  loto kātoa e aunoa mo te manakoga ke tavae mai tatou ne nisi tino. Se a te ikuga? E tuku mai ne “tou Tamana telā e onoono mai i te koga sē lavea a tou taui.” (Mata. 6:5, 6) E manino ‵lei i konei, me i te mea tāua ko te mafaufau o Ieova kae sē ko mafaufauga o tino e uiga ki ‵tou ‵talo. Ko tena kilokiloga e fai ei ke aoga tonu ‵tou ‵talo. E penā foki loa ki so se mea telā e fai ne tatou i ‵tou taviniga ‵malu. E se tāua te kilokiloga mo tavaega mai tino, kae ko te fakafiafia atu ki a Ieova, “telā e onoono mai i te koga sē lavea.”

I te taimi ne oti ei te faleie, ne “ufi ne te kaumana a te Faleie kae ko ‵fonu i te mainaga o te Aliki.” (Eso. 40:34) Se fakaasiga eiloa tenā o te taliaga a Ieova! Se a tau faka‵tau me ne a mafaufauga o Pesaleli mo Oliapo i te taimi tenā? E ui eiloa e seai ne lā igoa e tā i luga i mea kolā ne faite ne laua, ne ‵tau eiloa o lotoma‵lie ona ko te iloa atu me ne fakamanuia ne Ieova a galuega ‵gali a laua. (Faata. 10:22) I tausaga mai tua ifo, ne mautinoa eiloa me ne fia‵fia lā loto ke ‵kilo atu ki mea kolā ne faite ne laua koi tumau loa i te fakaaoga i te taupuakiga ki a Ieova. Kafai ko ‵toe faka‵tu mai i te lalolagi fou, e mautinoa eiloa me ka fia‵fia laua ke iloa atu me ne fakaaoga loa te faleie ki te tapuakiga tonu i se 500 tausaga fakamuli ifo!

I loto i te fakapotopotoga a Ieova i aso nei, a tino faite ata tama‵liki, tino tusi tala kae faite ata, tino fai pese, tino pei ata, tino ‵fuli, mo tino tusi tala ne ga‵lue kae seki ma‵nako ke iloa olotou igoa. E foliga mai me seai se tino e “onoono” ki a latou. E penā foki loa te galuega tenei e fai i fakapotopotoga kolā e silia atu mo te 110,000 i te lalolagi kātoa. Ko oi e onoono ki te tavini telā e tausi ki tupe mafai ko faka‵fonu ne ia a pepa kolā e manakogina i te fakaotiga o te masina? Ko oi e kilokilo ki te failautusi telā e fakatoka ne ia a lipoti o te galuega talai? Ko oi e lavea ne ia te taina io me se tuagane e fai ne ia se galuega telā ne manakogina ke faka‵lei aka ei te Fale Tapuaki?

I te fakaotiga o lā olaga, e seai ne ipu, pine io me ne mā ne maua ne Pesaleli mo Oliapo ke fakaasi atu ei te ‵gali o lā galuega. Kae ne maua eiloa ne laua se mea telā e tāua atu—Ko te taliaga a Ieova. E mautinoa eiloa i a tatou me ne lavea ‵lei ne Ieova a galuega a laua. Ke na fakaakoako tatou ki te fakaakoakoga gali o te loto maulalo mo te loto finafinau o laua.