I A SETEMA po 6 i te 1926, ne foki atu se ovasia faimalaga Tiapani telā ne nofo i Amelika ki tena fenua tonu ke fai pelā me se misionale. Ne fakatalitali ki a ia se tagata telā ne maua sāle ne ia feagaiga o Te Faleleoleo Maluga telā ne fakatu ne ia se potukau e suke‵suke ki te Tusi Tapu i Kobe. Ne fai te fono muamua a Tino A‵koga ki te Tusi Tapu konei i a Ianuali po 2, 1927, i te fa‵kai lasi tenā. E nofo ki te 36 tino ne ‵kau atu kae toko 8 ne papatiso. A te mea tenei se kamataga fakafiafia. Kae ne mafai la pefea o fakaoko atu ne te potukau foliki tenei a te munatonu mai te Tusi Tapu ki te 60 miliona o tino Tiapani?

I a Me i te 1927, ne fakatoka ne Tino A‵koga ki te Tusi Tapu loto ‵toa te galuega talai ke fakasalalau ei a lāuga faka-te-Tusi Tapu. I te taimi ne fai ei te lāuga muamua i Osaka, ne fakatoka ne taina a fakailoga e faka‵tu i feitu auala i te fa‵kai kātoa kae tufatufa atu a pepa ‵kami e 3,000 ki tino ma‵luga. Ne tufatufa atu ne latou a ‵kamiga e ‵tusa mo 150,000 kae faka‵pa ne latou te lāuga i te nusipepa lauiloa i Osaka e penā foki i luga i tiketi e 400,000 i tuleni. I te aso ne fai ei te lāuga, ne ‵lele atu a vakalele e lua i luga, kae peipei atu a pepa ‵kami e 100,000 ki lalo i te fa‵kai kātoa. E nofo ki se 2,300 a tino ne faka‵fonu ne latou te Asahi Hall i Osaka, ke fakalogologo ki te lāuga telā e fakaulutala penei: “Ko Pili Mai te Malo o te Atua.” Kāti ne fakailoa atu ki se toko afe tino me ko se mafai latou o ‵kau ona ko te seai ne koga avanoa mō latou. Mai tua o te lāuga, e silia atu mo te toko 600 tino ne ‵nofo ke tali aka olotou fesili. I masina mai tua ifo, ne fai a lāuga faka-te-Tusi Tapu i Kyoto mo nisi fa‵kai ‵lasi i te feitu ki te togalā o Tiapani.

I a Oketopa i te 1927, ne fakatoka ne Tino A‵koga ki te Tusi Tapu a lāuga i Tokyo. Ne ‵kami a tino ma‵luga—e aofia ei te ulu o te malo, sui o te palamene, mo takitaki o lotu mo kautau. Ne fakaaoga ne latou a faka‵pulaga i luga i laupapa, i nusipepa, mo pepa ‵kami e 710,000, kae e nofo ki te 4,800 tino ne ‵kau atu o fakalogo‵logo ki lāuga e tolu i te laumua o Tiapani.

Ne fai ne paenia se tiute tāua ke fakaoko atu te fekau o te Malo ki tino katoa. Ne galue ne Matsue Ishii mo tena avaga ko Jizo, kolā ne aofia i paenia muamua i Tiapani se tolu kuata o te fenua, mai te feitu ki mātū o Sapporo o fano ki Sendai, Tokyo, Yokohama, Nagoya, Osaka, Kyoto, Okayama, mo Tokushima. Ne pei ne te tuagane ko Matsue mo te suā tuagane matua ko Sakiko Tanaka, a gatu o te kau Tiapani (kimono) ke mafai ei o āsi atu ki tino ma‵luga o te malo. Ne fakamolemole atu se tokotasi o latou ke maua ne ‵kopi e taki 300 o tusi konei, The Harp of God mo te Deliverance ke avatu ki faletusi i falepuipui.

Ne talia ne Katsuo mo Hagino Miura a tusi mai te tuagane ko Matsue kae ne kamata o lavea ne lāua te munatonu. Ne papatiso lāua i te 1931 kae fai pelā me ne paenia. Ne talia foki ne Haruichi mo Tane Yamada  mo te tokoukega o lā kāiga te fekau o te Malo mai mua o te 1930. Ne aofia lāua i te galuega faka-paenia, kae ne fanatu te lā tamaliki fafine ko Yukiko, o tavini atu i te Peteli i Tokyo.

I taimi konei, a motoka e ‵togi ‵mafa ‵ki a ko auala e ma‵sei. Tela la, ne fakaaoga ne Kazumi Minoura mo nisi talavou paenia a kā fai fale e seai ne masini i ei. Ne fakaigoa ne latou a kā konei ki a Ieu, te tagata galue malosi telā ne masani o tele sāle i luga i te kaliota kae ne fai mo fai se tokotasi o tupu o Isalaelu. (2 Tupu 10:15, 16) A kā ‵lasi konei e tolu e nofo ki se 2.2 mita te ‵loa, 1.9 mita te lauefa mo te maluga kae e mafai o ‵nofo i ei a paenia e tokoono. E se gata i ei, ne faite ne te ofisa lagolago i Tiapani a kā fo‵liki e 11 kolā e mafai o ‵futi ne pasika tākivae kolā e faka‵tele ne tino e tokolua. Ne toe fai mai a Kiichi Iwasaki, telā ne fesoasoani atu i te faitega o kā, penei, “E isi katoa ne fale o kā konā fakatasi mo se patule o te motoka telā e fakaola ne ia a moli.” Ne fakamaina atu ne paenia konei a te munatonu i Tiapani kātoa, kae ne usu sāle atu ne latou a kā konei ki luga i mauga, kae olo atu i loto i vanu mai te feitu ki matū o Hokkaido ki te feitu ki saute o Kyushu.

Ne fai mai te paenia ko Ikumatsu, penei: “Kafai e oko atu matou ki se fa‵kai foliki, e tuku ne matou a omotou kā i kaugutu o te vaitafe io me i se malae. E āsi muamua atu matou ki tino ma‵luga o te fa‵kai, e pelā mo te takitaki o te fa‵kai, kae oti aka ko āsi atu ei matou ki fale o tino kae ofo atu a tusi. Kafai ko oti te motou galuega i konā, ko toe ga‵sue atu ei matou ki te suā fa‵kai.”

I te taimi muamua ne fai ei ne Tino A‵koga ki te Tusi Tapu e toko 36 a te lotou fono i Kobe, koi ‘foliki fua te galuega’ i konā. (Saka. 4:10, TTT) I tausaga e lima fakamuli—i te 1932, e nofo ki se 103 paenia mo tino talai i Tiapani ne masani o lipoti olotou galuega, kae tufatufa ne latou a tusi e silia atu mo te 14,000. I aso nei, ko oti ne fai te galuega talai i fa‵kai ‵lasi o Tiapani, kae toeitiiti ko kātoa te 220,000 tino talai e fakaoko atu ne latou te munatonu i Tiapani.​—Mai te ‵tou faletusi i Tiapani.