I SE lua tausaga mai mua o tupu te fakalavelave tenā, ne fatoā oti eiloa maua mo toku taugasoa misionale ko Evelyn Trabet mai te fa o vasega i te akoga i Kiliata, telā ne tu pili ki Ithaca, i Niu Ioki. Ne ‵tofi aka maua ke ga‵lue i Santa Ana. Kae koi tuai o faka‵soko taku tala i taku galuega fakamisionale mō se 29 tausaga, ke fai atu ne au te pogai ne filifili ei ne au te galuega tenā.

Ne ‵nofo atu oku mātua ko John mo Eva Olson, i Spokane, i Washington, U.S.A., i te tausaga 1923, telā ne fanau ei au. A lāua ne tino i te lotu telā ne fakatu ne Lutelu (Lutheran) kae ne seki talia ne lāua te akoakoga fakalotu e uiga ki te afi i seoli, me sē fealofani mo te lā talitonuga e uiga ki se Atua alofa. (1 Ioa. 4:8) Ne galue toku tamana i se fale fai falaoa, kae ne fakatalitonu atu ne se tino galue me e se akoako mai i te Tusi Tapu me i seoli se koga e fakapuapuaga ei a tino. E se leva kae ne kamata o suke‵suke oku mātua mo Molimau a Ieova kae tauloto ki mea kolā e akoako ‵tonu mai i te Tusi Tapu e uiga ki te olaga mai tua o te mate.

E masaua ne au me ko iva fua oku tausaga kae fakalogologo ki tala fakafia‵fia a oku mātua ki te auala ne maua ne lāua a muna‵tonu mai te Tusi Tapu. Ne ‵safe matagi lāua i te taimi ne tauloto ei ki te igoa tonu o te Atua, ko Ieova, kae ne fakasaoloto ei lāua mai te  akoakoga faka‵numi ko te Tolutasi Tapu. Ne kamata o tauloto ne au a akoakoga gali faka-te-Tusi Tapu konei, e pelā me ko te ‘munatonu telā e fakasaoloto ne ia se tino.’ (Ioane 8:32) Tela la, ne seki mafaufau lele au me i te akoga faka-te-Tusi Tapu se mea fakafi‵ta, kae ne fiafia faeloa au o sukesuke ki te Muna a te Atua. Faitalia toku mā, ne kau fakatasi au mo oku mātua i te galuega talai. Ne papatiso lāua i te 1934. I te 1939, ne kau foki au ki a lāua e pelā me se tavini papatiso a Ieova a ko 16 oku tausaga.

I te vaitaimi o te tau mafanafana i te 1940, ne ‵togi ne oku mātua ki tua te motou fale, kae ne kamata matou o ‵kau ki te taviniga tumau e pelā me ne paenia i Coeur d’Alene, i Idaho. Ne ‵nofo matou i se fale ‵togi mai luga o se koga faite motoka. Ne fai foki te motou fale pelā me se koga e fai ei a fakatasiga. I te taimi tenā, ne nāi fakapotopotoga fua e isi ne Kingdom Hall, tela la, e fai olotou fakatasiga i fale o tino io me ne potu ‵togi.

I te 1941, ne kau atu au mo oku mātua ki te fono i St. Louis, i Missouri. Ne fai te “Aso Tamaliki” i te Aso Sa, kae ne saga‵saga katoa a tamaliki mai te 5 ki te 18 tausaga i te feitu fakaatamai i mua o te tulaga. I te fakaotiotiga o tena lāuga, ne faipati mai te taina ko Joseph F. Rutherford ki a matou tamaliki, penei: “Koutou katoa . . . tamaliki . . . kolā ne fia‵fia o faka‵logo ki te Atua mo tena Tupu, fakamolemole ke ‵tu ki luga!” Ne ‵tu katoa ei matou ki luga. Kae ne fai mai a te taina ko Rutherford, “Kiloke, ko silia atu mo te 15,000 molimau fou o te Malo!” Ne fesoasoani mai a te mea tenā ke faka‵mautakitaki taku fakaikuga ke tumau i te fai pelā me se paenia i toku olaga kātoa.

I nāi masina mai tua o te fono i St. Louis, ne toe olo te motou kāiga ki te feitu ki saute o California. I konā, i te fa‵kai o Oxnard, ne kamata o fakatu aka ei ne matou se fakapotopotoga. Ne ‵nofo matou i se kā fai fale e tasi fua te moega i ei. Ne fakaaoga ne au te motou taipola ‵kai i po katoa mo fai toku “moega”—tai ‵kese malie mo te taimi ne isi ei soku potu totino!

Mai mua o oko atu matou ki California, ne pomu ei ne Tiapani a Pearl Harbor i Hawaii, i a Tesema 7, 1941. I te suā aso, ne kau atu a Amelika ki te Taua i te Lua a te Lalolagi. Ne fakatapu ne tino pule ma faka‵ka a moli i po, kae ne ‵tau eiloa o tamate ne matou a moli katoa i te po. Ne teletele eiloa a vakauku o Tiapani i te kogā tai o California, kae ne fesoasoani atu a te tamatega o moli i po ke sē lavea ne latou olotou taketi i luga i te fenua.

I nāi masina fakamuli, i a Setema 1942, ne ‵kau atu matou ki te fono ko te New World Theocratic i Cleveland, Ohio. I konā, ne fakalogologo matou i te taimi ne fai ei ne te taina ko Nathan H. Knorr tena lāuga “Te Filemu—E Mata, e Mafai o Tumau?” Ne fakamatala ne ia te Fakaasiga mataupu  17, telā e fakamatala mai ei te “manu fekai” telā “ne ola, kae ne mate, kae ka fai foki o fanaka mai i te lua ‵poko.” (Faka. 17:8, 11) Ne fakamatala atu ne te taina ko Knorr me i te “manu fekai” ko te Malo ‵Kau Fakatasi telā ne gata atu ana galuega fai i te 1939. Ne ‵valo mai i te Tusi Tapu me i te Malo tenei ka sui, kae ka iku atu ki se taimi o te filemu. Tela la, i te 1945, ne oti atu te Taua i te Lua a te Lalolagi. Mai tua i konā, ne toe sae aka ei te “manu fekai” e pelā me ko te Malo ‵Soko. Ne fakalauefa atu ne Molimau a Ieova a te lotou galuega talai ki te lalolagi kātoa, kae talu mai te taimi tenā, ne lavea atu eiloa te lasi o te fanakaga ki luga!

Ne fesoasoani mai te valoaga tenā ke lavea ne au a mea ka ‵tupu i aso mai mua. I te taimi ne faka‵pula ei me ka kamata te Akoga i Kiliata i te suā tausaga, ne manako malosi eiloa au ke fai pelā me se misionale. I te 1943, ne ‵tofi ei au ke paenia i Portland, Oregon.  I aso konā, ne fakaaoga ne matou a mea puke leo ke fakatagi ki ei a lāuga ki tino i olotou fale, kae ne mafai o ofo atu ne matou a tusi faka-te-Tusi Tapu e uiga ki te Malo o te Atua ki a latou. I te tausaga kātoa tenā, ne mafaufau faeloa au ki te galuega faka-misionale.

I te 1944, ne fiafia eiloa au ke maua se ‵kamiga ki Kiliata fakatasi mo toku taugasoa pele ko Evelyn Trabert. Mō se lima masina, ne fakaasi mai ne motou faiakoga a te auala ke maua te fiafia mai te sukesuke ki te Tusi Tapu. Ne fia‵fia eiloa matou ki te lotou loto maulalo. I nisi taimi, kafai e ‵kai matou, a taina konā e situati. Ne oti matou i a Ianuali 22, 1945.

Ne oko fakatasi atu matou mo Evelyn, Leo, mo Esther Mahan ki te koga e ga‵lue ei matou i El Salvador i a Iuni 1946. Ne maua aka ne matou me ko “‵kena aka eiloa i fuataga e ‵tau o tau” i konā. (Ioa. 4:35) A te fakalavelave telā ne taku atu i te kamataga o te tala e fakaasi mai ei te kaitāua o faifeau. I se vaiaso fua mai mua, ne fai te motou fono o te fenua muamua i Santa Ana. Ne fakasalalau atu ne matou te lāuga mō tino katoa kae ne fia‵fia ‵ki matou me toeitiiti ko katoa te 500 tino ne ‵kau mai. I lō te ma‵taku kae olo keatea mai te fa‵kai, ne fakaiku aka ne matou mo te mautinoa ke ‵nofo o fesoasoani atu ki tino loto ‵lei i konā. Faitalia me ne fakailoa atu ne faifeau ki tino ke se fai‵tau ki te Tusi Tapu kae ne nāi tino fua e isi ne olotou ‵kopi totino, e tokouke eiloa ne fia‵kai ki te munatonu. Ne fia‵fia latou ki omotou taumafaiga ke tauloto ki te ‵gana Spain ko te mea ke mafai o akoako atu latou e uiga ki te Atua tonu, ko Ieova, mo tena tautoga gali e uiga ki te fakafouga o te Palataiso i te lalolagi.

A Rosa Ascencio se tokotasi o tino e akoga mo au ki te Tusi Tapu. I te taimi ne kamata o sukesuke a ia ki te Tusi Tapu, ne tiaki ne ia te tagata telā ne ‵nofo tasi mo ia. Fakamuli, ne kamata o sukesuke tou tagata ki te Tusi Tapu. Ne avaga lāua, papatiso, kae ne fai lāua mo Molimau loto finafinau a Ieova. A Rosa ko te paenia muamua eiloa i Santa Ana. *

Ne fakatu ne Rosa se sitoa foliki. Kafai ne fano a ia i te galuega talai, ne ‵pono ne ia tena sitoa mo te loto talitonu me ka tausi atu a Ieova ki ana manakoga. Kafai ko ‵tala ne ia te sitoa mai tua o nāi itula, e ‵fonu faeloa tena sitoa i tino e ‵togi olotou mea. Ne fakatalitonu ei ne ia i konā a te ‵tonu o pati i te Mataio 6:33 kae ne fakamaoni eiloa a ia ke oko ki tena mate.

I te taimi e tasi, ne āsi atu te faifeau ki te tagata i ō ia te fale ‵togi telā e ‵nofo i ei matou misionale e tokoono, kae ne fai ki tou tagata me kafai e tumau o talia ke ‵nofo matou i tena fale ‵togi, ka faka‵tea eiloa a ia mo tena avaga mai te lotu. Kae ne seki talia ne te tagata i ō ia te fale ‵togi, telā se tino fai pisinisi takutakua, a te fakamalosiga tenā, me ko leva loa ne takalialia a ia ki faifaiga a faifeau. Ne fai atu foki a ia ki te faifeau me e sē se mea e fai i ei māfai e faka‵tea lāua mai te lotu. Ne fakamautinoa mai ne ia me mafai eiloa o ‵nofo matou i tena fale ki te leva e ma‵nako matou ki ei.

I te laumua ko San Salvador, ne sukesuke ki te Tusi Tapu se misionale e tokotasi mo te avaga a se initinia e igoa ki a Baltasar Perla. Ne galo te loto talitonu o te tagata loto ‵lei tenei ki te Atua i taimi ne lavea ne ia uiga fakaloiloi o takitaki lotu. I te taimi ne fai ei ke faite te ofisa lagolago, ne ofo mai a Baltasar telā e seki maua ne ia te munatonu, ke ‵lomi kae faite ne ia te ofisa e aunoa mo se ‵togi.

Mai te ‵kau fakatasi mo tino o Ieova i te galuega fakatutu tenei, ne kamata o fakatalitonu aka ne Baltasar me ko maua ne ia te lotu tonu. Ne papatiso a ia i a Iulai 22, 1955, a ko tena avaga, ko Paulina ne papatiso fakamuli. A lā tamaliki e tavini atu foki mo te fakamaoni ki a Ieova. A tena tamaliki tagata ko Baltasar, Jr., ne tavini atu i te Peteli i Brooklyn mō se 49 tausaga, kae ‵lago atu a ia i konā ki te galuega talai i te lalolagi kātoa kae ko tavini atu nei a ia e pelā me se Komiti o te Ofisa Lagolago i Amelika.  *

I te kamataga o fai omotou fono o te atufenua i San Salvador, ne fesoasoani mai te taina ko Perla ke fakamasani matou o fakaaoga faka‵lei a fale tafao ‵lasi. I te taimi muamua, ne fakaaoga fua ne matou a nāi koga saga‵saga; kae ona ko te fakamanuiaga a Ieova, ne gasolo o uke a koga sagasaga e fakaaoga i tausaga takitasi ke oko ki te taimi ko ‵fonu ei a te fale tafao kae ko se ofi foki i ei! I taimi fakafiafia konā, ne mafai o lavea atu ne au a tino kolā ne suke‵suke mo au ki te Tusi Tapu. Mafaufau la ki toku fiafia i taimi ne ‵kami ei au ne aku akoga faka-te-Tusi Tapu mua ke fakafetaui ki oku “mokopuna” faka-te-agaga—ko tino papatiso fou kolā ne suke‵suke fakatasi mo latou!

I te fono e tasi, ne vau se taina ki a au kae ne manako o fai tena fakatoesega. Ne seki masaua ne au a ia kae ne fia iloa malosi ne au a ia. Ne fai mai tou tagata, “Au se tokotasi o tamaliki ta‵gata kolā ne peipei ne matou koe ki fatu i Santa Ana.” Ko tavini fakatasi atu nei māua ki a Ieova! Ne ‵fonu toku loto i te fiafia. Ne fakamaoni mai ne te sau‵talaga tenā ki au me i te taviniga tumau ko te ‵toe galuega fakafiafia eiloa e mafai o filifili ne so se tino.

Ne tumau eiloa au i te galuega faka-misionale i El Salvador mō tausaga toeitiiti ko kātoa te 29, muamua i te fa‵kai o Santa Ana, Sonsonate, toe fano ki Santa Tecla kae fakamuli loa ki San Salvador. I te 1975, ne fakaiku ne au ke tiaki taku galuega faka-misionale kae foki atu ki Spokane mai tua o te ‵talo faeloa kae mafaufau faka‵lei. Ko manakogina ne oku mātua fakamaoni kolā ko ma‵tua a toku fesoasoani.

Mai tua o te mate o toku tamana i te 1979, ne tausi ne au toku mātua telā ko vāivāi kae sē mafai o fai se mea. Ne ola a ia mō se valu tausaga, kae ne mate atu a ko 94 ana tausaga. I te taimi faigata tenā, ne kamata o vāivāi au i te feitu faka-te-foitino mo mea tau lagonaga. Kae ne iku ki se masaki tigaina e pelā me ne kili e fakasae aka i te foitino (shingles). Kae e auala i te ‵talo mo fakamalosiga alofa a Ieova, ne mafai ei o kufaki au. E pelā loa mo pati a Ieova, “ke oko ki te taimi ko . . . , sinā otou ulu . . .  ka fesoasoani atu au ki a koutou kae faka‵sao koutou.”—Isa. 46:4.

Ne fanatu au ki Omak i Washington i te 1990. I konā, ne mafai ei au o toe talai i te ‵gana Spain, kae ne papatiso foki a nisi o aku akoga faka-te-Tusi Tapu. I a Novema 2007, ne sē mafai o tausi atu au ki toku fale i Omak, tenā ne fano ei au o nofo i se potu ‵togi i te fa‵kai o Chelan, i Washington. Ne tausi faka‵lei au ne te fakapotopotoga i te ‵gana Spain i konei, kae ne loto fakafetai eiloa au ki ei. Ona la ko au fua te Molimau matua i konei, ne fai au ne taina mo tuagane i konei e pelā me se “tupuna” o latou.

Faitalia me ne filifili au ke sē avaga kae fai soku kāiga ko te mea ke mafai o uke atu aku mea e fai i te galuega talai “e aunoa mo se fakalavelave,” e tokouke eiloa aku tamaliki faka-te-agaga. (1 Cor. 7:34, 35) Ne malamalama au me i te olaga tenei, e se mafai o maua ne au a mea katoa i ei. Ne fakamuamua ne au a mea tāua—ko taku tautoga ke tavini ki a Ieova mo te loto kātoa. I te lalolagi fou, ka uke atu a taimi ke aofia i galuega aoga kae fakafiafia. E gali ki au te tusi ko Salamo 145:16, telā e fakatalitonu mai ki a tatou me ka ‘fakamalie ne Ieova a manakoga o mea ola katoa.’

Ko 91 oku tausaga, kae koi malosi eiloa au ke paenia. E fesoasoani mai te galuega faka-paenia ke malosi toku loto kae ke maua se fakamoemoega aoga. I taku okoatuga muamua ki El Salvador, ne fatoa kamata eiloa a te faiga o te galuega talai. Faitalia a ‵tekemaiga a Satani, ko silia atu nei mo te 39,000 tino talai i te fenua tenā. Ne fakamalosi ne te mea tenei toku fakatuanaki. E manino ‵lei, me i te agaga tapu o Ieova e ‵lago mai ki taumafaiga o ana tino!