Ke mo a tatou e mafau‵fau me ona ko te mea e ‵galo a soko e toko 70 i te taimi ne kamata ei ne Iesu a te ‵Kaiga a te Aliki i te Afiafi, ko tena uiga ko se talia io me ko oti ne tiakina ne latou a ia. I te taimi tenā, ne manako fua a Iesu ke ‵kau fakatasi mo ana apositolo.

Ko oti ne talia ne ia a te toko 12 mo te toko 70 ke fai mo ana soko. Ne filifili ne Iesu mai ana soko e tokouke se toko 12 tāgata, kolā ne taku ne ia ki apositolo. (Luka 6:​12-16) Ne nofo atu a ia i Kalilaia i te taimi “ne ‵luku mai ei ne ia te toko Sefululua” kae “uga atu ne ia latou ke olo o talai a te Malo o te Atua kae faka‵lei a masaki.” (Luka 9:​1-6) Fakamuli ifo i Iuta, ne “fili aka ne [Iesu] a nisi tino e toko 70 kae uga atu ne ia taki tokolua.” (Luka 9:51; 10:1) Tela la, ne isi ne soko o Iesu i koga kese‵kese kolā ne talai atu e uiga ki a ia.

A tino Iutaia kolā ne fai mo soko o Iesu ne fakamanatu eiloa ne latou a te Paseka i tausaga takitasi, kāti fakatasi mo olotou kāiga. (Eso. 12:​6-11, 17-20) Mai mua malie o mate a ia, ne olo atu a Iesu mo ana apositolo ki Ielusalema. Kae ne seki fakailoa atu ne ia ki ana soko katoa i Iuta, Kalilaia mo Pelea ke olo atu ke fakamanatu fakatasi ne latou a te Paseka. A te ‵tonuga loa, ne manako fua a Iesu ke ‵kau fakatasi mo ana apositolo i te taimi tenei. Ana muna ki a latou: “Ne manako malosi au ke ‵kai fakatasi tatou i te Paseka tenei a koi tuai au o puapuaga.”—Luka 22:15.

E isi se pogai ‵lei ne fai ei ne ia te mea tenā. Ko pili fua o mate a Iesu e pelā me ko “te Tamā Mamoe a te Atua telā ka ave ne ia kea‵tea a agasala a te lalolagi.” (Ioa. 1:29) Ne ‵tau o tupu te mea tenā i Ielusalema, telā ne masani o ofo atu i ei a taulaga ki te Atua. Ka aumai ne te mate o Iesu te faka‵saoga telā e sili fakafia atu i lō te tamā mamoe telā ne kai ne kāiga Isalaelu i te aso o te lotou Faka‵saoga mai Aikupito. (1 Koli. 5:​7, 8) Ona ko te mea ne fai ne Iesu, ka fai eiloa a apositolo e toko 12 e pelā me ne fakavae o te fakapotopotoga Kelisiano. (Efe. 2:​20-22) Se mea fakaofoofogia me e “12 foki a fatu fakavae” i te fakai tapu o Ielusalema, kolā e tusi i luga i ei a “igoa e 12 o apositolo e toko 12 a te Tamā Mamoe.” (Faka. 21:​10-14) E tonu, ka maua eiloa ne apositolo fakamaoni konei se tulaga fakapito i te fakataunuga o te fuafuaga a te Atua. Tela la, ko malama‵lama tatou i te pogai ne manako a Iesu ke ‵kau fakatasi latou mo ia i te ‵toe Paseka tenā mo te mea telā ne fai ne latou mai tua ifo—te ‵Kaiga a te Aliki i te Afiafi.

A soko e toko 70 mo nisi soko ne seki ‵kau fakatasi mo Iesu i te ‵kaiga tenā. Kae koi aoga eiloa ki a latou katoa a te mea telā ne kamata o fai ne Iesu—te ‵Kaiga a te Aliki i te Afiafi. A soko katoa konā kolā ne fai fakamuli e pelā me ne Kelisiano fakaekegina ka aofia eiloa i se feagaiga mō se malo, telā ne fai atu ne Iesu ki ana apositolo i te po tenā.—Luka 22:​29, 30.