1-2. (a) Kaia ne fai mai ei te apositolo ko Paulo me i te alofa ko “te ‵toe” uiga sili? (e) Ne a fesili ka sau‵tala tatou ki ei?

 I TE taimi ne faipati te apositolo ko Paulo ki te fakatuanaki, te fakamoemoega mo te alofa, ne fakaoti ana pati mai te fai atu me i “te ‵toe mea sili i [uiga] konei, ko te alofa.” (1 Koli. 13:13) Kaia ne fai mai ei a Paulo penei? I aso mai mua, ka se manakogina ne tatou te fakatuanaki ki folafolaga a te Atua e uiga ki tena lalolagi fou, me i mea katoa konei ne fakamoe‵moe tatou ki ei ka taunu eiloa. Kae ka manakogina faeloa ne tatou te alofa ki a Ieova mo ana tino. E tonu, ka gasolo aka eiloa o lasi te ‵tou a‵lofa ki a latou ki te se-gata-mai.

² Ona ko te mea ka manakogina faeloa ke fakaasi atu te alofa, ka sau‵tala tatou ki fesili konei e tolu. Muamua la, kaia e ‵tau ei o fakatau a‵lofa tatou? Te lua, e fakaasi atu pefea ne tatou a te fakatau a‵lofa? Te tolu, e mafai pefea o tumau tatou i te fakatau a‵lofa malosi?

3. Ne a pogai e fakatau a‵lofa ei tatou?

³ Kaia e tāua ei ko tatou ke fakatau a‵lofa? I tafa o nisi pogai aka, a te alofa ko te iloga o tatou e pelā me ne Kelisiano ‵tonu. Ne fai atu a Iesu ki ana apositolo: “Ona ko te mea tenei ka iloa ei ne tino katoa i a koutou ko oku soko—māfai e fakatau a‵lofa koutou.” (Ioa. 13:35) E se gata i ei, a te fakatau a‵lofa e fakatumau ne ia te ‵kau fakatasi o tatou. Ne taku ne Paulo a te alofa ki te “fusi ‵lei katoatoa.” (Kolose 3:14) Kae e isi se suā pogai  e ‵tau ei mo tatou o fakatau a‵lofa. Ne tusi atu te apositolo ko Ioane ki ana taina tali‵tonu: “Me ko so se tino e alofa ki te Atua e ‵tau foki mo ia o alofa ki tena taina.” (1 Ioa. 4:21) Kafai e fakatau a‵lofa tatou, ko fakaasi atu ei te ‵tou a‵lofa ki te Atua.

4-5. Fakamatala mai te auala e isi ei se sokoga o te ‵tou a‵lofa ki te Atua mo te a‵lofa o tatou te suā tino ki te suā tino.

⁴ Se a te sokoga o te ‵tou a‵lofa ki te Atua mo te ‵tou a‵lofa ki taina mo tuagane? Ke fai se fakatusaga, mafaufau ki te sokoga o ‵tou fatu ki vaega katoa o ‵tou foitino. Ke mafai o iloa ne te tokita te tulaga o ‵tou fatu, e fakalogo a ia ki te ‵tā o ‵tou uaua i ‵tou lima, ko iloa aka ei me vāivāi io me malosi ‵tou fatu. I te auala fea e fakagalue aka ei ne tatou a te fakatakitakiga tenei ki te mataupu ko te alofa?

⁵ E pelā mo te tokita telā e mafai o iloa ne ia a nisi fakamatalaga e uiga ki te ola ‵lei o ‵tou fatu i te asiga ne ia a uaua i ‵tou lima, e mafai o maua ne tatou a nisi fakamatalaga e uiga ki te malosi o te ‵tou a‵lofa ki te Atua mai te iloilo aka a te ‵tou a‵lofa ki nisi tino. Kafai ko kamata o lavea atu me ko seai ne lagonaga a‵lofa o tatou ki ‵tou taina mo tuagane, tenā ko iloa ei ne tatou me ko gasolo ifo a te ‵tou a‵lofa ki te Atua. Kae kafai e fakaasi atu faeloa ne tatou te alofa ki ‵tou taina tali‵tonu, se fakaasiga tāua tenā me malosi ‵ki a te ‵tou a‵lofa ki te Atua.

6. Kaia e ‵tau ei o manava‵se tatou māfai ko se malosi ‵tou a‵lofa ki ‵tou taina mo tuagane? (1 Ioane 4:​7-9, 11)

⁶ E ‵tau eiloa o manava‵se tatou māfai ko se malosi a te ‵tou a‵lofa ki taina mo tuagane. Kaia? Me ka fakamataku ki te ‵tou feitu faka-te-agaga. Ne fakaasi manino mai ne te apositolo ko Ioane i tena fakamasauaga ki a tatou: “Te tino telā e se alofa ki tena taina, telā ko oti ne matea ne ia, e se mafai o alofa ki te Atua, telā e seki matea ne ia.” (1 Ioa. 4:20) Se a te akoakoga mō tatou? Ka fiafia eiloa a Ieova māfai fua tatou e “fakatau a‵lofa te suā tino ki te suā tino.”—Faitau te 1 Ioane 4:​7-9, 11.

7-8. Ne a nisi auala e mafai o fakaasi atu te ‵tou alofa te suā tino ki te suā tino?

⁷ E sae mafai faeloa i te Muna a te Atua a te fakatonuga ke “alofa te suā tino ki te suā tino.” (Ioa. 15:​12, 17; Loma 13:8; 1 Tesa. 4:9; 1 Pe. 1:22; 1 Ioa. 4:11) Kae ko te alofa se lagonaga i ‵tou loto telā e se mafai o lavea ne se tino. Tela la, e mafai pefea o fai ke lavea a te ‵tou a‵lofa te suā tino ki te suā tino? E auala i ‵tou pati mo faiga.

⁸ E uke a auala e mafai o fakaasi atu ei te ‵tou a‵lofa ki taina mo tuagane. Konei a nisi fakaakoakoga: “Fai‵pati ki te mea tonu te suā tino ki te suā tino.” (Saka. 8:16) “Tausi te filemu i te va o koutou.” (Male. 9:50) Ke mua “o fakaasi atu te āva o te suā tino ki te suā tino.” (Loma 12:10) “Ke fakatau talia ne koutou te suā tino mo te suā tino.” (Loma 15:7) Ke tumau i te “fakatau fakamagalo atu te suā tino ki te suā tino.” (Kolose 3:13) “Tumau i te fakatau amo otou amoga ‵mafa.” (Kala. 6:2) “Tumau i te fakamafanafana atu te suā tino ki te suā tino.” (1 Tesa. 4:18) “Tumau i te fakamalosi atu te suā tino ki te suā tino.” (1 Tesa. 5:11) “‵Talo te suā tino mō te suā tino.”—Iako. 5:16.

9. Kaia e fai ei te fakamafanafana atu o nisi tino e pelā me se fakaasiga tāua o te alofa? (Onoono foki ki te ata.)

⁹ Ke na sau‵tala nei tatou ki se auala e tasi e mafai o fakaasi atu ne tatou te alofa ki nisi tino, telā ne fakasae mai i te palakalafa mai mua. Ka suke‵suke tatou ki pati fakamalosi a Paulo: “Tumau i te fakamafanafana atu te suā tino ki te suā tino.” Kaia e fai ei a te fakamafanafana atu ki nisi tino e pelā me se  auala ke fakaasi atu te alofa ki a latou? E ‵tusa mo se fakamatalaga a se Tusi Tapu e tasi, a te pati “fakamafanafana” telā ne fakaaoga ne Paulo, e fakauiga loa ki te “tu atu i tafa o se tino telā e fepaki mo se fakalavelave faigata kae fakamalosi a ia.” Tela la, kafai e tuku atu ne tatou a fakamafanafanaga, ko fesoasoani tatou ki se taina talitonu telā e loto mafatia ke tu ki luga kae tumau i te sasale atu i te auala ki te ola. I taimi takitasi e tuku atu ne tatou se fakamafanafanaga ki se taina io me se tuagane, ko fakaasi atu eiloa ne tatou te alofa ki ‵tou taina tali‵tonu.—2 Koli. 7:​6, 7, 13.

10. Se a te sokoga o lagonaga atafai mo te tuku atu o fakamafanafanaga?

¹⁰ E isi se sokoga o lagonaga alofa atafai mo te tuku atu o fakamafanafanaga. I te auala fea? A te tino alofa atafai ka gasuesue eiloa o fakamafanafana a nisi tino kae taumafai o fakafeoloolo aka olotou lagonaga logo‵mae. Tela la, kafai tatou e a‵lofa atafai, ka fesoasoani mai ei ke fakamafanafana ne tatou a nisi tino. Ne fakaasi mai ne Paulo me ne gasuesue a Ieova o fakamafanafana atu a nisi tino ona ko tena alofa atafai. Ne fakamatala mai ne Paulo a Ieova e pelā me ko “te Tamana o te alofa fakamagalo mo te Atua o fakamafanafanaga katoa.” (2 Koli. 1:3) Ne fakaaoga ne Paulo i konei a te tugapati “alofa fakamagalo” ke fakamatala mai ei se lagonaga alofa atafai ki nisi tino. Tela la, a te Atua ko te Tamana, io me ko te Mafuaga o te alofa fakamagalo ona ko te lasi o tena alofa atafai ki tino. Kae e fakamalosi aka a ia ne te alofa atafai ke gasue o fakamafanafana mai “tatou i ‵tou tofotofoga katoa.” (2 Koli. 1:4) E pelā mo te vai ‵ma telā e ‵tafe mai i se vaipuna ke inu ki ei a latou kolā e fiainu, e aumai ne Ieova a te malosi fou mo fakamafanafanaga ki tino loto mafatia. E mafai pefea o fakaakoako tatou ki te alofa atafai o Ieova kae fakamafanafana atu a nisi tino? Tasi te auala e mafai ne tatou o fai penā, ko te ati aka o uiga kolā ka fesoasoani mai ke tuku atu ne tatou a fakamafanafanaga. Ne a nisi uiga konā?

11. E ‵tusa mo te Kolose 3:12 mo te 1 Petelu 3:​8, ne a nisi uiga e ‵tau o ati aka ne tatou ke fakatumau te alofa telā e fakamalosi ei tatou ke fakamafanafana atu a nisi tino?

¹¹ Ne a mea ka fesoasoani mai ke fakatumau ne tatou te alofa telā e manakogina ko te mea ke “tumau i te fakamafanafana atu te suā tino ki te suā tino” i aso takitasi? E ‵tau o ati aka ne tatou a vaegā uiga e pelā mo lagonaga fakataina, alofa fakataina, mo te alofa atafai. (Faitau te Kolose 3:12; 1 Petelu 3:8.) Ka fesoasoani mai pefea a uiga konei? Kafai e fakaasi ‵tonu atu ne tatou te alofa atafai ki ‵tou taina, ko tuku atu eiloa ne tatou a fakamafanafanaga ki a latou. E pelā mo pati a Iesu, “e faipati mai ne te gutu a mea kolā e ‵fonu i te loto. A te tagata ‵lei e aumai sāle ne ia mai i ana koloa ‵lei a mea ‵lei.” (Mata. 12:​34, 35) A te tukuatuga o fakamafanafanaga ki ‵tou taina mo tuagane, se auala tāua ‵ki ke fakaasi atu ei a te ‵tou a‵lofa ki a latou.

12. (a) Kaia e ‵tau ei o tumau tatou i te matapula‵pula? (e) Se a te fesili ka sau‵tala nei tatou ki ei?

¹² A tatou katoa e ma‵nako o “fakatau a‵lofa.” (1 Ioa. 4:7) Kae e tāua ke masaua me ne fakailoa mai a Iesu me ‘ka gasolo ifo o se a‵lofa a tino e tokouke.’ (Mata. 24:12) Ne seki fai mai a Iesu me ka tokouke ana soko ka sē fakatau a‵lofa. Kae e ‵tau o tumau tatou i te matapula‵pula ke mo a ma pokotia tatou i te kilokiloga sē alofa a tino o te lalolagi. E uiga ki ei, ke na mafau‵fau tatou ki te fesili tāua tenei: E isi se auala ke tofotofo aka ei me e mata, e malosi ‵tou a‵lofa ki ‵tou taina io me ikai?

13. Se a te mea ka fai ei ke tofotofo aka ei te ‵tou a‵lofa?

 ¹³ Tasi te auala ke fakaiku aka me e malosi te ‵tou a‵lofa, ko te sukesuke ki te auala e ‵saga atu ei tatou ki tulaga o te olaga. (2 Koli. 8:8) Tasi mai i ei, ko te mea telā ne fakasae mai ne te apositolo ko Petelu: “E sili atu i mea katoa, ke fakatau a‵lofa koutou, me e ‵tao ne te alofa a agasala e uke.” (1 Pe. 4:8) Tela la, a vāivāiga mo te tulaga sē ‵lei katoatoa o ‵tou taina e mafai o fai pelā me se tofotofoga ki te ‵tou a‵lofa.

14. E ‵tusa mo te 1 Petelu 4:​8, se a te vaegā alofa e manakogina ne tatou? Fakamatala mai.

¹⁴ Ke mafau‵fau faka‵lei nei tatou ki pati a Petelu. E fakamatala mai i te vaega muamua o te fuaiupu e 8 a te vaegā alofa e manakogina ne tatou—ko te “fakatau a‵lofa.” A te pati “fakatau a‵lofa” malosi telā ne fakaaoga ne Petelu i konei, e fakauiga eiloa ki te “fakalauefa atu.” A te vaega i te lua o te fuaiupu e fakamatala mai ei te aoga o te fakatau a‵lofa ki a tatou. E ‵tao ne ia a agasala katoa a ‵tou taina. E mafai o fakaataata ne tatou i te auala tenei: E taofi ‵mau ne tatou a te alofa ki ‵tou lima e lua, e pelā eiloa māfai e taofi ne tatou se laugatu kae tala ne tatou ke mafai o ‵tao ki ei e sē se agasala fua e tasi io me lua, kae ko “te ukega o agasala.” A te pati “‵tao” e  fakauiga eiloa ki te fakamagalo. E pelā me se laugatu telā e mafai o ‵tao ne ia se mea telā e pisia, a te alofa e mafai o ‵tao ne ia a vāivāiga io me ko mea ‵se a nisi tino.

15. Kafai e malosi ‵tou a‵lofa ki ‵tou taina mo tuagane, ne a mea ka mafai ne tatou o fai? (Kolose 3:13)

¹⁵ E ‵tau malosi a te ‵tou a‵lofa ki nisi tino, ke mafai o fakamagalo a mea ‵se a ‵tou taina tali‵tonu—maise loa māfai e manakogina a taumafaiga ke fai penā i nisi taimi. (Faitau te Kolose 3:13.) Kafai e fakamagalo ne tatou a nisi tino, ko fakaasi atu ne tatou a te malosi o te ‵tou alofa kae ka ma‵nako tatou o fakafiafia atu a Ieova. Ne a nisi mea e mafai o fesoasoani mai ke sē ‵saga tatou ki uiga sē ‵lei mo mea ‵se a nisi tino?

16-17. Ne a nisi mea ka fesoasoani mai ke sē ‵saga tatou ki tamā mea ‵se a nisi tino? Fakamatala mai. (Onoono foki ki te ata.)

¹⁶ Saga tonu atu ki uiga ‵lei o ‵tou taina mo tuagane kae e se ko olotou vāivāiga. Mafaufau ki te fakatusaga tenei. Mafaufau me nofo atu koe i se maopoopoga o taina mo tuagane. Ko oko loa i tou fiafia i te taimi tenā, kae i te fakaotiga, ko pei te otou ata. A te ‵tonuga loa ka toe pei fakalua ne koe a te ata i te mea ma sē gali te ata muamua. Nei la ko tolu au ata. Kae i tau ata e tasi, e lavea ne koe se taina e se fakamisikata. Ne a au mea ka fai ki ei? Ka tapale ne koe, me lua katoa au ata e lavea atu i ei a tino katoa fakatasi mo te taina tenā e fakamisi‵kata.

 ¹⁷ E mafai o fakatusa a ata kolā e tausi ne tatou ki mea e fakamasausau faeloa i ‵tou mafaufau. E masani o masaua ne tatou a taimi ‵gali ne fakamāumāu fakatasi ne tatou mo ‵tou taina mo tuagane. Kae kāti ne fai ne se taina io me se tuagane i taimi konā se mea ‵se. Se a te mea e ‵tau o fai ne tatou ki te mea tenā? E ‵tau o taumafai tatou o tapale kea‵tea a te mea ‵se tenā, e pelā eiloa māfai ko tapale kea‵tea ne tatou se ata e tasi telā e se gali ki a tatou. (Faata. 19:11; Efe. 4:32) E mafai o fakapuli ne tatou a te tamā mea ‵se a se taina talitonu tenā ona ko mea ‵gali ne fai ne ia i taimi e uke e ‵kau fakatasi ei tatou mo ia. Konā vaegā mea e ‵tau o fakamasausau ne tatou i ‵tou mafaufau.

18. Ne a manatu tāua e uiga ki te alofa ne sau‵tala tatou ki ei i te mataupu tenei?

¹⁸ Kaia ko ma‵nako ei tatou o fakamalosi aka te ‵tou a‵lofa te suā tino ki te suā tino? E pelā mo mea ko oti ne sau‵tala tatou ki ei, kafai e fakaasi atu ‵tou a‵lofa ki ‵tou taina mo tuagane, ko fakaasi atu ei te ‵tou a‵lofa ki a Ieova. E fakaasi atu pefea te ‵tou a‵lofa ki ‵tou taina tali‵tonu? Tasi o auala ko te tuku atu o fakamafanafanaga ki a latou. Ka mafai eiloa ne tatou o “tumau i te fakamafanafana atu te suā tino ki te suā tino” māfai e a‵lofa atafai tatou. E mafai pefea tumau tatou i te fakatau a‵lofa malosi? Mai te fai o te ‵toe mea e mafai ke fakamagalo a mea ‵se a nisi tino.

19. Kaia e tāua ‵ki ei i aso nei ke fakaasi atu te alofa te suā tino ki te suā tino?

¹⁹ Kaia ko tāua ‵ki ei i aso nei ke fakaasi atu te alofa te suā tino ki te suā tino? Mafaufau ki te pogai tenei ne tuku mai ne Petelu: “Te gataga o mea katoa ko pili mai. Tela la, . . . ke fakatau a‵lofa koutou.” (1 Pe. 4:​7, 8) Ona ko te pili ‵ki mai o te gataga o te lalolagi masei tenei, se a te mea e mafai o fakamoe‵moe tatou ki ei? Mai te faipati atu e uiga ki ana soko, ne ‵valo mai a Iesu: “Ka takalia‵lia a atufenua ki a koutou ona ko toku igoa.” (Mata. 24:9) Ke kufaki i vaegā takalialiaga konā, e ‵tau o tumau tatou i te ‵kau fakatasi. Kafai e fai tatou penā, ka se mafai eiloa o fakamavae‵vae tatou ne Satani, me e ‵kau fakatasi tatou i te alofa—te “fusi ‵lei katoatoa telā e fai ei ke ‵kau fakatasi a tino.”—Kolose 3:14; Fili. 2:​1, 2.