Ne Taunu te Fakamoemoega o Hulda
KAFAI ko oti ne asi atu koe ki te fenua foliki o Indonesia ko Sangir Besar i nāi tausaga ko ‵teka, kāti ne lavea ne koe a tuagane Kelisiano e tokotolu konei i te matafaga. E lauiloa latou i te fenua ona ko te lotou galuega talai—fesoasoani atu ki tino ke malamalama i te Tusi Tapu. Kae i te taimi tenei, ne fai ne latou se galuega tai ‵kese malie.
Te fenua ko Sangir Besar i te feitu ki mātū o Indonesia
Muamua la, e olo atu latou ki te tai, ‵sala a fatu ‵lasi ko amo aka ei ne latou ki uta i te matafaga. Nisi fatu e ‵pau loa te ‵lasi mo pōlo futipolo. Oti, ko saga‵saga ei a fāfine konei i tamā nofoaga laupapa kae fakaaoga a samala mo tukituki a fatu konā ke fo‵liki pelā me ne tamā fatu kolā e fo‵liki atu i te fuamoa. Ka oti, ko ‵fao ei ne latou a tamā fatu konā ki paketi lapa kae toe sau aka i se kakega ki luga i te koga e ‵nofo i ei latou. Ko ‵fao ei ne latou ki ato ‵lasi kolā e mafai o ave i motoka ke fakaaoga mō faite ki ei a auala.
Ko Hulda, e fakaputu ana fatu i te matafaga
Tokotasi mai tuagane konei ko Hulda. Ona ko ana fakanofonofoga, ne uke atu ana taimi sao‵sao ke fai te galuega tenei. E masani o fakaaoga ne ia ana tupe e maua i te galuega tenei mo ‵togi a mea mō tausi tena kāiga i aso takitasi. Kae i te taimi nei, ne galue a ia ke fakataunu a tena suā fakamoemoega. Ne manako tou fafine ki se tivaisi ko te mea ke mafai o fakaaoga ne ia te JW Library® app. Ne iloa ne Hulda me i vitio mo nisi mataupu i loto i te app ka fesoasoani atu ke momea aka te ‵lei o tena galuega talai, kae ke lasi tena malamalama i te Tusi Tapu.
Ne galue a Hulda i se lua itula i taeao katoa mō se tasi mo te āfa masina, o tukituki a fatu ke faka‵fonu te koga i tua o se motoka foliki. Fakamuli ifo, ne maua ne ia a tupe e lava kae ‵toe ke ‵togi ki ei a tena tivaisi.
Ko Hulda mo tena tivaisi
“E tiga eiloa ne fi‵ta kae logo‵mae toku foitino mai te ‵tukiga o fatu,” ne fai mai a Hulda, “ne puli fakavave i a au a mea faka‵mae katoa konā i te taimi ne maua ei taku tivaisi fou telā ne fesoasoani mai ke magoi te faiga o taku galuega talai kae ke faigofie aku fakatokaga e fai ki fakatasiga Kelisiano.” Ne fai mai foki me ne aoga ‵ki tena tivaisi i te taimi eiloa ne fatoa kamata te masaki ‵pisi, ona ko polokalame katoa a te fakapotopotoga ko fai i luga i te neti. E fia‵fia tasi eiloa tatou mo Hulda me ne mafai o taunu a tena fakamoemoega.
