I TE kogāloto o tausaga mai te 1930 o vau ki mua, ne olo atu a toku tamana mo toku mātua—ko James mo Jessie Sinclair—ki Bronx, se fa‵kai e tasi o Niu Ioki. E isi se la taugasoa i konā, ko Willie Sneddon, telā ne vau foki mai Scotland, e pelā mo laua. I loto i se fia minute ne fetaui ei latou mo te taimi muamua, ne sau‵tala a te tokotolu konei e uiga ki olotou kāiga. Au seki fanau ei i te taimi tenei.

Ne fai atu toku mātua ki a Willie me mai tua malie fua o te Taua Lasi, ne ma‵lemu tena tamana mo tena tuagane matua i te taimi ne ‵pa te lā poti faiika i se pōmu i te Tai ki mātū. Ne fai atu a Willie, “A tou tamana ko nofo i seoli!” A Willie se tokotasi o Molimau a Ieova, kae tenei te taimi muamua ke lagona ne toku mātua a te munatonu mai te Tusi Tapu.

Ne fanoanoa toku mātua i pati a Willie me ne iloa ne tou fafine me i tena tamana se tagata ‵lei. Kae ne toe fai atu a Willie, “E mata, e fiafia koe māfai e fai atu ne au i a Iesu ne fano foki ki seoli?” Ne toe masaua ne toku mātua a te talitonuga a te lotu, telā ne fakaasi tonu mai i a Iesu ne fano ki seoli kae ne toe fakatu aka i te tolu o aso. Telā ne mafaufau ei tou fafine penei, ‘Kafai a seoli se koga e fakapuapuagatia i ei a tino ma‵sei ki te afi, kaia la ne fano ei a Iesu ki te koga tenā?’ Tenā eiloa te taimi ne kamata ei o fiafia toku mātua o sukesuke ki te munatonu. Ne kamata o kau atu tou fafine ki fakatasiga fakatasi mo te fakapotopotoga i Bronx kae ne papatiso i te 1940.

I te taimi tenā, ne seki ai ne fakamalosiga fakapito ne tuku atu ki mātua Kelisiano ke suke‵suke fakatasi mo olotou tamaliki ki te Tusi Tapu. I te taimi ko kamata ei au o sasale, ne tausi au ne toku tamana i te taimi e fano ei toku mātua ki fakatasiga mo te galuega talai i fakaotiga o vaiaso. I nāi tausaga mai tua ifo, ne kamata māua mo toku tamana o olo ki fakatasiga fakatasi mo toku mātua. Ne malosi ‵ki tou fafine i te galuega talai mo te faiga o a‵koga faka-te-Tusi tapu mo tino fia‵fia. E tonu, e isi se taimi ne fai tasi ne ia te akoga o ana tino a‵koga ona ko te mea e ‵pili a koga e ‵nofo i ei ana tino a‵koga. Ne olo tasi māua i te galuega talai i taimi e malō‵lo ei a akoga. I te auala tenā, ne tauloto ei ne au a mea e uke e uiga ki te Tusi Tapu mo te auala ke akoako ei a nisi tino ki mea kolā e fakaasi mai i ei.

 E fakatoese atu au me i taku folikiga, ne seki fiafia katoatoa au ki te munatonu. Ne manatu māmā au ki ei. Kae i te taimi ko 12 ei oku tausaga, ne fai au pelā me se tino talai o te Malo kae ne kau faeloa au ki te galuega talai talu mai loa te taimi tenā. I te taimi ko 16 ei au, ne tuku atu toku ola ki a Ieova, e auala i te papatisoga i a Iulai 24, 1954, i te fono o te atufenua i Toronto, i Kanata.

A nisi taina i te motou fakapotopotoga ne tavini atu i te kāiga Peteli. Ne lasi te lotou fakamalosiga ki a au. Ne ofo au i te lotou a‵tamai i te fai‵pati kae fakamatala a muna‵tonu mai te Tusi Tapu. E tiga eiloa ne ma‵nako oku faiakoga ke fanatu au ki te iunivesiti, ne fakamoemoe eiloa au ke fanatu ki te Peteli. Tela la, ne avatu taku tusi ke galue i te Peteli i te fono o te atufenua ne fai i Toronto. Ne toe ave foki taku fakatagi i te 1955 i se fono o te atufenua ne fai i Yankee Stadium, i Niu Ioki. E se leva, i te taimi ko 17 ei oku tausaga, ne maua ne au se ‵kamiga ke kamata o galue i te Peteli i Brooklyn i a Setema 19, 1955. I te lua o aso i te Peteli, ne kamata o galue atu au i te koga faite tusi i Adams Street Napa 117. Ne fakagalue ne au a masini kolā e ‵lomi i ei a tusi kolā e taki 32-itulau kae fakatoka ki nisi masini kolā e ‵sui ei a tusi.

Kāti i se masina mai tua i te koga ‵lomi tusi, ne avatu au ki te Matagaluega o Mekesini me ne iloa ne au o taipa. I taimi konā, ne masani o tusi lima ne taina mo tuagane a fakatuatusi kae taipa a feagaiga ‵fou o te The Watchtower mo te Awake! I nai masina mai tua ifo, ne galue au i te Matagaluega aveave tusi. Ne fakamolemole mai a Klaus Jensen, te ovasia o te matagaluega tenā, me e fiafia au o olo tasi mo te tino fakateletele motoka telā e avatu ne ia a pokisi ki te koga telā e avatu ei a tusi ki te lalolagi kātoa. E isi foki ne taga mekesini ne ‵tau o avatu ki te ofisa meli ke lafo atu ki fakapotopotoga katoa i Amelika. Ne mafaufau a te taina ko Jensen me ka aoga ki a au te galuega  tenā. E 125 pauna ne mafai ne au o sau, me i a au e pakā fua. A malaga konā ki taulaga vaka mo ofisa meli ne fesoasoani mai ke fakamalosi aka toku feitu faka-te-foitino. Ne iloa ‵lei eiloa ne te taina ko Jensen a te mea telā e ‵lei ei ki a au!

Ne faka‵fonu foki ne te Matagaluega o Mekesini se pepa fakamolemole a te fakapotopotoga mō mekesini. Tela la, ne tauloto ne au a ‵gana kolā e ‵lomi i ei ‵tou mekesini i Brooklyn kae lafo atu ki nisi kogā koga o te lalolagi. Ne seki iloa aka eiloa ne au a ‵gana e uke konei, kae ne fiafia au ke iloa atu me e lau i sefulu afe o mekesini ne lafo atu ki koga ‵mao o te lalolagi. E tiga eiloa ne seki iloa ne au a mea konā i te taimi tenā, ne maua eiloa ne au te tauliaga ke asi atu ki koga konā i tausaga fakamuli ifo.

I te 1961, ne ‵tofi au ke galue i te ofisa e onoono ki tupe telā e onoono ki ei te taina ko Grant Suiter. Mai tua o se fia tausaga, ne toe avatu au ke galue i te ofisa o Nathan Knorr, telā ne takitaki ne ia te galuega i te lalolagi kātoa i te taimi tenā. Ne fakamatala mai ne ia me i te taina e tokotasi telā ne galue i tena ofisa ka kau atu ki te Akoga mō te Galuega Talai mō se masina, kae ka oti ko galue ei a ia i te Matagaluega mō te Galuega Talai. Ne ‵tofi ei au ke sui tena tulaga kae ga‵lue fakatasi mo Don Adams. Kae ne poi au me i a Don ko te taina telā ne talia ne ia taku tusi fakatagi i te fono o te atufenua i te 1955. A te avā taina kolā ko leva ne ga‵lue i te ofisa tenā ko Robert Wallen mo Charles Molohan. Ne ga‵lue fakatasi eiloa matou tokofa mō ne tausaga e silia atu mo te 50. Se mea fakafiafia eiloa ke ga‵lue fakatasi mo vaegā tagata fakamaoni penā!​—Sala. 133:1.

Mai i te 1970, ne ‵tofi au ke faimalaga atu mō nāi vaiaso i tausaga takilua o asi atu ki nisi ofisa lagolago o te Watch Tower Society, telā ne taku sale ki asiga ki atufenua. Ne aofia i ei  a te asi atu ki kāiga Peteli mo misionale i te lalolagi kātoa, o tuku atu a fakamalosiga faka-te-agaga, kae onoono foki ki lipoti a ofisa lagolago. Se mea fakafiafia ke fetaui mo nisi o latou kolā ne fatoa oti mai i te Akoga Kiliata kae koi tumau eiloa i te tavini fakamaoni atu i olotou tōfiga i fenua konā! Se tauliaga gali kae fakafiafia ke asi atu ki fenua e sili atu mo te 90 i te galuega tenei.

Ne ‵tofi atu a tino katoa i te kāiga Peteli i Brooklyn ki fakapotopotoga kese‵kese i te kogā koga tenā o Niu Ioki. Ne ‵tofi atu au ke kau ki te fakapotopotoga i Bronx. A te fakapotopotoga muamua eiloa i te fa‵kai tenā ko oti ne vaevae ona ko te tokouke. A te fakapotopotoga eiloa tenā ne iloa e pelā me ko te fakapotopotoga muamua i Bronx telā ne kau au ki ei.

I te kogāloto o te tausaga e 1960 o vau ki mua, ne au‵mai se kāiga Molimau mai Latvia kolā ne ‵kau atu ki te fakapotopotoga i Bronx ki saute. A Livija, te tamaliki fafine matua, ne fai pelā me se paenia tumau i te otimaiga i te akoga lasaga lua. I nāi masina mai tua ifo, ne fanatu a ia ki Massachusetts o galue i te koga telā ne manakogina i ei a tino talai o te Malo. Ne kamata o tusitusi atu au ki tou fafine o fai atu a tala o te fakapotopotoga, kae ne toe tusi mai a ia o fakamatala mai a te gali o tena galuega talai i Boston.

I nai tausaga fakamuli ifo, ne fai a Livija e pelā me se paenia fakapito. Ne manako a ia o fai a mea e uke e mafai ne ia o fai i te galuega a Ieova, telā ne tusi ei tou fafine ke galue i te Peteli kae ne ‵kami atu tou fafine ke galue i konā i te 1971. Ne foliga mai me tenei eiloa te avanoaga ne tuku mai ne Ieova! I a Oketopa 27, 1973, ne avaga māua kae se tauliaga gali ke fai ne te taina ko Knorr a te lāuga o te mā fakaipoipoga. E fai mai te Faataoto 18:22: “A te tino e maua ne ia se avaga fafine ‵lei ko maua ne ia se mea ‵lei, kae e maua ne tou tagata te taliaga a Ieova.” Ne gali eiloa ki a māua mo Livija a te ga‵lue fakatasi i te Peteli mō tausaga e sili atu i te 40. Kae ne tumau eiloa māua i te ‵lago atu ki se fakapotopotoga i te kogā koga foki eiloa tenā i Bronx.

A te ga‵lue fakatasi mo te Taina ko Knorr se mea fakafiafia eiloa. A iase taina galue malosi mō te munatonu kae fiafia malosi ki misionale i te lalolagi kātoa. A te tokoukega o latou ko Molimau muamua eiloa ki fenua kolā ne ‵tofi ke ga‵lue i ei. Se mea fakafanoanoa ke kilokilo atu ki te logo‵mae o te Taina ko Knorr i te kenisa i te 1976. I se taimi e tasi, i luga i tena moega, ne fakamolemole mai a ia ke faitau atu ne au a nisi mataupu kolā ko fakatoka ke ave o ‵lomi. Ne fakamolemole mai ke kalaga ki a Frederick Franz ko te mea ke mafai foki a ia o vau kae fakalogologo ki te faitauga. Ne fatoa iloa ei ne au fakamuli me i te taimi ko se ‵lei ei a mata o te Taina ko Franz, ne fakamāumāu eiloa ne te Taina ko Knorr ana taimi avanoa ke faitau ki tou tagata a mataupu konā.

Ne mate atu te Taina ko Knorr i te 1977, kae ko latou kolā ne iloa kae a‵lofa ki a ia ne fakamafanafanagina eiloa ona ko te mea ne oti atu tena olaga i te lalolagi nei mo te fakamaoni.  (Faka. 2:10) Mai i konā, ne takitaki ei ne te Taina ko Franz a te ‵tou galuega.

Mai te taimi tenā, ne fai ne au a galuega a te failautusi ko Milton Henschel, telā ne ga‵lue tasi mo te Taina ko Knorr mō se fia sefulu tausaga. Ne fakailoa mai ne te Taina ko Henschel me i toku tiute tāua i te Peteli i te taimi tenā ko te fesoasoani atu ki te Taina ko Franz i so se auala telā e manakogina. Ne faitau faeloa ne au a mataupu ki a ia a koi tuai o ‵lomi. Ne ‵teu faeloa ne te taina ko Franz i tena mafaufau a taimi ‵gali mo te atamai fakaofoofogia ke ‵saga katoatoa atu ki mea kolā e faitau. Ko tafaga la te fakafiafia ke fesoasoani atu ki a ia i te auala tenā ke oko eiloa ki te taimi ne oti atu ei tena olaga i te lalolagi nei i a Tesema 1992!

Ko oko eiloa i te ‵vave o tausaga e 61 ne fakaaoga ne au ke tavini atu i te Peteli. Ko ‵mate katoa oku mātua mo te fakamaoni ki a Ieova, kae e olioli au ke ‵toe fetaui mo laua i se lalolagi telā e gali fakafia atu. (Ioa. 5:28, 29) E seai se mea e ofo mai ne te lalolagi mua tenei e mafai o fakatusa ki te tauliaga gali ke ga‵lue fakatasi mo tāgata mo fafine fakamaoni kolā e sui ne latou a tino o te Atua i te lalolagi kātoa. E mafai o fai ‵tonu atu māua mo Livija me talu mai tausaga i te taviniga tumau, a “te fiafia o Ieova ko te otou ‵pui malosi.”​—Nee. 8:10.

A tino katoa i te fakapotopotoga saukātoa a Ieova e tāua, kae koi tumau eiloa te galuega o muna‵tonu e uiga ki te Malo. Se mea fakafiafia kae se tauliaga ke ga‵lue fakatasi mo taina mo tuagane ma‵losi kae fakamaoni i te fia o tausaga. A te tokoukega o te kau fakaekegina kolā ne ga‵lue fakatasi mo au ko se ‵nofo nei i te lalolagi. Kae e loto fakafetai au ke maua se soa mai tino faka-te-agaga fakamaoni i te galuega a Ieova.