“KO OKO eiloa i te uke o fuataga e ‵tau o ‵kati, kae e mu‵tana a tino ga‵lue. Tela la, fakatagi atu ki te Matai o te galuega ke uga mai ne tino ga‵lue o ‵kati a fuataga.” (Luka 10:2) A pati konei kolā ne faipati ne Iesu kāti i se 2,000 tausaga ko ‵teka e fakamatala mai i ei te tulaga o Myanmar i aso nei. Kaia? I Myanmar, e nofo fua ki se 4,200 tino talai e fakasalalau atu ne latou a te tala ‵lei ki se 55 miliona o tino.

Kae ne ‵goto ‵tonu eiloa a pati a te “Matai o te galuega” ko Ieova ki loto o te fia selau o taina mo tuagane mai fenua kese‵kese, kae ne au‵mai latou ki te fenua tenei o Asia ki Saute ke fesoasoani ki te galuega ko te ‵katiga o saito i te feitu faka-te-agaga. Se a te mea ne fakamalosi aka ei latou ke tiakina olotou fenua ‵tonu? Ne fesoasoani atu pefea ki a latou ke olo atu ki te fenua tenā? Kae ne a fakamanuiaga e maua ne latou? Ke sau‵tala aka tatou ki ei.

I nāi tausaga ko ‵teka, ne pokotia a Kazuhiro, se paenia i Tiapani, ne te masaki ko te pole, galo tena mafaufau kae ne avatu ki loto i te fakaimasaki. Ne fai atu te tokita ke sē toe fakateletele a ia mō se lua tausaga. Ne poi ‵ki eiloa a Kazuhiro. ‘E mafai pefea o fakatumau ne au a te galuega ne fiafia au o fai—paenia?’ ne ‵sili ifo a ia ki a ia eiloa. Ne ‵talo faeloa a ia, kae fakamolemole atu ki a Ieova ke ‵tala aka te auala ke mafai ne ia o tumau i te tavini atu e pelā me se paenia.

E fai mai a Kazuhiro: “I se masina mai tua ifo, ne logo toku taugasoa telā ne galue i Myanmar i toku fakalavelave. Ne telefoni mai a ia kae fai mai: ‘I Myanmar, a tino e masani loa o olo i pasi. Kafai e vau koe ki konei, e mafai o faka‵soko tau galuega talai e aunoa mo se motoka!’ Ne ‵sili atu au ki toku tokita me e mata, e ‵lei loa ma fanatu au ki Myanmar faitalia toku tulaga masaki io me ikai. Ne poi au, me ne fai mai te tokita, penei: ‘E isi se tokita o te faiai mai Myanmar e asi mai ki Tiapani i te taimi nei. Ka avatu ne au koe ke fetaui mo ia. Kafai e toe pole koe, e mafai o faka‵lei ne ia koe.’ Ne fai ne au a te tali a te tokita e pelā me se tali mai i a Ieova.”

E se leva, kae ne lafo atu ne Kazuhiro se meli ki te ofisa lagolago i Myanmar kae fakaasi atu ki a latou te lā manakoga mo tena avaga ke tavini atu i te fenua tenā e pelā me ne paenia. I se lima o aso mai tua ifo, ne tali mai te ofisa lagolago, “Au‵mai, e ma‵nako matou ki paenia e tokouke!” Ne ‵togi atu ki tua ne Kazuhiro mo tena avaga ko Mari a lā motoka ki tua, fakatoka lā visa, kae ‵togi lā tiketi i te vakalele. Nei la, ko tavini atu lāua mo te fia‵fia i te potukau fai tāga i Mandalay. Ne fai mai a Kazuhiro: “E  auala i te mea tenei ne tupu, e mafau‵fau māua me ne fakamalosi aka te mā fakatuanaki e uiga ki te folafolaga a te Atua telā e maua i te Salamo 37:5: ‘Tuku atu ou ala ki a Ieova; Fakalagolago ki a ia, kae ka gasuesue a ia mō koe.’”

I te 2014, ne maua ne Molimau a Ieova i Myanmar a te tauliaga ke fai i te lotou fenua se fono fakapito o te atufenua. E tokouke a sui mai fenua fakaa‵tea ne ‵kau atu ki ei. E tokotasi mai i ei ko Monique, se tuagane telā ko 30 tupu ana tausaga mai Iunaite Sitete, telā ne fai mai, penei: “I taku fokiga mai tua o te fono o te atufenua, ne ‵talo atu au ki a Ieova e uiga ki te suā auala e manakogina ne au i toku olaga. E se gata i ei, ne fai‵pati matou mo oku mātua e uiga ki oku fakamoemoega faka-te-agaga. Ne mafau‵fau katoa matou me e ‵tau o foki atu au ki Myanmar, kae e manakogina se taimi mo ‵talo e uke a koi tuai o fai taku toe fakaikuga.” Ne fakamatala mai ne Monique a te pogai.

“Ne fakamalosi ne Iesu ana soko ke ‘‵nofo muamua o galue te ‵togi.’ Tela la, ne fesili ifo au penei: ‘E mata, e mafai o fai ne au te mea tenei? E mata, ka mafai ne au o tausi a au eiloa i te fenua tenei e aunoa mo te fakamāumāu o taimi e uke i se galuega ‵togi?’” Ne fai ‵tonu mai a ia: “Ne iloa fakavave aka ne au me e se lava aku tupe ke gasue atu ki te suā feitu o te lalolagi.” Kae ne mafai pefea o gasue atu a tou fafine ki te fenua tenā?—Luka 14:28.

E fai mai a Monique: “I se aso e tasi, ne manako mai a toku pule ki a au. Ne polepole eiloa au, mo te mafaufauga i a au ka fakamalōlō. Kae i lō te fai penā, ne fakafetai mai toku pule ona ko aku galuega ‵gali ne fai. Kae ne fai mai tou fafine me ko oti ne fakatoka ne ia ke maua ne au se ponesi, telā ko te aofaki mautinoa eiloa ne manakogina ne au ko te mea ke se manavase au ki mea tau tupe!”

A Monique ne kamata o tavini atu i Myanmar talu mai i a Tesema 2014. E pefea ana lagonaga e uiga ki tena galuega talai? “Ko oko loa toku fiafia i konei,” ko ana pati. “Ko tolu aku akoga faka-te-Tusi Tapu. A taku suā akoga ko 67 ana tausaga. E fakatalofa mai faeloa ki a au mo te fakamisikata kae ‵sai mai. I te taimi ne iloa ne ia i te igoa o te Atua ko Ieova, ne tagi tou fafine. Ne fai mai a ia: ‘Tenei eiloa te taimi muamua i toku olaga ke lagona ne au me i te igoa o te Atua ko Ieova. A koe e foliki ‵ki loa i a au, kae ne akoako ne koe au e uiga ki te ‵toe mea tāua telā ne seki iloa aka eiloa ne au.’ Ne seki ai ne aku pati ne mafai o fai atu, kae ne tagi foki au. E fai ne tala penei ke maua ne tino kolā e tavini atu i koga e manakogina i ei a tino talai se olaga fakamalie loto.” Fakamuli nei, ne maua ne Monique a te tauliaga ke kau atu ki te Akoga mō Tino Talai o te Malo.

A te suā mea telā ne fakamalosi aka ne ia a nisi tino ke olo atu ki Myanmar, ko tala e uiga ki te fenua tenei kolā ne tusi i te 2013 Yearbook of Jehovah’s Witnesses. E isi se tuagane e igoa ki a Li telā ko 30 tupu ana tausaga ne nofo i Asia ki Saute. A ia se tino e galue tumau, kae ne fakamalosi aka ne tala kolā i te Yearbook a tena manakoga ke tavini atu i Myanmar. “I te 2014 i te taimi ne kau atu au ki te fono fakapito i Yangon, ne fetaui au mo se tauavaga kolā ne tavini atu i te ‵gana Saina i Myanmar. Ona ko te mea e faipati au ki te ‵gana Saina, ne fakaiku aka ei ke fanatu au ki Myanmar o ‵lago atu ki te potukau Saina i konā. Ne ga‵lue fakatasi māua mo Monique, kae ne olo atu māua ki Mandalay. Ne fakamanuia ne Ieova māua ki galuega sē tumau ke fai pelā me ne faiakoga i te akoga tenā, kae ne maua ne māua se fale ‵togi tai pili mai. Faitalia loa te ‵vela mo nisi fakalavelave aka, e fiafia eiloa au i taku taviniga i konei. E ola eiloa a tino i Myanmar i se olaga faigofie, kae ko latou eiloa ko āva kae loto fia‵fia o fakalogo‵logo ki te tala ‵lei. Se mea fakafiafia ke lavea atu te auala e fakava‵vave ei ne Ieova a te galuega. E talitonu au me ko te loto eiloa o Ieova ke nofo atu au i Mandalay.”

Ne fakamaoni aka ne nisi tino talai a te malosi o te ‵talo. E pelā loa mo te tala a Jumpei mo tena avaga ko Nao, kolā ko taki 30 tupu lā tausaga. Ko oti ne tavini atu lāua i se fakapotopotoga fai tāga i Tiapani. Kaia ne olo atu ei lāua ki Myanmar? E fai mai a Jumpei: “Ne isi faeloa ne mā fakamoemoega mo taku avaga ke tavini atu i nisi fenua kolā e manakogina i ei a tino talai. Ne fanatu eiloa se taina mai te motou fakapotopotoga fai tāga i Tiapani ki Myanmar. E tiga eiloa e mu‵tana mā tupe ne fakatupu, kae ne ga‵sue foki māua ki konā i a Me 2010. Ne tali fiafia eiloa māua ne taina mo tuagane i Myanmar!” E pefea a lagonaga o te taina tenā e uiga ki te galuega talai i te ‵gana fai tāga i Myanmar? “E lasi ‵ki te manakoga i ei. Kafai e fakaasi atu ne māua a vitio i te ‵gana fai tāga, ne ofo masei eiloa a tino ‵tuli. Ne fia‵fia eiloa māua me ne fakaiku aka ne māua ke tavini atu ki a Ieova i konā!”

Ne mafai pefea ne Jumpei mo Nao o kufaki i mea tau tupe? “I se tolu tausaga mai tua ifo, ne fakaaoga ne māua te ukega o mā tupe ne fakatupu kae ne seki lava mā tupe ke ‵togi ki ei te mā fale mō te suā tausaga. Ne fai ne māua mo taku avaga a ‵talo e uke. I se auala fakapoi, ne maua ne māua se ‵kamiga mai te ofisa lagolago ke tavini atu māua e pelā me ne paenia fakapito sē tumau! Ne tali‵tonu māua ki a Ieova, kae ne iloa ne māua me ne seki tuku tiaki ne ia māua. Ne tausi mai eiloa a ia ki a māua i auala katoa.” Ne ‵kau atu foki a Jumpei mo Nao fakamuli nei ki te Akoga mō Tino Talai o te Malo.

Se a te mea ne fakamalosi aka ne ia a Simone, se taina telā ko 40 tupu ana tausaga, kae se tino Italia, mo tena avaga ko Anna, se tuagane ko 30 tupu ana tausaga, mai Niusila, ke olo atu ki Myanmar? “Ko tala mai te 2013 Yearbook i Myanmar!” ko te tali a Anna. Ne fai mai a Simone: “Se tauliaga eiloa ke ‵nofo atu i Myanmar. A te olaga i konei e faigofie ‵ki eiloa, kae e uke atu oku taimi ke fai te galuega a Ieova. Se mea fakafiafia ke lavea atu a te atafai telā e tuku mai ne Ieova ki a māua i te taimi e tavini atu ei i se koga telā e manakogina malosi i ei a tino talai.” (Sala. 121:5) E fai mai a Anna: “Ko sili atu nei toku fiafia i lō te taimi muamua. E maua ne māua se olaga faigofie. Ko uke atu oku taimi e fakamāumāu mo taku avaga, kae ko gasolo malosi o ‵pili māua. Ne maua foki ne māua ne taugasoa pele. A tino e se fakailoga tino ki Molimau, kae ko oko eiloa i te tokouke o tino fia‵fia i te koga talai!” I auala fea?

Ne fai mai a Anna: “I se aso e tasi, ne talai atu au ki se tamaliki fafine e akoga i te iunivesiti i te maketi kae fakatoka ke toe fetaui mo ia. I te taimi ne fetaui mo ia, ne aumai ne ia sena taugasoa. I te suā taimi, ne toe aumai ne ia nisi taugasoa. Fakamuli ifo, ne toe au‵mai nisi tino tai tokouke atu. Nei la, ko tokolima a tino e suke‵suke fakatasi mo au.” Ne fai mai a Simone: “A tino ko oko loa i te mata fia‵fia kae fia ‵logo. E tokouke a tino fia‵fia. Kae e se lava te taimi o matou ke ‵saga atu ki tino fia‵fia konā.”

Kae e a nisi auala ma‵goi e aofia i ei a te faiga o fakaikuga ke olo atu ki Myanmar? Ne fai mai a Mizuho mai Tiapani, penei: “Ne ma‵nako faeloa māua mo taku avaga ko  Sachio, ke tavini atu i se fenua telā e lasi te manakoga mō tino talai—kae i fea la? I te otiga ne fai‵tau māua ki tala i te 2013 Yearbook e uiga ki Myanmar, ne otia māua i tala fakamalosi loto i ei kae ne kamata o mafau‵fau māua me e mafai ne māua o olo atu o tavini i Myanmar.” Ne fakaopoopo mai a Sachio: “Ne fakaiku aka ne māua ke olo atu o asi mō se vaiaso fua e tasi ki Yangon, te laumua o Myanmar, ke onoono aka ki te fenua. Ne fakamalosi aka ne te tamā asiga toetoe tenā ke au‵mai māua ki konei.”

A Rodney mo tena avaga ko Jane, mai i Ausetalia, kolā ko taki 50 tupu lā tausaga, mo te lā tamaliki tagata ko Jordan mo te lā tamaliki fafine ko Danica, ne tavini atu i Myanmar talu mai te 2010. E fai mai a Rodney: “Ne otia malosi eiloa matou i te fia‵fia o tino ke tauloto e uiga ki te Atua. E fia fakamalosi atu au ki nisi kāiga ke tofotofo aka latou o tavini atu i koga e pelā mo Myanmar.” Kaia? “Se mea gali ke lavea atu te auala ne fai ne te mea tenei ke ‵pili malosi atu matou ki a Ieova! A te tokoukega o talavou e fia‵fia eiloa ki olotou telefoni, motoka, galuega ‵togi, mo nisi mea aka. Kae e fakalave‵lave eiloa mā tama‵liki i te taulotoga o pati ‵fou ke fakaaoga i te galuega talai. E taumafai lāua o tauloto ki te auala ke fakasako‵sako atu mo tino kolā e se masani ‵lei mo te Tusi Tapu, mo te auala ke tali i taimi o fakatasiga a te fakapotopotoga, kae ne mafau‵fau loto eiloa lāua ki mea faka-te-agaga e uke.”

Ne fakamatala mai ne Oliver, se taina telā ko tai kātoa tena 40 tausaga mai te Iunaite Sitete, a te pogai e gali ei ki a ia a te vaega tenei o te taviniga: “A te tavini atu ki a Ieova i koga kolā e se masani ‵lei au ki ei e aoga ‵ki eiloa. A te fanatu ki se isi koga ne fakamalosi aka i ei toku loto talitonu ki a Ieova faitalia me ne a fakanofonofoga ka oko au ki ei. A te tavini fakatasi atu mo latou kolā e seki iloa ‵lei ne au kae e ‵pau motou talitonuga, ne fesoasoani malosi mai ke lavea ne au me e seai se mea i te lalolagi tenei e mafai o fakatusa ki te tāua o te Malo o te Atua.” Nei la, koi tavini atu eiloa mo te loto finafinau a Oliver mo tena avaga ko Anna, i te ‵gana Saina.

A Trazel, se tuagane ko 50 tupu ana tausaga mai Ausetalia, ne tavini atu i Myanmar talu mai te 2004. E fai mai tou fafine: “Ki a latou kolā e ‵lei olotou fakanofonofoga, e fakamalosi atu au ke tavini atu koutou i koga kolā e lasi te manakoga i ei. Ko oti ne iloa ne au me ka fai e loto fiafia koe o tavini atu, ka fakamanuia eiloa ne Ieova au taumafaiga. Ne seki mafaufau eiloa au me ka ola eiloa au penei. A te mea tenei se fakamanuiaga sili kae fakamalie loto ne seki fakamoemoe me ka maua ne au.”

Ke fai a pati fakamalosi loto konei a tino kolā ne olo atu ki koga e lasi te manakoga i ei i Myanmar mo mea e fakamalosi ne ia koe ke mafaufau o fesoasoani atu ki tino loto ‵lei i koga talai kolā e seki ga‵lue i ei. E tonu, e fakamalosi mai a tino kolā ne olo atu ki koga e lasi te manakoga i ei penei, “Fakamolemole, vau ki Myanmar o fesoasoani mai ki a matou!”