E MA‵NAKO eiloa a tino ke ola i se olaga fiafia. Kae i aso fakaoti konei, e fepa‵ki a tino e tokouke mo fakalavelave “faiga‵ta.” (2 Timo. 3:1) E fai ne faifaiga sē fakamaoni, masaki, seai ne galuega ‵togi, te loto fanoanoa, mo nisi mea fakafanoa‵noa ke galo atu te fia‵fia o tino. E mafai foki o oko atu ki tavini a te Atua a te loto vāivāi, ko fai ei ke galo atu te lotou fia‵fia. Kafai ko tupu a te mea tenei ki a koe, e mafai pefea o toe maua ne koe a te fiafia?

Ke tali aka te fesili tenā, e ‵tau muamua mo tatou o malamalama me se a te fiafia tonu kae ne tumau pefea te fia‵fia o nisi tino faitalia a fakalavelave. Kae ka tauloto ne tatou a mea kolā e mafai ne tatou o fai ke fakatumau kae fakalasi aka te fia‵fia o tatou.

E se ‵tau mo tatou o ‵numi i te fiafia mo te mata katakata. Ke fai se fakatusa: Mai tua o te inuga ki meainu ma‵losi e uke, kāti e mafai eiloa a te tino vale o katakata faeloa. Kae kafai ko ‵lei tena vale, ko se katakata, kae ko toe foki loa a ia ki tena olaga fanoanoa kae ‵fonu i fakalavelave. E se maua ne ia te fiafia tonu mai tena katakata mō se taimi toetoe.—Faata. 14:13.

Kae e ‵kese a te fiafia tenei, se uiga fiafia telā e vau tonu loa mai te ‵kanoloto o te tino. Ko oti ne taku pelā “me se lagonaga fiafia telā e fakamalosi aka mo te iloa me ka maua io me fakamoemoe me ka isi se mea ‵lei.” A te vaegā fiafia tenei ko te fiafia telā e tumau loa i loto i te tino faitalia me ‵lei io me se ‵lei a fakanofonofoga i tafa o tatou. (1 Tesa. 1:6) E tiga eiloa e mafai ne se tino o fanoanoa ki se mea kae e maua eiloa te fiafia i tena loto. E pelā eiloa mo te taimi ne ‵kini ei a apositolo ke fakagata te lotou fai‵pati e uiga ki a Keliso. Ne “olo keatea a latou konei mai te Sanetulini mo te fia‵fia me ko taulia latou i mua o te Atua ke fakamasiasigina ona ko tena igoa.” (Galu. 5:41) Kae ko te ‵tonuga loa, a latou ne seki fia‵fia ki olotou kiniga. Kae e pelā me ne tavini a te Atua, a te fiafia tonu ne fai ei ke fakamaoni latou ki te Atua.

Ne seki fa‵nau tatou mo te fiafia tonu tenā; io me maua fua ne tatou fakafuasei. Kaia? A te fiafia tonu se vaega o te fuataga o te agaga tapu o te Atua. Mai te fesoasoani o te agaga tapu o te Atua, e mafai ne tatou o ati aka a “uiga ‵fou,” telā e aofia i ei te fiafia. (Efe. 4:24; Kala. 5:22) Kae i te taimi e ati aka ei ne tatou a te fiafia, e faigofie ke fakafesagai atu tatou ki fakalavelave o te olaga.

E manako a Ieova ke lavea ne ia a mea ‵lei i te lalolagi, kae e se ko mea ma‵sei kolā e matea sāle ne tatou i aso katoa. Kae tiga eiloa a mea konā, a amioga ma‵sei a tino ma‵sei e se ave keatea i ei te fiafia mai i a Ieova. E fai mai te Muna a te Atua: “A te koga e nofo a ia i ei e ‵malu kae gali.” (1Nofo. 16:27) E se gata i ei, a mea ‵lei e fai ne ana tavini e fai ei ko te “loto [o Ieova] ke fiafia.”—Faata. 27:11.

E mafai o fakaakoako tatou ki a Ieova mai te se manava‵se ki nisi mea māfai e se taunu ‵tou manakoga i te auala e ma‵nako tatou ki ei. I lō  te manavase, ke ‵saga tatou ki mea ‵lei e maua nei ne tatou kae faka‵tali mo te kufaki ki mea ‵gali i aso mai mua. *

E mafai foki o maua ne tatou a fakaakoakoga ‵lei o tino i te Tusi Tapu kolā ne maua ne latou te fiafia faitalia a tulaga faiga‵ta ne fe‵paki mo latou. A Apelaamo se tokotasi ne kufaki i se tulaga fakamataku i tena olaga mo fakalavalave faiga‵ta mai nisi tino. (Kene. 12:10-20; 14:8-16; 16:4, 5; 20:1-18; 21:8, 9) Faitalia a tulaga fai‵gata konā, ne fakatumau eiloa ne Apelaamo te loto fiafia. Ne maua pefea ne ia? A te fakamoemoega ke ola i te laolagi fou mai lalo i te pulega a te Mesia se mea tonu eiloa i tena mafaufau. (Kene. 22:15-18; Epe. 11:10) Ne fai mai a Iesu: “Ne fiafia malosi a Apelaamo te otou tamana kae ne fakamoemoe a ia o kilo ki toku aso kae lavea ne ia kae fiafia.” (Ioa. 8:56) E mafai ne tatou o fakaakoako ki a Apelaamo mai te mafau‵fau ki aso fia‵fia mai mua nei.—Loma 8:21.

E pelā mo Apelaamo, ne ‵saga tonu atu eiloa a te apositolo ko Paulo mo tena taugasoa ko Sila ki fakamoemoega mai te Atua. Ne ma‵losi lā fakatuanaki kae fia‵fia faeloa faitalia tulaga faiga‵ta ne fe‵paki mo lāua. E pelā me se fakaakoakoga, i te ‵otiga ne ‵kini lāua i taimi e uke kae ‵pei atu ki loto i te falepuipui, “kāti ko te valuapo, ne ‵talo kae usu ne [lāua] a pese o tavaega ki te Atua.” (Galu. 16:23-25) Ke fakaopoopo a te malosi ki lā fakamoemoega, ne tumau eiloa a Paulo mo Sila i te fia‵fia me ne logo‵mae lāua ona ko te igoa o Keliso. E mafai ne tatou o fakaakoako ki a Paulo mo Sila mai te mafau‵fau ki mea ‵lei e maua ne tatou mai te tavini atu mo te fakamaoni ki te Atua.—Fili. 1:12-14.

I aso nei, e uke a fakaakoakoga ‵lei a ‵tou kautaina i te lalolagi kātoa kolā ne tumau i te fia‵fia faitalia a fakalavelave ne fe‵paki mo latou. E pelā me se fakaakoakoga, i a Novema 2013, ne poko se Typhoon malosi ‵ki i Haiyan i te kogaloto o Filipaina, kae ne fakamasei ne ia a fale o kāiga Molimau e silia atu mo te 1,000. A George, telā ne fakamasei katoatoa tena fale i te fakai lasi o Tacloban, ne fai mai penei: “Faitalia a mea ne ‵tupu kae e fia‵fia eiloa a taina. E tai faigata ke fakamatala atu toku fiafia.” Me ne a a fakalavelave e ‵tupu ki a tatou, ka tumau eiloa tatou i te fia‵fia māfai e mafaufau ‵loto ki mea kolā ne fai ne Ieova mō tatou. Ne a foki a mea kolā ne tuku mai ne Ieova ke maua i ei ne tatou a te fiafia?

Se a te pogai tāua o te fiafia e mafai o maua ne tatou mai te ‵tou fesokotakiga mo te Atua? Mafaufau aka la: E iloa ne tatou a te Pule Sili o te lagi mo te lalolagi. A iako te ‵tou Atua, Tamana, mo te Taugasoa!—Sala. 71:17, 18.

E fakatāua foki ne tatou a te meaalofa ko te ola mo te auala e maua ei ne tatou te fiafia. (Fai. 3:12, 13) E pelā me ne tino e faite ne te Atua, e ‵taki mai ne Ieova tatou, kae e iloa ne tatou te loto o te Atua mō tatou. (Ko. 1:9, 10) Tela la, ko aoga ‵tou olaga kae ko mafai o takitakigina faka‵lei. I te suā feitu, a te tokoukega o tino e se malamalama ‵lei i te pogai e ola ei tatou. Ne faka‵mafa mai ne Paulo te ‵kesega, i ana pati: “‘Ko mata e se ‵kite mo taliga e se ‵logo, e se maua foki i loto o te tagata a mea kolā ne fakatoka ne te Atua mō latou kolā e a‵lofa ki a ia.’ Me ne fakaasi mai ne te Atua a mea konā ki a tatou e auala i tena agaga.” (1 Koli. 2:9, 10) E mata, e se fia‵fia tatou me ko malamalama tatou i te loto mo te fuafuaga a Ieova?

Ke onoono aka ki te suā mea ne fai ne Ieova mō ana tino. E mata, e se fia‵fia tatou me ko mafai o fakamagalo ‵tou agasala? (1 Ioa. 2:12) Ona ko te alofa o te Atua, e fakamoe‵moe tatou ki te lalolagi fou telā ko pili mai. (Loma 12:12) Ke oko mai ki te taimi nei, e fakatoka ne Ieova se potukau o taina tali‵tonu. (Sala. 133:1) E fakatalitonu mai a te Muna a te Atua me ka puipui eiloa ne Ieova ana tino mai i a Satani mo ana temoni. (Sala. 91:11) Kafai e mafaufau ‵loto tatou ki fakamanuiaga konei mai te Atua, ka ‵poko kae gasolo aka o lasi a te ‵tou fia‵fia.—Fili. 4:4.

E mata, e mafai ne se Kelisiano fiafia o fakalasi aka tena loto fiafia? Ne fai mai a Iesu: “Ne faipati atu ne au a mea konei ki a koutou ko te mea ke maua i loto i a koutou a te fiafia tenei i a au kae ke katoatoa foki i te otou fia‵fia.” (Ioa. 15:11) E mata, e se fakaasi mai konei me e mafai o fakalasi aka te ‵tou fiafia? A te taumafaiga ke fakalasi aka ‵tou fiafia e mafai o fakatusa ki te ‵tafuga o te afi. E ‵tau o tafu ne koe a te afi ki fafie ko te mea ke gasolo o ‵ka kae ‵vela a te afi. E pelā eiloa mo te fagai ne koe a tou te feitu faka-te-agaga e fakalasi aka ei tou fiafia. Ke masaua: A te agaga tapu o te Atua e fakalasi ne ia te fiafia. Tela la, ke ati aka ne tatou te fiafia lasi mai te akai atu faeloa ki te agaga tapu o Ieova kae ‵talo kae te mafaufau ‵loto ki tena Muna fakaosofia.—Sala. 1:1, 2; Luka 11:13.

E mafai ne koe o fakalasi aka tou fiafia mai te faiga o galuega kolā e fakafiafia atu ki a Ieova. (Sala. 35:27; 112:1) Kaia? I a tatou ne faite ke “ma‵taku ki te Atua tonu, kae faka‵logo ki ana fakatonuga, me tenei eiloa te tiute kātoa o te tagata.” (Fai. 12:13) I nisi fakamunaga, a tatou ne faite ke fai te loto o te Atua. Tela la, i te taimi e tavini ei tatou ki a Ieova, e maua ne tatou te fiafia tonu i ‵tou olaga. *

I te taimi e ati aka ei ne tatou a te fiafia tonu mai te Atua, ka sili atu te fiafia e lagona ne tatou mai i te lagonaga masani fua i ‵tou loto. E pelā me se fakaakoakoga, ka fakafiafia ne tatou ‵tou Tamana i te lagi mai te tavini atu ki a ia mo te fiafia faitalia a fakalavelave e pokotia ei tatou. (Teu. 16:15; 1 Tesa. 5:16-18) Mai te mauaga o te fiafia tonu, ka ‵teke atu ne tatou a te fia maumea i koloa o te lalolagi mo ana manakoga, kae ka ‵sala atu tatou ki avanoaga ke tuku atu tatou mo te loto fia‵fia mai te fakamuamua a te Malo o te Atua. (Mata. 13:44) Kafai e lavea ne tatou a te ‵gali o mea e fai ne tatou, ka lasi eiloa ‵tou fia‵fia, ka fia‵fia eiloa tatou ki a tatou eiloa kae fakafiafia foki ne tatou a nisi tino.—Galu. 20:35; Fili. 1:3-5.

“Kafai e fiafia kae lotomalie koe i tou olaga nei, e seai se fakalotolotolua me ka ola ‵lei kae malosi koe i aso mai mua.” Konā eiloa a pati a se tino sukesuke i te Univesiti o Nebraska i te Iunaite Sitete e uiga ki te ola ‵lei mo te ma‵losi o tino e tokouke. E ‵lago atu eiloa a pati konā ki te Tusi Tapu, telā e fai mai penei: “A te loto fiafia se vailakau ‵lei.” (Faata. 17:22) Ao, kafai e fakalasi aka tou fiafia, e maua eiloa ne koe te ola ‵lei mo te malosi.

Faitalia me ola tatou i te taimi faigata tenei, e mafai o ati aka ne tatou te fiafia tonu kae seai se gataga mai te ‵talo atu ki te agaga tapu, fai a sukesukega, kae mafaufau ‵loto ki te Muna a Ieova. Kae e mafai o fakalasi aka ‵tou fiafia mai te mafau‵fau ki fakamanuiaga e maua nei ne tatou, fakaakoako ki te fakatuanaki o nisi tino kae fakamuamua a te faiga o te loto o te Atua. I auala konei, e ‵tonu ei a pati a te Salamo 64:10, telā e fai mai penei: “A tino amio‵tonu ka fia‵fia i a Ieova kae faka‵lafi atu ki a ia.”