E MATA, e iloa ne koe se taina io me se tuagane ne fanatu ki se fenua fakaa‵tea telā e lasi te manakoga i ei mō tino talai o te Malo? E masani o fai atu tatou me i Molimau penei e fia‵fia o ga‵lue i koga kolā e lasi te manakoga i ei. E mata, kai ‵sili ifo eiloa koe penei, ‘Se a te mea e fakamalosi aka ei latou ke tavini atu i fenua ‵mao? E fakatoka pefea latou mō te vaega o te taviniga tenei? E mata, e mafai o aofia au i ei?’ E tonu, a te auala ‵lei ke maua a tali ki vaegā fesili penā ko te fai‵tau ki tala o taina mo tuagane konei. Tela la, ke na fai ne tatou a te mea tenā.

Se a te mea ne fai ei ke kamata o mafaufau koe e uiga ki te tavini atu i se fenua fakaa‵tea telā e lasi te manakoga i ei? A Amy, telā ko 30 tupu nei ana tausaga, ne vau mai i Amelika. E fai mai tou fafine, penei: “Ko leva ne mafaufau au i se fia o tausaga e uiga ki te tavini atu i se fenua fakaa‵tea, kae e foliga mai me se fakamoemoega telā e se mafai o kausaki atu ki ei.” Se a te mea ne ‵fuli i ei tena kilokiloga? “I te 2004, ne ‵kami au ne se tauavaga kolā e ga‵lue i Belize, ke āsi atu kae paenia fakatasi mo laua mō se masina e tasi. Ne fanatu eiloa au—kae ne fiafia ‵ki eiloa au ki ei! I se tausaga mai tua ifo, ne fanatu au ki Ghana o tavini atu i ei e pelā me se paenia.”

I nāi tausaga ko ‵teka atu, a Stephanie, telā ko 20 tupu nei ana tausaga kae nofo foki i Amelika, ne iloilo aka ne ia ana fakanofonofoga kae mafaufau aka, penei: ‘Au e malosi ‵lei kae e seai ne oku tiute faka-te-kāiga. Ko tena uiga, e mafai eiloa o uke atu aku mea e fai mō Ieova i lō te taimi nei. Ne fakamalosi aka ne te iloiloga totino tenā ke fanatu tou fafine ki Ghana o fakalauefa atu tena taviniga. A Filip mo Ida, se tauavaga paenia koi fo‵liki mai Denmark, ko leva eiloa ne mafau‵fau ke olo atu ki se koga talai telā e lasi te manakoga i ei. Ne salasala ne laua a auala ke mafai o fakataunu te lā fakamoemoega tenā. “I te taimi ne maua ei ne māua se avanoaga,” ko muna a Filip, “e pelā eiloa me ko Ieova ko fai mai ki a māua, penei: ‘Na ga‵sue!’ ” I te 2008, ne olo atu laua ki  Ghana kae tavini atu i konā i tausaga e silia atu mo te tolu.

A Hans mo Brook, se tauavaga paenia kolā ko taki 30 tupu lā tausaga, e ga‵lue i Amelika. I te 2005, ne fesoasoani atu laua ki te matagaluega mō fakalavelave ‵tupu o te natula mai tua o te Alikeni ko te Katrina. Fakamuli ifo, ne tusi atu laua ke fesoasoani ki galuega fakatu‵tu i te lalolagi kātoa kae ne seki maua ne laua se ‵kamiga. Ne fai mai a Hans, penei: “Kae ne lagona ne maua se lāuga i se fono o te atufenua e uiga ki pogai ne talia ei ne te tupu ko Tavita me ka se faite ne ia a te faletapu, tela la, ne ‵fuli tena fakamoemoega. Ne fesoasoani mai a te manatu tenā ke lavea ne māua me se mea ‵lei ke ‵fulifuli a fakamoemoega faka-te-agaga o se tino.” (1 Nofo. 17:1-4, 11, 12; 22:5-11) Ne toe fakaopoopo mai a Brook penei, “Ne manako a Ieova ke ‵sala atu māua ki nisi avanoaga kolā koi ma‵tala.”

I te taimi ne lagona ei ne laua a tala mai lā taugasoa kolā ne tavini atu i nisi fenua, ne fakamalosi aka a Hans mo Brook ke taumafai o olo atu o paenia i nisi fenua. I te 2012, ne olo atu laua ki Ghana kae ne mafai o tavini atu i konā mō se fa masina, mai te fesoasoani atu ki te fakapotopotoga fai tāga. E tiga eiloa ne ‵tau o ‵foki atu laua ki Amelika, ne fakamalosi aka ne te lā taviniga i Ghana ke fakamuamua ne laua a te Malo i lā olaga. Nei la, ko fesoasoani atu laua ki te faitega o se ofisa lagolago i Micronesia.

Ne fakatoka pefea koe ke tavini atu i koga kolā e lasi te manakoga i ei? “Ne fai aku sukesukega i mataupu o te Watchtower e uiga ki te tavini atu i koga kolā e lasi te manakoga i ei,” ko muna a Stephanie. * “Ne sau‵tala foki au mo toeaina o te fakapotopotoga mo te ovasia o te fenua mo tena avaga e uiga ki toku manakoga ke tavini atu i nisi fenua. Mai mea katoa loa, ne aofia ne au toku fakamoemoega i aku ‵talo ki a Ieova.” I te taimi foki tenā, ne fakafaigofie ne Stephanie tena olaga, kae ne mafai ei o ‵teu ana tupe ke ‵lago atu ki a ia fafine māfai ko fanatu o tavini i te suā fenua.

Ne fai mai a Hans: “Ne ‵talo atu māua ki a Ieova mō se takitakiga, me ne ma‵nako  māua o olo atu ki te koga telā e manako a ia ki ei. Ne aofia foki i mā ‵talo a te taimi tonu telā ne ‵tau o kamata i ei te mā galuega e ‵tusa mo ma fakatokaga.” Ne lafo atu ne laua a tusi ki ofisa lagolago e fa. I te taimi ne maua ei ne laua se tali fakafiafia mai te ofisa lagolago i Ghana, ne faima‵laga atu laua ki ei, kae fakaiku aka ke ‵nofo lāua i konā mō se lua masina. Ne fai mai a Hans, penei: “Ne fia‵fia māua o ga‵lue fakatasi mo te fakapotopotoga, telā, ne toe ‵nofo atu ei māua.”

A George mo Adria, se tauavaga mai Kanata, kolā ko taki 30 tupu lā tausaga, ne masaua faeloa ne laua me e fakamanuia ne Ieova a fakaikuga ‵lei, kae e se fua ko fakatokaga ‵lei. Tela la, ne fai ne laua a fakaikuga ‵lei ke kausaki atu ki lā fakamoemoega. Ne fesokotaki atu laua ki se tuagane telā ne tavini atu i se koga telā e lasi te manakoga i ei i Ghana, kae ‵sili atu ne lāua a fesili e uke ki tou fafine. Ne tusi atu foki laua ki te ofisa lagolago i Kanata mo Ghana. Ne fai mai a Adria, penei: “Kae ne ‵sala atu māua ki auala ke tai fakafaigofie aka mā olaga.” Ne fesoasoani atu a fakaikuga konā ke mafai o olo atu laua ki Ghana i te 2004.

Ne a mea faiga‵ta ne fakafesagai mo koe i te taimi ne fanatu ei koe ki te suā fenua, kae ne mafai pefea o kufaki ne koe a mea konā? E pelā mo Amy, ne fakafesagai atu a ia ki te tulaga faigata, ko te solopū ki kāiga. “Ne ‵kese ‵ki eiloa a mea i te taimi tenei mo mea kolā ne masani o fai ne au.” Se a te mea ne fesoasoani atu ki tou fafine? “A sau‵talaga i te telefoni mo oku kāiga kolā e fakaasi mai te lotou loto fia‵fia ki taku galuega, ne fesoasoani mai ke tuku i toku mafaufau a te pogai ne fai ei taku fakaikuga ke fanatu ki suā fenua. Fakamuli ifo, ne fakaaoga ne matou a polokalame vitio (video chats) i te itaneti ke sau‵tala mo kāiga. Ona ko te mea ko mafai o  lavea ne au oku kāiga, penā foki latou ki a au, ne seki foliga mai pelā me ‵nofo ‵mao latou mai i a au.” Ne fai mai a Amy me i te fai taugasoa ki se tuagane i te fenua tenā, ne fesoasoani atu ke iloa ‵lei ne ia a tuu kese‵kese. “Ne fai toku taugasoa e pelā me ko toku faka‵naga māfai e se malamalama au i faifaiga a tino i konā. Mai tena fesoasoani, ne tauloto ne au a mea kolā e ‵tau o fai ne au, mo mea kolā e ‵tau o ‵kalo keatea mai i ei, kae ne aoga i te faiga o taku galuega talai mo te fiafia.”

Ne fakamatala mai ne George mo Adria, me i te taimi muamua ne olo ei laua ki Ghana, ne fai eiloa pelā me ko ‵foki loa lāua ki aso mua. “I lō te fakaaoga o se masini tagatu, ne fakaaoga ne māua a paketi. Ne foliga mai me i te fakatokaga o se meakai e leva atu fakafia i lō mea kolā ne masani māua ki ei,” ne fai mai a Adria. “Kae e se leva, a mea kolā ne faiga‵ta muamua, ne fai pelā me ne mea ‵fou ne tauloto ne māua.” Ne fai mai a Brook, penei: “Faitalia a fakalavelave kolā e fe‵paki mo paenia, kae e maua eiloa ne matou se olaga fakamalie loto. Kafai ko tuku fakatasi katoa a tala fakamalosi loto a matou, e fai eiloa pelā me se teu pulalakau gali telā e tāua ‵ki.”

Kaia e gali ei ki a koe a te vaega o te taviniga tenei o te Malo? “A te talai atu i se koga talai telā e tokouke a tino e fetaui mo koe e fia‵fia ‵ki o tauloto ki te munatonu kae ma‵nako o suke‵suke fakatasi mo koe ki te Tusi Tapu i aso katoa, se mea fakafiafia eiloa ki a au,” ko muna a Stephanie. “A te fanatu o tavini atu i se koga telā e lasi te manakoga i ei se tasi o fakaikuga ‵lei ne fai ne au!” I te 2004, ne avaga a Stephanie ki a Aaron, kae nei la, ko tavini atu laua i te ofisa lagolago i Ghana.

“Ko oko eiloa i te gali ki a au te taviniga tenei,” ko muna a Christine, se paenia mai Siamani telā ko 30 tupu nei ana tausaga. Ne tavini atu a Christine i Bolivia a koi tuai o fanatu a ia ki Ghana. Ne toe fai mai tou fafine, penei: “Ona ko te ‵nofo ‵mao mai i kāiga, e ‵talo faeloa au ki a Ieova mō se fesoasoani. Ne fai eiloa a ia e pelā me se tino tonu ki a au i lō taimi muamua. Ko lavea foki ne au a te fealofani tu ‵kese o tino o Ieova. Ne fai ne te taviniga tenei ke maumea toku olaga i te feitu faka-te-agaga.” Ne avaga fakamuli a Christine ki a Gideon, kae koi tavini fakatasi atu nei laua i Ghana.

Ne fai mai ne Filip mo Ida a mea kolā ne fai ne laua ke fesoasoani atu ki akoga faka-te-Tusi Tapu ke ga‵solo ki mua. “Ne masani o nofo ki te 15 io me silia atu a mā a‵koga faka-te-Tusi Tapu, kae ne tuku ifo ne māua ki te taki 10 i te tino, ko te mea ke mafai o akoako faka‵lei ne māua a mā a‵koga faka-te-Tusi Tapu. E mata, ne maua ne tama‵liki a‵koga a mea aoga? Ne fai mai a Filip: “Ne suke‵suke fakatasi māua mo te talavou e igoa ki a Michael. Ne fai tena akoga i aso katoa kae fakatoka faka‵lei eiloa tou tagata ki ei, tela la, ne fakaoti ne māua a te tusi ko te Akoakoga a te Tusi Tapu i se masina. Mai tua ifo, ne fai a Michael e pelā me se tino talai seki papatiso. I tena aso muamua i te galuega talai, ne ‵sili mai tou tagata ki a au: ‘E mafai o fesoasoani mai koe ki aku a‵koga faka-te-Tusi Tapu? Ne kilo atu au kae poi. Ne fai mai a Michael me ko oti ne kamata o fai ne ia a akoga faka-te-Tusi Tapu e tolu kae manako a ia ki se fesoasoani i te faiga o akoga konā.” Mafaufau la me ne lasi ‵ki te manakoga mō faiakoga, kae ne fai foki a akoga faka-te-Tusi Tapu mo fai ne faiakoga!

Ne fakamatala mai ne Amy a te auala ne lavea fakavave ei ne ia a te lasi o te manakoga: “Mai tua malie o taku okoatuga ki Ghana, ne talai atu matou i se fa‵kai foliki kae ‵sala atu ki tino ‵tuli. Ne maua ne matou se tokovalu o tino ‵tuli i te fa‵kai tenā!” Mai tua malie, ne avaga a Amy mo Eric, kae ne tavini fakatasi atu laua e pelā me ne paenia fakapito. Ne ‵kau atu laua ki se fakapotopotoga fai tāga ke fesoasoani atu ki tino talai ‵tuli e silia atu mo te 300 e pelā foki mo tino fia‵fia i te fenua. E pelā mo George mo Adria, a te tavini atu i Ghana ne fesoasoani atu ki a laua ke mafai o fai pelā me ne misionale. Tela la, se mea fakafiafia i te taimi ne maua ei ne laua se ‵kamiga ke ‵kau atu ki te vasega 126 i te Akoga i Kiliata! I aso nei, ko tavini atu nei laua e pelā me ne misionale i Mozambique.

Se mea fakamafanafana loto ke lavea atu a te tokoukega mai nisi fenua e ga‵lue ma‵losi fakatasi mo taina mo tuagane i te ‵katiga o te saito. (Ioa. 4:35) I vaiaso takitasi i te tausaga, e fakatautau ki se toko 120 o tino e papatiso i Ghana. E pelā mo te toko 17 kolā ne olo ki Ghana ona ko te lasi o te manakoga i ei, e lau i afe o tino talai i te lalolagi kātoa ko oti ne fakamalosigina ne te alofa ki a Ieova ke “ofo atu ne latou a latou eiloa mo te loto fia‵fia.” E tavini atu nei latou i koga kolā e lasi te manakogina o tino talai o te Malo i ei. E mautinoa eiloa me e fakafiafia ne tino ga‵lue loto fia‵fia konei a te loto o Ieova!—Sala. 110:3; Faata. 27:11.