MŌ TAUAVAGA
2: Ga‵lue Tasi
TENA UIGA
Kafai e ga‵lue fakatasi lāua i se fakaipoipoga, a te tagata mo te fafine avaga e fai eiloa pelā me se pailate mo te pailate fesoasoani telā e tasi lā fakasologa o te lā oloolo malaga. Faitalia me mafai o ‵sae aka a mea faiga‵ta, e mafaufau eiloa te tauavaga penei “a tāua” i lō te fai atu penei “ko au.”
FAKATAKITAKIGA MAI TE TUSI TAPU: “Tenā ko se tokolua ei lāua kae ko fai lāua mo foitino e tasi.”—Mataio 19:6.
“A te tagata avaga mo te fafine avaga e ‵tau o ga‵lue fakatasi ko te mea ke iku manuia.”—Christopher.
TE POGAI E TĀUA I EI
Kafai e sae aka se kinauga, a te tagata mo te fafine avaga kolā e se ga‵lue fakatasi ka iku atu fua ki te fakamasei te suā tino ki te suā tino i lō te faka‵lei aka a te fakalavelave. A fakalavelave fo‵liki ka iku atu fua ki fakalavelave ‵lasi.
“A te ga‵lue tasi ko te ‵toe vaega tāua o te fakaipoipoga. Moi fai e se ga‵lue tasi au mo taku avaga tagata, penei e fai eiloa māua e pelā me ne tino e potu tasi fua i lō te fai e pelā me se tauavaga—ne tino tokolua kolā e ‵nofo tasi kae e se fai fakatasi a lā mea maise eiloa māfai e fai a fakaikuga tāua.”—Alexandra.
MEA E MAFAI O FAI NE KOE
KE TOFOTOFO AKA KOE KI EI
-
E mata, e kilo atu au ki tupe katoa kolā ne ga‵lue ne au me i a “aku katoa”?
-
Ke maua se malōlōga ‵lei, e mata, e manakogina ei ke fano au ki se koga tai ‵mao e aunoa mo taku avaga?
-
E mata, e taumafai au o faka‵mao mai i kāiga o taku avaga, e tiga eiloa te ‵pili o tena fesokotakiga mo latou?
KE SAU‵TALA KI EI FAKATASI MO TAU AVAGA
-
Ne a feitu i te tā olaga fakatauavaga e ga‵lue fakatasi ei tāua?
-
Ne a feitu e mafai o momea aka te ‵lei i ei?
-
Ne a auala e mafai o fai ne tāua ko te mea ke momea aka ki luga a te loto fiafia o ga‵lue fakatasi?
NISI MANATU FESOASOANI
-
Ke fakaataata aka me tafao atu koe i te tafaoga ko te tenisi kae e tu atu koe i te suā feitu o te nete kae ko tau avaga i te suā feitu. E ui i ei, ne a auala e mafai ne koe o fai ke kau atu koe ki tou avaga ko te mea ke ‵kau tasi koulua?
-
Sa mafaufau penei, ‘E mafai pefea o manumalo au?’ kae ke mafaufau penei, ‘E mafai pefea o manumalo tāua?’
“Ke se toe saga atu me ko oi e sao io me ‵se. E se tāua eiloa a mea konā i te mauaga o te filemu mo te kau fakatasi i tau fakaipoipoga.”—Ethan.
FAKATAKITAKIGA MAI TE TUSI TAPU: “Ke se onoono fua koutou ki mea e ‵lei ei koutou kae ki mea foki e ‵lei ei a nisi tino.”—Filipi 2:3, 4.
