A faifaiga ‵lei ne vaega uiga totino kolā e ‵tau o ola koe i ei i aso takitasi. E penei me se fakaakoakoga, e mata, e taumafai koe o fakamaoni i au mea katoa e fai? Kafai e penā loa, e manako loa koe o faka‵goto a te uiga tenā ki loto o au tama‵liki.

E aofia foki i loto i faifaiga a uiga ‵lei e fakaasi atu. E pelā me se fakaakoakoga, a te tino e uiga ‵lei e loto finafinau o fai se mea, e se uiga fāpito, kae mafaufau ki te ‵lei o nisi tino—ko uiga ‵lei kolā e mafai o ati aka ne se tino i te taimi koi tupu aka ei.

FAKATAKITAKIGA MAI TE TUSI TAPU: “Ke fakamasani se tamaliki ki te auala e ‵tau o fano a ia i ei; Kafai ko matua a ia ka se tiaki eiloa ne ia te auala tenā.”—Faataoto 22:6; fakamatalaga mai lalo.

Gasologa o poto ‵fou i aso nei, e tāua ‵ki eiloa a faifaiga ‵lei. “A faifaiga ma‵sei ko mafai fua o maua i se tivaisi i so se taimi,” ko pati a se mātua e igoa ki a Karyn. “E mafai eiloa o sagasaga tasi atu tatou mo ‵tou tamaliki kae e onoono atu latou ki se ata se ‵lei!”

FAKATAKITAKIGA MAI TE TUSI TAPU: “Tino ma‵tua . . . ko latou kolā ne fakaaoga ne latou kae ne akoako i ei te malosi o olotou mafaufau ke fakavasega aka ei a te mea tonu mai te mea ‵se.”—Epelu 5:14.

A uiga ‵lei e tāua foki. E aofia i ei te akoako atu a uiga āva i tamā mea fo‵liki (e penei mo te “fakamolemole” mo te “fakafetai”) kae fakaasi atu foki te atafai ki nisi tino—ko faifaiga kolā ko faigata o lavea atu i aso nei, me i tino ko ga‵solo o ‵saga malosi atu ki tivaisi i lō te saga atu ki tino.

FAKATAKITAKIGA MAI TE TUSI TAPU: “E pelā foki mo mea kolā e ma‵nako koutou ke fai atu ne tino ki a koutou, ke fai foki ne koutou ki a latou.”—Luka 6:31.

Ke fakaasi atu i au faifaiga ‵lei mo au amioga ‵lei. E pelā me se fakaakoakoga, e fai mai a sukesukega ne fai me i talavou kolā e ‵teke atu ki faifaiga fakatauavaga sē ‵tau ko latou kolā ko oti ne akoakogina faka‵lei me i te faifaiga tenei e ‵se.

NISI MANATU FESOASOANI: Ke fakaaoga se tala fakamuli nei ke kamata aka ki ei se sautalaga e uiga ki faifaiga. E pelā me se fakaakoakoga, kafai e logo aka i se tala e uiga ki faifaiga fakasaua, e mafai e fai atu koe: “Ko oko eiloa te ma‵sei te auala e fakaasi atu i ei ne tino a te vaega kaitaua penā ki nisi tino. E mata, se a tau faka‵tau, se a te auala ne takitaki atu i ei latou ke fai penā?”

“E tai faigata eiloa ki tama‵liki ke filifili aka te mea ‵lei mai te mea masei māfai e se iloa ne latou te mea ‵lei mai i te mea masei.”—Brandon.

Ke akoako atu a uiga ‵lei. Ke oko foki eiloa ki tamā tama‵liki e mafai o tauloto ke iloa o fai atu penei “fakamolemole” mo te “fakafetai” kae fakaasi atu foki te atafai ki nisi tino. “Kafai e uke a mea e aofia i ei a tama‵liki i loto — i te kāiga, te akoga, io me ko te koga e nofo i ei latou—ko te faigofie foki o fakaasi atu ne latou a faifaiga a‵lofa atafai kolā e aoga ki tino katoa, kae e se ki a latou fua,” ko pati mai i te tusi ko te Parenting Without Borders.

NISI MANATU FESOASOANI: Ke tuku atu ne galuega ke fai ne tama‵liki ko te mea ke tauloto ne latou te tāua o te faifaiga ‵lei ke fesoasoani atu latou ki nisi tino.

“Kafai ko masani au tama‵liki ki te faiga o galuega i te taimi nei, e se ‵fou ki a latou māfai ko nofo tokotasi eiloa latou. Te tausi atu ki nisi tiute ko leva eiloa ne fai e pelā me se vaega o te lotou olaga.”—Tara.