I nāi vaiaso mai mua nei, ka fai eiloa a palota i nisi fenua i te lalolagi. E fai ne tino a fakaikuga tāua e uiga ki takitaki kolā ka filifili ne latou.

 Ne a pati a te Tusi Tapu?

 E fakaasi mai i te Tusi Tapu me isi se gataga ki mea e mafai o fai ne takitaki katoa o te lalolagi.

•   “Sa tali‵tonu ki pelenise io me ki se tama a se tagata, telā e se mafai o aumai ne ia te fakaolataga. E fano ki tua tena mānava, e foki atu a ia ki te laukele; i te aso eiloa tenā e fakagata i ei ana mafaufauga.”—Salamo 146:3, 4.

 Ke oko foki loa ki toe takitaki ‵lei, ka ‵mate atu fakamuli. E se gata i ei, e se mafai o mautinoa i a latou me ka fakatumau eiloa ne tino kolā e ‵mai i olotou tua a olotou galuega ‵lei.—Failauga 2:18, 19.

 A te ‵tonuga loa, e fakaasi mai i te Tusi Tapu me e seai eiloa se fakatokaga ne fai ke pule atu a tino ki a latou eiloa.

•   “E seai se pule a te tagata ke fakatonutonu ne ia tena auala.”—Ielemia 10:23.

 E mata, e isi se tino e mafai o fai pelā me se takitaki ‵lei i aso nei?

 E fakamatala mai i te Tusi Tapu me ko oti ne ‵tofi aka ne te Atua a te ‵toe takitaki ‵lei kae fakatuagagina: ko Iesu Keliso. (Salamo 2:6) A Iesu ko te Tupu i te Malo o te Atua, se pulega telā e pule mai i te lagi.—Mataio 6:10.

 E mata, ka filifili ne koe te pulega a Iesu? E fakaasi mai i te Tusi Tapu a te tāua o te filifiliga tenā:

•   “Fakaaloalo atu ki te tama tagata [Iesu Keliso], i te Atua ma kaitaua malosi kae ka ‵mate ei koutou i te auala, me i Tena kaitaua e oso fakavave aka. E fia‵fia a latou katoa kolā e faka‵lafi atu ki a Ia.”—Salamo 2:12.

 Tenei te taimi ke na fai tau fakaikuga. E fakaasi mai i valoaga i te Tusi Tapu me i te pulega a Iesu ne kamata i te tausaga ko te 1914 kae ko pili fua o sui ne te Malo o te Atua a malo katoa o tāgata.—Tanielu 2:44.

 Ke tauloto ki mea e uke e uiga ki te auala ke ‵lago atu ki te pulega a Iesu, faitau ki te mataupu ko te “Filifili ke ‵Lago Atu Nei ki te Malo o te Atua!”