Mudumbu Barbara Osmyk-Urban, uyo wakulera yekha ŵana ndipo wakukhala ku Rzeszów, Poland, wakasangirapo mwaŵi panyengo ya kusopa kwa mbumba kuti wasambizge ŵana ŵake ŵaŵiri wa vyaka 10 Jakub na wa vyaka 8 Nina, kuti ŵaŵenge na mtima wakupokelera ŵalendo na walusungu. Mbumba iyi yikalondezga ivyo yikasambira. Kufuma waka apo nkhondo yikambira ku Ukraine pa February 24, 2022, mbumba iyi yapokelera ŵabali na ŵadumbu ŵakujumpha 20.

Apo ŵabali na ŵadumbu ŵithu ŵakuchimbira kufuma ku Ukraine kuluta mu vigaŵa ivyo vinthu viliko makora, Ŵakaboni ku Poland na ŵa mu vyaru vinyake ŵakuŵapokelera mu nyumba zawo na kuŵawovwira mu nthowa zinyake. Kufika pasono Ŵakaboni 11,000 ŵa ku Ukraine ŵachimbilira ku Poland. Pa nyengo ya nkhondo, ŵanalume ŵa ku Ukraine ŵa vyaka vya pakati pa 18 na 60 ŵakuzomerezgeka yayi kufuma mu charu chawo. Ndipouli, ŵanalume awo ŵachali kulera ŵana ŵatatu ŵachokoŵachoko ŵakuzomerezgeka kufuma.

Barbara wakuti: “Awo ŵakuchimbira ku Ukraine mba mu mbumba yithu yauzimu.” Ŵana ŵake nawo ŵali na maghanoghano gheneghagha gha chitemwa cha paubali. Jakub na Nina mwakukhumbisiska ŵakafuma mu vipinda vyawo vya kugona kuti mugonenge ŵalendo. Pakuti ŵakuyowoya viyowoyero vyakupambana, ŵakupulikana kwizira mu kumwemwetera, kuhagana, na kulira. Awo ŵakachimbira kukwawo ŵati ŵaluta waka, Jakub wakafika na pakuyowoya kuti mu nyumba mwati waka yiii ndipo wakapempha amama ŵake usange ŵangafiska kupokelera ŵabali na ŵadumbu ŵanyake.

Mubali Łukasz Cholewiński na Rafał Jankowski ŵakajipeleka kuyegha vinthu vyakukhumbikwa na kuluta navyo ku Ukraine. Ŵabali aŵa ŵakuti ŵakawona ŵanakazi na ŵana ŵanandi ŵakulira kulindilira kuti ŵajumphe pa boda mwakuti ŵasangeko chivikiliro. Łukasz wakuti: “Chakukondweska ntchakuti para tasangana na ŵabali na ŵadumbu ŵithu ŵakaŵanga ŵakukondwa.”

Ulendo wakuluta ku Ukraine na kukawera ukatora maora ghanayi. Wovwiri wati wafika, ŵabali ku Ukraine ŵakagaŵa wovwiri uwu mu charu chose ichi. Pasono pakusoŵa na munthu yayi wakuti wakapeleke wovwiri ku Ukraine nangauli kuchita nthena kukuŵa kwakofya. Rafał wakuti: “Ni mwaŵi wapadera chomene kovwirapo.”

Mudumbu Elżbieta Ustrzycka, uyo wakukhala ku Rzeszów, wakulongosora umo wakajipulikira wati wapokelera Ŵakaboni ŵakufuma ku Ukraine pa nyumba pake, wakati: “Nkhakhwaskika chomene na ivyo ŵalara ŵa mu mpingo mwane ŵakachita pakwiza na mbumba izi, ŵakenda usiku pakati uku ŵayegha ŵana awo ŵakaŵa kuti ŵagona. Ivyo ŵakachita apa ni vyakuti ningaviluwa luŵiro yayi.”

Mubali Bartłomiej Figura njumoza mwa ŵalara awo ŵakuŵikapo mtima chomene pa mulimo wawo. Iyo pamoza na muwoli wake, Estera, ŵakulutanga ku boda panji ku malo ghakukwelera sitima kuti ŵakawovwire Ŵakaboni ŵanyawo kuchimbilira ku malo gha chivikiliro. Nyengo zinyake, ŵakuyileka nyumba yawo kuti mukhalenge ŵabali. Para ŵangafiska ŵakupelekaso wovwiri wa ku thupi.

Bartłomiej wakuti: “Tili ŵa mu mbumba yimoza. Tikujiwona kuti tili pamoza chomene na ŵabali na ŵadumbu ŵithu. Para tikujipeleka, kanandi tikujiwonera tekha umo Yehova wakukhorweskera vyakukhumba vya Ŵakaboni ŵanyithu.”

Kufika pasono, ŵabali ŵithu ŵa ku Poland ŵatumizga tumathumba twa wovwiri twakukwana 23,000, uto mukuŵanga chakurya, vyakovwira kuti paŵenge utozi na vinthu vinyake.

Tili na chigomezgo chose kuti Yehova walutilirenge kuŵapa vyakukhumba vyawo ŵabali na ŵadumbu ŵithu ŵa ku Ukraine kwizira mu Ŵakaboni ŵanyawo awo ŵakulutilira kupeleka mwawanangwa.—Zintharika 11:24; Ŵaroma 12:13.