Luzon

• Pa November 11, 2020, chimphepo chakuchemeka Typhoon Vamco (icho chikumanyikwaso kuti Ulysses) chikaputa ku Patnanungan mu chigaŵa cha Quezon, kufuma apo chikasakaza vinthu vinandi mu vigaŵa vya Luzon

• Chipempho cha Typhoon Vamco, ntchimphepo cha nambara 21 kutimba charu cha Philippines chaka chino pera, ndipo chapangiska kuti maji ghatutuke chomene kuluska kumasinda kose mu charu ichi

• Chimphepo ichi chikiza pachali pandajumphe sabata ziŵiri kufuma apo chimphepo chinyakeso chikuru chakuchemeka Typhoon Goni, icho ŵakuti ntchimoza mwa vimphepo vikuru chomene kutimba Philippines kwambira mu 2013, ndipo chikasakaza vinthu ku vigaŵa vya Luzon

• Chivula icho chikalondezgana na vimphepo ivi chikazuzga uheni chomene maji gha mu madamu ghakurughakuru. Ichi chikapangiska kuti ŵalaraŵalara ŵajure madamu agha, ndipo maji ghakapongokera mu vigaŵa ivyo chimphepo cha Typhoon Vamco chikafikako yayi

• Mabanja ghakujumpha 600 ghakachimbira mu nyumba zawo chifukwa cha kututuka kwa maji. Ŵanyake ŵa iwo ŵakachimbilira pachanya pa nyumba zawo kuwopa vimaji ivyo vikazuranga m’paka apo ŵanthu ŵakaŵathaskira

• Mubali munyake wachinyamata wakapwetekeka gilasi lakusweka lati lamutimba kumaso. Sono vinthu vikusinthako

Lipoti lakwambilira likulongora kuti:

• Maji ghakazura mu Nyumba za Ufumu 6 kweniso ofesi yakung’anamulirako mabuku

• Nyumba pafupifupi 20 zikanangika

• Nyumba yimoza yili kunangikirathu

• Ŵalaŵiliri ŵa dera pamoza na ŵalara mu mipingo ŵakapelekapo wovwiri wakwambilira, ŵakapeleka chakurya, maji, na pakugona ku awo ŵakachimbira mu nyumba zawo

• Mabanja ghanyake ghali kuwelera ku nyumba zawo kuti ŵakambe ntchito ya kukapa vimaji na kutozga

• Magulu ghatatu gha Makomiti Ghakovwira Para Kwachitika Soka ghakwendeska ntchito ya kupeleka wovwiri

• Ŵabali ŵakupwelelera chomene kuti ntchito ya kupeleka wovwiri yendenge mwakukolerana na fundo zakujivikilira ku muliri wa COVID-19

Tikumanya kuti Yehova waŵasungilirenge ŵabali na ŵadumbu ŵithu aŵa mu nyengo yakusuzga iyi. Tikulindilira mwakunweka nyengo iyo ŵanthu wose ŵa Yehova ŵazamukhala mwamtende na mwakufwasa, kwambura kopa masoka ghakwiza mwamabuchi.—Salimo 4:8.