Mwasonosono apa ofesi ya munthavi ku Nigeria yajulira sukulu ziphya ziŵiri zakusambizga Baibolo. Chilato chikuru cha malo agha ntchakuti muchitikirenge Sukulu ya Ŵapharazgi ŵa Ufumu. Kilasi lakwamba la Sukulu iyo yili kuzengeka ku Uli likanjira mu February 2023. Ndipo sukulu iyo yili kuzengeka ku Ibadan, kilasi lakwamba likanjira pa June 2, 2023. Sukulu yiliyose pa masukulu agho ghajulika, kuchitikirengeso Sukulu ya Ŵalaŵiliri Ŵadera na Ŵawoli Ŵawo.

Masukulu ghose ghaŵiri ghali kuzengeka pa malo ghakuchitirapo maungano ghakuru ndipo ŵali kuŵikapo kilasi, layibulare na malo ghakukhala gha ŵanthu awo ŵanjira sukulu izi. Ŵanthu ŵakujumpha 500 wakupempha kuti ŵakanjire Sukulu ya Ŵapharazgi ŵa Ufumu chaka chilichose ku Nigeria, ntheura tikukhazga kuti sukulu yiliyose yiŵenge na makilasi ghanayi pa chaka. Sukulu izi zichitikenge mu Chingerezi, Chiigbo, Chipidgin (West Africa), na Chiyoruba.

Mu kalata iyo ŵakalemba awo ŵali kumalizga sukulu ya Ŵapharazgi ŵa Ufumu iyi mwasonosono ku Uli, ŵakazunuramo za uwemi wa malo agho ŵakusambilirako. Iwo ŵakati: “Ni malo ghawemi chomene kusambilirako kweniso kuli malo ghawemi chomene ghakugonako ndipo ivi vikapangiska kuti tikondwenge kweniso kuleka kutimbanizgika apo tasambiranga sukulu iyi. Ŵabali na ŵadumbu awo ŵakupwelelera malo gha masukulu agha, ŵakaŵikangapo mtima chomene kutipwelelera ndipo tajiwonera tekha chitemwa icho chikuŵapo pakati pa Ŵakhristu.”

Tili na chigomezgo chose kuti masukulu ghaphya agha ghovwirenge ŵabali na ŵadumbu ŵithu ku Nigeria kuti ‘ŵafiske uteŵeti wawo mwakukwana.’—2 Timote 4:5.