Pa October 16, 2021, Mubali Anthony Morris, wa mu Wupu Wakulongozga wa Ŵakaboni ŵa Yehova, wakafumiska Baibolo lakunozgekaso la pa intaneti la Malemba Ghakupatulika mu Mang’anamuliro gha Charu Chiphya mu Chimalagasy. Pulogiramu iyi yikajambulikirathu ndipo ŵanthu pafupifupi 40,000 ŵakawonelera. Baibolo lakuchita kupulinta lambenge kusangika kukwambilira kwa 2022.

Chimalagasy chikuyowoyeka na ŵanthu pafupifupi 27 miliyoni, ndipo chikuyowoyeka chomene ku Madagascar, uko kuli ŵanthu ŵanandi ŵa chiyowoyero ichi. Nangauli charu cha Madagascar chili pa mtunda wa makilomita 400 kufuma mumphepete mwa Africa, kweni Chimalagasy chili mu gulu la viyowoyero ivyo vikuyowoyeka ku Southeast Asia na ku South Pacific nga Chifiji, Chiindonesiya, na Chitagalog.

Ntchito ya kung’anamura Baibolo mu Chimalagasy yikamba ni kale chomene, cha kukwambilira kwa m’ma 1800. Ŵamishonale awo ŵakachitanga ntchito iyi ŵakasangananga na masuzgo nga ni maleriya, kususkika na ŵanthu ŵa chigaŵa icho ŵakaŵa, kweniso ŵakasoŵanga mashini ghakuti ŵapulintire, ndipouli ŵakafiska kung’anamura Baibolo lose mu 1835.

Nangauli pakaŵa kale Baibolo ili, kweni ŵanthu awo ŵakuyowoya Chimalagasy ŵakaŵavya Baibolo lipusu na lambura kusuzga kupulikiska kwa vyaka vinandi. Ŵakaboni ŵa Yehova ŵakafumiska Baibolo la Mang’anamuliro gha Charu Chiphya mu Malemba gha Chigiriki mu 2003. Ndipo kufuma apo ŵakafumiska Baibolo lose la Mang’anamuliro gha Charu Chiphya mu 2008.

Baibolo lakunozgekaso la Mang’anamuliro gha Charu Chiphya liwovwirenge ŵanthu awo ŵakuyowoya Chimalagasy kuti ŵapulikiskenge makora unenesko wa mu Baibolo, nangauli ŵakupambana mazgu ghanyake agho ŵakugwiliskira ntchito. Yumoza uyo wakang’anamurako wakati: “Pakuti mazgu ghanyake ghakumanyikwa chomene mu misumba yikuruyikuru pera kweni ku vigaŵa vinyake ghakumanyikwa yayi, awo ŵakang’anamuranga ŵakagwiliskira ntchito mazgu agho ghakaŵa ghapusu kuti ŵanthu ŵa mu vigaŵa vyakupambanapambana ŵapulikiskenge makora.”

Chiyelezgero chimoza ni icho chili pa Ŵakolose 3:13, apo pakuti: “Lutilirani kuzizipizgirana.” Mu Baibolo lakale la Mang’anamuliro gha Charu Chiphya, ŵanthu awo ŵakukhala ku chigaŵa cha kumafumiro gha dazi ŵakapulikiskanga mazgu gha pa vesi ili kuti ŵakwenera “kulutilira kuyowoyeskana.” Baibolo lakunozgekaso likugwiliskira ntchito mazgu ghakupambanako agho ghakovwira kuti ŵanthu wose ŵa chiyowoyero ichi ŵapulikiske fundo yeneko yakuti ŵakwenera kusulako waka maubudi gha ŵanji na kuŵagowokera.

Munyakeso uyo wakang’anamurako wakati: “Apo nkhagwiranga ntchito iyi ndipo nkhalombanga pafupipafupi chomene. Nkhajiwonera nekha umo Yehova wakatovwilira na mzimu wake utuŵa.”

Nase tikukondwera lumoza na ŵabali na ŵadumbu awo ŵakuyowoya Chimalagasy apo ŵapokera chawanangwa chapadera icho chikulongora “lusungu lukuru” lwa Yehova.—1 Petrosi 4:10.