Kuwona Mwakwenelera Ndalama
Ŵanthu ŵanandi ŵachepeska masuzgo agho ghakuŵapo pa nkhani ya ndalama, chifukwa cha kulondezga fundo za mu Baibolo.
MUCHITENGE VINTHU MWANDONDOMEKO
FUNDO YA MU BAIBOLO: “Maghanoghano gha munthu wachitatata ghakovwira kuti vinthu vyende makora, kweni wose awo ŵakuchimbilira pakuchita vinthu ŵakavukenge.”—Zintharika 21:5.
IVYO FUNDO IYI YIKUNG’ANAMURA: Mukwenera kuchita vinthu mwakuyana na ndondomeko yinu kuti vinthu vimwenderani. Ntheura mukwenera kupanga dankha bajeti pambere mundagure vinthu. Mukwenera kumanya kuti mungagura yayi chilichose icho mukukhumba. Para mwachita nthena, ndikuti mukugwiliskira ntchito ndalama mwamahara.
IVYO MUNGACHITA:
-
Londezgani bajeti yinu. Lembani vyose ivyo mukukhumba kukagura, ndipo muviŵike mu magulu nga ni vyakuvwara, chakurya na vinyake vyakukhumbikwa panyumba. Ghanaghanirani ndalama izo zikukhumbikwa pa katundu waliyose. Para mwawona kuti ndalama zinandi zamalira pa chinthu chimoza, muchepeskeko ndalama izo mwate mugulirenge vinyake. Mwachiyelezgero, para ndalama zinandi mwagulira chakurya, mungachepeskako ndalama izo mwate mulutirenge kukatembeya.
-
Chepeskani ngongoli. Para mungafiska mungachita makora kulekerathu kuŵa na ngongoli. Musungenge ndalama kuti mugulirenge ivyo mukukhumba. Para mukugura vinthu mwakugwiliskira ntchito credit card, mukwenera kupeleka ndalama zose kuti muleke kuzakapeleka zapachanya. Para muli na ngongoli, yezgeskani kuti zose mupeleke.
Kafukufuku munyake wakulongora kuti para ŵanthu ŵakugwiliskira ntchito credit card kanandi ŵakunanga ndalama zinandi. Ntheura para mukugwiliskira ntchito credit card, mugurenge vinthu ivyo ni vyakukhumbikwa nadi.
MUNGAŴANGA ŴAKATA YAYI
FUNDO YA MU BAIBOLO: “Munthu mukata wakulima yayi mu chifuku, ntheura wazamupempheska mu nyengo ya vuna, para walije kanthu.”—Zintharika 20:4.
IVYO FUNDO IYI YIKUNG’ANAMURA: Ukata ungapangiska kuti munthu wakavuke. Ntheura mulimbikirenge ntchito kweniso mugwiliskirenge ntchito makora ndalama kuti kunthazi muzakaleke kusoŵerathu pakukora.
IVYO MUNGACHITA:
-
Mulimbikirenge ntchito. Para mukulimbikira ntchito, awo ŵali kumulembani ntchito ŵamugomezganinge, ntheura ntchito yimalenge bweka yayi.
-
Mugomezgekenge. Kwiba yayi pa ntchito. Para mukwiba, mbiri yinu yinganangika ndipo chingaŵa chakusuzga kuti mukasangeso ntchito yinyake.
-
Mukhorwenge. Para nyengo zose mukukhalira waka kupenja ndalama, mungananga umoyo winu kweniso ubwezi winu na ŵanyinu. Mukwenera kukumbuka kuti ndalama pera ndizo ni zakuzirwa pa umoyo yayi.
FUNDO ZINYAKE ZA MU BAIBOLO
Mungaŵerenga Baibolo pa intaneti ndipo likusangika mu viyowoyero vinandi
KUNANGA NDALAMA PA VINTHU VYAMBURA KUZIRWA YAYI.
“Pakuti muloŵevu na nkharye ŵakavukenge, ndipo kusiwa kumuvwalikenge munthu vizwazwa.”—ZINTHARIKA 23:21.
KWENJERWA CHOMENE YAYI.
“Lekani kwenjerwa na umoyo winu kuti muryengechi panji mumwengechi, nesi ivyo muvwalikenge mathupi ghinu.”—MATEYU 6:25.
GEGANI BINA.
“Munthu wabina wakunwekera usambazi, kwambura kumanya kuti ukavu umusangenge.”—ZINTHARIKA 28:22.
Panji Mungatemwa Kuŵerengaso Nkhani Izi
GONGWE LA MULINDA
Umo Mungacitira Para Muli na Ngongoli
Kasi mbumba zingacita wuli para zikuwona kuti nchakusuzga kukhalirathu kwambura ngongoli?
GONGWE LA MULINDA
Umo Mungagwiliskira Nchito Ndalama Mwakuyana na Umo Mukusangira
WUKANI!
Tikwenera Kuwona Ndalama Mwakwenelera
Mafumbo 7 agho mungajifumba ghangamovwirani kuti mumanye usange mwamba kutemwa chomene ndalama.
NKHANI ZINYAKE
Ivyo Mungachita Kuti Mukhalenge Umoyo Wambura Kukhumba Vinandi
Nangauli wamunthu ungamba kusuzgika maghanoghano para wamba kusanga ndalama zichoko, kweni fundo za mu Baibolo izi zingamovwirani kuti mukhalenge mwakukondwa nangauli mukusanga ndalama zichoko.
MAFUMBO AGHO BAIBOLO LIKUZGORA
Kasi Baibolo Linganovwira pa Nkhani ya Ndalama na Ngongoli?
Munthu wakuŵa wakukondwa chifukwa cha ndalama yayi. Kweni mu Baibolo muli fundo zinayi izo zingamovwirani pa nkhani ya ndalama.
