KU ŴAKUTORANA
3: Kuchindikana
IVYO MUKWENERA KUMANYA
Ŵakutorana awo ŵakuchindikana ŵakutemwana nanga ni para ŵangapambana maghanoghano. Buku linyake likuti: “Ŵakutorana ŵanthena ŵakudundukirana yayi para ŵapambana maghanoghano m’malo mwake ŵakudumbiskana pa ivyo ŵapambana. Ŵakutegherezgana mwantchindi para munyake wakuyowoya maghanoghano ghake ndipo paumaliro wose ŵakukolerana chimoza.”—Ten Lessons to Transform Your Marriage.
FUNDO YA MU BAIBOLO: “Chitemwa . . . chikupenja vyake pera yayi.”—1 Ŵakorinte 13:4, 5.
Micah wakati: “Nkhuchindika ivyo munyane wakutemwa ndipo nkhukhumba yayi kuchita chilichose icho chingamukhuŵazga panji kunanga nthengwa yithu.”
CHIFUKWA WULI NTCHAKUZIRWA?
Para ŵakutorana ŵakuchindikana yayi, ŵakutemwa kugazgana na kuyowoyerana mazgu ghakulasa. Ŵakaswiri awo ŵakufufuza nkhani za nthengwa ŵakuyowoya kuti para ŵakutorana ŵakuchita nthena ni vimanyikwiro vyakuti nthengwa yawo yili pangozi mwakuti yingamara nyengo yiliyose.
Brian wakati: “Kususka muwoli wako mwambura ntchindi kweniso kuyowoya milangwe yambura kwenelera kwa muwoli wako vingapangiska kuti waleke kukugomezga panji kukuchindika, ndiposo vingananga nthengwa yinu.”
IVYO MUNGACHITA
JISANDANI
Wonani umo mukuyowoyeskerana na kuchitira vinthu kwa sabata yimoza. Pamanyuma jifumbani kuti:
-
‘Kasi munyane nkhamususka kanandi wuli, ndipo nkhamuwongapo kalinga?’
-
‘Ni vichi ivyo nkhachita kulongora kuti nkhumuchindika munyane wamunthengwa?’
DUMBISKANANI NA MUNYINU WAMUNTHENGWA
-
Kasi ni vichi ivyo tingachita na kuyowoya ivyo vingawovwira kuti waliyose wawonenge kuti wakuchindikika?
-
Kasi ni vichi ivyo tikwenera yayi kuchita na kuyowoya ivyo vingalongora kuti tikuchindikana yayi?
IVYO VINGAMOVWIRANI
-
Lembani vinthu vitatu ivyo mungatemwa kuti munyinu walongore kuti wakumuchindikani. Munyinu wamunthengwa nayo walembe vyake. Sinthanani ivyo mwalemba ndipo waliyose wachite ivyo munyake wakukhumba.
-
Lembani vinthu ivyo mukuwona kuti munyinu wakuchita makora. Muphalirani munyinu kuti mukukondwa na ivyo wakuchita makora.
Megan wakati: “Nkhulongora kuti nkhuchindika mfumu wane mu vyakuchita ndipo nkhukhumba kuti nyengo zose wakondwenge. Kanandi ni vinthu vikuru yayi ivyo nkhuchita na kuyowoya kulongora kuti nkhumuchindika mfumu wane.”
Lekani kujilumba mwekha kuti mukumuchindika munyinu, kweni munyinu ndiyo wakwenera kuwona kuti mukumuchindika.
FUNDO YA MU BAIBOLO: “Vwarani mtima wa chiwuravi, lusungu, kujiyuyura, kuzika, na kuzikira.”—Ŵakolose 3:12.
Panji Mungatemwa Kuŵerengaso Nkhani Izi
GONGWE LA MULINDA
Kucindika Munyinu wa mu Nthengwa
Kasi mfumu na muwoli ŵangacita wuli kuti ŵayowoyeskanenge mwanchindi?
WUKANI!
Kasi Mungachita Wuli Kuti Muchindikenge Mfumu panji Muwoli Winu?
Kuchindikana mu nthengwa ni nkhani yakuzirwa chomene. Kasi mungachita wuli kuti muchindikenge mfumu panji muwoli winu?
WUKANI!
Kasi Mungachita Wuli Kuti Muwongenge?
Usange waliyose wakuwona tuwemi uto mfumu panji muwoli wake wakuchita na kumuwonga, nthengwa yikwenda makora. Kasi ntchivichi chingamovwirani kuti muwongenge munyinu?
