Janet wakati: “Pakati pajumpha nyengo yichoko waka adada ŵati ŵafwa, afumu ŵane ŵakaniphalira kuti ŵasanga mwanakazi munyake. Nakalinga ŵakayegha katundu wawo, mbwe wautali. Ise no kutilayira. Nkhakhala nekha joo na ŵana ŵaŵiri.” Janet wakamba ntchito, kweni ndalama izo wakapokeranga zikaŵa zakukwana yayi kuti ziŵawovwire. Kweniso wakasangana na suzgo la ndalama pera yayi. Iyo wakati: “Nkhenjerwanga chomene chifukwa chakuti nkhamba kuchita nekha vinthu vyose vya pa nyumba. Nkhawonanga nga kuti nkhutondeka kovwira ŵana ŵane mwakukwana nga umo ŵapapi ŵanyake ŵakuchitira. Na sono wuwo, nichali kujifumba umo ŵanthu ŵakutiwonera ine na ŵana ŵane. Kasi ŵakughanaghana kuti ine nkhatondeka kuchitapo kanthu kuti nthengwa yane yileke kumara?”

Janet wakutemwa kulomba, ndipo ichi chikumovwira kuti mtima wake ukhazikikenge kweniso kuti wakoleske ubwezi wake na Chiuta. Iyo wakuti: “Usiku ndipo kukuŵa ntchito, para kwati yii nkhwamba kughanaghana ivi na ivi. Kweni para nalomba na kuŵazga Baibolo ndipo nkhusangako tulo. Vesi ilo nkhulitemwa chomene nda Ŵafilipi 4:6, 7, ilo likuti: ‘Mungenjerwanga chara na kanthu kalikose, kweni mu vinthu vyose, mu lurombo na ŵeyelero pamoza na kuwonga, madando ghinu ghamanyikwe kwa Chiuta, ndipo mtende wa Chiuta uwo ukuluska maghanoghano ghose, usungilirenge mitima yinu na maghanoghano ghinu.’ Nyengo zinandi usiku nkhulomba, ndipo nkhuwona kuti Yehova wakunisanguluska.”

Fundo iyo Yesu wakayowoya mu Upharazgi wa pa Phiri yikovwira chomene ŵanthu awo ŵakwenjerwa na vinthu vyakupambanapambana. Iyo wakati:  ‘Chiuta wakumanya vinthu ivyo mukusoŵerwa pambere imwe mundamulombe.’ (Mateyu 6:8) Ndipouli, tikwenera kumupempha. Kulomba ni nthowa yimoza iyo yingatovwira kuti ‘tisendelere kwa Chiuta.’ Para tasendelera kwa iyo, nayo ‘wasendelerenge kwa ise.’—Yakobe 4:8.

Nadi, pemphero likutovwira kuti tijipulikeko makora para tamuthulira Chiuta ivyo vikutisuzga mu mtima. Kweniso Yehova, uyo ‘wakupulika malurombo,’ wakovwira wose awo ŵakumupempha mu chipulikano. (Salmo 65:2) Lekani Yesu wakasambizga ŵasambiri ŵake kuti “ŵalombenge nyengo zose kwambura kugongowa.” (Luka 18:1) Tilombenge Chiuta kuti watipe mahara na kutovwira, ndipo tigomezgenge kuti watitumbikenge chifukwa cha chipulikano chithu. Tingakayikanga yayi, na kughanaghana kuti wangatovwira yayi. Para tikulomba “kwambura kuleka” tikulongora kuti tili na chipulikano chakukhora.—1 Ŵatesalonika 5:17.

Kasi munthu wakuŵa wuli na chipulikano? Munthu wakuŵa na chipulikano para ‘wamanya’ Chiuta. (Yohane 17:3) Tingamumanya makora Chiuta para tikusambira Baibolo. Mu Baibolo tikusambira kuti Chiuta wakuwona waliyose wa ise ndipo wakukhumba kutovwira. Kweni chipulikano nkhumanya waka Chiuta yayi. Pakukhumbikwira kuti tiŵe ŵabwezi ŵake. Nga umo vikuŵira na taŵanthu, vingachitika yayi kuti tiŵe ŵabwezi ŵa Chiuta papo na papo. Chipulikano chithu ‘chikusazgikira’ para tikusambira vinandi vya Chiuta na para ‘tikuchita ivyo vikumukondweska,’ kweniso para tikuwona kuti wakutovwira. (2 Ŵakorinte 10:15; Yohane 8:29) Chipulikano chanthena ichi ndicho chikumovwira Janet.

Janet wakuti: “Chipulikano chane chakhora chifukwa nkhuwona kuti Yehova wakuŵa nane pa chilichose. Ŵanthu ŵakatichitirapo nkhaza kanandi waka. Kweni chifukwa cha kulomba, Yehova wakatipa mahara ghakumazgira masuzgo agha. Para nkhuwonga Chiuta, nkhukumbuka vinandi ivyo wanichitira. Nyengo zose wakutovwira pa nyengo yakwenelera, kweniso pa nyengo yake. Wanovwira kusanga ŵabwezi ŵawemi pakati pa Ŵakhristu ŵanyane, ŵanalume na ŵanakazi. Ŵabwezi aŵa ŵakunovwira nyengo zose ndipo ntchiyelezgero chiwemi ku ŵana ŵane.” *

“Sono nkhupulikiska chifukwa icho Yehova pa Malaki 2:16, wakuyowoyera kuti ‘nkhutinkha kupatana.’ Chikuŵa chinthu chakuŵinya chomene para mfumu panji muwoli wako wakwenda pasi. Sono pajumpha vyaka kufuma apo afumu ŵane ŵakanilekera. Kweni nyengo zinyake nkhujiwona kuŵa wawakawaka. Para vyaŵa nthena, nkhuyezga kovwira munthu munyake, ndipo ichi chikunovwira nyengo zose.” Pasono Janet wakwenjerwa viŵi yayi chifukwa wakulondezga fundo ya mu Baibolo ya kuleka kujipatura. *—Zintharika 18:1.

Janet wakuti: “Icho chikunipembuzga chomene ni fundo yakuti Chiuta ni ‘wiske wa ŵalanda na mweruzgi panji kuti muvikiliri wa vyokoro.’ Watilekenge yayi nga umo afumu ŵane ŵali kuchitira.” (Salmo 68:5) Janet wakumanya kuti Chiuta wakutiyezga na ‘vinthu viheni yayi.’ Kweni iyo wakupeleka vinjeru “mwawanangwa ku wose” na “nkhongono zakuluska zakawiro” mwakuti vitovwire para tikwenjerwa.—Yakobe 1:5, 13; 2 Ŵakorinte 4:7.

Kweni kasi tingachita wuli usange tikwenjerwa chifukwa chakuti umoyo withu uli pangozi?