Yehova Ciuta wakukhumba kuti nyengo zose tifwatukenge kumuphalira ivyo tikwenjerwa navyo. (Luka 18:1-7) Wakupulikizga para tikulomba cifukwa wakutitemwa. Adada ŵithu ŵakucanya ŵakutipempha kuti tiŵalombenge. Kasi cingaŵa camahara kukana pempho ili?—Ŵazgani Ŵafilipi 4:6.

Tikulomba kuti tipemphe waka wovwiri yayi. Lurombo likutovwira kuti tisendelere kwa Ciuta. (Salmo 8:3, 4) Para nyengo zose tikuphalira Ciuta ivyo vili ku mtima withu, tikukhozga ubwezi withu na iyo.—Ŵazgani Yakobe 4:8.

Para tikulomba, Ciuta wakukhumba yayi kuti tiyowoyenge mazgu ghakujilongora waka, panji kuwerezgawerezga malurombo ghakusungilira pa mtima. Kweniso para tikulomba, nchakukhumbikwa yayi kuti ticite kukhala mu nthowa yinyake yapadera. Yehova wakutipempha kuti tilombenge kufumira pasi pa mtima. (Mateyu 6:7) Mwaciyelezgero, mu nyengo ya Israyeli, Hana wakalomba za suzgo yikuru iyo wakaŵa nayo mu nyumba yake. Wakakondwa comene apo lurombo lwake lukazgoreka, ndipo wakawonga Ciuta kufumira pasi pa mtima.—Ŵazgani 1 Samuel 1:10, 12, 13, 26, 27; 2:1.

Tili na mwaŵi ukuru comene wakuphalira Mlengi withu vinthu ivyo tikwenjerwa navyo. Tingamulumba na kumuwonga pa ivyo waticitira. Uwu ni mwaŵi wapadera comene ndipo tingawutayanga yayi.—Ŵazgani Salmo 145:14-16.