Nkhakulira ku Santiago, msumba ukuru wa Chile. Ku malo agha, kuswa malango, ucigeŵenga, kweniso kuguliska munkhwala wakutimbanizga wongo vikaŵa vyakuzara. Adada ŵakakomeka apo nkhaŵa na vyaka vinkhondi. Pamasinda, amama ŵakatorana na mwanalume munyake wankhaza. Ndipo wakakhaliranga waka kutitimba, tose na amama. Vicali kuniŵinya para nkhukumbuka ivyo vikacitikanga.

Apo nkhakulanga, nane nkhamba kuŵa wankhaza comene. Nkhategherezganga sumu zavyongo, nkhamba kumwa comene moŵa, kweniso nyengo zinyake nkhamwanga munkhwala wakutimbanizga wongo. Nkhakhaliranga waka kutimbana na ŵakuguliska minkhwala, ndipo ŵakakhumbapo kunikoma kanandi waka. Pa nyengo yinyake ŵalwani ŵane ŵakatuma cigeŵenga cakumanyikwa kuti cinikome, kweni nkhapona nangauli cikanigwaza na cimayi. Nyengo yinyakeso gulu la ŵakuguliska minkhwala ili, likanidininizga futi ku mutu ndipo likakhumbanga kunikakilira kuti nifwe.

Mu 1996, nkhamanyana na mwanakazi munyake zina lake Carolina ndipo mu 1998, tikatorana. Mwana withu wakwamba wakati wababika, nkhafipanga mtima kuti panji nane nambenge kuyuzga mbumba yane nga umo ŵakacitiranga adada ŵamusangapo. Ntheura, nkhaluta pa kacipatala kanyake kuti ŵanovwire. Ŵakanipa munkhwala na kuniphalira vyakuti nicite, kweni vikawovwira yayi. Nkhakwiyanga nipera nanga paŵe pa tunthu tucoko comene. NKhakhumbanga kujikoma kuti nileke kuyuzga mbumba yane. Mwamwaŵi vikatondeka.

Kwa vilimika vinandi nkhagomezganga yayi kuti kuli Ciuta. Kweni pa nyengo iyi nkhakhumbanga kumumanya Ciuta. Ntheura nkhamba kuluta ku chalichi la Evangelical. Panyengo iyi, muwoli wane wakasambiranga Baibolo na Ŵakaboni ŵa Yehova. Ine nkhaŵatinkhanga comene Ŵakaboni ndipo kanandi nkhaŵatukanga, kweni nyengo zose ŵakanizgoranga mwamtende. Nkhaghanaghanangako yayi kuti ŵangacita nthena.

Zuŵa linyake Carolina wakaniphalira kuti niŵazge Salmo 83:18 mu Baibolo lane. Vesi ili likuyowoya makora kuti zina la Ciuta ni Yehova. Nkhazizwa cifukwa ku chalichi tikamanyanga waka vya ciuta, kweni ŵakasambizgapo yayi za Yehova. Cakukwambilira  kwa caka ca 2000, nane nkhamba kusambira Baibolo na Ŵakaboni.

Apo nkhalutiliranga kusambira Baibolo, nkhakhozgeka kumanya kuti Yehova ni Ciuta walusungu kweniso wakugowokera. Mwaciyelezgero, pa Exodus 34:6, 7, pakuti Yehova ni “Ciuta wa lusungu na ucizi, wakukunthirapo, wakuzara na uwemi na unenesko, wakusungira ŵanthu vikwi lusungu, wakugowokera kwananga na majuvyo na uheni.”

Nangauli vikaŵa nthena, cikaŵa cipusu yayi kucita ivyo nkhasambiranga. Ndipo nkhawonanga kuti vingacitika yayi kuti nileke kukwiya luŵiro. Nyengo yiliyose para natondeka kujikora, Carolina wakanikhozganga mwacitemwa. Wakanikumbuskanga kuti Yehova wakuwona ivyo nkhuyezgayezga kucita. Ivyo wakacitanga vikanovwira kuti nilutilire kucita vinthu vyakuti nikondweske Yehova, nangauli nkhawonanga kuti ningafiska yayi.

Zuŵa linyake Alejandro, uyo wakasambiranga nane Baibolo wakaniphalira kuti niŵazge Ŵagalatiya 5:22, 23. Mavesi agha ghakuti vigaŵa vya cipambi ca mzimu “nchitemwa, cimwemwe, mtende, kukhomezga, lusungu, uwemi, cipulikano, kuzika na kujikora.” Alejandro wakaniphalira kuti vikuthemba pa ine pera yayi kuti niŵe na mikhaliro iyi, kweni vikuthembaso pa mzimu utuŵa wa Ciuta. Fundo iyi yikanovwira kuti nambe kuwona vinthu mwakupambanako.

Pamasinda nkhaluta ku ungano ukuru wa Ŵakaboni ŵa Yehova. Pa ungano uwu, nkhakhorwa kuti nasanga cisopa caunenesko cifukwa ca umo ŵanthu ŵakacitiranga vinthu. Ŵakaŵa ŵakukolerana, ŵakapweleleranga makora malo, kweniso ŵakatemwananga. (Yoh. 13:34, 35) Nkhabapatizika mu Febuluwale 2001.

Yehova wanisintha, kale nkhaŵa wankhaza, kweni sono nkhucita vinthu mwamtende. Nkhuwona kuti wali kunizgura mu mathakalimbwa umo nkhaphatira. Ici ndico nchifukwa ico ŵanthu ŵanandi ŵakanitinkhiranga, kweni nkhuŵasuska yayi. Ndipouli, sono nkhuteŵetera Yehova mwakufwatuka, lumoza na muwoli wane kweniso ŵana ŵane ŵaŵiri ŵanyamata.

Ŵabali na ŵabwezi ŵane ŵakupulikiska yayi umo nili kusinthira. Ndipo ici cawovwira kuti ŵanandi ŵambe kunweka kusambira Baibolo. Kweniso naŵa na mwaŵi wakovwira ŵanji kumanya Yehova. Nkhukondwa comene para nkhuwona kuti nawo Baibolo likuŵasintha.