Baibolo likuti: “Ciuta wa kucanya wati wimike uthemba, uwo kuti wamkuparanyika cara muyirayira, panji mazaza ghake ghasidike ku fuko linyake cara. Wamkuteketa mauthemba ghose agha na kughamara kweni uwu tiwimilire muyirayira.”—Daniel 2:44.

Ufumu wa Ciuta ni Boma lakucanya ilo Fumu yake ni Yesu Khristu. Boma ili, lizamunjira mu malo mwa maboma ghose gha ŵanthu. Ndipo Yesu Khristu wazamuwoneseska kuti khumbo la Ciuta lafiskika kucanya na pa caru capasi. (Mateyu 6:9, 10) Palije boma la ŵanthu ilo lizamunjira mu malo mwa boma ili, cifukwa Baibolo likuti ni “ufumu wamuyirayira wa Fumu yithu na Mponoski Yesu Khristu.” Ntheura pa caru pazamuŵa mtende wambura kumara.—2 Petrosi 1:11.

Baibolo likuti: “Satana iyomwene wakujizgora mungelo wa ungweru. Ntheura nchinthu cikuru cara usange ŵateŵeti ŵake nawo ŵakujizgora ŵateŵeti ŵa urunji. Kweni umaliro wawo uzamuŵa wakuyana na milimo yawo.”—2 Ŵakorinte 11:14, 15.

Cisopa cautesi cizamumanyikwa kuti ni mulimo wa Satana ndipo cizamuparanyika. Kweniso ŵanthu ŵazamutinkhana yayi, nesi kukomana cifukwa ca visopa. Ici cizamupeleka mpata ku ŵanthu awo ŵakutemwa “Ciuta wamoyo na waunenesko” kuti ŵamusope mu “cipulikano cimoza,” kweniso “mu mzimu na unenesko.” Ntheura pazamuŵa mtende na kukolerana.—1 Ŵatesalonika 1:9; Ŵaefeso 4:5; Yohane 4:23.

Baibolo likuti: “Ciuta iyomwene wazamuŵa nawo. Ndipo wazamufyura sozi lililose ku maso ghawo, ndipo nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara. Vinthu vyakale vyafumapo.”—Uvumbuzi 21:3, 4.

Yehova Ciuta wazamucita ivi kwizira mwa Mwana wake Yesu uyo wakapeleka umoyo wake kuti wawombore ŵanthu. (Yohane 3:16) Apo Yesu wazamuwusa,  ŵanthu ŵazamuŵaso ŵakufikapo. Masuzgo ghose ghazamumara, cifukwa “Ciuta iyomwene wazamuŵa nawo” ndipo wazamufyura “sozi lililose ku maso ghawo.” Kuwura kufikapo na masuzgo vizamuŵa vinthu vyakale ndipo ‘ŵakunyoloka ŵazamuhara caru na kukhala mwenemumo kwandanda.’—Salmo 37:29.

Baibolo likuti: “[Yesu Khristu] wakakora cinjoka, njoka ya papo kale, ico ni Dyabulosi na Satana, na kucikaka vilimika cikwi. Ndipo wakaciponya mu cizongwe na kujarapo ndipo wakabatikapo skee pacanya, mwakuti cileke kupuluskaso mitundu.”—Uvumbuzi 20:2, 3.

Satana na viŵanda vyake ŵazamupuluskaso ŵanthu yayi para ŵazakakakika na kuponyeka mu “cizongwe.” Ici cikung’anamura kuti ŵazamucitaso kalikose yayi. Ŵazamunjilirapo yayi pa vyakucita vya ŵanthu. Cizamuŵa cakukondweska comene kukhala mu caru kwambura kupusikika na Satana na viŵanda vyake.

“Mazuŵa ghaumaliro” ghazamumara pa nyengo iyo Yesu wakayicema kuti “suzgo yikuru.” Yesu wakati: “Kuzamuŵa suzgo yikuru, iyo yindacitikepo yantheura kufuma ku mtendeko wa caru mpaka sono, cara nadi, nesi yizamucitikaso cara.”—Mateyu 24:21.

Suzgo yizamuŵa yikuru mu fundo yakuti pazamucitika vinthu vyakofya vyakuti ciwiro vindacitikepo. Vinthu vizamufika paheni pa “nkhondo ya zuŵa likuru la Ciuta Wankhongonozose,” iyo yikucemeka kuti “Haramagedoni.”—Uvumbuzi 16:14, 16.

Ŵanthu wose awo ŵakutemwa urunji mbakunweka kuzakawona kuti mgonezi uheni uwu wamara. Wonani vinyake mwa vitumbiko ivyo ŵazamusanga mu Ufumu wa Ciuta.

“Mzinda ukuru” uzamupona na kunjira mu caru ciphya: Baibolo likuti “mzinda ukuru” wambura mapendeko uzamupona pa “suzgo yikuru” na kunjira mu caru ciphya ico muzamuŵa urunji. (Uvumbuzi 7:9, 10, 14; 2 Petrosi 3:13) Ŵazamuwonga comene Yesu Khristu “Mwanamberere wa Ciuta uyo wakuwuskako kwananga kwa caru!”—Yohane 1:29.

Ŵanthu ŵazamusambizgika na Ciuta: Mu caru ciphya, “caru camkuzura na kumumanya Yehova.” (Yesaya 11:9) Ŵanthu ŵazamusambizgika umo ŵangakhalira mwamtende na ŵanyawo kweniso umo ŵangapwelelelera cilengiwa. Ciuta wakulayizga kuti: “Ine ndine Yehova, Ciuta winu uyo wakumusambizgani kuti muwone candulo, uyo wakumulongozgani mu nthowa iyo mukwenera kwendamo.”—Yesaya 48:17.

Ŵakutemweka ŵithu awo ŵali kufwa ŵazamuwuka: Apo Yesu wakaŵa pa caru capasi, wakawuska mubwezi wake Lazaro ku ŵakufwa. (Yohane 11:1, 5, 38-44) Ici cikulongora kuti mu Ufumu wa Ciuta wazamuwuska ŵanthu ŵanandi comene.—Yohane 5:28, 29.

Pazamuŵa mtende na urunji kwamuyirayira: Para Yesu wazakamba kuwusa, kuzamuŵavya ucikanamalango. Kasi tikumanya wuli fundo iyi? Pakuti Yesu wakumanya vya mu mtima wa munthu, ntheura cizamuŵa cakusuzga yayi kumanya uyo ni murunji na muheni. Awo ŵazamukana kuleka nthowa zawo ziheni, ŵazamuzomerezgeka yayi kukhala mu caru ciphya ca Ciuta.—Salmo 37:9, 10; Yesaya 11:3, 4; 65:20; Mateyu 9:4.

Apa tadumbiskanapo vinthu vicoko waka ivyo Ciuta walayizga kuti wazamucita munthazi. Para Ufumu wa Ciuta wamba kuwusa pa caru capasi, pazamuŵa mtende kwamuyirayira. (Salmo 37:11, 29) Vyose ivyo vikwambiska masuzgo vizamumara. Tikumanya kuti ivi vizamucitika, cifukwa Ciuta walayizga kuti: “Wonani! Nkhupanga vinthu vyose kuŵa viphya. . . . Mazgu agha ngakugomezgeka na ghaunenesko.”—Uvumbuzi 21:5.