Kucezga na Mbumba
“Wonani, nako nkhukongora na kunozga uko ŵanambumba ŵakukhala pamoza na mtima wakurungana!”—SALMO 133:1.
Cifukwa ico ŵanji ŵakukondwelera Khisimasi.
Pakuti Ŵaisrayeli wose ŵakafuma mwa munthu yumoza, Yakobe, iwo ŵakaŵa paubali panji kuti ŵamumbumba yimoza. Ndipo cikaŵanga cinthu ‘cakunozga’ comene para ŵawungana pa viphikiro ku Yerusalemu. Ntheura nga Mbaisrayeli, mbumba zinandi mazuŵa ghano zikulindilira mwakunweka nyengo ya Khisimasi kuti zizakasangwe pamoza.
Cifukwa wuli ŵakutondeka?
Buku linyake lakulongosora vya Khisimasi na Nyuyeri likuti: “Masuzgo ghacokoghacoko agho mbumba yakumananga nagho cilimika cose, ghakuzakakura para ŵamumbumba ŵakumana pamoza pa nyengo ya maholide.”
Fundo za mu Baibolo izo zingawovwira
‘Ŵawezgerani vyakwenelera ŵapapi na ŵagogo ŵinu, pakuti ici nchakuzomerezgeka pamaso pa Ciuta.’ (1 Timote 5:4) Mukwenera kuyezgayezga kuŵa na nyengo ya kukawona ŵamumbumba yinu. Usange ŵabali ŵinu ŵakukhala kutali, mungadumbiskana nipera. Mungaŵalembera kalata, kuŵayimbira telefoni, kuŵalembera meseji, panji kucezga nawo pa intaneti. Para mukuyowoyeskana pafupipafupi masuzgo ghanyake ghangacepa.
“Mukufyenyeka mu mtima winu wacitemwa . . . Musanuzge.” (2 Ŵakorinte 6:12, 13) Para ŵabali ŵinu mukuwonana waka pa caka kamoza, nchipusu kwamba kuwonana nga mbalendo, comenecomene ŵana. Ŵana ŵanyake ŵangaghanaghana kuti palije ubali weneco pakati pa iwo na ŵagogo ŵawo panji ŵabali ŵanji ŵapataliko. Ntheura, ŵaciskani ŵana ŵinu kuti ‘ŵasanuzge’ citemwa cawo pa ŵabali ŵawo kusazgapo ŵacekuru. * Kanandi ŵana awo ŵakutemwa kucezga na ŵacekuru, ŵakuŵa na lusungu kweniso ŵakucindika ŵanthu awo mbalara kwa iwo.
“Lizgu pa nyengo yakwenelera nalo ndiwemi.” (Zintharika 15:23) Kasi mungacita wuli kuti mbumba yinu yileke kutimbanizgika cifukwa cakupambana maghanoghano na masuzgo ghanyake? Nthowa yimoza nkhusankha “nyengo yakwenelera” yakudumbiskana masuzgo ghinu. Usange nyengo zose mukuyowoyeskana na ŵamumbumba yinu, mbwenu ciŵenge cipusu kudumbiskana na kumazga masuzgo ghanyake. Ndipo para mwakumana pamoza mukukondwa na nchezgo yiwemi.
^ ndime 9 Wonani nkhani ya mutu wakuti, “Kodi N’chifukwa Chiyani Ndiyenera Kudziŵana ndi Agogo Anga?” na yakuti “Kodi Nditani Kuti Ubale Wanga ndi Agogo Ulimbe?” mu Galamukani! ya Meyi 8 na ya Juni 8, 2001 ghakupharazgika na Ŵakaboni ŵa Yehova.
