Pakuti Yesu wakawovwiranga ŵakavu, ŵalwari na ŵakuyuzgika, ntheura ŵanji ŵakukhumba kucita nga ndiyo. Ntheura ŵanthu ŵakuwona kuti nyengo yiwemi iyo ŵangacitira nthena mpha Khisimasi, cifukwa mawupu agho ghakovwira ŵakusuzgika ghakutolera vyawanangwa pa nyengo iyi.

Pa nyengo ya maholide ŵanthu ŵakutangwanika comene na kugura vinthu, kukasangwa, kuluta ku ŵabali kweniso ŵabwezi. Vyose ivi vikuŵalyera nyengo, nkhongono, panji ndalama mwakuti ŵakutondeka kovwira ŵakusuzgika.

“Ungaŵakaniranga uwemi awo ŵakwenera kupokera para kuli mu nkhongono zako kuti uwucite.” (Zintharika 3:27) Ŵanthu ŵakavu, awo ŵalije cakurya na awo ŵali na masuzgo ghanyake, ŵakusuzgika pa nyengo ya Khisimasi pera yayi. Usange imwe mwawona kuti munthu wasuzgika ndipo mukuwona kuti mungamovwira, mwalekeraci kumovwira m’malo mwa kulindilira Khisimasi? Muzamutumbikika comene para mungacita nthena.

“Zuŵa lakwamba lililose la sabata, waliyose wa imwe ku nyumba yake waŵikenge kanthu padera na kukasunga mwakuyana na umo wakusangira, mwakuti para niza pazakaŵavye kusonkha.” (1 Ŵakorinte 16:2) Mpositole Paulosi wakapeleka ulongozgi uwu ku Ŵakhristu ŵakwambilira awo ŵakakhumbanga kovwira ŵakavu. Kasi namwe mungasunga yayi ndalama zinyake pamphepete kuti movwilirenge ŵakavu panji kupeleka ku wupu uwo mukuwona kuti ukovwira nadi ŵakavu? Para mucitenge nthena ndikuti mulongorenge kuti mukupwelelera ŵakusoŵerwa na ivyo muli navyo.

“Mungaluwanga cara kucita uwemi na kugaŵana vinthu na ŵanji, cifukwa na sembe zantheura Ciuta wakukondweskeka nkhanira.” (Ŵahebere 13:16) Wonani kuti padera pa “kugaŵana vinthu na ŵanji,” tikweneraso kukumbuka “kucita uwemi,” panji kuti kovwira ŵanji pa milimo yinyake. Mwaciyelezgero, ŵapapi ŵavinjeru ŵakusambizga ŵana ŵawo kuti ŵawovwirenge ŵacekuru milimo yinyake ya pa nyumba, kukhozga awo ŵakulwara mwa kuŵalembera kadi, kukaŵawona, panji kuŵayimbira foni. Kweniso kuti ŵacitirenge citima ŵana ŵanyawo awo mbakavu panji awo mbakupendera. Ntheura, ŵana ŵakusambira kucitira lusungu ŵanji kweniso ŵakupa nyengo yiliyose.