KU WEST AFRICA, mulenji uliwose, kukapulikikwanga kasungu kawemi ka masoseji na mpunga wakuphika. Ŵanakazi ŵakajumphanga uku ŵadekezga vibwayira vikuru pa mitu. Vikhakhali vikapulikikwanga uku ŵanji ŵakucemelera malonda. Nangauli kukaŵa mulenji, kweni zuŵa likawochanga.

Gulu la ŵana likati laniwona, likamba kwimba na kuvina mwakuyana na kaluso kawo para ŵakukhumba kuti munthu waŵape vyawanangwa. Sumu yawo yikambanga na mazgu ghakuti “Muzungu, Muzungu, ndipo yikamaranga na mazgu ghakuti “mutipenge cawanangwa yayi pa umo tavinira apa?” Msepuka yumoza wakimbangako yayi. Apo nkhalutizganga ulendo wane, wakanilondezga na kuyowoya nane na mawoko. Vikaŵanga nga wakuyowoya ciyowoyero ca mawoko. Apo nkhaŵa ku America nkhasambirako ciyowoyero ca mawoko ca ku America, kweni ku caru ici ŵanthu ŵakuyowoya Cifurenci.

Nkhayezga kuzunura zina lane mwakusuzgikira mu ciyowoyero ca mawoko. Musepuka uyu wakamwemweteranga waka. Wakanikora pa woko na kulazga nane kunyumba yakwawo iyo yikaŵa na vipinda viŵiri. Ŵanthu ŵa mu mbumba yakwake ŵakiza na kuniwungilira. Waliyose wakayowoyanga ciyowoyero ca mawoko. Kasi nkhacita wuli? Nkhayowoya zina lane mu ciyowoyero ca mawoko, ndipo pamasinda nkhaŵalembera waka tumazgu kuti ndine mumishonale, ndipo nkhusambizga Baibolo na kuŵaphalira kuti nizengeso. Ŵazengezgani awo ŵakapulikanga nawo ŵakiza, ndipo wose ŵakazomerezganga na mitu yawo. NKhajifumbanga kuti, kasi nifiskenge?

Nati nafika ku nyumba, nkhamba kughanaghana kuti, ‘Pakukhumbikwa munthu wakuti wawovwire ŵanthu aŵa kumanya layizgo la Ciuta lakuti: “Makutu gha ŵakumangwa nagho ghamkubanuka.”’ (Yesaya 35:5) Ntheura nkhapenjerezga vinandi pa nkhani ya ŵakumangwa. Nkhasanga kuti ciŵelengero ca sonosono cikalongora kuti ku Benin kukaŵa ŵanthu ŵakumangwa pafupifupi 12,000. Kweniso Ciyowoyero Camawoko ca ku America ndico ŵakaŵasambizganga mu masukulu m’malo mwa Cifurenci. Kweni cacitima cikaŵa cakuti pakaŵavya Kaboni wa Yehova uyo wakamanyanga Ciyowoyero Camawoko ca ku America. Nkhadandaulira Kaboni munyake kuti: “Mphanyi panguŵa yunji uyo wakumanya Ciyowoyero Camawoko ca ku America kuti wazakaŵawovwire.” Kweni wakanizgora kuti: “Asi imwe mulipo!” Wakaneneskanga nadi. Ntheura nkhacemeska buku na ma DVD gha Ciyowoyero Camawoko ca ku America ghakupharazgika na Ŵakaboni  ŵa Yehova. Lurombo lwane lukazgoreka apo Kaboni munyake uyo wakamanyanga Ciyowoyero Camawoko ca ku America wakasama ku Cameroon na kwiza ku Benin.

Ŵanthu ŵanandi ŵakapulika kuti nkhusambira ciyowoyero ca mawoko. Ŵanthu ŵakaniphalira kuti nikumane na Brice uyo wakalembanga vilembo vya ciyowoyero camawoko. Mu shopu yake iyo wakacitirangamo mulimo uwu mukaŵa tumphepo tuwemi, cifukwa mtenje wake ukaŵa na mahamba gha makuni gha mkama. Pakuti kwa vyaka vinandi mu ciliŵa wakapuputangamo na maburashi gha penti, cikaŵa na mitundu yinandi ya penti. Wakapuputa fuvu mu tumipando na kunilindilira kuti nambeko. Nkhaŵikapo DVD kuti tiwonelere. Wakasendezgera pafupi mpando wake kuti wawonelere. Iyo wakayowoya mu ciyowoyero ca mawoko kuti: “NKhupulika! Ŵana ŵapafupi ŵakiza na kulingizga kuti ŵawone. Mwana munyake wakazizwa ndipo wakafumba kuti: “Cifukwa wuli ŵakuwoneska vidiyo yambura mazgu?”

Nyengo zose apo nkhizanga kuzakakumana na Brice, pakaŵanga ŵanthu ŵanandi awo ŵakakhumbanga kuwonelera DVD. Pakatora nyengo yitali yayi, Brice na ŵanji ŵakamba kufika ku maungano. Apo nkhayezganga kung’anamulira mu ciyowoyero ca mawoko, vikanovwira kuti nimanyeko vinandi. Apo ŵanthu ŵakamba kuŵa ŵanandi, ŵanji ŵakizanga ŵekha kwa ine. Mwaciyelezgero, zuŵa linyake galimoto yane yikanjira mu cikhululu apo nkhakhumbanga kugega nkhumba na mbuzi izo zikaŵa mu msewu. Mwamabuci nkhapulika kuti guu! guu! kumasinda kwa galimoto. Nkhafipa mtima kuti panji galimoto yane yanangikaso. Kweni nkhasanga kuti ni munthu wambuwu uyo wakanicimbiliranga, ntheura wakatimbanga galimoto kumasinda na cilato cakuti nipulike.

Ciyowoyero Camawoko ca ku America cikamba kuthandazgika mu matawuni ghanyake. Apo maungano gha mu ciyowoyero camawoko ghakambanga, nkhaŵa yumoza wa awo ŵakang’anamuliranga. Apo nkhalutanga kunthazi kwa pulatifomu na kulindizga kuti muyowoyi wambe kuyowoya, nkhakumbuka ivyo vikacitika apo nkhambanga mulimo wane. Nkhajifumbanga kuti, ‘Kasi ni vici vinyake ivyo ningacita kuno ku Africa pakuŵa mumishonare?’ Nati nalaŵiska ŵategherezgi nkhasanga zgoro lakuti, iŵa mumishonale ndipo wovwira ŵanthu ŵambuwu. Pasono nkhujifumbaso yayi fumbo lakuti ‘Kasi nifiskenge?’