Vimbundi Vimalenge!
Vimbundi Vimalenge!
“Lindizga Yehova, endanga mu nthowa yake . . . para ŵaheni ŵadumulika iwe tiuwonepo.”—SALMO 37:34.
NGA umo viliri na ŵanthu ŵanandi, kasi namwe mukucita wofi na vimbundi ndipo mukughanaghana kuti vingamalirathu yayi? Para ni nthena, wofi winu ngwakwenelera. Ŵanthu ŵayezgapo mitundu yakupambanapambana ya maboma, kweni ghatondeka kumazgirathu vimbundi. Kasi yizamuŵapo nyengo yakuti ŵanthu wose ŵazakacitiranenge vinthu mwa urunji?
Cakukondweska nchakuti Baibolo likuti vimbundi vimalenge! Likutiphalira kuti sonosono apa, Ciuta wacitengepo kanthu kuti wamazge vimbundi. Kasi wazamucita wuli? Wazamucita nthena kwizira mu Ufumu wake, uwo ni boma lakucanya ilo lizamusintha vinthu pa caru. Ufumu uwu ni wura Yesu wakasambizganga ŵasambiri ŵake kuti ŵawulombenge. Lurombo ulu ndilo ŵanji ŵakuti Lurombo lwa Fumu. Yesu wakati: “Ufumu winu wize. Khumbo linu licitike, umo kuliri kucanya, ntheura pera pa caru capasi.”—Mateyu 6:10.
Pakuyowoya za Yesu Khristu uyo ni Fumu ya Ufumu uwu, Baibolo likuti: ‘Wazamuthaska musauci para wacema, na mukavu, na uyo walije movwiri. Wazamufwira lusungu ŵakutemphentha na ŵakavu, na kuponoska mizimu ya ŵasauci. Wazamuwombora mizimu yawo ku kuyuzga na ukali.’ (Salmo 72:12-14) Wonani kuti Yesu wakucitira lusungu ŵanthu awo ŵakusuzgika cifukwa ca vimbundi, ndipo wazamucitapo kanthu pa suzgo ili. Ici nchakukhozga comene.
Kwizira mwa themba la lusungu na la nkhongono ili, Ufumu wa Ciuta uzamuwuskapo vimbundi. Mwawuli? Uzamuwuskapo vinthu vitatu ivyo vikucitiska ŵanthu kucita vimbundi.
Kwananga
Pasono tose tikulimbana na vizgoŵi vya kwananga, ivyo vikutikhuŵilizga kuti tijighanaghanirenge tekha. (Ŵaroma 7:21-23) Ndipouli, pali ŵanthu ŵanji ŵawemi awo ŵakukhumba kucita ico nchiwemi. Ŵali na cipulikano mu sembe yakuwombora ya ndopa za Yesu, ndipo zakwananga zawo zingagowokereka. a (1 Yohane 1:7, 9) Ŵanthu aŵa ŵakusanga candulo na citemwa cikuru ca Ciuta nga umo tikuŵazgira pa Yohane 3:16. Lemba ili likuti: “Ciuta wakacitemwa comene caru, mwakuti wakapeleka Mwana wake wapadera yekha, ntheura kuti waliyose uyo wakupulikana mwa iyo waleke kuparanyika kweni waŵenge na umoyo wamuyirayira.”
Ciuta wazamucitira ŵanthu ŵakugomezgeka cinthu cinyake cakukondweska comene. Mu caru ciphya ico cikwiza, wazamuwuskapo kwananga kose, ndipo ŵanthu ŵakugomezgeka wose ŵazamuŵaso ŵakufikapo na ŵarunji. (Yesaya 26:9; 2 Petrosi 3:13) Ntheura, kwananga kuzamucitiskaso ŵanthu kucita vyambura urunji yayi. Mu Ufumu wa Ciuta ŵanthu ŵakugomezgeka ‘ŵazamufwatuka ku wuzga wa kuvunda.’—Ŵaroma 8:20-22.
Caru Ico Tikukhala
Cacitima nchakuti ŵanandi mazuŵa ghano ŵakuyuzga ŵanyawo. Ŵakulyera masuku pa mutu ŵanthu ŵakuyuyuka na ŵakavu, ndipo ŵakucicizga ŵanji kuti ŵacitenge vimbundi nga ndiwo. Baibolo likucenjezga ŵanthu ŵantheura kuti: “Muheni waside nthowa yake, na wambura kunyoloka maghanoghano ghake.” Baibolo likulayizga kuti para munthu uyo wakacitanga viheni wapera, Ciuta ‘wazamumugowokera comene.’—Yesaya 55:7.
Ndipouli, awo ŵakukanira dala kuleka nthowa zawo ziheni, Ciuta wazamuŵalekelera yayi. Mu Ufumu wa Ciuta layizgo la mu Baibolo ili lizamufiskika. Layizgo ili likuti: “Lindizga Yehova, endanga mu nthowa yake, . . . para ŵaheni ŵadumulika iwe tiuwonepo.” b (Salmo 37:34) Ndipo para ŵaheni ŵazakafumiskikapo ŵasopi ŵakugomezgeka ŵa Ciuta, ŵazamusuzgikaso yayi na vimbundi.
Satana Dyabulosi
Cikanamalango mukuru comene wa ŵakwananga ni Satana Dyabulosi. Kweni cakukondweska nchakuti sonosono apa, Yehova wazamujalira Satana kuti waleke kupuluska ŵanthu. Paumaliro, Ciuta wazamumuparanyirathu. Munthu wa nkhaza uyu wazamupuluskaso ŵanthu yayi kuti ŵacitenge vimbundi.
Fundo yakuti Ciuta wazamuwuskapo vyose ivyo vikupangiska kuti ŵanthu ŵacitenge vimbundi njaunenesko, ni maghanoghano waka yayi. Nyengo zinyake mungajifumba kuti, ‘Kasi vingacitika nadi kuti Ciuta wasinthe vinthu? Usange wangasintha, cifukwa wuli wandasinthe mpaka sono?’ Agha ni mafumbo ghawemi ndipo Baibolo likupeleka mazgoro ghakukhorweska. c Tikumupemphani kuti musande mwekha ivyo Baibolo likusambizga pa ivyo vicitikenge sonosono apa, apo vimbundi vizamuŵakoso cara.
[Mazgu ghamusi]
a Kuti mumanye vinandi vyakukhwaskana na kuzirwa kwa sembe yakuwombora ya nyifwa ya Yesu, wonani cipaturo 5 mu buku lakuti Kasi Baibolo Likusambizgaci Comenecomene? lakupharazgika na Ŵakaboni ŵa Yehova.
b Yehova ni zina la Ciuta nga umo Baibolo likulongolera.
c Kuti mumanye vinandi wonani cipaturo 3, 8, na 11 mu buku la mutu wakuti Kasi Baibolo Likusambizgaci Comenecomene?
[Cithuzithuzi pa peji 7]
