Nkhakhumbanga Kwenda Malo Ghakupambanapambana

Yakuyowoyeka na Zoya Dimitrova

Apo nkhaŵa na vilimika 15, nkhawona kuti vyose ivyo nkhakhumbanga vyacitika ndipo nkhasangwanga comene kwenda malo ghakupambanapambana kusanguluska ŵanthu. Kweni pa Seputembala 4, 1970, nkhacita ngozi. Pa nyengo yicoko waka nkhagadabukanga mucanya mwakukondwa, kweni pakajumpha na nyengo wuwo yayi mbwenu najimbofyora pasi.

NKHABABIKA pa Disembala 16, 1952, ndipo nkhakhalanga na ŵapapi ŵane na mukuru wane ku Sofia, mu caru ca Bulgaria. Pa nyengo iyi, boma la Bulgaria likakanizganga yayi kusopa nangauli likagongoweskanga ŵanthu kuŵa na cisopa. Ŵanthu ŵanandi ŵakagomezganga yayi kuti kuli Ciuta, ndipo awo ŵakagomezganga ŵakajibisanga. Nangauli mu mbumba yithu tikatenge tili ŵa chalichi la Orthodox, kweni nkhasambizgikapo yayi vya cisopa ndipo nkhaghanaghanirangako yayi vya Ciuta.

Apo nkhaŵa mwana, nkhatemwanga maseŵera ghakupambanapambana, comenecomene maseŵera ghakugadabukagadabuka. Apo nkhaŵa na vilimika 13, mwanalume munyake wakiza ku sukulu yithu, wakapenjanga msungwana uyo wangasambizgika maseŵera agha. Msambizgi wa maseŵera agha wakasankha ine. Nkhanotha comene kwenda mu galimoto ya bwana iyo yikaŵa yapacanya comene, kuluta kukafumbika na kuyezgeka na ŵasambizgi ŵa maseŵera agha. Pamanyuma nkhasoreka ndipo nkhakondwa comene. Nkhamba kusambira malango gha umo ningacitira maseŵera agha na kucita ivyo nkhasambiranga, ndipo pakatora vilimika vyakujumpha viŵiri kuti nisambire. Nkhamalizga kusambira maseŵera agha apo nkhaŵa na vilimika 15 ndipo nkhayamba kwenda malo ghakupambanapambana na gulu lakucita maseŵera agha. Pakwamba nkhazingilira caru cose ca Bulgaria kweni pamanyuma nkhamba kwenda mu vyaru vya mu Soviet Union ndiposo ku Algeria, Hungary, na caru ico kale cikaŵa Yugoslavia.

Kwa vilimika vitatu, vinthu vikendanga makora comene. Kweni apo nkhasanguluskanga ŵanthu mu tawuni ya Titov Veles, ku Macedonia, nkhacita ngozi iyo nayowoya kukwambilira. Nkhaŵa kuti nkhugadabuka mucanya comene. Munyane wakaŵa musi mwane ndipo wakaniponyanga mucanya kuti para nkhukhira pasi wanankhenge. Mwasoka nkhawinda mawoko ghake, ndipo cingwe ico nkhajikakilira kuti cinivikilirenge cikadosoka ndipo nkhajimbofyora pasi. Ŵakacimbilira nane ku cipatala, ndipo ŵadokotala ŵakasanga kuti naphyoka woko, mbambo, na msana. Kwa tumazuŵa, nkhamanyangako kalikose yayi. Nkhati namba kuweleramo, nkhawona kuti viŵaro vyane vyafwa kufumira mu ciwuno kukhira pasi. Kweni pakuti nkhaŵa mucoko, nkhaghanaghananga kuti para ŵanovwira panji kunicita opareshoni mbwenu nizamwamba kwenda ndiposo kulutilira maseŵera ghane.

Kwa vilimika vyakulondezgapo viŵiri na hafu, nkhapokera wovwiri mu vipatala vyakupambanapambana, ndipo nkhaghanaghananga kuti nicirenge. Paumaliro, nkhamanya kuti ivyo  nkhaghanaghananga vyatondeka. Panyengo iyi nkhenera kusintha na kwamba kwenda pa njinga ya ŵanthu ŵakupendera, ico cikaŵa cakupambana comene na umoyo wakwendakwenda uwo nkhakhumbanga.

Kwamba kwa Umoyo Uphya

Pakuti nkhazgoŵera umoyo wambura kukhala malo ghamoza, nkhawona kuti umoyo uwu niwukwaniskenge yayi. Pakuti pakaŵavya cakuti ningacitapo, nkhamba kusuzgika maghanoghano. Mu 1977, munyamata munyake zina lake Stoyan wakiza ku nyumba kwane. Nkhati namanya kuti ni mudumbu wa munyane uyo tikacitiranga lumoza maseŵera, nkhamunjizga mu nyumba. Apo tikacezganga, wakanifumba usange nkhugomezga kuti zuŵa linyake ningazakacira. Cifukwa ca kukwiya na umoyo, nkhazgora kuti vingacitika yayi. Apo wakaniphalira kuti ni Ciuta pera uyo wanganovwira, nkhazgora mwaukali kuti, “Para Ciuta waliko, cifukwa wuli nkhusuzgika nthena?”

Mazgu agha ghakamupa mwaŵi Stoyan kuti wanilongosolere makora vinthu vyakukondweska ivyo Baibolo likulayizga. Iyo wakasambira Baibolo na kuŵa yumoza wa Ŵakaboni ŵa Yehova apo wakaŵa ku United States kukacita maseŵera ghakuyana waka na agho ine nkhacitanga. Nkhakondwa comene kusambira kuti sonosono caru ciŵenge paradiso. Layizgo lakuti “nyifwa yizamuŵakoso cara, nesi kutengera panji kutampha nesi vyakuŵinya vizamuŵakoso cara” likanicontha comene. (Uvumbuzi 21:4) Nkhakhumba comene kuti nizakaŵeso makora nga ni kale. Nyengo yeneyiyo nkhazomera kusambira Baibolo. Uku kukaŵa kwamba kwa umoyo wane uphya. Nkhacisanga cifukwa ca kugomezgera kuti nizamuŵaso makora kunthazi.

Sabata yiliyose nkhalindiliranga mwakunweka zuŵa lane la kusambilira Baibolo. Pakwamba wakanisambizganga ni Stoyan ndipo pamanyuma wakamba kunisambizga ni Totka, uyo wakaŵa Kaboni walusungu comene. Wakanovwira comene mwakuti nkhacedwa yayi kumanya unenesko uwo Baibolo likusambizga, ndipo nkhapatulira umoyo wane kwa Yehova Ciuta. Panyengo iyi, ku Sofia kukaŵavya munthu uyo wanganibapatiza, ntheura nkhenera kulindilira mbali kufuma ku Macedonia. Pa Seputembala 11, 1978, pamanyuma pa cilimika cimoza kufuma apo nkhambira kusambira Baibolo, nkhabapatizika mu cibeseni cikuru ico cikaŵa ku bafa lane. Nkhaŵa wakukondwa comene kubapatizika nga njumoza wa Ŵakaboni ŵa Yehova, ndipo sono nkhamanyanga cifukwa ico niliriko.

Unenesko wa mu Baibolo uwo nkhasambira ukagoleranga nga ni moto mwa ine. Waliyose uyo wiza ku nyumba yane nkhamuphalirangako cigomezgo cane. Mwasoka, pakaŵavya uyo wakanigomezganga. Panji ŵanthu ŵakaghanaghananga kuti mutu wane ukwenda makora yayi cifukwa ca ngozi iyo yikaniwira.

Ubudi Ukuru

Pa nyengo iyo Ŵakaboni ŵa Yehova ŵakaŵa ŵakukanizgika mu caru ca Bulgaria, mu caru cose  mukaŵa Ŵakaboni ŵacoko comene. Maungano gha mpingo ghakacitikanga yayi, ndipo ŵabali na ŵadumbu ŵakuti tikhozganenge cipulikano ŵakasoŵanga. Cifukwa ca suzgo ili ndiposo cifukwa ca kuleka kuŵikako mahara ku cenjezgo lakuti tileke kwendezgana na awo ŵakuleka kulondezga fundo za mu Baibolo, nkhacita ubudi ukuru.

Njuŵi yikanisuzga, ndipo vikaniŵinya comene kuti nadumura ubwezi wane na Yehova Ciuta. Nkhaŵa na citima ndipo soni zikanikora comene, nkhaphalira Yehova vyose ivyo vikaŵa mu mtima wane, ndipo nkhalomba kuti wanigowokere. Pamanyuma, ŵalara mu mpingo ŵakanovwira, umoyo wane wauzimu ukambaso kwenda makora, ndipo nkhambaso kuteŵetera Yehova mwakukondwa. Nchakukondweska comene kuteŵetera Yehova na njuŵi yituŵa na kuŵa mu gulu lake lakutowa.

Nkhukondwa Nangauli Nkhutondeka Kucita Vinyake

Ngozi iyo yikanicitikira vilimika 40 ivyo vyajumpha yili kutimbanizga khumbo lane la kucita maseŵera na kwenda vyaru vyakupambanapambana, ndipo sono nkhukhala waka pa njinga ya ŵanthu ŵakupendera. Kweni nkhudandawurapo yayi nesi kucita citima nga ni para nili wakutondeka. Unenesko uwo nasambira mu Baibolo wanovwira kumanya kuti cimwemwe ico nkhatenge niŵenge naco pakucita maseŵera agha cikatenge ciŵenge ca nyengo yicoko waka. Najiwonera nekha vyakuŵinya ivyo ŵanyane awo ŵakalutilira maseŵera agha ŵakumana navyo. Kweni ine nasanga cuma capadera comene, nili paubwezi na Yehova Ciuta, uyo ni Mlengi wane. Ici canipangiska kuŵa wakukondwa comene mwakuti nkhatenge nikondwenge nthena yayi niŵenge kuti nicali kucita maseŵera agho nkhacitanga.

Niliso wakukondwa kuwona ŵanthu ŵanandi ŵakusambira unenesko wa mu Baibolo na kupatulira umoyo wawo kwa Ciuta withu wacitemwa, Yehova. Apo nkhamba kusambira Baibolo mu 1977, mu Bulgaria mukaŵa Ŵakaboni ŵa Yehova ŵacoko comene. Nanga muŵe mu 1991, apo muwuso wa Communist ukamara ndipo Ŵakaboni ŵa Yehova ŵakazomerezgeka kakwamba, mu caru cose ca Bulgaria mukaŵa Ŵakaboni ŵambura kujumpha 100. Ndine wakukondwa comene kuwona kuti ciŵelengero ca ŵapharazgi ŵa Ufumu cikukulirakulira ndipo sono pali ŵapharazgi pafupifupi 1,800.

 Pacali nchito yinandi yakuti yicitike mu Bulgaria. Ŵanthu ŵanandi ŵakukhumba kumanya ivyo Mazgu gha Ciuta ghakusambizga. Ŵanthu 3, 914 awo ŵakiza pa Cikumbusko ca nyifwa ya Yesu mu 2010 mbukaboni wakuti ŵanandi ŵakupenja unenesko. Nkhukondwa comene kuwona umo Yehova watumbikira ŵanthu ŵacoko waka awo ŵakasambira unenesko mu Bulgaria. Najiwonera nekha umo “mucoko” wazgokera “mtundu wa nkhongono” nga umo lemba la Yesaya 60:22 likayowoyerathu.

Cinthu cinyakeso cakukondweska comene pa umoyo wane cikaŵa kufumiskika kwa Baibolo la New World Translation of the Holy Scriptures mu ciyowoyero ca Bulgaria. Baibolo ili likafumiskika mu Ogasiti 2009, pa Ungano wa Cigaŵa wa mutu wakuti “Muŵenge Maso!” uwo ukacitikira ku Sofia. Kwanyengo yitali nkhalindiliranga nyengo iyo Baibolo ili lizamufumiskika mu ciyowoyero cane. Nchakuwonekerathu kuti Baibolo ili lovwirenge ŵanthu ŵanandi mu Bulgaria kuti ŵamanye unenesko wa mu Baibolo.

Nangauli nkhutondeka kucitako comene mulimo wa kupharazga makani ghawemi gha Ufumu cifukwa cakuti nili kupendera, kweni nkhukondwa comene kuphalirako fundo za mu Baibolo ŵazengezgani ŵane na waliyose uyo wiza pa nyumba yane. Zuŵa linyake apo nkhaŵa pa khonde nkhacema mzengezgani wane munyake uyo wakajumphanga. Wakazomera kwiza, ndipo nati namuphalira fundo zakukhozga kufuma mu Baibolo, wakazomera kuti nisambirenge nayo Baibolo. Nkhakondwa comene apo pamanyuma wakabapatizika na kuŵa Mkhristu munyane. Naŵa na mwaŵi wa kovwira ŵanthu ŵanayi kuti ŵapatulire umoyo wawo kwa Yehova.

Cinthu ico cikunikondweska comene ndiposo kunikhozga nkhuwungana nyengo zose na Ŵakhristu ŵanyane. Iwo ŵali nga mba mu mbumba yane. Pakuti mu caru cithu mulije magalimoto ghapadera ghakunyamura ŵacekuru na awo ŵakutondeka kwenda, vikunisuzga kuluta ku maungano. Nkhuwonga comene umo mbali munyake muwukirano wakunovwilira. Zuŵa lililose la maungano wakuninyamura mu nyumba na kuniŵika mu galimoto yake, kufuma mu galimoto yake kuluta mu Nyumba ya Ufumu, na kuweleraso ku nyumba. Nkhuwonga Yehova kuti nili pakati pa mbumba iyo yikutemwana nthena.

Para nkhulaŵiska kumanyuma, vinthu pa umoyo wane vikupambaniranathu na umo nkhaghanaghaniranga apo nkhaŵa muwukirano. Kuteŵetera Yehova kwanipa cimwemwe cikuru comene panyengo yasono ndiposo cilindizga ciwemi ca munthazi. Nkhuzirwiska comene layizgo la Ciuta lakuti “mugonthi wadukenge nga ndi mphala.” (Yesaya 35:6) Nkhulindilira na cigomezgo cose zuŵa ilo nizamuduka kufuma pa njinga ya ŵanthu ŵakupendera, ndipo nizamuŵaso na umoyo uwemi ndiposo nkhongono zose.

[Mazgu Ghakukhozgera pa peji 30]

“Cinthu ico cikunikondweska comene ndiposo kunikhozga nkhuwungana nyengo zose”

[Mazgu Ghakukhozgera pa peji 31]

“Cinthu cakukondweska comene pa umoyo wane cikaŵa kufumiskika kwa Baibolo la New World Translation of the Holy Scriptures mu ciyowoyero ca Bulgaria”

[Cithuzithuzi pa peji 29]

Nkhamba kucita maseŵera ghane apo nkhaŵa na vilimika 15