1, 2. Kasi Mkhristu waliyose wakwenera kuchitachi? Yowoyani chiyelezgero.

MAMA para wakugura vipasi ku msika, wakusankha waka chilichose icho ntchikuru panji chakutchipa yayi. Kweni wakusankha icho ntchakuphya makora. Wakukhumba vipasi ivyo vikunowa na kununkhira makora, kweniso ivyo ni viwemi ku umoyo wa munthu. Mama wakusankha vipasi ivyo ni vyakukhwima na kuphya makora.

² Munthu uyo wajipeleka kwa Chiuta na kubatizika, wakulutilira kukura mwauzimu. Wakukhumba kuti waŵe muteŵeti wakukhwima wa Chiuta. Mkhristu waliyose wakwenera kuŵa wakukhwima mwauzimu. Mpositole Paulosi wakaphalira Ŵakhristu ŵa ku Efeso kuti ŵalutilire kukura mwauzimu. Wakaŵachiska kuti ‘ŵafike ku umoza mu chipulikano na kumanya makora Mwana wa Chiuta, kuti ŵaŵe ŵanthu ŵalara ŵakufikapo, kufika pa msinkhu wakuyana na uzali wa Khristu.’—Efe. 4:13.

3. Kasi Ŵakaboni ŵa Yehova ŵakuyana wuli na Ŵakhristu ŵa mpingo wa Efeso?

³ Apo Paulosi wakalemberanga kalata mpingo wa Efeso,  pakaŵa kuti pajumpha vyaka vinandi kufuma apo mpingo uwu ukambira. Ŵakhristu ŵanandi mu mpingo uwu ŵakaŵa ŵakukhwima mwauzimu. Ndipouli, ŵanyake ŵakakhumbikwiranga kulimbikira kuti ŵaŵe ŵakukhwima. Mazuŵa ghano, ndimo viliriso na Ŵakaboni ŵa Yehova. Ŵabali na ŵadumbu ŵanandi ŵateŵetera Yehova kwa nyengo yitali ndipo mbakukhwima mwauzimu. Ndipouli, ŵanyake ŵandakhwime mwauzimu. Mwachiyelezgero, chaka chilichose ŵanthu ŵanandi ŵakubatizika. Ntheura ŵanyake ŵakwenera kulimbikira kuti ŵakhwime mwauzimu. Kasi imwe ndimwe ŵakukhwima mwauzimu?—Kol. 2:6, 7.

4, 5. Kasi ni vichi ivyo Ŵakhristu ŵakukhwima ŵakuyana yayi, ndipo ni vichi ivyo ŵakuyana? (Wonani chithuzi chakwamba.)

⁴ Para mukusankha vipasi vyakuphya, mukumanya kuti vyose vikuyana yayi. Kweni pali vinthu vinyake vyakuyana ivyo vikulongora kuti vipasi ni vyakuphya. Ŵakhristu ŵakukhwima nawo ŵakuyana yayi vinthu vinyake nga ni mtundu, umo ŵali kulelekera, nkhongono, misinkhu, maluso, nkharo, kweniso kakhaliro. Ndipouli, wose awo ŵakura mwauzimu ŵali na mikhaliro yakuyana iyo yikulongora kuti mbakukhwima. Kasi ni mikhaliro wuli?

⁵ Mkhristu wakukhwima wakuchita vinthu nga umo Yesu wakachitiranga. Yesu wali kutilekera chakuwonerapo kuti ‘tilondezgenge mendero ghake mwakugomezgeka.’ (1 Pet. 2:21) Kasi ntchinthu wuli chakuzirwa chomene icho Yesu wakati tichitenge? Wakati titemwenge Yehova na mtima withu wose, umoyo withu wose, na maghanoghano ghithu ghose, kweniso titemwenge ŵanyithu nga umo tikujitemwera taŵene. (Mat. 22:37-39) Mkhristu wakukhwima wakuchita ivyo Yesu wakati tichitenge. Nyengo zose wakulongora kuti wakutemwa nadi Yehova kweniso kuti wakutemwa ŵanyake.

6, 7. (a) Kasi Mkhristu wakukhwima wakuŵa na mikhaliro wuli? (b) Kasi tose tikwenera kujifumba fumbo wuli?

⁶ Chitemwa ntchimoza cha vipambi vya mzimu ivyo Mkhristu wakukhwima wakulongora. (Gal. 5:22, 23) Vipambi vinyake nga ni kuzika, kujikora, na kuzikira navyo ni vyakuzirwa. Vipambi ivi vikovwira Mkhristu kuti wazizipizge para wakumana na masuzgo. Para Mkhristu wakukhwima wakuŵazga Mazgu gha Chiuta, wakupenja fundo izo zingamovwira kupambaniska pakati pa chiwemi na chiheni. Ntheura para wakusankha chakuchita wakulongora kuti ngwakukhwima mwauzimu. Wakupulikira ivyo njuŵi yake yikumuphalira mwakukolerana na ivyo Baibolo likuyowoya. Mkhristu wakukhwima wakuŵa wakujiyuyura chifukwa wakumanya kuti malango gha Yehova ghakuluska maghanoghano ghake. * Wakulimbikira kupharazga makani ghawemi na kovwira kuti mpingo ulutilire kuŵa wakukolerana.

⁷ Kwali tateŵetera Yehova kwa utali wuli, tose tikwenera kujifumba kuti, ‘Kasi ntchivichi icho ningachita kuti nilondezgenge Yesu na kulutilira kukura mwauzimu?’

8. Ntchivichi icho chikulongora kuti Yesu wakaghamanyanga makora Malemba?

⁸ Yesu Khristu wakaghamanyanga makora  Mazgu gha Chiuta. Apo wakaŵa na vilimika 12, wakadumbiskananga nkhani za mu Malemba na ŵasambizgi pa tempile. “Wose awo ŵakamupulikizganga ŵakazizwa chomene chifukwa wakapulikiskanga luŵiro vinthu kweniso wakaŵazgoranga makora.” (Luka 2:46, 47) Zuŵa linyake, ŵanthu awo ŵakasuskanga Yesu ŵakasoŵa chakuyowoya.—Mat. 22:41-46.

9. (a) Kasi munthu uyo wakukhumba kukura mwauzimu wakwenera kuchita vichi? (b) Chifukwa wuli tikwenera kusambira Baibolo?

⁹ Mkhristu uyo wakukhumba kukura mwauzimu wakwenera kulondezga Yesu. Nyengo zose wakwenera kusambira Baibolo kuti wamanye vinandi, chifukwa “chakurya chakukhoma ntcha ŵanthu ŵakukhwima.” (Heb. 5:14) Mkhristu wakukhwima wakwenera “kumanya makora Mwana wa Chiuta.” (Efe. 4:13) Kasi mukuŵazga Baibolo zuŵa lililose? Kasi sabata yiliyose mukupatura nyengo yakuchitira sambiro la mwaŵene, kweniso kusopa kwa mbumba? Para mukuŵazga Baibolo, penjani fundo izo zingamovwirani kumanya maghanoghano gha Yehova. Londezgani fundo za mu Baibolo, nakuti ndizo mwenderenge para mukusankha chakuchita. Para muchitenge nthena, mukhozgenge ubwezi winu na Yehova.

10. Kasi fundo za mu Baibolo zikumovwira wuli Mkhristu wakukhwima?

¹⁰ Pali vinandi ivyo Mkhristu wakukhwima wakwenera kuchita. Wakwenera kutemwa malango gha Yehova na fundo zake. Usange wakuŵika pakwamba khumbo la Yehova mu umoyo wake, wakulongora kuti wakutemwa malango gha Yehova na fundo zake. Mkhristu wakwenera kuvura wunthu wakale na kuvwara  wunthu uphya wakuyana na Khristu, “uwo ukalengeka mwakuyana na khumbo la Chiuta, mu urunji wenecho na kugomezgeka.” (Ŵazgani Ŵaefeso 4:22-24.) Baibolo likalembeka na wovwiri wa mzimu utuŵa wa Chiuta. Mkhristu uyo wakulongozgeka na mzimu utuŵa, wakuŵazga na kutemwa fundo za mu Baibolo. Ntheura wakukura mwauzimu.

11. Kasi Yesu wakakhalanga na ŵanthu wuli?

¹¹ Apo Yesu wakaŵa pa charu chapasi, wakakhalanga na ŵanthu ŵakwananga. Ŵapapi na ŵabali ŵake awo wakakhalanga nawo ŵakaŵa ŵakwananga. Nanga mbapositole ŵake nawo ŵakalongoranga mtima wakujitemwa. Mwachiyelezgero, pa usiku wakuti machero Yesu wafwenge, “pakawukaso suskano likuru pakati pawo pa nkhani ya uyo wakuwoneka kuŵa mukuru chomene.” (Luka 22:24) Ndipouli, Yesu wakaŵa na chigomezgo chakuti ŵapositole ŵake ŵakurenge mwauzimu na kupanga mpingo wakukolerana. Pa usiku uwu, Yesu wakalomba kuti ŵapositole ŵake ŵatemwanenge na kukolerana. Iyo wakati: ‘Wose ŵaŵe ŵamoza, umo imwe, Ŵadada muliri mu umoza na ine ndipo ine nili mu umoza na imwe, kuti iwo nawo ŵaŵe mu umoza na ise, mwakuti ŵaŵe ŵamoza umo ise tiliri ŵamoza.’—Yoh. 17:21, 22.

12, 13. (a) Kasi lemba la Ŵaefeso 4:15, 16 likutichiska kuchitachi? (b) Kasi Mubali Uwe wakachita wuli kuti wakoleranenge na ŵanyake mu mpingo?

¹² Muteŵeti wa Yehova uyo ngwakukhwima, wakovwira kuti mpingo uŵe wakukolerana. (Ŵazgani Ŵaefeso 4:1-6, 15, 16.) Pakuti ndise ŵateŵeti ŵa Yehova, tose tikwenera kukumana pamoza panji kuti kuŵa ŵakukolerana. Baibolo likuti tikwenera kujiyuyura kuti tiŵe ŵakukolerana. Mkhristu wakukhwima wakuŵa wakujiyuyura ndipo wakulutilira kukolerana na ŵanyake nanga ni para ŵamukhuŵazga. Kasi mukuchita wuli na maubudi gha ŵabali panji ŵadumbu mu mpingo? Kasi mukuchita wuli usange munyake mu mpingo wamukhuŵazgani? Kasi mukusona mulomo winu na kuleka kuyowoya na uyo wamukhuŵazgani? Kasi mukuyezgayezga kuwezgerapo ubwezi na uyo wamukhuŵazgani? Mkhristu wakukhwima wakwenera chara kumazga ubwezi wake na munthu uyo wamukhuŵazga, kweni wakwenera kulimbikira kuchita vinthu ivyo vingawovwira kuti ubwezi ulutilire.

¹³ Wonani ivyo vikachitikira Mubali Uwe. Pakwamba, Uwe wakakhuŵaranga chomene na maubudi gha Ŵakhristu ŵanyake. Pamanyuma, wakaghanaghana kusanda nkhani ya Davide mu Baibolo na mu buku lithu linyake. (Insight on the Scriptures) Chifukwa wuli wakasankha nkhani ya Davide? Mubali Uwe wakati: “Davide wakasuzgika na nkharo yiheni ya Ŵaisrayeli ŵanyake. Mwachiyelezgero, Themba Sauli likakhumbanga kumukoma. Ŵanthu ŵanyake ŵakakhumbanga kumuponya na malibwe, kweniso mwanakazi wake wakamuyowoyera mazgu ghamsinjiro. (1 Sam. 19:9-11; 30:1-6; 2 Sam. 6:14-22) Kweni Davide wakaleka yayi kutemwa Yehova chifukwa cha nkharo yiheni ya ŵanthu ŵanyake. Davide wakaŵa walusungu ndipo nane nkhakhumbanga kuŵa nga ndiyo. Nkhani ya Davide yikanovwira kusintha umo nkhawoneranga maubudi gha Ŵakhristu ŵanyane. Nili kuleka kuŵasungira ŵanyane chigwinini panji vyakusingo. Mu malo mwake nkhulimbikira kuti nikoleranenge na ŵanyane mu mpingo.” Kasi namwe mukukolerana na ŵanyinu mu mpingo?

14. Kasi mbanthu wuli awo Yesu wakasankha kuŵa ŵabwezi ŵake?

¹⁴ Yesu wakatemwanga munthu waliyose. Ŵanthu wose ŵakafwatukanga nayo, kwali mbanalume, ŵanakazi, ŵalara, na ŵana. Kweni wakachita kusankha awo ŵakaŵa ŵabwezi ŵake ŵa pa mtima. Yesu wakaphalira ŵapositole ŵake kuti: “Imwe muli ŵabwezi ŵane usange mukucita ivyo nkhumulangurani.” (Yoh. 15:14) Yesu wakasankha awo ŵakamulondezganga mwakugomezgeka, kweniso awo ŵakateŵeteranga Yehova na mtima wose kuti ŵaŵe ŵabwezi ŵake. Kasi namwe ŵabwezi ŵinu ni ŵanthu awo ŵakuteŵetera Yehova? Chifukwa wuli ntchiwemi kusankha ŵabwezi awo ŵakuteŵetera Yehova?

15. Chifukwa wuli ŵawukirano ŵakwenera kuchezga na Ŵakhristu ŵakukhwima?

¹⁵ Vipasi vinandi vikuphya makora para vili pa kazuŵa kawemi. Ŵabali na ŵadumbu nawo ŵali nga ni kazuŵa kawemi ndipo ŵangamovwirani kuti mukhwime mwauzimu. Usange ndimwe muwukirano ndipo mukukhumba kuteŵetera Chiuta, sankhani makora ŵakuchezga nawo. Muchezgenge na Ŵakhristu ŵakukhwima awo ŵateŵetera Yehova mwakugomezgeka kwa nyengo yitali kweniso ŵawovwira mpingo kuti ulutilire kuŵa wakukolerana. Ŵakhristu aŵa ŵakumanya vinandi chifukwa ŵakumanapo na vinandi pakuteŵetera Chiuta. Iwo ŵangamovwirani kuti musankhe makora vyakuchita. Usange mukuchezga na ŵabali na ŵadumbu ŵanthena aŵa, ŵamovwiraninge kusankha vinthu mwavinjeru, ndiposo kuti mukhwime mwauzimu.—Ŵazgani Ŵahebere 5:14.

16. Kasi mudumbu munyake muwukirano wakawovwirika wuli?

¹⁶ Mudumbu Hega wakukumbuka ivyo ŵana ŵanyake ŵa sukulu ŵakayowoyanga apo wakaŵa pafupi kumalizga masambiro gha ku sekondare. Ŵanandi ŵakakhumbanga kuluta ku yunivesite kuti ŵazakasange ntchito za malipiro ghanandi. Hega wakadumbiskana nkhani iyi na Ŵakhristu ŵanyake ku mpingo. Hega wakati: “Ŵakhristu awo nkhachezgapo nawo nkhani iyi, ŵanandi ŵakaŵa ŵalara kuluska ine. Ŵakanichiska kuti nambe upayiniya wanyengozose. Ntheura nkhachita upayiniya kwa vyaka vinkhondi. Sono pajumpha nyengo, ndipo ndine wakukondwa chomene chifukwa nkhasankha kuteŵetera Yehova. Nkhudandawura yayi kuti nili kusankha kuteŵetera Yehova.”

17, 18. Chifukwa wuli tikwenera kuŵa ŵakukhwima mwauzimu?

¹⁷ Para tikulimbikira kuyezga Yesu, tikurenge mwauzimu. Ubwezi withu na Yehova ukhorenge, nakuti tilutilirenge kumuteŵetera na mtima wose. Mkhristu uyo ngwakukhwima wakuteŵetera Yehova na mtima wose. Yesu wakaphalira ŵalondezgi ŵake kuti: “Ungweru winu uŵale panthazi pa ŵanthu, mwakuti ŵawone milimo yinu yiwemi na kupeleka uchindami kwa Awiskemwe ŵa kuchanya.”—Mat. 5:16.

¹⁸ Mkhristu uyo ngwakukhwima wakovwira chomene mpingo kuti wendenge makora. Mkhristu wakukhwima wakupulikira njuŵi yake mwakukolerana na fundo za Chiuta. Kasi njuŵi yithu yingatovwira wuli kuti tisankhenge vinthu mwavinjeru? Kasi tingachindika wuli ivyo Ŵakhristu ŵanyithu ŵakusankha mwakuyana na njuŵi zawo? Mafumbo agha ndigho tizamudumbiskana mu nkhani yakulondezgapo.