Ivi ndivyo Ŵakhristu ŵanyake ŵakuyowoya, chomenechomene awo ŵandanjire mu nthengwa. Iwo ŵakumanya kuti Yehova wakukhumba kuti ŵateŵeti ŵake ŵatorenge panji kutengwa “mu Fumu pera.” Ŵakumanya kuti ŵakwenera kutorana na munthu uyo ni Kaboni wa Yehova. (1 Kor. 7:39) Kweni chifukwa wuli ŵanyake ŵakuyowoya mazgu agho ghali pachanya apa?

Ŵakhristu awo ŵakuyowoya mazgu agha kanandi ŵakughanaghana kuti ŵadumbu ŵambura kutengwa mbanandi kuluska ŵabali ŵambura kutora. Ndimo viliri nadi mu vyaru vinandi. Ku Korea, pa Ŵakhristu 100, awo ŵandanjire mu nthengwa, 57 mbadumbu. Pa Ŵakhristu 100 ku Colombia, 66 mbadumbu.

Ŵapapi ŵanyake ŵakutchaja maloworo ghanandi. Ŵabali ŵanyake ŵangakwaniska yayi kupeleka maloworo ghanandi. Ntheura ŵadumbu ŵanyake ŵakukayika usange ŵangasanga mubali wakuti ŵatorane nayo. *

Panji namwe mukupenja mubali wakwenelera wakuti mutorane nayo ndipo mukumanya yayi usange wasangikenge. Yehova wakumanya ivyo mukukhumba ndipo wakumupulikiskani.—2 Mid. 6:29, 30.

Chifukwa wuli Yehova wali kupeleka dango lakuti tikwenera kutora panji kutengwa mu Fumu pera? Iyo wakutivikilira kweniso wakutikhumbira viwemi. Wakukhumba yayi kuti tisankhe vinthu ivyo tingadandawura navyo paumaliro. Mu nyengo ya Nehemiya, Ŵayuda ŵanandi  ŵakatoranga ŵanakazi awo ŵakasopanga Chiuta yayi. Nehemiya wakaŵakumbuska ivyo vikachitikira Solomoni. Iyo wakati Solomoni ‘wakatemweka na Chiuta wake ndipo Chiuta wakamwimika themba pachanya pa Israyeli yose; kweni ŵanakazi ŵa mitundu ŵakamunangiska.’ (Neh. 13:23-26) Lekani Yehova wakuphaliraso Ŵakhristu mazuŵa ghano kuti ŵakwenera kutora panji kutengwa mu Fumu pera. (Sal. 19:7-10; Yes. 48:17, 18) Tikuwonga Yehova chifukwa wakutipa ulongozgi uwemi uwo ukulongora kuti wakutitemwa. Para tikumupulikira tikulongora kuti iyo ndiyo ngwakwenelera kutiphalira icho ntchiwemi.—Zinth. 1:5.

Tikumanya kuti mukukhumba yayi ‘kukakika joko’ na munthu wambura kupulikana uyo wakuleka kutemwa Yehova. Iyo wangamupuluskani kuti muleke kuteŵetera Yehova. (2 Kor. 6:14) Ŵabali na ŵadumbu ŵanandi ŵatumbikika chifukwa cha kupulikira ulongozgi wa Yehova. Kweni ŵanyake ŵakusurako waka ulongozgi uwu.

Maggy, * wa ku Australia, wakalongosora ivyo vikachitika apo wakaŵa pa chibwezi na munthu uyo ni Kaboni yayi. Iyo wakati: “Nkhakhalanga ku maungano kuti nkhachezgenge na chibwezi chane. Ntheura nkhalopwa chomene mwauzimu.” Ratana wa ku India, wakaŵa pa chibwezi na munyamata uyo ŵakasambiranga lumoza. Munyamata uyu wakamba kusambira Baibolo kuti waŵe pa chibwezi na Ratana. Paumaliro Ratana wakaleka unenesko na kwamba chisopa chinyake kuti watorane na munyamata uyu.

Ndenguè wa ku Cameroon, wakatengwa na vyaka 19 kwa mwanalume wakuwaro. Pambere ŵandatorane, mwanalume wakamuphalira kuti wamukanizgenge yayi kusopa. Pakati pajumpha masabata ghaŵiri ŵati ŵatorana, mwanalume wake wakamukanizga kuluta ku maungano. Ndenguè wakati: “Nkhakhaliranga waka kulira. Nkhawona kuti palijeso icho ningachita. Nkhati ‘mama ine, tukaŵa twachi!’”

Ŵanyake ŵali kutengwa na munthu uyo ŵakuti ni muwemi kweni ngwakuwaro. Munthu wakuwaro wangawoneka nga wali na nkharo yiwemi, kweni kasi ubwezi winu na Yehova uŵenge wuli para mungatorana nayo? Kasi mujipulikenge wuli pakuti mundapulikire ulongozgi wa Yehova? Kasi Yehova wajipulikenge wuli na ivyo mwachita?—Zinth. 1:33.

Ŵabali na ŵadumbu ŵanandi pa charu chose ŵakutengwa na kutora mu Fumu pera ndipo ŵakuwona kuti ntchamahara nadi kuchita nthena. Ŵabali na ŵadumbu ŵanandi ŵambura kutora na kutengwa ŵaŵikapo mtima kuti ŵasange munyawo uyo wakusopa Yehova. Michiko wa ku Japan, ŵabali ŵake ŵakamuchichizganga kuti watengwe kwa munthu wakuwaro. Wakadokeranga kuwona kuti ŵasungwana ŵamsinkhu wake ŵakutengwa ku ŵabali. Nayo wakakhumbanga kupulikira ulongozgi wa Yehova, ndipo wakati: “Yehova ni ‘Chiuta wakukondwa.’ Ntheura munthu wangaŵa wakukondwa chifukwa chakuti watengwa pera yayi. Kweniso wakutipa ivyo mtima withu ukukhumba. Para tikukhumba kutengwa, kweni munthu wakwenelera wakusangika yayi, ntchiwemi kuzikira.” (1 Tim. 1:11) Pati pajumpha nyengo, Michiko wakasanga mubali muwemi chomene, ndipo ngwakukondwa chomene chifukwa cha kupulikira ulongozgi wa Yehova.

Ŵabali ŵanyake ŵalindilira kwa nyengo yitali kuti ŵasange mudumbu wakwenelera wakuti ŵatorane nayo. Bill wa ku Australia nayo vikamuchitikirapo. Nyengo yinyake wakadokeranga ŵasungwana ŵakuwaro, kweni wakakana kuzgoŵerana nawo. Chifukwa wuli wakachita nthena? Wakakhumbanga yayi kukakika “goliwoli” na munthu wambura kupulikana. Pakati pajumphapo vyaka, wakasongapo ŵadumbu ŵanyake, kweni ŵakamukana. Bill wakalindilira vyaka 30 ndipo paumaliro wakasanga mudumbu wakwenelera ndipo ŵakatorana. Bill wakati:  “Nkhudandawura yayi. Yehova wanitumbika. Nkhupharazgira lumoza na muwoli wane. Tikusambira Mazgu gha Chiuta na kuluta ku maungano lumoza. Nkhukondwaso kuchezga na ŵabwezi ŵa muwoli wane chifukwa Mbakaboni ŵanyithu. Para tapambana maghanoghano na muwoli wane, tikulondezga fundo za mu Baibolo.”

Apo mukulindilira kuti musange munthu wakwenelera wakuti mutorane nayo, lutilirani kulondezga ulongozgi wa Yehova. Jifumbani kuti: Chifukwa wuli nindatore panji kutengwa m’paka sono? Chifukwa mukukhumba kupulikira na kukondweska Yehova. (1 Sam. 15:22; Zinth. 27:11) Lutilirani kulomba kwa Yehova na kumuphalira vyakusingo. (Sal. 62:8) Kanani makhumbiro ghaheni ndipo ubwezi winu na Yehova ukhorenge. Manyani kuti Yehova wakumupwelelerani ndipo muli ŵakuzirwa chomene kwa iyo. Yehova wamusankhiraninge mwanalume panji mwanakazi yayi. Kweni usange mukukhumba kutengwa panji kutora mu fumu pera, Yehova wamovwiraninge kuti musange munthu wakwenelera.—Sal. 145:16; Mat. 6:32.

Namwe mungajipulika nga ni Davide uyo wakati: ‘Nizgorani mwaluŵiro, A Yehova. Nkhongono zane zamara. Mungabisanga chara chisko chinu kwa ine.’ (Sal. 143:5-7, 10) Kugongowa yayi kweni lindilirani Yehova kuti muwone ivyo wamuchitiraninge. Ŵazgani Baibolo zuŵa lililose na kulondezga ivyo mwasambira. Manyani ivyo Yehova wakukhumba kweniso umo kale wakawovwilira ŵateŵeti ŵake. Para mukutegherezga kwa Yehova, mumugomezgenge chomene na kumupulikira.

Kasi ni vichi vingamovwirani kuti muŵe ŵakukondwa pa nyengo iyo mundatore panji kutengwa? Khozgani ubwezi winu na Yehova ndipo ŵani na nkharo yiwemi. Mukwenera kuŵa ŵalusungu, kulimbikira ntchito, muŵenge ŵakufwatuka na ŵanyinu, kweniso ŵakugomezgeka kwa Yehova. Mikhaliro iyi yingamovwirani kuti muzakaŵe ŵakukondwa mu nthengwa yinu. (Gen. 24:16-21; Ruth 1:16, 17; 2:6, 7, 11; Zinth. 31:10-27) Penjani dankha Ufumu ndipo mulimbikirenge kupharazga na kuwungana. Ivi vimovwiraninge kuti muchitenge vinthu mwamahara. Bill wakakhala vyaka vinandi pambere wandatore. Iyo wakati: “Nkhachitanga upayiniya. Ntheura nyengo yikenda luŵiro chomene.”

Dango la Yehova la kutora panji kutengwa mu “Fumu pera” ndakovwira nyengo zose. Para tikulondezga dango ili, tikuchindika Yehova ndipo tikuŵa ŵakukondwa. Baibolo likuti: ‘Ngwakutumbikika munthu uyo wakopa Yehova, uyo wakukondwa chomene na malango ghake. Usambazi uli mu nyumba yake; kunyoloka kwake kukulutilira swii.’ (Sal. 112:1, 3) Ntheura londezgani ulongozgi wa Yehova wa kutora panji kutengwa mu “Fumu pera.”