ICI cikacitika mu Ogasiti 1936. Cikacitikira ku Nyumba ya Themba la Swaziland. Robert na George Nisbet ŵakaŵa kuti ŵalizga waka sumu na nkhani za Mubali J.F. Rutherford mu galimoto iyo yikaŵa na vyakukuzgira mazgu. Themba Sobhuza II likakondwa. George wakalongosora kuti: “Soni zikatikora comene cifukwa cakuti tikatondeka kuliguliska Themba vinthu ivyo likakhumbanga. Themba likakhumbanga kugura cakwimbira cithu, malekodi, na masipika ghakupharazgira uthenga wa Ufumu.”

Robert wakaphepiska na kuphalira themba kuti vinthu ivi vikaŵa vyakuguliska yayi. Cifukwa wuli? Cifukwa vikaŵa vya munthu munyake. Themba likakhumbanga kumumanya munthu uyu.

Robert wakazgora kuti: “Vinthu ivi ni vya Themba linyake.” Kufuma apo, Sobhuza wakakhumba kumanya zina la Themba ili. Robert wakati: “Ni Yesu Khristu, Themba la Ufumu wa Ciuta.”

Na nchindi zikuru, Themba Sobhuza likati: “Yesu ni Themba likuru. Nkhukhumba cara kutora cinthu cilicose ca Themba ili.”

Robert wakalemba kuti: ‘Nkhacontheka mtima comene na nkharo ya Themba la Mathemba Sobhuza. Likayowoyanga makora Cingelezi. Ndipouli, likayowoyanga kwambura kujilongora panji kujikuzga, ndiposo likayowoyanga mwakupulikikwa makora kweniso likaŵa lakufwatuka na ŵanji. Nkhakhala nalo mu ofesi yake kwa maminiti pafupifupi 45, apo George wakalizganga sumu kuwaro.

Robert wakalutilira kuti: ‘Kumise zuŵa lenelira, tikaluta ku Sukulu ya Boma ya Swazi, ndipo uku kukacitika cinthu cakukondweska comene kuluska vyose. Tikapharazgira mulara wa pa sukulu iyi, ndipo wakategherezga comene. Tikati tayowoya vya cakwimbira ndiposo kuti tikakhumbanga kuti sukulu yose yipulikizgeko sumu na nkhani zakujambulika pa malekodi, wakakondwa ndipo wakacema ŵana pafupifupi 100 kuti ŵakhale pa utheka na kutegherezga. Tikaphalirika kuti sukulu iyi yikasambizganga ŵana ŵanyamata ulimi, kupanda maluŵa, ukalipentara, kuzenga, Cingelezi, na masamu. Ŵana ŵasungwana yikaŵasambizganga unesi, nchito za pa nyumba, na nchito zinyake.’ Abuya ŵa Themba la Mathemba ili ndiwo ŵakambiska sukulu iyi. a

Themba Sobhuza likapulikizga uthenga wakupharazgika na ŵapayiniya aŵa mwakukondwa apo ŵakafika ku nyumba yake mu 1933. Pa nyengo yinyake, themba likawunganya ŵasilikari ŵake 100 kuti ŵapulikizge uthenga wa Ufumu wakujambulika. Likapokera  mabuku agho tikaligaŵira na kulembeska kuti lipokerenge magazini ghithu mwezi na mwezi. Pakati pajumpha nyengo yicoko waka, Themba ili likaŵa na mabuku ghakulongosora Baibolo pafupifupi ghose pa layibulare yake. Kweniso Themba ili likasunga makora mabuku ghose nangauli boma la Britain likakanizga mabuku ghithu pa nyengo ya nkhondo yaciŵiri ya caru cose.

Themba Sobhuza II likalutilira kupokelera Ŵakaboni ku Nyumba yake ku Lobamba, kweniso likacemanga ŵaliska ŵa visopa kuti ŵategherezgeko nkhani za mu Baibolo. Apo Kaboni wa ku malo agha zina lake Helvie Mashazi wakalongosoranga lemba la Mateyu cipaturo 23, ŵaliska ŵanyake ŵakawuka mwaukali kuti ŵamulekeske kuyowoya. Kweni Themba likanjilirapo na kuphalira Mubali Mashazi kuti walutilire kuyowoya. Kweniso, Themba likaphalira ŵategherezgi kuti ŵalembe mavesi ghose gha mu Baibolo agho ghakazunulika mu nkhani.

Ŵaliska ŵanayi ŵa chalichi linyake ŵakaleka nchito yawo ya uliska ŵakati ŵategherezga nkhani ya mupayiniya munyake. Iwo ŵakati: “Kwambira muhanya uno ndiseso ŵaliska yayi, kweni ndise Ŵakaboni ŵa Yehova.” Kufuma apo, ŵakapempha mupayiniya mabuku ghakuyana na agho Themba la Mathemba likaŵa nagho.

Themba la Mathemba ili likacindikanga Ŵakaboni ŵa Yehova kwambira waka mu vyaka vya m’ma 1930 mpaka pa nyifwa yake mu 1982, ndipo likazomerezga yayi kuti ŵatambuzgikenge cifukwa ca kuleka kulondezga mitheto ya Maswazi. Ntheura, mphake kuti Ŵakaboni ŵakaliwonga comene Themba ili, ndipo pa nyifwa yake ŵakalira comene.

Kukwambilira kwa 2013, mu Swaziland mukaŵa ŵapharazgi ŵa Ufumu ŵakujumpha 3,000. Caru ici cikaŵa na ŵanthu ŵakujumpha 1,000,000 pa nyengo iyi, ndipo mupharazgi yumoza wakeneranga kupharazgira ŵanthu 384. Ŵapayiniya ŵakujumpha 260 mu mipingo 90, ŵakatangwanika na mulimo wa kupharazga, ndipo ŵanthu 7,496 ŵakiza ku Cikumbusko mu 2012. Ivi vikulongolerathu kuti unandi wa ŵapharazgi usazgikirengeko. Nadi, lufura luwemi lwa vyose ivi, lukaŵikika panyengo iyo ŵabali ŵakizira mu Swaziland mu vyaka vya m’ma 1930.—Kufuma mu nthamba yithu mu South Africa.